1. Ia 1 Tesalonia 5:11, eaa te angaanga ta tatou ka rave?

 KUA pātu ainei me kore kua akaou ainei taau putuputuanga i tetai Are Uipaanga Patireia? Me koia ia, penei ka maara ia koe taau uipaanga mua ki reira. Kua akameitaki tikai koe ia Iehova. Penei no toou rekareka maata kua ngatā ia koe te imene i te imene akamataanga. Kua akapaapaaia a Iehova no to tatou Are Uipaanga Patireia ou tei pātuia. Inara ka maata atu te akapaapaa anga me rave tatou i tetai atu pātuanga. E angaanga puapinga atu tetai i te pātuanga are. Ko te akamaroiroi anga i te tangata tei tae mai ki te ngai akamorianga. Teia ta te apotetoro ko Paulo i akamanako no tana akatutuanga pātu are i tona tataanga i teia ia 1 Tesalonia 5:11, ta tatou tumu irava.​—E tatau.

2. Eaa ta tatou ka uriuri i teia atikara?

² E akaraanga meitaki to te apotetoro ko Paulo no te akamaroiroi i te au taeake. Kua tangi aroa aia ia ratou. I teia atikara, ka uriuri tatou akapeea aia i te tauturu anga i tona au taeake e te au tuaine (1) kia akakoromaki i te au timataanga, (2) kia noo ‘au ki tetai e tetai, e te (3) kia akamatutu i to ratou akarongo ia Iehova. Akara akapeea tatou me aru iaia e te akamaroiroi i te au taeake e te au tuaine i teia tuatau.​—1 Kori. 11:1.

3. Eaa te manako tau ta Paulo i akaari?

³ Akaperepere maata a Paulo i tona au taeake. Kua mātau aia i te oraanga ngatā; e kua tangi aroa atura aia i te au taeake ia ratou e manamanata ra. I tetai atianga, kua pou ta Paulo moni e kua angaanga aia no te tauturu iaia e tona au  taeake. (Anga. 20:34) E tangata maani puakapa aia. I tona tae anga ki Korinetia, kua angaanga kapiti aia ki tona nga taeake maani puakapa ko Akuila e Peresila. “I te au sabati ravarai” ka tutu aere aia ki te ngati Iuda e to Ereni. I te taeanga a Sila e Timoteo, kua “riro rava atura te vaerua o Paulo, kua akakite ua atura.” (Anga. 18:2-5) Kua akamou a Paulo ki runga i tona akakoroanga, kia tavini ia Iehova. Kua rauka i te tangata angaanga pakari ko Paulo i te akamaroiroi i te au taeake e te au tuaine. Kua akamaroiroi aia eiaa ratou e tuku i te taomianga o te oraanga e te akono i te ngutuare, kia akaruke ratou i “te au mea e maata ua atu te meitaki;”​—te akamorianga ia Iehova.​—Phili. 1:10.

4. Akapeea a Paulo e Timoteo te tauturu anga i te au taeake kia akakoromaki i te takinokino anga?

⁴ Muri ua ake i te akanooia anga te putuputuanga i Tesalonia, kua tupu te patoianga pakari ki te au taeake ou. No tei kore a Paulo e Sila i kitea e te pupu aronga kino, kua ‘kika ratou i te au taeake ki te au akava i te oire,’ te ava anga: ‘Kua patoi ratou ia Kaisara.’ (Anga. 17:6, 7) Akamanako ana i te mataku o teia au taeake Kerititiano ou i te uri anga te pupu aronga kino kia ratou? Ka māmā ua ratou i te akaparuparu i te tavini ia Iehova, kare a Paulo i inangaro ana e kia tupu teia. Noatu ka akaruke raua ko Sila, kua na mua raua i te akatinamou i te putuputuanga ou. Akamaara atura a Paulo i to Tesalonia: “Unga akenei [matou i te] taeake ia Timoteo . . . , ei akatinamou ia kotou, e ei akapumaana ia kotou, i to kotou akarongo: Kia kore rava tetai tangata kia ngaueue i teianei au mate.” (1 Tesa. 3:2, 3) Papu e kua tupu ana te takinokino anga kia Timoteo i tona oire ko Lusetera. Kua kite aia ia Paulo te akamaroiroi anga i te au taeake. Te kiteanga i ta Iehova tauturu, kua rauka ia Timoteo i te akamaroiroi i te au taeake e te au tuaine ou e ka tupu te meitaki kia ratou.​—Anga. 14:8, 19-22; Ebe. 12:2.

5. Akapeea te taeake ko Bryant te tauturuia anga e tetai tangata pakari?

⁵ Eaa atu tetai mataara i akamaroiroi ei a Paulo i te au taeake? I to Paulo e Banaba oki akaou anga ki Lusetera, Ikonia, e Anetioka, kua “akonoia e raua te aronga orometua no ratou i te au ekalesia katoa.” (Anga. 14:21-23) Kare e ekoko anga kua riro teia aronga ikiia ei akamaroiroi i te putuputuanga, mei te aronga pakari o teia tuatau. Teia ta te taeake ko Bryant i akakite: “I toku 15 mataiti,” i nana ei, “kua akaruke toku papa ia matou e kua akaruke a mama ia Iehova. Kua taitaiaia au ma te maromaroa.” Eaa tei tauturu ia Bryant kia akakoromaki i te reira tuatau ngatā? Karanga aia: “Kua pukapuka mai tetai tangata pakari ko Tony kiaku i te au uipaanga, e tetai ua atu taime. Kua akakite mai aia i te aronga tei na roto i te au timata anga inara kua mataora ua ratou. Kua tatau mai aia ia Salamo 27:10 kiaku e kua akakite mai ia Hezekia, tei vai tiratiratu noatu kare tona metua tane i te akaraanga meitaki.” Akapeea teia te tauturu anga ia Bryant? “Ma te akamaroiroianga a Tony,” i na Bryant ei, “kua akamata au i tetai oraanga tavini tamou ma te rekareka.” E te aronga pakari, e akono i te au taeake, mei ia Bryant, tei anoano i te “tuatua meitaki” ei akamaroiroianga.​—Mase. 12:25.

6. Akapeea a Paulo te taangaanga anga i te au tua oraanga ei akamaroiroi i te au taeake e te au tuaine?

⁶ Kua akamaara a Paulo i te au taeake e  na roto i te maroiroi o Iehova, e “urupu maata” tetai tei akakoromaki i te au turanga ngatā. (Ebe. 12:1) Kua mārama a Paulo akapeea te au tua oraanga o te aronga tei autu i te au turanga ngatā te akamaroiroi anga i te au taeake e te au tuaine kia akamou ki runga i “te oire o te Atua ora ra.” (Ebe. 12:22) Aiteite katoa i teia tuatau. Koai ïa tangata tei kore i akamaroiroiia i te tatau anga i ta Iehova tauturu anga ia Gideona, Baraka, Davida, Samuela, e te vai atura? (Ebe. 11:32-35) Akapeea te au akaraanga o te akarongo i teia tuatau? I te opati maata o teianei ao, e tae ua ana te au reta mei te au taeake e te au tuaine tei akamaroiroiia te tatau anga i te tua oraanga o tetai tavini tiratiratu o Iehova i teia tuatau.

7. Eaa taau i apii mai mei ta Paulo akoanga ia Roma 14:19-21?

⁷ Ka akamaroiroi tatou i te au taeake e te au tuaine me akatupu tatou i te ‘au i roto i te putuputuanga. Kare tatou e tuku i te au manako tukeke kia akatakake ia tatou. E kare tatou e māro i to tatou tikaanga me kore tetai kaveinga Tuatua Tapu i aatiia. Akamanako ana i teia akaraanga. Tei roto i te putuputuanga o Roma te au Kerititiano ngati Iuda e te Pa enua ke. Te akakoreia anga te Ture a Mose, kare te au ture no tetai au kai e anoano akaouia. (Mare. 7:19) Mei te reira taime e aere ua atu, kua kai tetai au Kerititiano ngati Iuda i te au kai tukeke. E kare tetai au Kerititiano ngati Iuda i kai ana i te reira. Kua akatupu teia i te ke i roto i te putuputuanga. Kua akakite a Paulo i te puapinga kia akatupu i te ‘au e kua tuatua: “E mea meitaki oki kia kore e kai i te puaka, e kia kore e inu i te wina, e kia kore e rave i te au mea ravarai e turori ei to taeake ra, e e maitu ei, a e apikepike ei ra oki.” (E tatau ia Roma 14:19-21.) Kua tauturu a Paulo i tona au taeake kia kite e ka takino te reira au taumāro anga i te au taeake e te putuputuanga. Kua inangaro katoa aia i te taui i tona tu kia kore e akaturori i tetai. (1 Kori. 9:19-22) Ka akamaroiroi katoa tatou i tetai ma te ‘au me kopae tatou i te akatupu i te au manamanata rikiriki.

8. Eaa ta Paulo i rave, ei akatupu i te ‘au i roto i te putuputuanga?

⁸ Kua akanoo a Paulo i te akaraanga meitaki no te akatupu i te ‘au ki te aronga tei patoi i tetai au mea puapinga. Ei akaraanga kua māro tetai pae o te putuputuanga o te anere mataiti mua kia peritomeia te au tangata ke, kia kore ratou e akaapaia e te aronga o vao. (Gala. 6:12) Kua patoi a Paulo i te reira, kare aia i māro i tona manako, ma te akaaka kua akakite aia i te reira ki te au apotetoro e te aronga pakari i Ierusalema. (Anga. 15:1, 2) Tei tupu, kua riro tona tu ei tauturu i te au Kerititiano kia akatupu i te rekareka e te ‘au i roto i te putuputuanga.​—Anga. 15:30, 31.

9. Akapeea tatou me aru i to Paulo akaraanga?

⁹ Me tupu tetai taumāro anga, ka akatupu tatou i te ‘au na te patianga i te tauturu a te aronga ta Iehova i iki kia akono i te putuputuanga. Ka kitea te aratakianga Pipiria i roto i ta tatou au puka e te au ikuikuanga a te akaaerenga. Me aru tatou i te au aratakianga e kare e māro i to tatou au manako ka akatupu tatou i te ‘au i roto i te putuputuanga.

10. Eaa atu ta Paulo i rave no te akatupu i te ‘au i roto i te putuputuanga?

 ¹⁰ Kua akatupu katoa a Paulo i te ‘au na te akameitaki anga i te au tu meitaki o te au taeake e te au tuaine. Ei akaraanga, i te taopenga anga i tana reta ki to Roma, kua taiku a Paulo i te ingoa o te au taeake e kua akameitaki ia ratou e ta ratou i rave. Ka aru katoa tatou ia Paulo na te taiku anga i te au tu meitaki o te au taeake e te au tuaine. Me pera tatou, te oronga ra tatou i tetai tumu kia piri vaitata te au taeake e te au tuaine, e ka akamaroiroi i te putuputuanga ma te aroa.

11. Akapeea tatou me akatupu i te ‘au me tupu te manamanata?

¹¹ I tetai au taime, ka patoi e ka taumaro tetai au Kerititiano tukatau. Kua tupu te reira kia Paulo e tona oa ko Banaba. Kua tauetono teia nga taeake me ka apai raua ia Mareko e me kare i to raua tere mitinari. Kua “tupu atura oki te taumāro maata” e kua takake atura raua. (Anga. 15:37-39) Inara kua akatupu a Paulo, Banaba, e Mareko i te ‘au, te akaari anga i te puapinga kia akatupu i te ‘au e kia taokotai te putuputuanga. Kua akameitaki a Paulo ia Banaba e Mareko i muri mai. (1 Kori. 9:6; Kolo. 4:10) Ka anoano katoaia tatou kia akatikatika i to tatou manamanata i roto i te putuputuanga e e akamou ki runga i to ratou au tu meitaki. Na teia tu, ka akatupu tatou i te ‘au e te tu taokotai.​—Ephe. 4:3.

12. Eaa te au manamanata tei tupu ki te au taeake e te au tuaine?

¹² Me akamaroiroi tatou i te au taeake e te au tuaine, ka akamatutu te reira i te akarongo kia Iehova. Kua akakinoia tetai pae e te ngutuare irinaki kore, te au oa angaanga e te au oa apii. Te akakoromaki ra tetai pae i te maki kino e te au manako ngakau mamae. E te tiaki nei rai tetai au Kerititiano tei papetitoia no tetai tuatau roa, kia takoreia teia akatereanga. Ka riro teia ei timata i te akarongo o te au Kerititiano i teia tuatau. Kua tupu teia ki te au taeake i roto i te putuputuanga o te anere mataiti mua. Eaa ta Paulo i rave ei akamaroiroi i te au taeake e te au tuaine?

13. Akapeea a Paulo te tauturu anga i te aronga tei akakinoia no to ratou irinakianga?

¹³ Taangaanga a Paulo i te au Tuatua Tapu ei akamatutu i te akarongo o tona au taeake e te au tuaine. Ei akaraanga, penei kua taitaiaia te au Kerititiano ngati Iuda e te au akakino anga a te au kopu tangata irinaki kore e e meitaki atu te akonoanga ngati Iuda i te akonoanga Kerititiano. Kare e ekoko anga kua riro ta Paulo reta ki te au Epera ei akamaroiroi i te au Kerititiano. (Ebe. 1:5, 6; 2:2, 3; 9:24, 25) Ka rauka ia ratou te taangaanga i tana au tataanga no te akamuteki i te aronga akaapa. I teia tuatau, ka tauturu tatou i te au taeake tei akakinoia, kia taangaanga i te au puka Pipiria no te akamārama i to ratou irinakianga. E me akakinoia ta tatou au mapu no tei irinaki i te au mea i angaia, ka tauturu tatou ia ratou kia rauka te pauanga i roto i te au poroutia Was Life Created? e The Origin of Life​—Five Questions Worth Asking kia akaari i to tatou irinakianga e kua angaia te au mea ora.

14. Noatu ta Paulo tutu aere e te apii, eaa tana i rave?

¹⁴ Akamaroiroi a Paulo i te au taeake e te au tuaine kia aroa ua na roto i “te  angaanga memeitaki.” (Ebe. 10:24) Kua tauturu aia i tona au taeake e te au tuaine na roto i tana tuatua e tana i rave. Ei akaraanga, te tupuanga te onge ki te au taeake i Iudea, kua tauturu a Paulo ia ratou. (Anga. 11:27-30) Noatu te maroiroi ra a Paulo i te tutu aere e te apiianga, kua tauturu ua aia i te au taeake i te pae kopapa. (Gala. 2:10) Na te pera anga, kua akamaroiroi aia i tona au taeake e ka akono ua rai a Iehova ia ratou. I teia tuatau, me oronga tatou i to tatou taime, maroiroi, e te tu karape no te tauturu i te au tumatetenga natura, ka akamatutu tatou i te akarongo o te au taeake e te au tuaine. Ka tupu katoa teia me oronga ua tatou i te moni tauturu no te angaanga i teianei ao. Na roto i teia e tetai atu, te tauturu ra tatou i te au taeake e te au tuaine kia irinaki e kare rava a Iehova e akaruke ia ratou.

15-16. Akapeea tatou me akono i te aronga kua paruparu te akarongo?

¹⁵ Kare a Paulo i akaruke ana i te aronga kua paruparu te akarongo. Kua tangi aroa aia ia ratou e kua tuatua maru ma te papu kia ratou. (Ebe. 6:9; 10:39) Ei akaraanga, i roto i tana reta ki te au Epera, kua taangaanga putuputu aia i te tuatua “tatou,” ei akaari e kua taangaanga katoa aia i tana akoanga. (Ebe. 2:1, 3) Mei ia Paulo, kare tatou e akaruke i te aronga kua paruparu te akarongo. Mari ra, ka akamaroiroi tatou ia ratou ma te aroa. Na teia tu, te akaperepere ra tatou ia ratou. Ka riro to tatou reo maru ma te aroa ei akamaroiroi ia ratou.

¹⁶ Kua akamaroiroi a Paulo i tona au taeake e te au tuaine e te kite maira a Iehova i ta ratou angaanga memeitaki. (Ebe. 10:32-34) Ka rauka katoa ia tatou  te tauturu i tetai taeake kua paruparu te akarongo. Penei ka tauturu tatou iaia kia akamaara i tona aere anga mai ki roto i te tuatua mou e te taime i tauturu ei a Iehova iaia. Ka taangaanga tatou i teia atianga kia akapapu kiaia e kare rava a Iehova i akangaropoina i tana au angaanga memeitaki e kare a Iehova e akaruke iaia a te tuatau ki mua. (Ebe. 6:10; 13:5, 6) Na roto i teia pukapuka anga ka akakeuia teia au taeake akaperepere kia tavini akaou Iaia.

17. Eaa te au tu karape ka akatupu ua atu tatou?

¹⁷ Mei te tangata pātu are tei akamaata i tona au tu karape, ka akamaroiroi katoa tatou i tetai e tetai. Ka tauturu tatou i tetai kia akakoromaki i te au manamanata na te akakite anga i te au akaraanga o te aronga tei akakoromaki i mua ana. Ka akatupu tatou i te ‘au na te taikuanga i te tu meitaki o tetai ke, kia noo ‘au ua me tamanataia, e kia akatupu i te ‘au me tupu te manamanata. E ka akamatutu tatou i te akarongo o te au taeake e te au tuaine na te uriuri anga i te au tuatua mou Pipiria, me oronga i te tauturu tau, e te tauturu i te aronga kua paruparu te akarongo.

18. Eaa ta tatou ka aruaru ua atu i te rave?

¹⁸ Mataora te aronga te rave ra i te angaanga pātu are. Ka mataora tatou me tauturu i te pātu anga pae vaerua i roto i te putuputuanga. Kare e aiteia ki te au are te ka pe, ka mutu kore ua atu ta tatou angaanga pae vaerua! Kia aruaru ua atu tatou te “akapumaana [anga] tetai ki tetai, e akatupu i te meitaki tetai ki tetai.”​—1 Tesa. 5:11.