E noo ana a Irma ki Tiamani e kua vaitata tona mataiti ki te 90. No te nga ū kino tikai tana i na roto, e te maata o tona vaiia anga, kare e rauka akaou iaia kia tutu aere mei tera are ki tera are. Te tata nei a Irma i te au karere Pipiria ki tona kopu tangata e te au aronga tana i kite. Kua āriki rekarekaia tana au reta akamaroiroi e te pumaana, e kua akameitaki atu iaia, e te pati kia tata akaou kia ratou. Karanga mai a Irma e, “Mataora tikai au no teia, e te rave i te angaanga orometua.”

 E tata katoa ana a Irma ki te au tangata e noo ana i te ngai o te aronga pakarikari. Akakite mai aia e: “Ringi mai tetai vaine pakarikari e kua karanga mai, e na taku reta i akapumaana iaia i te mateanga tana tane. Te vai nei teia reta i roto i tana Pipiria, e te tatau ra aia i te reira. Ko tetai vaine ke, koi mate ua ake nei tana tane, karanga mai aia e kua tauturu maata atu taku reta iaia kare te akoanga a tona orometua. E maata tana au uianga kare i pauia, e te inangaro nei aia kia aere mai ki toku kainga.”

 Ko tetai vaine kare i te Kite, kua neke atu ki tetai ngai mamao e kua pati ia Irma kia tata mai kiaia. “Kua akono pouroa aia i taku reta,” i karanga ai a Irma. “Muri ake i tona mateanga, ringi mai tana tamaine iaku. Akakite mai aia e kua tatau pouroa aia i te au reta a tona mama, e me ka tika iaku kia tata i te au karere Pipiria kiaia.”

 Mataora nei a Irma i tana angaanga orometua. Karanga aia e, “Te pati akatenga nei au kia Iehova kia akamaroiroi iaku i te akamori iaia, e noatu kare e rauka iaku kia tutu aere mei tera are ki tera are, rave au i taku ka rauka.”