ATIKARA APII 20
IMENE 67 ‘Akakite i te Tuatua’
Kia Akakeu te Aroa ia Koe Kia Tutu Aere!
“E na mua ra te evangelia nei i te akakiteia atu i to te pa enua ravarai e tika’i.”—MARE. 13:10.
AKAKOROANGA
Ka akakeu te aroa ia tatou kia maroiroi i te tutu aere ma te ngakau katoa.
1. Eaa ta tatou i apii mai i ko i te uipaanga mataiti 2023?
I KO i te uipaanga mataiti 2023, a kua apii tatou i te au akamārama anga ou no to tatou irinakianga e te au tuatua akakite no te angaanga tutu aere. Ei akaraanga, kua apii mai tatou e ka rauka i tetai tuatau no te aronga kia piri atu ki to Iehova iti tangata i muri ake i te takore anga ia Babulonia Maata. Kua rongo katoa tatou e akamata ia Noema 2023, kare te au papuritia e anoanoia kia ripoti i ta ratou ka rave i roto i te angaanga tutu aere. No teia au tauianga, ka riro ainei te angaanga tutu aere ei mea puapinga kore e kare i te angaanga rapurapu akaou? Kare rava!
2. Eaa i riro ei ta tatou angaanga tutu aere ei mea rapurapu i te au rā? (Mareko 13:10)
2 A te au rā ka aereia, e mea rapurapu ta tatou angaanga tutu aere. No teaa ra? No te mea te poto nei te tuatau. E akamanako i ta Iesu i totou no te angaanga tutu aere i te au tuatau openga. (E tatau ia Mareko 13:10.) Kia tau ki te puka o Mataio, kua karanga a Iesu e ka tutu aereia te nuti meitaki ki te ao katoa e ko “te openga iora ïa i reira.” (Mata. 24:14) Koia oki ka takore takiriia te ao kino o Satani. Kua akanoo takere a Iehova i “te reira rā e te reira ora” no te akatupu i te reira. (Mata. 24:36; 25:13; Anga. 1:7) I te au rā e aereia nei, te vaitata atura tatou ki te openga. (Roma 13:11) No reira, ka anoanoia tatou kia tutu aere e tae ua atu ki te openga.
3. Eaa te ka akakeu ia tatou kia tutu aere?
3 E uianga puapinga ta tatou pouroa ka akamanako no te angaanga tutu aere: Eaa te tumu ka tutu aere ei tatou i te nuti meitaki? Te pauanga, no te aroa. Ka tutu aere tatou no to tatou inangaro i te nuti meitaki, to tatou akaperepere i te tangata e te mea maata to tatou inangaro ia Iehova e tona ingoa. Ka uriuri tatou i teia.
TUTU AERE TATOU NO TE INANGARO I TE NUTI MEITAKI
4. Eaa ta tatou ka rave me akakiteia mai tetai nuti meitaki kia tatou?
4 Te maara ra ainei ia koe tetai mea mataora tei tupu i roto i toou oraanga, penei kua anau tetai pepe ou i roto i toou ngutuare me kore kua orongaia mai tetai ngai angaanga naau tei anoano maataia? E mea papu kua mataora koe i te akakite i teia nuti ki toou ngutuare e te au oa. Kua tupu ana te reira kia koe te rongo anga koe i te nuti meitaki rava atu, koia te nuti meitaki o te Patireia o te Atua?
5. Eaa tei tupu kia koe te apii anga koe i te tuatua mou i roto i te Tuatua a te Atua? (Akara katoa i te au tutu.)
5 E akamaara i taau i kite te apii anga koe i te tuatua mou mei te Tuatua a te Atua. Kua apii koe e te akaperepere ra toou Metua i te rangi ia koe, ka inangaro aia kia piri koe ki tona aronga akamori, taputou aia i te takore i te mamae e te manakonakoanga e ka aravei akaou koe i toou au akaperepere tei mate i te ao ou e te vai atura. (Mare. 10:29, 30; Ioa. 5:28, 29; Roma 8:38, 39; Apo. 21:3, 4) Kua pumaana toou ngakau no taau i apii mai. (Luka 24:32) Kua akaperepere koe i teia au tuatua mou e kua akakite aere i te reira ki te katoatoa!—Akaaite ia Ieremia 20:9.
Te apii anga tatou i te Pipiria, mataora tikai tatou i te akakite i te reira ki te katoatoa! (Akara i te parakarapa 5)
6. Eaa taau i apii mai mei tei tupu kia Ernest e Rose?
6 Akamanako ana i teia tupuanga. E tai ngauru mataiti o Ernest b te mate anga tona papa. Karanga a Ernest: “Kua ui au: ‘Kua aere ainei aia ki te rangi? Me kua ngaro aia e tuatau ua atu?’ Vareae au i te au tamariki ke e papa to ratou.” No tetai tuatau roa kua aere a Ernest ki te ngai tanumanga, kua tuturi aia ki mua i te menema o tona papa, e kua pure aia: “Me ka tika e te Atua, inangaro au kia kite e teiea toku papa.” E 17 mataiti i muri ake te mate anga tona papa, kua āriki a Ernest i tetai apii Pipiria. Kua umere aia i te apii e kare a te aronga mate apinga i kite, mei te mea e te moe tinainai ra ratou e te taputou ra te Pipiria i te tuakaouanga a te tuatau ki mua. (Kohe. 9:5, 10; Anga. 24:15) I teianei, kua kite aia i te pauanga ki tana au uianga tei tamanata ana iaia no tetai tuatau roa! Kua mataora tikai a Ernest i te au tuatua mou Pipiria tana e apii ra. Kua piri katoa tana vaine ko Rose ki tana apii, e kua akaperepere katoa aia i te karere Patireia. I te 1978, kua papetitoia raua. Kua akakite raua i to raua irinakianga ki to raua ngutuare, au oa e ki tetai ua atu te ka akarongo mai. Tei tupu, kua tauturu a Ernest e Rose i te 70 tuma tangata kia kite ia Iehova e kia papetito.
7. Eaa te ka tupu me akaia te inangaro no te tuatua mou Pipiria i roto i to tatou ngakau? (Luka 6:45)
7 Me akaia te inangaro no te tuatua mou Pipiria i roto i to tatou ngakau, ka inangaro tatou i te akakite i te reira ki te katoatoa. (E tatau ia Luka 6:45.) Ka aite to tatou manako ki te au pipi a Iesu i te anere mataiti mua tei karanga: “Kare oki matou e tika kia kore e tuatua i ta matou i akara akenei, e ta matou i akarongo akenei.” (Anga. 4:20) No to tatou akaperepere i te tuatua mou, ka akakite aere tatou i te reira ki te katoatoa.
TUTU AERE TATOU NO TE AKAPEREPERE I TE TANGATA
8. Eaa te ka akakeu ia tatou kia akakite i te nuti meitaki ki te tangata? (Akara i te pia “ Akaperepere i te Tangata—E Akariro Ei Pipi.”) (Akara katoa i te tutu.)
8 Mei ia Iehova e tana Tamaiti, ka akaperepere tatou i te tangata. (Mase. 8:31; Ioa. 3:16) Ka tangi tatou i te aronga “e manakonako anga kore e te Atua kore” to ratou. (Ephe. 2:12) No to ratou au manamanata, mei te mea rai e tei roto ratou i tetai vaarua oonu e tei ia tatou te taura no te uuti mai ia ratou ki vao, koia oki te nuti meitaki o te Patireia o te Atua. Ka akakeu to tatou aroa e te tu tangi ia tatou kia tauta pakari i te akakite i te nuti meitaki kia ratou. Ka riro tera karere ei akapumaana ia ratou e te tauturu ia ratou kia rauka te “ora mutu kore” i roto i te ao ou o te Atua.—1 Timo. 6:19.
Ka akakeu te aroa e te tu tangi ia tatou kia tauta ua rai i te akakite i te nuti meitaki ki te tangata (Akara i te parakarapa 8)
9. Eaa te au akamatakite anga ta tatou ka akakite no te tuatau kia mua, e no teaa ra? (Ezekiela 33:7, 8)
9 Ka akakeu to tatou aroa i te tangata kia akamatakite ia ratou e te vaitata maira te openga o teia ao kino. (E tatau ia Ezekiela 33:7, 8.) Ka tangi tatou i te tangata ravarai, kapiti mai to tatou ngutuare tangata kare e tavini ana ia Iehova. Kua varenga ua te tangata i to ratou oraanga ma te kore e kite e “e mate maata tei te reira tuatau, kare ïa mei muatangana mai i teianei ao, e tae rava akenei i teianei rā, e kare oki a muri atu.” (Mata. 24:21) Ka inangaro tatou ia ratou kia kite eaa te ka tupu a tera tuatau akavaanga. Mea mua, ka akapouia te akonoanga pikikaa, aru mai ka takore takiriia teia akatereanga kino i te tamaki o Aramakito. (Apo. 16:14, 16; 17:16, 17; 19:11, 19, 20) Te pure nei tatou kia ariu mai te tangata e manganui ki te akamatakiteanga e ka kapiti mai kia tatou i te akamori ia Iehova i teia taime. Akapeea ra te aronga tei kore i akarongo mai ki te akamatakite anga i teianei, kapiti mai to tatou ngutuare tangata?
10. Eaa i puapinga ai kia akamatakite ua rai tatou i te tangata?
10 Mei tei akamāramaia i roto i te atikara i mua atu ana, ka akaora a Iehova i te tangata tei irinaki iaia me kite ratou i te takore anga o Babulonia Maata. Me koia ïa, e mea rapurapu kia akakite tatou i te reira kia ratou i teia taime tikai. Akamanako ana i teia: Ko ta tatou ka akakite i teianei, ka akamaara ratou a tera tuatau. (Akaaite ia Ezekiela 33:33.) Penei ka akamanako ratou i te akamatakiteanga ta ratou i rongo ana mei ia tatou e ka akakeuia ratou kia piri mai ki te akamorianga ia Iehova. Mei te tiaki mouauri rai i Philipi, tei irinaki ia Iehova i muri ake i ‘te tupuanga te ngaruerue enua maata,’ penei ka akamata tetai pae i te irinaki ia Iehova me kite ratou i te akapouanga o Babulonia Maata.—Anga. 16:25-34.
TUTU AERE TATOU NO TE INANGARO IA IEHOVA E TONA INGOA
11. Akapeea tatou me oronga i te kakā, te akangateitei e te mana kia Iehova? (Apokalupo 4:11) (Akara katoa i te au tutu.)
11 Te tumu puapinga rava atu ka tutu aere tatou i te nuti meitaki, no to tatou inangaro i te Atua ko Iehova e tona ingoa tapu. E ravenga meitaki te angaanga tutu aere no te akapaapaa i to tatou Atua aroa. (E tatau ia Apokalupo 4:11.) Ka āriki ua tatou i te tuatua e e tau te kakā, te akangateitei e te mana kia Iehova anake. No te reira, ka akakakā e ka akangateitei tatou iaia me akakite aere e nana i “anga i te au mea ravarai nei” e no tona inangaro i angaia ai ratou. Ka oronga tatou i te mana kia Iehova me akapou i to tatou taime, maroiroi e te au mea no te tutu aere ki te tangata kia tau ki ta tatou ka rauka i te rave. (Mata. 6:33; Luka 13:24; Kolo. 3:23) Tera te aiteanga, e mea reka na tatou i te tuatua no runga i te Atua ta tatou e akaperepere ra. Ka akakeu katoa ia tatou kia akakite aere ki te tangata i tona ingoa e tona au tu. No teaa ra?
Ka oronga tatou i to tatou taime, te maroiroi e te apinga kia Iehova, na te tutu aere anga ki te tangata tei tau ki to tatou maroiroi (Akara i te parakarapa 11)
12. Akapeea tatou me akatapu i te ingoa o Iehova i roto i te angaanga tutu aere?
12 Ka akakeu to tatou inangaro ia Iehova kia akatapu tatou i tona ingoa. (Mata. 6:9) Ka inangaro tatou i te akakite ki te tangata e pouroa te au mea kino ta Satani i akakite no Iehova, e au pikikaa te reira. (Gene. 3:1-5; Iobu 2:4; Ioa. 8:44) Me tutu aere tatou, ka akakite tatou i te tika no runga ia Iehova ki tetai ua atu te ka akarongo mai. Ka inangaro tatou i te katoatoa kia kite e ko te aroa tona tu maata, e tutara ana aia ma te tuatua tika e te tu tau, ka takore tona Patireia i te mamae e te kino e ka akatupu i te ’au e te mataora ki te tangata ravarai. (Sala. 37:10, 11, 29; 1 Ioa. 4:8) Me akakite aere tatou i teia au tuatua mou ki te tangata, ka akatapu tatou i tona ingoa. Ka mataora katoa tatou no te mea te rave nei tatou i ta tatou tuanga ei Au Kite no Iehova. Akapeea ra?
13. Eaa tatou i ngakau parau ei kia kapikiia ei Au Kite no Iehova? (Isaia 43:10-12)
13 Karanga a Iehova no tatou: “Ko kotou toku kite.” (E tatau ia Isaia 43:10-12.) I tetai au mataiti i topa, kua akakite te reta no ko mai i te Pupu Akaaere: “Ko te tikaanga ngateitei rava atu ka rauka ia tatou pouroa, koia oki kia riro mai ei Au Kite no Iehova.” c No teaa ra? Akamanako i teia akatutuanga. Kua akaapaia koe no te rave i te tarevake, no reira ka anoanoia tetai tangata kia akakite ki te katoatoa e pikikaa tera akaapaanga e e tangata meitaki ua koe. Koai taau ka iki? Ka pati koe i tetai tangata irinakiia e e ingoa meitaki tona kia akakite i te tika noou. Na te kapiki anga ia tatou ei Au Kite nona, te akaari maira a Iehova kua kite aia e kua irinaki ia tatou kia akakite ki te katoatoa e koia anake te Atua mou. E apainga ngateitei no tatou kia riro ei Au Kite nona, te akakite i tona ingoa i te au atianga ravarai e te akapapu e pouroa te au akaapa anga no runga iaia, e au pikikaa te reira. Me pera tatou, ka ngakau parau tatou e e Au Kite tatou no Iehova!—Sala. 83:18; Roma 10:13-15.
KA TUTU AERE TATOU E TAE UA ATU KI TE OPENGA
14. Eaa te ka tupu a te tuatau ki mua?
14 Ka inangaro tatou i te kite eaa te ka tupu kare e roa atu ana! Ma te akameitakianga a Iehova, ka inangaro tatou i te kite i te manganui te ka ariu mai ki te tuatua mou i mua ake ka akamata ai te mate maata. Ka mataora katoa tatou e i te tuatau o te mate maata, penei ka akaruke te tangata i to Satani ao e ka piri mai kia tatou i te akapaapaa ia Iehova!—Anga. 13:48.
15-16. Eaa ta tatou ka rave ua atu, e eaa te roa?
15 I teianei, e angaanga ta tatou ka rave. Koia oki te tutu aere anga i te nuti meitaki o te Patireia o te Atua i te ao katoa. I taua taime rai, ka akamatakite tatou i te tangata i te ka tupu. Ka anoanoia te tangata kia kite e te vaitata maira te openga o teia akatere anga kino. Me tae mai tera tuatau akavaanga, ka kite ratou e no ko mai i te Atua ko Iehova te karere ta tatou e akakite ra.—Eze. 38:23.
16 Eaa i reira ta tatou ka anoanoia kia rave? No te aroa koia oki te inangaro i te nuti meitaki, te akaperepere i te tangata, e tei maata rava atu to tatou akaperepere i te Atua ko Iehova e tona ingoa, ka tutu aere ua atu tatou ma te maroiroi e te rapurapu e tae ua atu ki te tuatau e karanga ai a Iehova, “Kua rava ua!”
IMENE 54 “Teia te Ara”
a Kua raveia te uipaanga mataiti ia Okotopa 7, 2023 i ko i te Newburgh Assembly Hall o te Au Kite o Iehova i New York, U.S.A. Akaariia te porokaramu ki runga i te JW Broadcasting®—Tuanga 1 ia Noema 2023 e te Tuanga 2 ia Tianuare 2024.
b Akara i te atikara “Taui te Pipiria i te Oraanga—Umere Au i te Pauanga Taka Meitaki e te Māmā ua a te Pipiria” i roto i Te Punanga Tiaki o Peperuare 1, 2015.
c Akara i te 2007 Yearbook of Jehovah’s Witnesses, kapi 3.