Kare. E tutu aere ana matou mei tera are ki tera are, inara kare matou e irinaki ana e ka akaoraia matou na te rave anga i teia angaanga. (Ephesia 2:8) No teaa ra?

 Akamanako ana i teia akatutuanga: Kua taputou tetai tangata meitaki i te oronga ua i tetai apinga oko maata ki te katoatoa me tae mai ratou ki te ngai tana i iki i te ora tana i akataka. Me irinaki koe i teia tangata, kare ainei e ka rave koe i tana i akakite mai? Ae! Pera katoa, ka papu e ka akakite koe ki toou au oa e toou ngutuare no runga i teia kia rauka ia ratou taua apinga oronga ua. Noatu ra, kare oou tikaanga no taua apinga ra no te mea kua akarongo koe ki tera tangata. Te tumu, e apinga oronga ua te reira.

 Mei te reira katoa, te irinaki nei te Au Kite o Iehova i te taputou a te Atua kia oronga i te oraanga mutu kore no te aronga tei akarongo kiaia. (Roma 6:23) Te tauta nei matou i te akakite i ta matou i irinaki ki etai ke, e te inangaro nei matou kia puapingaia ratou mei ta te Atua i taputou. Kare ra matou i irinaki e ka rauka ia matou te tikaanga no te oraanga mutu kore me rave i te angaanga tutu aere. (Roma 1:17; 3:28) Ko te tika, noatu eaa ta tatou ka rave, kare e rauka ia tatou te tikaanga no teia akameitakianga no ko mai i te Atua. Te na ko maira a Tito 3:5 e: “Kua akaora aia ia tatou, eiaa no te tuatua-tika i raveia e tatou nei, no tona ra aroa.”