1. Eaa ta Iehova apiianga puapinga kia Aberahama?

 I TE au mataiti i aereia mai, kua akakite a Iehova kia Aberahama e ka takore aia i te oire o Sodoma e Gomora. Kua ngatā ia Aberahama i te āriki i te reira noatu tona irinaki i te Atua. Karanga aia: “E akapou katoa aina koe i te tangata tuatua-tika, e te akono kore i te Atua? . . . Kare ainei e mea tika ta te Akava i to te ao katoa nei e rave?” Kua tauturu a Iehova i tona oa akaperepere ko Aberahama kia kite i tetai apiianga puapinga te ka tauturu ia tatou, koia oki kare roa te Atua e takore i te aronga tuatua tika.—Gene. 18:​23-33.

2. Akapeea tatou e papu ei me akava a Iehova i te tangata, ka rave aia i te tika ma te aroa ua?

² Akapeea tatou e kite ei e ka rave a Iehova i te tika me akava aia i te tangata? Kua kite tatou e ka rauka Iaia i te akara i te ngakau o te tangata. (1 Samu. 16:7) E koia anake, ‘tei kite i te ngakau o te tangata ravarai.’ (1 Ari. 8:39; 1 Para. 28:9) E tuatua mou te reira. E Atua kite pakari a Iehova e kare tatou e mārama i tana akavaanga. No reira te apotetoro ko Paulo i tata ai no te Atua ko Iehova: “Te kimi anga taea kore o tana akatauanga!”—Roma 11:33.

3-4. Eaa ta tatou i ui ana i tetai taime, e eaa ta tatou ka uriuri i roto i teia atikara? (Ioane 5:​28, 29)

³ Noatu kua kite tatou e ka rave a Iehova i te tika, penei e au uianga ta tatou mei ta Aberahama rai. Penei ka ui tatou: ‘E tuakaouanga ainei to te aronga tei takoreia i Sodoma e Gomora? Ko ratou ainei tetai i roto i te ‘tuakaouanga o te aronga tuatua-tika kore’?—Anga. 24:15.

 ⁴ Ka akamanako ana i ta tatou i mārama no te tuakaouanga. Kare i roa akenei, kua orongaia mai te akamāramaanga ou no te “tuakaouanga ora e te tuakaouanga akaapa.” a (E tatau ia Ioane 5:​28, 29.) Kua akamaata atu teia i to tatou mārama no tetai au mea ke te ka uriuriia i roto i teia atikara e te ka aru mai. No runga i ta Iehova akavaanga tika, ka akamanako tatou na mua eaa ta tatou kare i kite e oti eaa ta tatou i kite.

TA TATOU KARE I KITE

5. Eaa ta tatou i apii i mua ana no te aronga tei takoreia i Sodoma e Gomora?

⁵ I mua ana, kua akakite ta tatou puka i te ka tupu ki te aronga ta Iehova i akava ei aronga tuatua tika kore. Kua karanga tatou no te aronga tei takoreia i Sodoma e Gomora, kare o ratou tuakaouanga. Inara na roto i tetai apii e te pure no runga i teia, ka ui tatou, E mea tika ainei e te papu teia?

6. Eaa tetai au akaraanga no ta Iehova akavaanga i te aronga tuatua tika kore, e eaa ta tatou kare i kite?

⁶ E akamanako ana i teia au uianga. E maata te au akaraanga Pipiria te akakite maira i ta Iehova akavaanga i te aronga tuatua tika kore. Ei akaraanga, i te tuatau o te Vaipuke kua takore Aia i te katoatoa, kareka a Noa e tona ngutuare kua akaoraia ratou. Na roto i te iti tangata Iseraela kua takore a Iehova i te au enua ke e itu tei noo i te Enua Taputouia, e na roto i te angera okotai, kua tamate Aia e 185,000 vaeau Asura i te po okotai. (Gene. 7:23; Deu. 7:​1-3; Isa. 37:​36, 37) I roto i teia au akaraanga, kua akakite mai ainei te Pipiria e kua akautunga a Iehova i teia aronga pouroa kia mate e tuatau ua atu e kare o ratou tuakaouanga? Kare rava. No teaa ra?

7. Eaa ta tatou kare i kite no te aronga tei takoreia i te tuatau o te Vaipuke e te aronga i Kanaana? (Akara i te tutu mua.)

⁷ Kare tatou i kite i te tumu i akava ei a Iehova i teia aronga; e kare katoa tatou i kite me kua rauka ia ratou te tuatau no te apii no runga ia Iehova e kia tataraara. I te tuatau o te Vaipuke, te akakite ra te Pipiria no runga ia Noa e koia tetai “tangata i ako i te tuatua-tika ra.” (2 Pete. 2:5) Kare te reira i akakite mai ana e iaia e pātu ra i te araka maatamaata, kua tauta katoa aia i te tutu aere ki te au tangata ravarai i mua ake ka tupu ei te Vaipuke. Pera katoa, kare tatou i kite me e tuatau to te aronga rave kino i Kanaana i te apii no runga ia Iehova e te taui i to ratou oraanga.

8. Eaa ta tatou kare i kite no te aronga i Sodoma e Gomora?

⁸ Akapeea te aronga i Sodoma e Gomora? Te noo ra te tangata tuatua tika ko Lota i rotopu ia ratou. Inara kua kite ainei tatou me kua tutu aere a Lota kia ratou pouroa? Kare. E aronga kino tikai ratou, e kare a ratou mea i kite. Akamaara ana i te pupu tane o tera oire tei inangaro i te piri ainga ki te nga manuiri a Lota. Akakite te Pipiria no teia au tane e ko “tei ou, e tei ruaine, kua akapini maira i taua are ra.” (Gene. 19:4; 2 Pete. 2:7) Kua kite ainei tatou me kua akautunga a Iehova i teia aronga kia mate e kare e tuakaouanga? Kua akakite a Iehova kia Aberahama e kare e kitea atu e okotai ngauru tangata tuatua tika i te reira oire. (Gene. 18:32) No reira e  aronga tuatua tika kore ratou e kua tau rai ia Iehova kia takore ia ratou. Inara, ka rauka ainei ia tatou i te tuatua e kare tetai ia ratou e tau no te ‘tuakaouanga o te aronga tuatua-tika kore’? Kare, kare i papu ia tatou!

9. Eaa ta tatou kare i kite no runga ia Solomona?

⁹ I tetai tua, ka tatau katoa tatou i roto i te Pipiria no te aronga tuatua tika tei riro mai ei aronga tuatua tika kore. Ko te Ariki ko Solomona tetai akaraanga. Kua apii meitaki aia i ta Iehova au kaveinga e kua akameitakiia aia; inara i muri mai kua akamori a Solomona i te au atua pikikaa. Kua riri a Iehova iaia e kua akatupu ta Solomona angaanga kino i te mamae ki to Iseraela no tetai tuatau roa. E tika, akakite te irava, “kua moe iorā Solomona ki o tona ra ai metua,” kapiti mai ki te ariki tiratiratu ko Davida. (1 Ari. 11:​5-9, 43; 2 Ari. 23:13) No te mea kua taiku te Pipiria i tona tanuia anga, ko te aiteanga ainei i reira e ka akatuia mai aia? Kare te Pipiria i akakite mai i te pauanga. Penei ka manako tetai pae e ka akatuakaouia mai a Solomona, no te mea te akakite maira te Pipiria, ko “te tangata oki i mate ra, kua matara ïa aia i te kino.” (Roma 6:7) E tika, kare te aiteanga e ka akatuia mai te katoatoa tei mate, mei te mea atura e tikaanga to ratou kia ora akaou. E apinga aroa te tuakaouanga no ko mai i to tatou Atua akaperepere. Ka oronga aia i te reira ki te aronga tei inangaro i te tavini iaia e tuatau ua atu. (Iobu 14:​13, 14; Ioa. 6:44) Ka rauka ainei ia Solomona teia apinga aroa? Ko Iehova anake tei kite; kare ko tatou. Inara kua kite tatou e ka rave a Iehova i te mea tika.

TA TATOU I KITE

10. Eaa to Iehova manako no te takoreanga i te tangata? (Ezekiela 33:11) (Akara katoa i te tutu.)

¹⁰ E tatau ia Ezekiela 33:11. Me akava a Iehova i te tangata, ka akakite mai aia i tona manako. Aite ki ta Ezekiela i tata, kua akakite te apotetoro ko Petero e, “Kare ua [a Iehova] . . . i anoano e kia mate atu tetai.” (2 Pete. 3:9) Ka akapumaana teia irava ia tatou no te mea kua kite tatou e kare a Iehova e takore ua i tetai tangata. E Atua aroa ua aia e ka akaari aia i te aroa ma te tumu meitaki.

11. Koai ma kare e akatuia mai, e akapeea tatou e kite ei?

¹¹ Eaa ta tatou i kite no te aronga kare e akatuakaouia mai? E iti ua te akaraanga ta te Pipiria e akakite maira. b Akakite mai a Iesu e kare a Iuda Ikariota e akatuia mai. (Mare. 14:21; akara katoa ia Ioane 17:12 e te study note.) Kua rave akakoro a Iuda i te patoi ia Iehova e Tana Tamaiti. (Akara katoa ia Mareko 3:29 e te study note.) Pera katoa tetai au arataki akonoanga tei patoi ia Iesu, kare ratou e akatuia mai. (Mata. 23:33; akara ia Ioane 19:11 e te study note “te tangata tini.”) c Akamatakite katoa a Paulo no te aronga pikikaa kare i tataraara, kare ratou e akatuia mai.—Ebe. 6:​4-8; 10:29.

12. Eaa ta tatou i kite no runga i to Iehova aroa? Oronga mai i tetai akaraanga.

¹² Inara eaa ta tatou i kite no runga i to Iehova aroa? Akapeea aia i te akaari anga mai e ‘kare ua aia i anoano e kia mate atu tetai’? Akapeea aia i te aroa  anga i tetai tei rave i te ara kino. Kua rave te Ariki ko Davida i te au ara kino, mei te akaturi e te ta tangata. Inara kua tataraara a Davida, e kua akakore a Iehova i tana ara. (2 Samu. 12:​1-13) E tangata kino te Ariki ko Manase. Inara noatu te kino o ta Manase ara, kua aroa a Iehova iaia no te mea kua tataraara aia e kua akakoreia tana ara. (2 Para. 33:​9-16) Te akaari maira teia nga akaraanga e ka aroa ua a Iehova i te tangata me kite aia i te tumu anga tau no te reira. Ka akatuakaou mai Aia i teia aronga no te mea kua kite ratou i ta ratou au ara kino i rave e kua tataraara.

13. (a) Eaa a Iehova i aroa ua ai i te iti tangata o Nineve? (e) Eaa ta Iesu i tuatua no te iti tangata o Nineve?

¹³ Kua kite katoa tatou i to Iehova aroa i te iti tangata o Nineve. Kua akakite Aia kia Iona: “Kua tae rava mai to ratou kino ki mua i taku aroaro nei.” Inara, i te tataraara anga ratou kua akakore a Iehova i ta ratou ara. Kua aroa ua aia i te iti tangata o Nineve tei tuke kia Iona. Kua riri a Iona inara kua akamaara a Iehova kiaia e kare ratou “i kite i to ratou rima katau e to ratou rima kaui” me kore kare ratou i kite i te tika mei te tarevake. (Iona 1:​1, 2; 3:10; 4:​9-11) I muri mai, kua apii a Iesu i te reira akaraanga no te akaari i to Iehova tu tika e te aroa ua. Karanga a Iesu e ka “tu katoa mai te tangata o Nineve ki runga i te akavaanga.”—Mata. 12:41.

14. Eaa te aiteanga o te “tuakaouanga akaapa” ki te iti tangata o Nineve?

¹⁴ Eaa te “akavaanga” te ka “tu katoa mai” te iti tangata o Nineve ki runga? Kua apii a Iesu i te tuakaouanga akaapa a te tuatau ki mua. (Ioa. 5:29) Te taiku ra aia i te tuatau o te Tutara Anga Tauatini Mataiti, i reira ka akatuia mai “te aronga tuatua-tika e te aronga tuatua-tika kore.” (Anga. 24:15) No te aronga tuatua tika kore, e “tuakaouanga akaapa” to ratou. Tera te aiteanga, ka akara a Iehova e Iesu me kua akarongo e kua taangaanga teia aronga i ta ratou i apii mai. Me kare tetai tangata Nineve tei akatuia mai e akamori ia Iehova, ka takoreia aia. (Isa. 65:20) Kareka ra te  aronga tei iki i te akamori ua atu ia Iehova, ka ora mai ratou. Tei ia ratou te ora mutu kore!—Dani. 12:2.

15. (a) Eaa tatou ka kopae ei i te tuatua e kare tetai tei takoreia i Sodoma e Gomora e akatuia mai? (e) Eaa te aiteanga o te aerenga tuatua i roto ia Iuda 7? (Akara i te pia “ Eaa te Aiteanga o ta Iuda Tuatua?”)

¹⁵ No runga i te iti tangata o Sodoma e Gomora, karanga a Iesu e kia tae ki te “rā akavaanga” ka meitaki atu to ratou turanga i to te aronga tei patoi ia Iesu e tana au apiianga. (Mata. 10:​14, 15; 11:​23, 24; Luka 10:12) Eaa te aiteanga o tana tuatua? Penei ka manako tatou e te taangaanga ra a Iesu i tetai ravenga apiianga i konei. Kare ko tera te aiteanga inara e aronga kino rai te iti tangata Nineve. I te akaraanga te akakite ra a Iesu i te tika. Ko te “rā akavaanga” tana i tuatua, kua tau katoa ki to Nineve. Kua rave te iti tangata o Sodoma e Gomora i te kino mei to Nineve rai. Inara e tuatau to ratou kia tataraara. Akamaara eaa ta Iesu i tuatua no “te tuakaouanga akaapa.” Ka kapitiia mai te aronga “tei rave ana i te kino.” (Ioa. 5:29) Ei akaraanga, penei e manakonakoanga to te tangata o Sodoma e Gomora. Penei ka akatuia mai ratou e ka rauka ia tatou i te apii ia ratou no runga ia Iehova e Iesu Mesia.

16. Eaa ta tatou i kite e koai ta Iehova ka akatu mai? (Ieremia 17:10)

¹⁶ E tatau ia Ieremia 17:10. Ka tauturu tera irava ia tatou kia akamanako eaa ta tatou i kite: Ko Iehova “tei kimi matatio i te ngakau, tei timata i te manako” o te tangata. Me iki a Iehova e koai tana ka akatu mai a te tuatau ki mua, ka “oronga atu [aia] ki te tangata katoa ra i tei tau i tona ra au aerenga.” Ka akaari a Iehova i te tu tinamou inara ma te aroa ua. No reira auraka tatou e tuatua e kare tetai tangata e akatuia mai me kare tatou i kite!

E “MEA TIKA TA TE AKAVA I TO TE AO KATOA NEI” KA RAVE

17. Eaa te ka tupu ki te aronga tei mate a te tuatau ki mua?

¹⁷ Mei te taime i piri atu ei a Adamu raua ko Eva kia Satani i te patoianga i  te Atua ko Iehova, e pirioni ua atu tangata tei mate. E “enemi” kino te mate! (1 Kori. 15:26) Eaa te ka tupu ki te reira au tangata? Ka akatuia te 144,000 pipi tiratiratu a Karaiti ma te oraanga mate kore i te rangi. (Apo. 14:1) Ko te au tane e te au vaine tiratiratu tei akaperepere ia Iehova, ka akatuia mai ratou ei “aronga tuatua-tika” e ka noo ki te enua e tuatau ua atu me vai tiratiratu ratou i te tuatau o te Tutara Anga Tauatini Mataiti a Karaiti e te timataanga openga. (Dani. 12:13; Ebe. 12:1) Pera katoa i te Tauatini Mataiti, ka orongaia tetai tuatau ki “te aronga tuatua-tika kore”—kapiti mai te aronga kare i tavini ana ia Iehova e “tei rave ana i te kino”—kia taui i to ratou oraanga e kia tavini ia Iehova. (Luka 23:​42, 43) Kareka ra, te aronga tei rave i te kino e kua patoi ia Iehova e tana akakoroanga, kare rava ratou e akatuia mai.—Luka 12:​4, 5.

18-19. (a) Eaa ta tatou i papu no runga i ta Iehova akavaanga i te aronga tei mate? (Isaia 55:​8, 9) (e) Eaa ta tatou ka uriuri i te atikara ka aru mai?

¹⁸ E tumu meitaki ainei ta tatou kia irinaki me akava a Iehova i te tangata, ka rave aia i te tika? Ae! Kua mārama meitaki a Aberahama i te reira, ko Iehova te akava pakari, tika e te aroa ua “i to te ao katoa nei.” Kua tereni aia i tana Tamaiti e kua oronga i te akavaanga kiaia. (Ioa. 5:22) Ka rauka i te Metua e te Tamaiti i te tatau i te ngakau o te tangata. (Mata. 9:4) I te au taime ravarai, ka rave raua i te “mea tika”!

¹⁹ E irinaki ua tatou ia Iehova no te mea kua kite aia i te mea meitaki no tatou. Kare tatou e akava i tetai mari ra ko Iehova anake ua! (E tatau ia Isaia 55:​8, 9.) No reira, e akaruke tatou i te akavaanga Kiaia e tana Tamaiti, te Ariki tei akaata meitaki i te tu tika e te aroa ua o Iehova. (Isa. 11:​3, 4) Inara akapeea a Iehova e Iesu me akava i te tangata i te tuatau o te mate maata? Eaa ta tatou kare i kite? E eaa ta tatou i kite? Ka oronga mai te atikara ka aru mai i te pauanga.