Akangateitei te Au Kite o Iehova i te au kavamani e to ratou au akairo enua. Kua mārama ratou e ka iki tetai kia tuatua akapaapaa, kia akangateitei i te reva, e kia imene i te imene o te enua.

 Inara, kare te Au Kite o Iehova e piri ana ki roto i teia au akaepaepa anga no te mea irinaki matou kare te reira e au ana ki te au apiianga Pipiria. Mataora matou me akangateitei mai te tangata i ta matou irinakianga e ka akangateitei katoa matou i ta ratou.

I roto i teia atikara

•  Eaa te au apiianga Pipiria no teia?

•  Akapeea me akaueia te reira e te ture?

•  E akatakake anga ainei teia na te Au Kite o Iehova no te tangata e te poritiki?

 E rua apiianga Pipiria ka akamanako tatou:

•   Ko te Atua anake ta tatou e akamori. Karanga te Pipiria: “Ko toou Atua ra ko Iehova taau e akamori, e koia anake rai taau e akarongo.” (Luka 4:8) I roto i teia au tuatua akapaapaa e te au imene o te enua e taputou teia kia akangateitei anakeia te enua. No reira kare te Au Kite o Iehova e piri ki roto i teia au akaepaepa anga.

   Irinaki katoa te Au Kite o Iehova e me akangateiteiia te reva e akamorianga te reira, me kore e akamorianga itoro, e te patoi ra te Pipiria i te reira. (1 Korinetia 10:14) Karanga tetai aronga kimikimi e e au akairo akonoanga te au reva o te enua. “E akonoanga te akaepaepa anga enua e kia akamori anakeia te reva,” i tata ei te tata tuatua enua ko Carlton J. H. Hayes. a No runga i te au Kerititiano mua, karanga te tata ko Daniel P. Mannix e: “Kare te au Kerititiano . . . i akangateitei ana i te tutara tapu [o Roma]—kare katoa ratou e akangateitei i te reva i teia tuatau.” b

  Noatu kare te Au Kite o Iehova e akangateitei ana i te reva, kare katoa matou e taviivii, e tutungi, e kare e akangateitei kore i te reira e tetai ua atu akairo o te enua.

•   Aiteite te tangata katoa i mua i te Atua. (Angaanga 10:34, 35) Karanga te Pipiria e na te Atua “i anga i te tangata i te pa enua katoa nei i te toto okotai ra.” (Angaanga 17:26) No reira kare te Au Kite o Iehova e akakakā i tetai ua atu iti tangata me kore enua ki rungao i tetai. Akangateitei matou i te au iti tangata katoatoa, noatu te enua e te ngai nooanga.—1 Petero 2:17.

 Kare te Au Kite o Iehova e patoi ana i te kavamani. Irinaki matou e tuanga ta te kavamani “tei akonoia e te Atua” kia akono i te enua. (Roma 13:1-7) Irinaki katoa matou kia akarongo te au Kerititiano ki te aronga mana o tetai enua.—Luka 20:25.

 Akapeea me tupu te pekapeka i rotopu i te au ture a te kavamani e ta te Atua? I tetai au ngai, ka rauka i te tuku atu i tetai akatikatika anga ki te ture a te kavamani. c Me kare te taui anga e rauka, “ko te Atua ta [te Au Kite o Iehova] e akarongo e tikaʼi auraka te tangata.”—Angaanga 5:29.

 Kare. Kare te Au Kite o Iehova e piri ana ki roto i te au manamanata o te tangata e te poritiki. Me patoi matou i te tuatua akapaapaa, te akangateitei i te reva, e te imene i te imene o te enua, kare matou e patoi ra i te kavamani. Mari ra, te aru ra matou i te au apiianga Pipiria no runga i teia au akaepaepa anga.