Te atoro ra a Artur, e akaaere kotinga i Armenia, i tetai putuputuanga o te Au Kite o Iehova. Kua kite mai aia e kare teia putuputuanga i tutu aere ake ki te ngai tangata, te taangaanga anga i te pereoo puka no te akaari i te au puka Pipiria. Ei akamaroiroi i teia tu no te tutu aere, kua akanoo a Artur e tana vaine ko Anna, e tetai mai Kite ko Jirayr, i te pereoo puka i roto i tetai oire. Kua iki ratou i tetai ngai e maata te au tangata e aere ana na reira.

 Kare i roa ana kua inangaro e kua apai te au tangata i te puka. Inara, kare roa atu ana, kua kite katoa mai tetai aronga patoitoi i te pereoo puka. E rua nga orometua i aere mai ki te pae i te pereoo, e ma te poitirere kua tue tetai ia raua i te pereoo ki raro. E oti kua pakia mai aia ia Artur, i topa ai to Artur mata titia ki raro. Kua tauta a Artur ratou ko Ana, e Jirayr i te akamaru i te nga orometua, kare ra i rauka ana. Kua takatakai te nga orometua i te pereoo e kua pepei aere i te puka. Kua akaruke raua i muri ake te tao anga e te tamatakutaku anga i te Au Kite.

 Kua aere atu a Artur ratou ko Anna e Jirayr ki te akava i te ripoti i te manamanata. Kua akakite atu ratou i tei tupu, e no tetai manga taime ua kua akamārama atu ki tetai au akava e te au tangata e angaanga ra i reira i te Pipiria. Kua apainaia atu te nga Kite e toru ki te opati o te akava maata. I te akamata anga inangaro ua aia i te kite eaa tei tupu ana. I na, tona kite anga ia Artur, teia āka tangata tumutumu, e kare aia i inangaro ana i te ta atu te pakia mai anga aia, akamutu ua aia i tana uiui anga e kua ui mai no runga i te irinaki anga o te Au Kite. Tei tupu, pou e a ora te pukapuka anga ratou! Reka tikai teia akava i tana e akarongo ra e kua tuatua mai: “E akonoanga meitaki tena! Umere tikai au!”

 I tera mai rā, kua akamata akaou a Artur i te tutu aere i te ngai tangata, kua aravei mai tetai tangata iaia tei kite ana i tei tupu i tera atu rā. Akameitaki mai taua tangata ia Artur no tona tu maru e kare i akakino atu ana. Karanga katoa aia e ko tana i kite ana kare aia e āriki akaou i te au orometua.

 I taua po rai, inangaro te akava maata kia oki atu a Artur ki te opati akava. Inara, kare e kia uriuri akaou i tei tupu ana, mari ra i te uiui mai no runga i te Pipiria. E rua akava tei piri mai ki roto i te uriurianga.

 I tera mai rā, kua atoro akaou a Artur i te akava maata, i teia taime kua akaari aia i tetai o ta tatou au vitio no runga i te Pipiria. Kua kapiki atu te akava maata i tetai au akava kia aere mai e akara katoa i te au vitio.

 Tei tupu mai no te tu kino o te nga orometua, e maata te au akava tei orongaia atu tetai akakitekite anga. Kua akatupu teia i tetai akaraanga meitaki kia ratou no runga i te Au Kite o Iehova.