1. Eaa a Iesu i pati ei kia tiaki mai a Iehova i tana au pipi?

 I TE po i mua ake ka mate ei aia, kua pati a Iesu i tetai patianga takake ki tona Metua i te rangi. Kua pati aia ia Iehova kia tiaki mai i tana au pipi. (Ioa. 17:15, 20) Ae, kua tiaki ua ana a Iehova​—e kua akono e te paruru—​i tona iti tangata. Inara, kua kite a Iesu e ka patoi kino a Satani i tana au pipi. Kua kite katoa a Iesu e ka anoanoia ta Iehova tauturu ei patoi i te au tamaki anga kino a te Tiaporo.

2. Ia Salamo 33:18-20, eaa tatou ka kore ei e mataku i te manamanata?

² Te akatupu nei a Satani i te au manamanata no te au Kerititiano mou i teia tuatau. Te kite nei tatou i te au manamanata te ka takino e te timata i to tatou tiratiratu kia Iehova. Inara mei ta tatou ka kite i teia atikara, kare tatou e mataku. Ka tiaki a Iehova ia tatou​—te kite maira aia i to tatou manamanata, e kua papa ua aia i te tauturu ia tatou. Ka akara matatio tatou e rua akaraanga Pipiria tei akaari e “tei runga [to Iehova] mata i te aronga i mataku iaia.”​—E tatau ia Salamo 33:18-20.

3. Eaa tatou ka maromaroa ei?

³ Noatu e ngutuare maata tatou i roto i te akamorianga, ka maromaroa rai tatou i tetai taime. Ei akaraanga, penei ka maromaroa te au mapu me akamārama i to ratou irinakianga ki mua i te au oa apii i te apii e me aere ratou ki tetai putuputuanga ou. Penei te maromaroa ra tetai pae e te akakoromaki ra i te au manako taitaia, e te akakoromaki ra tatou i te reira ko tatou anake ua. Penei ka emiemi tatou i te tuatua atu ki tetai no te mea kare ratou e mārama i te reira. I tetai au taime, penei ka manako tatou me te manako maira tetai iaku. No te maromaroa​—noatu eaa  te tu—​ka akakeuia rai tatou kia manako puapinga kore e te apiapi. Kare rava a Iehova e inangaro ia tatou kia pera. Eaa ra?

4. Eaa te peroveta ko Elia i karanga ai: “Ko au anake nei tei toe”?

⁴ Akamanako i te akaraanga o te tangata tiratiratu ko Elia. Kua tia a Iezebela no te tamate iaia, no reira kua oro aia e 40 rā. (1 Ari. 19:1-9) I te openga, iaia i roto i te ana, kua kapiki aia kia Iehova: “Ko au [te peroveta] anake nei tei toe.” (1 Ari. 19:10) Te vaira tetai au peroveta i te enua; kua rauka ia Obadia i te akaora e 100 peroveta mei te rima kino o Iezebela. (1 Ari. 18:7, 13) Eaa a Elia i manako ei e koia anake ua te vaira? Kua manako ainei aia e kua mate te au peroveta ta Obadia i akaora? Penei kua manako aia koia ua tei toe e kare tetai pae i piri kiaia i te tavini ia Iehova i muri ake i te timata anga o Baala i te Maunga o Karamela? Penei kua manako aia e kare okotai i kite e kua tumatetengaia aia, e kare aia i manakoia mai ana? Kare teia tua i akamārama mai ana i te au manako pouroa o Elia. Inara kua papu ia tatou e kua mārama a Iehova i to Elia noo ua anga koia anake e kua kite Aia akapeea me tauturu iaia.

5. Akapeea a Iehova te akapumaana anga ia Elia e kare aia e noo ua ra koia anake?

⁵ Kua tauturu a Iehova ia Elia na roto i te au ravenga ke. Kua akamaroiroi aia ia Elia kia tuatua. E rua taime Tana patianga ia Elia: “Te akapeea ua na koe i ko na?” (1 Ari. 19:9, 13) Kua akarongo ua a Iehova ia Elia e akakite maira i tona au manako ngakau. Kua ariu atu a Iehova kia Elia na te akaari anga Iaia e tona mana ririnui. Kua akapumaana katoa aia ia Elia e te vaira te au taeake akamori e manganui. (1 Ari. 19:11, 12, 18) Kare e ekoko anga, kua maru mai a Elia te akakite anga aia i tona au manako ngakau kia Iehova e te akarongo anga i Tona manako. Kua oronga a Iehova i tetai au angaanga puapinga na Elia. Kua pati aia kiaia kia akatainu ia Hazaela ei ariki no Suria (Arama), ia Iehu ei ariki no Iseraela,  e Elisaia ei peroveta. (1 Ari. 19:15, 16) Na te oronga anga i teia au angaanga kia Elia, kua tauturu a Iehova iaia kia akamanako i te au mea meitaki. Kua oronga katoa te Atua i tetai tokorua nona, ko Elisaia. Akapeea e rauka ai ta Iehova tauturu me noo ua koe ko koe anake?

6. Eaa taau ka pure me noo ua koe ko koe anake? (Salamo 62:8)

⁶ Te pati maira a Iehova ia koe kia pure kiaia. Te kite maira aia i taau e akakoromaki ra, e te akapumaana maira aia e ka akarongo aia i taau pure i tetai ua atu taime. (1 Tesa. 5:17) Rekareka aia i te akarongo ki te aronga tei akamori iaia. (Mase. 15:8) Eaa taau ka pure me te noo ua ra koe ko koe anake? E uri i toou au manako ngakau kia Iehova, mei ia Elia rai. (E tatau ia Salamo 62:8.) E akakite kiaia, toou au manamanata e toou au manako ngakau. E pati tauturu kia Iehova kia rauka ia koe te akakoromaki. Ei akaraanga, me te noo ua ra koe ko anake ma te mataku i te tutu aere i te apii, e pati kia Iehova kia oronga mai i te tu ngakau toa kia kite koe i te tuatua. E pati katoa no te pakari e kia akamārama meitaki i toou irinakianga. (Luka 21:14, 15) Me te ngatā ra ia koe te akakoromaki i toou au manako tau kore, e pati tauturu kia Iehova kia tuatua ki tetai Kerititiano pakari no te reira. E pati tauturu kia Iehova kia rauka ia koe i te tuatua ki tei akarongo maira e kia mārama ia koe. E uri i toou au manako ngakau kia Iehova, akara akapeea aia me pau mai i taau au pure, e e āriki i te tauturu a tetai; kare i reira koe e maromaroa.

7. Eaa taau i apii mai mei te akaraanga o Mauricio?

⁷ Kua oronga mai a Iehova i tetai angaanga puapinga na tatou. Te kite maira aia e te āriki ra i taau angaanga i roto i te putuputuanga e te tutu aere. (Sala. 110:3) Akapeea teia angaanga te tauturu anga ia koe kia kore e maromaroa? Akamanako i te akaraanga o tetai taeake mapu ko Mauricio. * I muri poto ua ake i to Mauricio papetitoanga, kua akaruke tetai o tona au oa piri mou i te tuatua mou. “Te akaruke anga aia, kua taitaiaia au,” i na Mauricio ei. “Kua manako au me ka rauka iaku te akono i toku akatapuanga e kia noo tamou ki roto i to Iehova ngutuare tangata. Kua maromaroa au e kua manako kare e tangata e mārama i toku au manako.” Eaa tei tauturu ia Mauricio? “Kua akamaata atu au i taku tutu aere,” i nana ei. “Kua tauturu te reira iaku kia kore e manako ua iaku uaorai e te au manako tau kore. Kua rekareka mai au e kare au e maromaroa akaou ana, iaku e  tutu aere kapiti ra ki tetai pae. E tika, noatu e ngatā i te tutu aere kapiti ki te au taeake, te akamaroiroiia nei tatou kia piri atu ki te angaanga tata reta e te tutu aere na runga i te tereponi. Eaa atu tei tauturu ia Mauricio? Karanga aia: “Kua maroiroi katoa au i roto i te putuputuanga. Kua akapou au i toku taime te akapapa e te rave i te au ako rikiriki i roto i te putuputuanga. Kua akamaroiroi teia iaku e te āriki maira a Iehova e tetai ke iaku.”

8. Akapeea te au manamanata te takino anga ia tatou?

⁸ Kite tatou ka tupu te manamanata i teia tuatau openga. (2 Timo. 3:1) Inara i tetai taime ka poitirere tatou me tupu te reira. Penei ka ō tatou ki roto i te manamanata o te moni, te maki, e kua takake tetai tei akaperepereia. I tetai au taime, ka apiapiia tatou e kua taitaia e kua na roto i te au manamanata katoatoa i te taime okotai. Akamaara, te akara ua maira a Iehova, e ka tauturu aia ia tatou ma te akakoromaki i tetai ua atu manamanata.

9. E akakite mai i tetai au manamanata o Iobu.

⁹ Akamanako akapeea a Iehova te tauturu anga i te tangata tiratiratu ko Iobu. Kua akakoromaki aia i te au manamanata kino i roto i tetai tuatau poto. I tetai rā, kua kite a Iobu i te au mea kino tei tupu ki tana manu, kua mate tona au tavini, e tei kino roa atu, kua matemate tana au tamariki akaperepere. (Iobu 1:13-19) E oti, iaia e akakoromaki ra i tona au taitaia, kua tuia aia e te maki kino. (Iobu 2:7) Kua kino roa tona turanga e kua karanga a Iobu: “Kua iu au; auraka au kia ora roa atu.”​—Iobu 7:16.

10. Akapeea a Iehova te tauturu anga ia Iobu kia akakoromaki i tona au manamanata? (Akara i te tutu i te kapi mua.)

¹⁰ Te akara ua maira a Iehova ia Iobu. No ta Iehova akaperepere ia Iobu, kua tauturu Aia iaia kia akakoromaki i tona au manamanata. Kua tuatua a Iehova kia Iobu, te akakite anga i Tona tu pakari e te akono aroa i Tana au mea ora. Kua tuatua aia no te au tu manu umere e te ririnui. (Iobu 38:1, 2; 39:9, 13, 19, 27; 40:15; 41:1, 2) Kua taangaanga katoa a Iehova i te mapu tiratiratu ko Eliu ei akamaroiroi e te akapumaana ia Iobu. Kua akapumaana a Eliu iaia e ka akameitaki ua rai a Iehova i te aronga tei akamori Iaia. Kua akakeu katoa a Iehova ia Eliu kia ako ia Iobu ma te aroa. Kua tauturu a Eliu ia Iobu kia akamanako meitaki e e iti ua aia i te pae ia Iehova, tei anga i te ao rangi e pini ua ake. (Iobu 37:14) Kua oronga katoa a Iehova i tetai angaanga na Iobu; kia pure no tona au oa e toru tei ara. (Iobu 42:8-10) Akapeea a Iehova te tauturu anga ia tatou i teia tuatau me tupu te manamanata?

11. Eaa ta te Pipiria akapumaana anga me rokoia tatou e te manamanata?

¹¹ Kare a Iehova e tuatua ana kia tatou, mei tana i rave kia Iobu, inara e tuatua mai ana Aia na roto i Tana Tuatua, te Pipiria. (Roma 15:4) Te akapumaana maira aia ia tatou na roto i tetai manakonakoanga no te tuatau ki mua. Akamanako i tetai au manako no roto mai i te Pipiria ei akapumaana ia tatou. I roto i te au Tuatua Tapu, te akapumaana maira a Iehova e kare rava​—te au timata anga kino—​“e tika kia akataka ke ia tatou i te aroa o te Atua.” (Roma 8:38, 39) Te akapumaana katoa maira aia na roto i te pure  e “te vaitata mairā Iehova i te aronga i kapiki atu iaia.” (Sala. 145:18) Te akakite maira a Iehova e me irinaki tatou iaia, ka akakoromaki tatou i tetai ua atu manamanata e ka mataora tatou noatu me tamamaeia. (1 Kori. 10:13; Iako. 1:2, 12) Te akamaara katoa maira te Tuatua a te Atua e no teia taime ua teia manamanata me akaaiteia ki te tutaki mutu kore ka oronga mai aia. (2 Kori. 4:16-18) Te akapapu maira a Iehova e ka takore aia i tei akatupu i te manamanata katoatoa​—ko te Tiaporo ko Satani e te aronga tei aru i tona au tu kino. (Sala. 37:10) Kua tamou ngakau ainei koe i tetai au irava Pipiria ei tauturu ia koe kia akakoromaki i te au manamanata a te tuatau ki mua?

12. Eaa ta Iehova i tapapa mai ia tatou kia rave kia puapingaia tatou mei tana Tuatua?

¹² Te tapapa maira a Iehova kia akanoo tatou i tetai tuatau no te apii putuputu i te Pipiria e kia akamanako oonu i te reira. Me taangaanga tatou i te reira, ka matutu to tatou akarongo e ka piri vaitata tatou ki to tatou Metua i te rangi. Ka akamaroiroiia tatou kia akakoromaki i te au manamanata. Te oronga katoa maira a Iehova i tona vaerua tapu ki te aronga tei irinaki i tana Tuatua. E ka oronga mai te vaerua tapu i “te mana maata meitaki” kia akakoromaki tatou i tetai ua atu manamanata.​—2 Kori. 4:7-10.

13. Akapeea te kai pae vaerua ta “te tavini akono meitaki” e oronga maira ei tauturu ia tatou kia akakoromaki i te au manamanata?

¹³ Ma te tauturu a Iehova, te oronga maira “te tavini akono meitaki e te pakari” i tetai au atikara, te au vitio, e te akatangianga imene ei akamatutu i to tatou akarongo e kia vai matakite tatou i te pae vaerua. (Mata. 24:45) Ka anoanoia tatou kia taangaanga i teia au tauturu i te tuatau tau. Kua akameitaki tetai tuaine i Marike i teia au kai i te pae vaerua. Karanga aia: “I toku 40 mataiti i te tavini anga ia Iehova, kua timataia toku tu tiratiratu eia ua atu taime.” Kua ō aia ki roto i te au manamanata kino​—kua taiaia tona papa ruau e tetai tangata kona kava, kua tuia tona nga metua e te maki kino, e kua tuia aia e te maki cancer e rua taime. Eaa tei tauturu iaia kia akakoromaki? Akamārama aia: “Kua akono ua rai a Iehova iaku. Kua riro tana au kai pae vaerua na roto mai i te tavini akono meitaki  e te pakari ei tauturu iaku kia akakoromaki. No te reira, kua aite au mei ia Iobu, tei karanga: “E mate ua atu au, kare rai au e pa i te tuatua-tika naku ra.”​—Iobu 27:5.

14. Akapeea a Iehova me taangaanga i te au taeake kia tauturu ia tatou i te tuatau manamanata? (1 Tesalonia 4:9)

¹⁴ Kua tereni a Iehova i tona iti tangata kia aroa e kia akapumaana i tetai e tetai i te au tuatau taitaia. (2 Kori. 1:3, 4; e tatau ia 1 Tesalonia 4:9.) Na te aru anga ia Eliu, te anoano nei te au taeake e te au tuaine te tauturu ia tatou kia vai tiratiratu me rokoia tatou e te manamanata. (Anga. 14:22) Ei akaraanga, akamanako akapeea te putuputuanga a Diane te akamaroiroi anga iaia kia vai tiratiratu te rokoia anga tana tane e te maki kino. Karanga aia: “E ngatā tikai. Inara kua kite maua i to Iehova rima aroa i teia au marama ngata. Kua aere mai ta maua putuputuanga i te tauturu ia maua. Kua atoro mai ratou, kua taniuniu mai, e kua takave ia maua. Mei te mea kare au e akaoro ana i te motoka, kua akapapu te au taeake e te au tuaine kia tae au ki te uipaanga e te tutu aere.” Mei teaa atura te akameitakianga i teia ngutuare aroa i te pae vaerua!

15. Eaa tatou i papu ei e ka rauka ia tatou te akakoromaki i te manamanata?

¹⁵ Ka tupu tetai manamanata kia tatou katoatoa. Mei ta tatou i apii mai, kare tatou e na roto i te reira ko tatou anake ua. Mei tetai Metua aroa, te akara ua maira a Iehova ia tatou. Tei te pae aia ia tatou, ma te papa ua i te akarongo i ta tatou kapiki anga tauturu e te inangaro ra aia i te tauturu ia tatou. (Isa. 43:2) Papu ia tatou e ka rauka ia tatou te akakoromaki i te manamanata no te mea kua oronga ua mai aia i te au mea ravarai tei anoanoia. Kua oronga mai aia i te pure, te Pipiria, e te au kai pae vaerua, e te au taeake aroa ei tauturu.

16. Akapeea tatou me vai ua ki roto i te rima tauturu o Iehova?

¹⁶ Mei teaa atura to tatou akameitaki i te Metua i te rangi te tiaki maira ia tatou! “E rekareka oki to tatou ngakau iaia.” (Sala. 33.21) Ka akaari tatou kia Iehova e te āriki ra tatou i tona tu aroa na te taangaanga anga i tana au tauturu. Ka anoano katoaia tatou kia vai ua ki roto i tona rima tauturu. Mei tera te tu, me akarongo ua tatou ia Iehova e kia rave i te mea tau ki mua iaia, ka tiaki aia ia tatou e tuatau ua atu!​—1 Pete. 3:12.