ATIKARA APII 21
IMENE 107 Akaraanga no te Aroa o te Atua
Me Kimi i Tetai Tokorua Akaipoipo Meitaki
“Koai te tangata kua kitea e ia te vaine akono meitaki ra? kare te au poe nei e tau iaia.”—MASE. 31:10.
AKAKOROANGA
Taangaanga i te au kaveinga Pipiria ei tauturu i te kimi i tetai tokorua akaipoipo meitaki e akapeea te putuputuanga me tauturu i te aronga tei inangaro i te akaipoipo.
1-2. (a) Eaa te au mea ka akamanako tetai taeake i mua ake ka aere kapiti raua ko tetai? (e) Eaa te aiteanga kia “aere kapiti”? (Akara i te “Akamārama Anga Tuatua.”)
KA INANGARO ainei koe i te akaipoipo? Kia mataora, kare tetai e anoanoia kia akaipoipo, inara e maata te au Kerititiano mapu e te pakarikari te tapapa ra kia akaipoipo. I mua ake ka kimi ei i tetai tokorua, ka anoanoia koe kia maroiroi i te pae vaerua, te pae ngakau e i te pae moni. a (1 Kori. 7:36) Me rave koe i te reira ka mataora toou oraanga akaipoipo.
2 Inara, kare i te mea māmā i te kimi i tetai tokorua akaipoipo meitaki. (Mase. 31:10) Pera katoa me kitea tetai taau ka inangaro i te akaipoipo, kare i te mea māmā no korua i te aere kapiti. b I teia atikara, ka uriuri tatou eaa te ka tauturu i te aronga kare i akaipoipo kia kimi i tetai tokorua meitaki e eaa ta ratou ka akamanako me aere kapiti. Ka uriuri katoa tatou akapeea te putuputuanga me tauturu i te aronga tei inangaro i te akaipoipo.
KIMI I TETAI TOKORUA MEITAKI
3. Eaa ta tetai Kerititiano ka akamanako me kimi aia i tetai tokorua akaipoipo?
3 Me inangaro koe i te akaipoipo, e mea meitaki kia kite koe i te au tu taau ka inangaro i roto i tetai tokorua i mua ake ka aere kapiti ei korua. c Ko te openga ka aru koe i tetai tokorua kare i tau kia koe. E tika, ka anoanoia tetai tokorua meitaki kia papetitoia. (1 Kori. 7:39) Inara kare te aiteanga e ka riro aia ei tokorua meitaki noou. No reira, e ui i teia au uianga kia koe uaorai: ‘Eaa toku au akakoroanga? Eaa te au tu ka inangaro au mei tetai tokorua? E mea tau ainei taku e inangaro ra?’
4. Eaa te au mea ta tetai pae ka pure?
4 Penei kua pure ana koe no te aravei i tetai tokorua meitaki noou. (Phili. 4:6) Kare a Iehova i taputou mai ana e ka rauka tetai tokorua akaipoipo noou. Inara te manako maira aia ia koe e ka akono ia koe e ka tauturu ua aia ia koe kia kimi i tetai tokorua akaipoipo. No reira e akakite i toou anoano e taau e inangaro ra kia Iehova. (Sala. 62:8) E pure no te tu pakari e te akakoromaki. (Iako. 1:5) Akakite mai a John, d e taeake kare i akaipoipo no Marike mai, i te au mea ka pure aia: “Ka akakite au kia Iehova no te au tu taku e inangaro ra i roto i tetai tokorua. Ka pure au e kia aravei au i tetai tokorua meitaki. Ka pati au kia Iehova kia tauturu mai iaku kia akaari katoa au i te au tu ei tane meitaki.” Karanga a Tanya, e tuaine no Sri Lanka mai: “Iaku e kimi ra i tetai tokorua meitaki, ka pati au ia Iehova kia tauturu mai iaku kia vai tiratiratu, kia manako papu e kia mataora.” Teianei noatu kare i kitea mai tetai tokorua akaipoipo, kua taputou a Iehova e ka akono ua rai aia ia koe i te pae kopapa e te ngakau.—Sala. 55:22.
5. Akapeea koe me aravei i te au Kerititiano kare i akaipoipo te inangaro ra ia Iehova? (1 Korinetia 15:58) (Akara katoa i te tutu.)
5 Te akamaroiroi maira te Pipiria ia tatou kia “maata nei te rave anga i te angaanga a te Atu.” (E tatau ia 1 Korinetia 15:58.) Ia koe e rave maroiroi ra i ta Iehova angaanga e te kapiti atu ki te au taeake e te au tuaine tukeke, ka akamaroiroiia koe e penei ka aravei koe i te au taeake kare i akaipoipo te tavini ra ia Iehova mei ia koe katoa. E ia koe e tauta pakari ra i te akamareka ia Iehova, ka mataora koe.
Me rave maroiroi koe i ta Iehova angaanga e te akapou i toou taime ki te au taeake tukeke, penei ka aravei koe i tetai tokorua meitaki (Akara i te parakarapa 5)
6. I te kimi anga i tetai tokorua, eaa ta tetai Kerititiano kare i akaipoipo ka akamaara?
6 Inara, e matakite: Eiaa e akapou maata i toou taime no te kimi i tetai tokorua. (Phili. 1:10) Ka rauka te mataora mei tetai pirianga vaitata kia Iehova. (Mata. 5:3) No te mea kare koe i akaipoipo ake, e maata atu toou taime no te tutu aere. (1 Kori. 7:32, 33) E taporoporo meitaki i te tuatau. Karanga a Jessica, e tuaine no Marike tei akaipoipo i tona 30 tuma mataiti, “Kua rave maroiroi au i te angaanga tutu aere e kua tauturu te reira iaku kia mareka i toku turanga noatu te inangaro ra au i te akaipoipo.”
E AKARA MA TE AKAMANAKO MEITAKI
7. Eaa i meitaki ei kia akara matatio koe i tetai taeake i mua ake ka akakite ei koe i toou anoano kiaia? (Maseli 13:16)
7 Akapeea me kua manako koe e kua tau tetai ei tokorua meitaki noou? Ka akakite ainei koe i toou manako kiaia? Karanga te Pipiria ka kimi tetai tangata pakari i te kite i mua ake ka rave ei aia i tetai angaanga. (E tatau ia Maseli 13:16.) No reira e mea meitaki kia akara matatio koe i tetai i mua ake ka akakite i toou inangaro iaia. Karanga mai a Aschwin no te Netherlands: “Ka tupu viviki te inangaro e ka ngaro rai te reira. Na te akara matatio anga i tetai taeake, kare i reira koe e rapurapu i te pati iaia kia aere kapiti korua.” Ia koe e akara ra i te reira tangata, penei ka kite mai koe kare aia i tau ei tokorua noou.
8. Akapeea tetai kare i akaipoipo me akara matatio i tetai tokorua meitaki? (Akara katoa i te tutu.)
8 Akapeea koe me akara matatio i tetai tokorua meitaki? I ko i te au uipaanga e me kapiti ki te au taeake, ka kite koe i tona au tu i te pae vaerua, me akono aia i tetai ke e tana e manako ra. Koai ma tona au oa e eaa tana e reka ana i te pukapuka? (Luka 6:45) Kua aite ainei tana akakoroanga ki taau? Penei ka komakoma koe ki te aronga pakari e te au taeake tukatau tei kite meitaki iaia. (Mase. 20:18) E ui no runga i tona turanga e tona au tu. (Ruta 2:11) Ia koe e akara ra iaia, eiaa e taakama iaia. E akangateitei i tona manako, auraka e ui i te au uianga kare e tau ana e eiaa e māro iaia.
I mua ake ka akakite ei koe i toou inangaro, e akara ma te akamanako meitaki (Akara i te parakarapa 7-8)
9. I mua ake ka aravei koe i tetai, eaa taau ka akapapu?
9 Mei teaa te roa me akara matatio koe i tetai i mua ake ka akakite ei koe i toou inangaro? Me akakite vave koe i te reira kiaia, penei ka manako aia e tu rapurapu toou. (Mase. 29:20) I tetai tua, me taroaroa koe e kua kite aia i toou inangaro iaia, ka ekoko tona manako. (Kohe. 11:4) E akamaara, me aravei koe iaia, kare te aiteanga e ka akaipoipo koe i tera taeake. Kia papu ra e kua papa koe no te akaipoipo e penei ka riro aia ei tokorua meitaki noou.
10. Eaa taau ka rave me kite koe te akainangaro maira tetai ia koe inara kare ko tera toou inangaro?
10 Akapeea me kua kite koe e te akainangaro maira tetai taeake ia koe? Me kare ko tera toou inangaro e akakite i te reira kiaia e kia kore aia e manako te inangaro ra koe iaia.—1 Kori. 10:24; Ephe. 4:25.
11. I te au enua e akanooia ana tetai tokorua akaipoipo e tetai ke, eaa taau ka akamanakoia?
11 I tetai au enua, na te nga metua e te aronga pakarikari e iki i te tokorua no tetai kare i akaipoipo. I tetai atu au enua, ka kimi te ngutuare tangata e te au oa i tetai tokorua meitaki e oti ka akanoo kia aravei raua e me kua tau raua kia akaipoipo. Me patiia koe kia tauturu i te kimi i tetai tokorua akaipoipo, e akamanako eaa ta raua e inangaro ra e ta raua e reka ana. Me kitea mai tetai tokorua meitaki, e akara matatio i tona au tu me akono aia i tetai ke e tei maata atu ko tona turanga pae vaerua. E puapinga maata atu te pirianga vaitata kia Iehova i te moni, te kite e te turanga. Inara e akamaara, na te taeake e te tuaine kare i akaipoipo te ikianga openga me ka akaipoipo raua.—Gala. 6:5.
AERE KAPITI ANGA
12. Me inangaro koe i te aere kapiti ki tetai ke, akapeea koe me akakite i toou manako kiaia?
12 Me inangaro koe i te aere kapiti ki tetai taeake, akapeea koe me akakite i toou manako? e Penei ka pukapuka korua i te ngai tangata me kore i runga i te tereponi. E akataka meitaki i toou inangaro iaia. (1 Kori. 14:9) E oti, e akaruke i tetai tuatau nona kia akamanako i tana ka pau mai. (Mase. 15:28) Me kare aia e inangaro i te aere kapiti e akangateitei i tona manako.
13. Eaa taau ka rave me akakite mai tetai i tona inangaro ia koe? (Kolosa 4:6)
13 Akapeea me akakite mai tetai i tona inangaro ia koe? E tuatua maru e te akangateitei iaia, no te mea kare i te mea māmā nona i te akakite i tona manako kia koe. (E tatau ia Kolosa 4:6.) Me ka anoano koe i te tuatau kia akamanako me ka aere kapiti korua e akakite kiaia. Inara eiaa e taroaroa. (Mase. 13:12) Me kare koe e inangaro iaia, e akakite i te reira ma te maru. Akara i ta Hans, e taeake no Austria, i tuatua ki tetai tuaine tei pati iaia kia aere kapiti raua: “Kua akakite au i toku manako ma te maru. Kua rave viviki au i teia kia kore aia e ekoko. Pera katoa kua matakite au akapeea me akono iaia a muri ake.” I tetai tua, me inangaro koe kia aere kapiti korua, e akakite i toou manako e taau e inangaro ra. Penei kare e aiteite ana ta korua e inangaro ra no te tuke i ta korua peu.
AKAPEEA TE AU TAEAKE ME TAUTURU I TE ARONGA KARE I AKAIPOIPO?
14. Akapeea tatou me tuatua akamaroiroi i te au taeake kare i akaipoipo?
14 Akapeea tatou me tauturu i te aronga kare i akaipoipo? Tetai ravenga, e matakite i ta tatou ka tuatua. (Ephe. 4:29) Penei ka ui tatou kia tatou uaorai: ‘E tatiaeae ana au i te aronga te inangaro ra i te akaipoipo? Me kite atu au i tetai taeake e tetai tuaine kare i akaipoipo e pukapuka ra, ka manako ainei au e te akainangaro ra raua i tetai e tetai?’ (1 Timo. 5:13) Pera katoa, auraka tatou e māro i te au taeake kare i akaipoipo kia manako e ka anoanoia ratou kia akaipoipo e mataora ai. Karanga a Hans, tei taikuia i mua ana: “Akakite tetai au taeake, ‘Aea koe e akaipoipo ei? Te pakari ua atura koe, kare koe e mapu akaou.’ Ka riro te reira au tuatua ei akataitaia i te aronga kare i akaipoipo e pera ka māroia ratou kia akaipoipo.” E ngari ake i te akameitaki atu i te aronga kare i akaipoipo!—1 Tesa. 5:11.
15. (a) Kia tau kia Roma 15:2, eaa ta tatou ka akamanako i mua ake ka tauturu ei i tetai kare i akaipoipo? (Akara katoa i te tutu.) (e) Eaa te au manako tauturu taau i kite mai i roto i te vitio?
15 Akapeea me te manako ra koe e kua tau tetai taeake e tetai tuaine kia akaipoipo? Te akakite maira te Pipiria kia akamaara tatou i te manako o tetai ke. (E tatau ia Roma 15:2.) Te aronga kare i akaipoipo ake kare ratou e inangaro i tetai ke kia akaaravei ia ratou ki tetai tokorua meitaki no ratou. (2 Tesa. 3:11) I tetai tua ka āriki mai tetai i te tauturu, eiaa ra tatou e māro atu i to tatou manako. f (Mase. 3:27) Ko tetai pae, ka inangaro ratou e na ratou rai e iki. Karanga a Lydia, e tuaine kare i akaipoipo no Tiamani mai: “Penei ka pati koe i te taeake e te tuaine kia piri mai ki te katoatoa. E na raua rai e iki kia kite meitaki raua i tetai e tetai.”
Ka aravei te au Kerititiano kare i akaipoipo i tetai ngai e maata te taeake (Akara i te parakarapa 15)
16. Eaa ta tetai Kerititiano kare i akaipoipo ka akamaara?
16 Pouroa tatou noatu me kua akaipoipo e kare i akaipoipo ka mataora e ka merengo ua i to tatou oraanga! (Sala. 128:1) No reira me inangaro koe i te akaipoipo e kare i kitea tetai tokorua noou, e rave tamou i ta Iehova angaanga. Karanga te tuaine ko Sin Yi no Macao mai: “Me akaaiteia ki te tuatau ka akapou koe ki toou tokorua i te Parataito, e tuatau poto ua te oraanga kare i akaipoipo. E akaperepere i te reira tuatau e te taangaanga meitaki i te reira.” Akapeea me kua kitea tetai tokorua meitaki e te aere kapiti nei korua? I te atikara ka aru mai, ka uriuri tatou akapeea korua e puapingaia ai me aere kapiti.
IMENE 137 Au Vaine, au Tuaine Akarongo Mou
a Kia kite me kua papa koe, aere ki runga i te jw.org akara i te atikara “Dating—Part 1: Am I Ready to Date?”
b AKAMĀRAMA ANGA TUATUA: I teia atikara e te ka aru mai, ko te “aere kapiti” te akataka ra i te tuatau te kimi ra tetai nga tokorua me kua tau raua kia akaipoipo. I tetai au ngai, kua kapikiia te reira e ko te dating, te akamatau anga ki tetai e te akainangaro. Ka akamata raua i te aere kapiti me akakite raua i to raua inangaro i tetai e tetai, e ka taopenga me tia raua i te akaipoipo me kore me akamutu raua i te aere kapiti.
c I roto i teia atikara, ko te taeake te tokorua meitaki. E ka tau katoa teia ki tetai tuaine.
d Kua tauiia te au ingoa.
e I tetai au peu, na te taeake e pati ki te tuaine kia aere kapiti raua. I tetai tua, ka rauka katoa i tetai tuaine kia pera. (Ruta 3:1-13) Kia kite maata atu akara i te atikara “Young People Ask . . . How Can I Tell Him How I Feel?” i te Awake! o Okotopa 22, 2004.
f Akara i te vitio i runga i te jw.org Aronga Autu te Taitaia no te Akarongo—Kare i Akaipoipo.