Kare. Kare te Au Kite o Iehova e patoi ana i te vairakau patia paruru. Na te au Kerititiano tataki tai teia ikianga. E maata te Au Kite o Iehova tei iki i te vairakau patia paruru.

 Ka āriki matou i te au vairakau meitaki e te au rapakauanga tukeke te ka akamaru mai i te maki. Te akameitaki nei matou i te aronga kite o te rapakau no ta ratou angaanga memeitaki i te tuatau tumatetenga.

 Ka aru te Au Kite o Iehova i te aratakianga a te aronga rapakau maki. Ei akaraanga, te tupu anga te maki COVID-19, kua nenei te Au Kite o Iehova i te tuatua akamaaraara i roto i te anere tuma reo i runga i teia website, ei akamaroiroi i te tangata kia aru i te au ravenga paruru i to ratou ngai. Kapiti mai te akatakake anga i tetai mei tetai e te aru i te au ture paruru i te ngai tangata, te noo ua i te kainga, orei i te rima, arai i te mata e te aru katoa i tetai ua atu ravenga paruru tei akakiteia e te aronga rapakau maki.—Roma 13:1, 2.

 No tetai au mataiti, kua akakite te au puka a te Au Kite o Iehova i te tumu puapinga kia aru i teia au kaveinga:

•   Tei runga uaorai i tetai tangata i te iki i tana ravenga rapakauanga.—Galatia 6:5.

   “Kare [teia makatini] e akakite mai e ko teea rapakau vairakau me kore ravenga paruru ta te reira tangata ka iki. Te akakoroanga o teia makatini koia oki, kia oronga mai i te au tuatua akakite e na te tangata tatau e iki i tana ka rave.”—Awake!, Peperuare 8, 1987.

   “Me ka patia paruruia koe e taau tamariki, naau teia ikianga.”—Awake!, Aukute 22, 1965.

•   Ka kimi matou i te paruru anga rapakau no te mea te akaperepere ra matou i te oraanga.—Angaanga 17:28.

   “Ka āriki te Au Kite i te au ravenga rapakauanga tukeke ei tauturu ia ratou kia rapakau i to ratou maki. Akaperepere ratou i te oraanga e ka kimi ravenga kia akaroa atu i te reira na te aru anga i te au kaveinga Pipiria.”—The Watchtower, Tiurai 1, 1975.

   “Ka āriki rekareka te Au Kite o Iehova i te au vairakau e tetai atu au rapakauanga. Inangaro ratou i te oraanga maroiroi e te akaroa i to ratou puke rā. Mei ia Luka e Kerititiano o te anere mataiti mua, e au taote tetai pae o te Au Kite o Iehova. . . . Akaperepere maata te Au Kite o Iehova i te aronga angaanga maroiroi tikai i te pae o te rapakau maki. Āriki rekareka katoa ratou i te vairakau a teia aronga i oronga mai.”—The Watchtower, Peperuare 1, 2011.