1. Akapeea tatou e puapinga ai me pukapuka i to tatou aere anga mai ki roto i “te tuatua-mou”?

 “AKAPEEA koe i aere mai ei ki roto i te tuatua mou?” Kare e ekoko anga e maata toou taime te pau anga i teia uianga. Ko te uianga mua teia ta tetai taeake ka ui mai me aravei korua. E reka ana tatou te akarongo akapeea te au taeake e te au tuaine te apii anga e kua akaperepere ia Iehova, e e reka ana tatou te akakite atu i to tatou manako. (Roma 1:11) Mei teia pukapuka anga, kua kite tatou i te puapinga o te tuatua mou. E kua aruaru maata atu tatou i te ‘aere ra na te tuatua mou’​—koia oki, kia aru i te oraanga te ka akameitaki ia Iehova.​—3 Ioa. 4.

2. Eaa ta tatou ka uriuri i teia atikara?

² I teia atikara, ka uriuri tatou i tetai au tumu i akaperepere ei tatou i te tuatua mou. E oti ka uriuri tatou akapeea me akaperepere i teia apinga aroa. E ka akameitaki maata atu tatou i ta Iehova i rave no te akavaitata ia tatou ki te tuatua mou. (Ioa. 6:44) Ka akamaroiroi katoa ia tatou kia apii i te tuatua mou ki tetai ke.

3. Eaa te tumu puapinga i akaperepere ei tatou i te tuatua mou?

³ E maata te tumu i akaperepere ei tatou i te tuatua mou. Te mea puapinga, akaperepere tatou i te Atua ko Iehova, te Tumu o te tuatua mou. Na roto i tana Tuatua, te Pipiria, kua kite tatou i Tei Anga i te rangi e te enua, e ei Metua aroa no tatou i te rangi. (1 Pete. 5:7) Kua kite tatou “e Atua takinga-meitaki, e te aroa ua, e te akakoromaki  maata, e te meitaki maata, e te tuatua-mou” to tatou. (Exo. 34:6) Akaperepere a Iehova i te tu tika. (Isa. 61:8) Te mamae ra aia me kite aia i to tatou mamae, e kua papa ua aia​—ae, ma te inangaro—​kia takore i te reira i te tuatau tau. (Iere. 29:11) Mei teaa atura te mataora! No reira tatou i akaperepere ei ia Iehova!

4-5. Eaa te apotetoro ko Paulo i akaaite ei i te manakonakoanga ki tetai tutau?

⁴ Eaa tetai tumu i akaperepere ei tatou i te tuatua mou? Ka apai mai te reira i te au puapinga. Akamanako ana i tetai akaraanga. Ka kapiti mai to tatou manakonakoanga no te tuatau ki mua ki roto i te tuatua mou Pipiria. Ei akatutu i te puapinga o te reira, tata te apotetoro ko Paulo: “Ko ta tatou ïa tutau no te vaerua, e mea mauti kore e te mou meitaki.” (Ebe. 6:19) Mei te tutau tei pārani i tetai poti, ka pārani katoa te manakonakoanga Pipiria ia tatou me rokoia e te manamanata.

⁵ I teia aerenga manako, te uriuri ra a Paulo i te manakonakoanga no te rangi ta te au Kerititiano akatainuia e akaperepere ra. Inara ka tau rai teia tuatua no te au Kerititiano te ka noo i te enua parataito nei e tuatau ua atu. (Ioa. 3:16) Papu, kua puapingaia to tatou oraanga te apiianga i teia manakonakoanga no te ora mutu kore.

6-7. Akapeea a Yvonne i puapinga ai mei te tuatua mou no te tuatau ki mua?

⁶ Akamanako ana i te tua o tetai tuaine ko Yvonne. Kare aia i utuutuia mai ki roto i te tuatua mou, e mei tona tamariki anga kua mataku aia i te mate. Kua maara iaia tetai tuatua: “Te vaira te rā kare o apopo.” Karanga aia: “Kua ara ua au i te po te akamanako anga i te tuatau ki mua. ‘E maata atu te vaira i te oraanga,’ i manako ei au. ‘Eaa ra toku akakoroanga?’ Kare au e inangaro i te mate!”

⁷ I muri mai, ei mapu, kua aravei a Yvonne i te au Au Kite o Iehova. Akakite aia: “Kua akamata au i te irinaki e manakonakoanga toku kia noo e tuatau ua atu ki roto i te parataito i te enua nei.” Akapeea to tatou tuaine i puapingaia ai? Karanga aia: “Kare au e ara akaou ana i te po, te manata i te tuatau ki mua e no te mate.” Ae, akaperepere tikai a Yvonne i te tuatua mou, e kua reka aia i te akakite i tona manakonakoanga no te tuatau ki mua ki tetai ke.​—1 Timo. 4:16.

8-9. (a) I ta Iesu parapore, eaa te puapinga o te poe ta te tangata i kite mai? (e) Eaa te puapinga o te poe kia koe?

⁸ Ka o rai te nuti meitaki no te Patireia o te Atua ki roto i te tuatua mou Pipiria. Kua akaaite a Iesu i te tuatua mou no te Patireia ki tetai poe tei uunaia. Mei tei tataia ia Mataio 13:44, karanga a Iesu: “E arite oki te basileia o te ao ki te apinga i ngaro ki roto i te kainga; e kitea iora e tetai tangata, kua uuna rava atura aia, e no te rekareka i te reira, kua oko aere aia i te apinga tini ravarai nana ra, e kua oko atura i taua kainga ra.” Kare te tangata i kimi ana i te poe. Inara kua kiteaia e ïa te reira, kua akaruke aia i tetai au apinga kia rauka te reira. Te tika, kua oko aia i tana au mea ravarai. Eaa te tumu? Kua kite meitaki aia e mea puapinga te poe. E puapinga rava atu te reira i tetai ua atu apinga tana i rauka.

⁹ Ko toou tu ainei teia no te tuatua mou. Papu roa! Kua kite tatou kare e  apinga i teianei ao ka akaaiteia ki te tavini rekareka anga ia Iehova, kia rauka te ora mutu kore i raro ake i te tutara anga Patireia. E puapinga rava atu te akameitakianga kia rauka tetai pirianga vaitata kia Iehova. To tatou rekareka maata koia oki kia ‘mareka mai aia i te au mea katoa ra.’​—Kolo. 1:10.

10-11. Eaa tei akakeu ia Michael kia taui i tona oraanga?

¹⁰ E maata tatou tei akaruke i te au apinga maata kia mareka a Iehova ia tatou. Kua akaruke tetai pae i te au angaanga rongonui. Kua akaruke tetai pae i te aruaru i te kimi moni. E kua taui takiri tetai pae i to ratou oraanga te apii anga ia Iehova. Ta Michael te reira i rave. Kare aia i utuutuia mai i roto i te tuatua mou. Ei mapu, kua apii aia i te karate. Karanga aia: “E mea puapinga kia akono au i toku kopapa. Kua manako au iaku ei tumutoa ketaketa.” Te akamata anga a Michael i te apii i te Pipiria, kua kite aia i to Iehova manako no te ta ua. (Sala. 11:5) No runga i te tokorua Au Kite tei apii kiaia, karanga a Michael: “Kare rava raua i karanga mai ana kia akaruke au i taku karate; kua apii ua raua i te tuatua mou Pipiria.”

¹¹ Te maata atu ta Michael i apii no Iehova, te maata atu tana akaperepere Iaia. Kua pakia tona ngakau i to Iehova tu tangi aroa no Tona iti tangata tei akamori iaia. Kare i roa, kua kite mai a Michael e ka anoanoia aia kia taui i tona oraanga. “Kua kite au e ko te karate te apinga ngatā rava atu taku ka akaruke,” i nana ei. “Inara kua kite au e ka akamareka te reira ia Iehova, e kua pauna taku tavini anga iaia.” Akameitaki tikai a Michael i te tuatua mou, e kua akakeu iaia kia taui i tona oraanga.​—Iako. 1:25.

12-13. Akapeea te Pipiria te akamārama anga i te tuatua mou Pipiria kia Mayli?

¹² Ei akaari i te puapinga o te tuatua mou, kua akaaite te Pipiria i te reira ki tetai ramepa marama i roto i te poiri. (Sala. 119:105; Ephe. 5:8) Kua āriki a Mayli, i Azerbaijan, i te tauturu mei te Tuatua a te Atua. Kua utuutuia aia i roto i tetai ngutuare akonoanga tukeke. E Muslim tona papa, e ngati Iuda tona mama. Karanga aia: “Noatu kare au e patoi ana e te vaira te Atua, e maata taku e manata ra. Kua manako au, ‘Eaa te Atua i anga ei i te tangata, e eaa te tangata ka mamae ei i tona oraanga e kia tamamaeia ki roto i te aʼi vera?’ Mei te mea kua karanga te tangata e anoano te reira no te Atua, manako au, ‘E akatere ana ainei te Atua i te tangata ma te mareka te mamae ra ratou?’”

¹³ Kua kimi ua atu rai a Mayli i te au pauanga ki tana au uianga. Kare i roa, kua āriki aia i tetai apii Pipiria e kua aere mai ki roto i te tuatua mou. “Kua taui te Pipiria i toku oraanga,” i nana ei. “Na roto i te au akamārama anga puapinga mei roto i te Tuatua a te Atua kua rauka iaku te tu au.” Mei ia Mayli, ka akapaapaa tatou ia Iehova, no “tona meitaki, to tei kapiki ia [tatou] i to roto i te poiri, kia tae ki tona mārama umereia.”​—1 Pete. 2:9.

14. Akapeea tatou me akaperepere maata atu i te tuatua mou? (Akara katoa i te pia “ Akaaiteanga Ke Atu.”)

¹⁴ E au akaraanga ua teia tei akatutu i te puapinga o te tuatua mou. Kare e ekoko anga ka manako koe i tetai. Eaa ka kore ei e rave i tetai apii Pipiria naau kia kitea  te au tumu i akaperepere ei tatou i te tuatua mou? Te maata atu taau akaperepere i te tuatua mou, te maata atu taau akaari anga i te reira.

15. Eaa tetai ravenga ka akaari tatou e te akaperepere ra tatou i te tuatua mou?

¹⁵ Ka akaari tatou e te akaperepere ra tatou i te tuatua mou me apii putuputu tatou i te Pipiria e te au puka Pipiria. Noatu eaa te roa ia tatou i roto i te tuatua mou, e maata ta tatou ka apii mai. Te akakite ra te makatini mua: “Kua aite te tuatua mou, ki tetai manga tiare i roto i te metepara o te oraanga, tei takapiniia e kua vaitata i te maremo mei te tupuanga maata o te au ngangaere tarevake. Me kitea e koe te reira kia matakite. . . . Me kitea te reira e tauta kia rauka te reira. Auraka e rava ua ki te tiare okotai o te tuatua mou. . . . E akaputu i te reira, kia maata.” E angaanga pakari te apii, inara ka pauna te taime.

16. Eaa te ravenga apii taau e reka ra? (Maseli 2:4-6)

¹⁶ Kare te katoa anga ia tatou e reka ana i te tatau e te apii. Inara te pati maira  a Iehova ia tatou kia “kimi pu tikai” e “kia makitoro marie” kia mārama meitaki i te tuatua mou. (E tatau ia Maseli 2:4-6.) Me tauta maata tatou, ka puapingaia tatou. No runga i tana tatau Pipiria, karanga a Corey e kua akamou aia ki runga i te irava okotai. Karanga aia: “Ka tatau au i te au tuatua rikiriki i raro, ka akara i te au akakiteanga, ma te kimikimi marie. . . . E maata taku e rauka ana mei teia!” Me ka taangaanga tatou i teia e tetai atu, te āriki maata ra tatou i te tuatua mou.​—Sala. 1:1-3.

17. Eaa te aiteanga kia aru tatou i te tuatua mou? (Iakobo 1:25)

¹⁷ Ae, kua kite tatou kare e rava kia apii ua i te tuatua mou. E puapinga ai te reira, e aru tatou i te tuatua mou, kia taangaanga i te reira i roto i to tatou oraanga. I reira tatou e mataora ai. (E tatau ia Iakobo 1:25.) Akapeea tatou e papu ei e te aru ra tatou i te tuatua mou? Kua akakite mai tetai taeake i tana akara matatio anga kia kitea te au ngai meitaki e te au ngai ka anoanoia te tauturu. Karanga te apotetoro ko Paulo: “Ko ta tatou ngai i rauka maira, na reira tatou i te aere na taua akairo rai, kia akono oki tatou i te mea okotai.”​—Phili. 3:16.

18. Eaa tatou ka maroiroi ei kia ‘aere ra na te tuatua mou’?

¹⁸ Akamanako ana i te au puapinga me ‘aere ra tatou na te tuatua mou’! Ka akameitaki atu tatou i te oraanga e ka akarekareka ia Iehova e te au taeake tei irinaki iaia. (Mase. 27:11; 3 Ioa. 4) Ae, e tumu anga maata ta tatou kia akaperepere i te tuatua mou e kia aru i te tuatua mou?