Te apii ra a Marta, tetai Kite no Iehova i Guatemala i te reo Kekchi ei apii i te karere a te Pipiria ki te aronga e tuatua ra i taua reo ra. Tetai rā, kua kite aia i tetai tangata e akaruke ra i te are maki. No tona tutu mata, kua tamanako a Marta e no ko mai aia i tetai oire Kekchi i roto i te ngai maunga kare e tutu putuputuia ana e te Au Kite o Iehova. Kua aravei aia i teia tangata e kua tuatua kiaia i te manga reo Kekchi tana i kite.

 Ui a Marta me ka inangaro aia i te apii i te Pipiria. Āriki mataora ua te tangata i tana patianga inara karanga aia e kare ana moni no te tutaki i te reira. Akamārama a Marta e e apii ana te Au Kite o Iehova i te Pipiria ki te tangata kare e tutaki. Karanga katoa a Marta e ka rauka i te apii i te Pipiria na runga i te tereponi e ka akatikaia kia kapiti mai tona ngutuare ki te apii. Āriki teia tangata. No te mea kua kite aia i te tuatua e te tatau i te reo Paniora, kua oake a Marta i te New World Translation of the Holy Scriptures reo Paniora kiaia. Kua oronga katoa aia i te puka apii Pipiria Eaa Tikai ta te Pipiria e Apii Maira? i te reo Kekchi. I tera mai epetoma, kua akamata a Marta i te apii i te Pipiria ki teia tangata, tana vaine, e ta raua nga tamariki i runga i te tereponi. E rua taime i te epetoma ta ratou apii. “No te mea kare au i karape ana i te tuatua i te reo Kekchi,” i karanga ai a Marta, “kua apii matou i roto i te reo Paniora, e kua uri te tane i te reira no tana vaine. Kua mārama katoa ta raua nga tamariki i te reo Paniora.”

 E orometua taua tangata ra i roto i tana akonoanga. Kua akamata aia i te apii i tana i mou mai mei tana apii Pipiria ki tana ekalesia. Kua reka katoa ratou i ta ratou i akarongo e kua ui kiaia e noea mai tana au apiianga ou. Te akakite anga aia no runga i tana apii Pipiria, kua akamata marie ratou i te kapiti mai ki te apii. Kare i roa ana, mei te 15 tangata tei uipa mai i te au epetoma no te apii i te Pipiria kia Marta na runga i te tereponi. Muri mai, kua tuku ratou i tetai pu i te pae mai i te tereponi kia rongo meitaki ua te katoatoa.

 Te akakite anga a Marta ki te aronga pakari i roto i tana putuputuanga no runga i tana apii Pipiria, kua atoro tetai ia ratou i te oire e noo ra te aronga apii. Pati aia ia ratou kia tae mai no tetai akoanga na te katoatoa ta te akaaere kotinga * ka oronga i roto i tetai oire mei te tai ora te mamao me akaoro e oti e rua ora na raro ua. Kua āriki te aronga apii i tana patianga e e 17 ia ratou tei tae mai.

 I tetai au epetoma i muri mai, kua akapou te akaaere kotinga e tetai Au Kite ke e a rā ma te aronga apii. I te popongi, ka akara ratou i te au vitio Pipiria i runga i te jw.org i te reo Kekchi, e oti kua apii ratou i te poroutia Koai ma te Rave ra i to Iehova Anoano i Teia Tuatau? I te avatea, ka akara ratou i te au vitio i runga i te JW Broadcasting. Kua akanoo te akaaere kotinga kia rauka te aronga apii tetai puapii Pipiria na ratou uaorai.

 I roto i tera a rā, kua tutu aere te Au Kite i roto i te au oire i te pae mai tei tuatua i te reo Kekchi e kua pati i te tangata ki tetai uipaanga takake. I ko i te uipaanga, kua pati te au taeake i te 47 tangata tei tae mai me ka inangaro ratou i te apii i te Pipiria. E 11 ngutuare tangata tei āriki i teia patianga.

 I nga marama i muri mai, kua akanoo te aronga pakari kia raveia tetai uipaanga i te au openga epetoma i roto i tera reo. I teia rā, mei te 40 tangata tei tae putuputu mai ki te au uipaanga. E i te rave anga te au taeake i te Akamaaraanga no te mate o Iesu, mataora ratou i te kite e 91 tangata tei tae mai.

 Me akamaara aia akapeea teia i te akamataanga e te tupuanga, karanga a Marta: “Akameitaki tikai au ia Iehova. Tetai taime e manako ana au e iti ua taku ka rauka i te rave. Inara e taoonga angaanga tatou i roto i te rima o te Atua. Kua kite aia eaa tei roto i te ngakau o te tangata i roto i teia au oire, e nana e akavaitata ia ratou ki tona iti tangata. Akaperepere a Iehova ia ratou.”