Tuke ki te oraanga angaanga ua e te turituri i te oire maata, e noo ana te au kopu tukeke, au reo ke, e te iti tangata ki te vao rakau Amazon i Marike Tonga. No reira ia Tiurai 2017, kua teretere atu e 13 Au Kite o Iehova no te tutu aere na runga i te Kauvai Maroni e te atoro i te au kopu tukeke i te tua itinga o French Guiana. To ratou akakoroanga? No te tutu aere i te karere no te manakonakoanga Pipiria ki te au tangata e noo ra i te pae i te kauvai.

 Okotai marama i mua ake ka akamata ei teia 12 rā tere tutu aere, ka uipa te katoatoa no teia akakoroanga. “Kua apii mai matou no te reira ngai e te tangata e noo ra i reira, kua uriuri matou akapeea me akapapa no te reira tere,” i karanga ai a Winsley. Kua tuʼaia te au apinga vairanga meitaki ki te katoatoa, no to ratou roi hammock e te paruru namu. Ka ō mai e rua rere anga pairere ki reira e oti ka teretere atu na runga i te vaka.

 Eaa to teia aronga manako no teia patianga? Kua viviki a Claude e Lisette, e nga tangata pakarikari, i te āriki ua i te reira. “Mataora tikai au, ma te matakutaku,” i karanga ai a Claude. “I rongo ana au i te au kauvai kinokino o reira.” Kua manata a Lisette: “Ka akapeea au me tuatua i te reo Marike Initia,” i karanga ai aia.

 Kua manako akapera katoa te taeake ko Mickaël. “Kare a matou apinga i kite no te kopu Wayana,” i karanga ai aia, “no reira kua rave au i te kimikimianga i runga i te Initaneti no te apiipii i te au tuatua me aroa i te tangata i to ratou reo.”

 Kua tata a Shirley, raua ko tana tane ko Johann, i te au reo e tuatuaia ana e te tangata e noo ra i te pae kauvai. “Kua kopi mai maua i te au vitio o te reira reo, i runga i te jw.org e kua apai atu i te au puka reo Wayana,” i karanga ai aia.

 Ruirua, Tiurai 4, kua aere atu taua pupu na runga i te pairere ki Saint-Laurent du Maroni, mei reira mai kua rere akaou atu ki Maripasoula, e oire meangiti i French Guiana.

 I nga mea rā e a, kua tutu aere teia pupu ki te au tangata e noo ra ki roto i te au oire i te pae ia Maroni, te teretere anga na runga i tetai vaka matini, kapikiia ko te pirogues. “Kite mai matou e reka ana te iti tangata Marike Initia i te au manako Tuatua Tapu,” i karanga ai a Roland, koia tetai o te pupu. “Maata ta ratou uianga ka ui mai, e kua inangaro tetai o ratou kia apii matou i te Pipiria kia ratou.”

 I roto i tetai vira, kua aravei a Johann e Shirley i tetai nga tokorua mapu, kua tamate tetai o to raua kopu tangata iaia. “Kua akaari maua i te vitio A Native American Finds His Creator,” i runga i te JW Broadcasting kia raua, i na Johann ei. “Kua pakia to raua ngakau i te akara anga i teia vitio. E kua oronga mai i ta raua imere, no te mea kua inangaro raua i te tuatua ua mai kia maua.”

 Tetai ngai mamao roa atu tei atoroia na runga i teia kauvai ko Antécume Pata. I reira, kua akatika mai te tangata maata o te vira e kia tamoumou te Au Kite tei roiroi, i to ratou roi hammock ki te ngai tei akanooia no te katoatoa. Kua pai katoa ratou ki raro i te kauvai mei te aronga e noo ra i reira.

 Mei reira mai, kua aere atu teia pupu ki te oire o Twenké, e kua aravei ratou i te tangata e aue ra no tei mate tetai tei akaperepereia. “Kua akatika mai te ‛Tangata Maata,’ te ariki o te kopu, ia matou kia aere ua i roto i te vira no te akapumaana i te aronga e mamae ra i reira,” i karanga ai a Éric, tetai o te aronga akaaere o te tere tutu aere. “Mareka tikai te tangata maata e tona pamiri i te au irava ta matou i tatau kia ratou no roto mai i te Pipiria Wayana. Kua akaari atu matou i te au vitio no runga i te au taputou a te Pipiria no te tuakaouanga.”

 Aru mai i te reira ka teretere atu e rua e te apa ora, na runga i te kauvai mei Maripasoula ki te oire meangiti o Grand-Santi. I te Ruirua e te Ruitoru, ka tutu aere te au taeake i te karere Pipiria ki te au tangata i reira. I te Paraparau, kua teretere akaou atu te Au Kite—e rima e te apa ora ki raro i taua Kauvai Maroni ki te vira o Apatou.

 Mua ake i te rā openga o te tere tutu aere, kua atoro atu te au taeake i te au vira i roto i te vao rakau Maroon, e uanga no te aronga tuikaa no Aperika mai tei apainaia ki Marike Tonga i te tuatau i akaaereia ai to Suriname e te enua i te pae mai. Kua pati atu te Au Kite i te katoatoa ki te uipaanga i te vao rakau ki roto i tetai ākā puakapa tei patuia no te reira akakoroanga. “Ki to matou ngakau i te rekareka i te tae anga mai te au tangata,” i karanga ai a Claude. “Kua pati matou ia ratou i te reira popongi!” No te taime mua i teia tere, kua oronga a Karsten i te akoanga ki te katoatoa i te reo Aukan te ingoa “Ko Teia Ua Ainei te Oraanga?” Kua tae mai e 91 tangata mei te au vira tukeke ki te uipaanga.

 Aere ua rai kua oki teia au taeake ki Saint-Laurent du Maroni. Mataora tikai te katoatoa i te kite i te aronga tei āriki i te karere, te au puka tukeke e te akarakara i te au vitio tei neneiia e te Au Kite o Iehova.

 “Kare e rauka iaku te akamārama atu i toku mataora no teia tere tutu aere,” i karanga ai a Lisette. Kua āriki katoa a Cindy: “Me ka aere akaou, ka pati akatenga au kia aere au. E tamata koe i teia kia mataora koe!”

 Kua akakeukeu teia tere tutu aere i te inangaro o tetai kia oki akaou ki reira. “Kua papa matou no te teretere akaou ki reira!” i karanga ai a Mickaël. Kua neke a Winsley ki Saint-Laurent du Maroni. Kua iki a Claude e Lisette, e 60 tuma mataiti, no te neke ki Apatou.