Tetai rā te apii ra a Eliso, e Kite no Iehova i te Pipiria ki tetai vaine i tona kainga, e kua atoroia raua e tetai nga tangata. I ko i te ngutupa, te tu ua ra te tangata orometua e tana vaine. Kua rongo a Eliso e kua takake ta raua tamaiti okotai kare i roa ake nei.

 Te akakite anga a Eliso i te tuatua akapumaana ki te tangata orometua e tana vaine, kua aue maata raua. E oti, kua tuatua riri te tangata orometua: “Kare au i kite eaa te Atua i akatika ai i teia kino kia tupu! Eaa aia i apai ei i taku tamaiti? E 28 mataiti toku tavini anga i te Atua e e maata te angaanga meitaki taku i rave, e ko tana tutaki teia! Eaa ra te Atua i tamate ei i taku tamaiti?”

 Akamārama a Eliso ki teia nga tokorua e kare na te Atua i apai i ta raua tamaiti. Kua uriuri katoa ratou i te au tumu manako mei te oko, te tuakaouanga e te tumu i akatika ai te Atua i te kino kia tupu. Akakite te orometua e tana vaine kia Eliso e kua pau aia i te au uianga ta raua i pure ana.

 I tera mai epetoma, kua oki mai te orometua e tana vaine e kua piri atu ki te apii Pipiria a te vaine. Kua apii a Eliso i te pene “Te Manakonakoanga Tikai no Taau Aronga Akaperepereia Tei Mate,” i roto i te puka Eaa Tikai ta te Pipiria e Apii Maira? Kua pau maoraora te nga tokorua i ko i te apii.

 I muri mai, kua aere raua ki te uruoaanga takake o te Au Kite o Iehova i Tbilisi, Georgia, e kua akakeu maataia raua e te aroa e te tu taokotai ta raua i kite—kua roa ta raua tauta anga i te akatupu i teia tu i roto i ta raua akonoanga, kare ra i rauka.