1-2. No teaa ra a Iesu i manamanata ei?

I TONA rā openga ei tangata, kua manamanata a Iesu. Kare e roa atu ana, ka takinokinoia aia e ka tamateia i te rima o te aronga kino. Noatu e ka mate a Iesu, e maata atu tana e manata ra. Akaperepere tikai aia i tona Metua e kua inangaro i te akamareka iaia. Kua kite a Iesu, e me tiratiratu aia i raro ake i te au timata anga ngata, ka riro teia ei akatika anga i te ingoa o Iehova. Akaperepere katoa a Iesu i te tangata, e kua kite aia e tei runga to tatou manakonakoanga no te ora mutukore a te tuatau ki mua, te akaoti tiratiratu anga i tana angaanga i te enua nei.

² Noatu kua taitaia maata a Iesu, kua noo ‘au ua aia. Akakite aia ki tana au apotetoro: “Ko taku nei au taku e o atu no kotou.” (Ioa. 14:27) Kua rauka iaia te “au o te Atua,” te ngakau maru no tona pirianga akaperepere kia Iehova. Kua akatupu teia i te manako ngakau ‘au kia Iesu.—Phili. 4:6, 7.

3. Eaa ta tatou ka akara matatio i roto i teia atikara?

³ Kare rava tetai ia tatou e na roto i teia turanga mamae ta Iesu i akakoromaki, inara ka tupu rai te manamanata kia tatou me aru iaia. (Mata. 16:24, 25; Ioa. 15:20) Mei ia Iesu rai, ka na roto rai tatou i te au turanga ngata i tetai taime. Akapeea tatou me akaiti mai i te tu taitaia kia kore teia e riro ei akatere ia tatou e kia akangere i to tatou manako ‘au? Ka akara matatio tatou e toru ravenga ta Iesu i rave i te tuatau o tana angaanga orometua i te enua nei, e ka akapeea tatou me aru iaia.

4. Roto ia 1 Tesalonia 5:17, oronga mai i tetai au akaraanga, te akaari maira e kua pure putuputu a Iesu i te rā openga o tona oraanga i te enua nei.

⁴ E tatau ia 1 Tesalonia 5:17. Kua pure putuputu a Iesu i tona rā openga i te enua nei. I tona akaari anga ki tana au pipi, akapeea me akamaara i tona matenga, kua pure aia no te manga e te uaina. (1 Kori. 11:23-25) Mua ake ka akaruke ei i te ngai i raveia ai te Pasa, kua pure kapiti ratou ko tana au pipi. (Ioa. 17:1-26) I te taeanga ratou ki te Maunga o Oliveta i te po, kua pure putuputu akaou ratou. (Mata. 26:36-39, 42, 44) E kua pure a Iesu i roto i tana tuatua openga i mua ake ka mate ei aia. (Luka 23:46) Na roto i te pure, kua akaari a Iesu i tona irinaki ia Iehova no tana angaanga puapinga ka rave.

5. No teaa ra i parukaua ai te maroiroi o te au apotetoro?

⁵ Tetai tumu i rauka ai ia Iesu i te akakoromaki i tona timataanga, kua pure aia ki tona Metua. I tetai tua, kare te au apotetoro i maroiroi ana i te pure putuputu i taua po ra. Tei tupu mai, kua rokoia ratou e te timataanga e kua parukaua to ratou maroiroi. (Mata. 26:40, 41, 43, 45, 56) Me aro atu tatou i te au timataanga, ka vai tiratiratu tatou me aru tatou i te akaraanga o Iesu e kia “pure” ua rai. Eaa ta tatou ka pure?

6. Akapeea te akarongo me tauturu ia tatou kia noo ‘au ua?

⁶ Ka rauka ia tatou te pure kia Iehova kia “akamaata mai i to [tatou] akarongo.” (Luka 17:5; Ioa. 14:1) Ka anoano tatou i te akarongo, no te mea ka timata a Satani ia tatou me aru ia Iesu. (Luka 22:31) Akapeea te akarongo me tauturu ia tatou kia noo ‘au ua,  noatu me na roto tatou i te au manamanata tukeke? Me rave tatou i tei rauka ia tatou kia akakoromaki i te au timataanga, ka akakeu te akarongo ia tatou kia tuku i to tatou taitaia kia Iehova. No te mea ka irinaki tatou e e meitaki atu tana tiaki anga mai ia tatou, ka ‘au te manako e te ngakau.—1 Pete. 5:6, 7.

7. Eaa taau i apii mai mei ta Robert i tuatua?

⁷ Ka tauturu te pure ia tatou kia akatupu i te ngakau ‘au noatu te au timataanga ka na roto tatou. Akamanako ana i te akaraanga o Robert, e tangata pakari e te tiratiratu, e 80 tuma ona mataiti i teianei. Karanga aia: “Kua riro te ako ia Philipi 4:6, 7 ei tauturu iaku kia akakoromaki i te au timataanga e manganui i roto i toku oraanga. E maata toku manamanata i te pae o te moni. E kua akamutu au i te tavini ei tangata pakari.” Eaa tei tauturu ia Robert kia akatupu i te ngakau ‘au? “Ka pure viviki au iaku e kite ra i te taitaia,” i nana ei. “Irinaki au e ko te maata atu i taku pure akatenga e te putuputu, ko te maata ïa toku ‘au.”

8. Tei akakiteia ia Ioane 8:29, eaa tetai tumu ke i rauka ai ia Iesu te ngakau ‘au?

⁸ E tatau ia Ioane 8:29. Noatu kua takinokinoia aia, e ngakau ‘au ua to Iesu no te mea kua kite aia e te akamareka ra aia i tona Metua. Kua akarongo ua aia noatu e kua ngata te reira. Kua inangaro aia i tona Metua e kua akamou i tona oraanga i te tavini ia Iehova. I mua ake ka aere mai ei aia i te enua nei, kua angaanga kapiti ana raua ko tona  Metua. (Mase. 8:30) Iaia i te enua nei, kua apii aia ma te maroiroi i tetai ke no runga i tona Metua. (Mata. 6:9; Ioa. 5:17) Kua rekareka maata tikai a Iesu i teia angaanga.—Ioa. 4:34-36.

9. Akapeea ta tatou angaanga maroiroi i te tutu aere te tauturu anga ia tatou kia rauka te ngakau ‘au ua?

⁹ Ka rauka ia tatou te aru ia Iesu na te akarongo anga kia Iehova, ka “maata [atu] te rave anga i te angaanga a te Atu.” (1 Kori. 15:58) Me “akakite ua atura” tatou i te angaanga tutu aere, ka rauka i reira ia tatou te akakoromaki i to tatou au manamanata. (Anga. 18:5) Ei akaraanga, te aronga ta tatou e aravei ana i roto i te angaanga orometua, e maata atu to ratou manamanata. Inara, me apii ratou i te inangaro ia Iehova e te taangaanga i tana ako, ka meitaki mai to ratou oraanga e ka mataora ratou. Me kite tatou i teia i te au rā ravarai, papu e te akono maira a Iehova ia tatou. Tauturu teia ia tatou kia rauka te ngakau ‘au ua. Kua tupu teia ki tetai tuaine tei na roto ana i te au manako ngakau taitaia e te mamae. “Me rave maroiroi au i te angaanga tutu aere,” i nana ei, “kua kite au i te mataora e te manako papu. No te mea me aere au i te tutu aere, piri vaitata au kia Iehova.”

10. Eaa taau i apii mai mei ta Brenda i tuatua?

¹⁰ Akamanako katoa i te akaraanga o tetai tuaine ko Brenda. Kua tuʼia raua e tana tamaine e te maki multiple sclerosis. E noo ua ana a Brenda ki roto i te pereoo e kare ona maroiroi. Kua tutu aere aia mei tera are ki tera are me ka rauka iaia, inara e tutu aere ana aia na roto i te tata anga reta. Karanga aia: “I toku āriki anga ma te ngakau tae e kare toku maki e rapakauia, kua va ua au i te akamou ki runga i taku angaanga tutu aere. Tauturu taku angaanga tutu aere iaku kia akakoromaki i toku taitaia. Kua akakeu te reira iaku kia tauturu i te aronga taku ka aravei i roto i te ngai tutu aere. E kua akamaara mai teia iaku no te manakonakoanga a te tuatau ki mua.”

11-13. (a) Akapeea te au apotetoro e tetai ke atu i te akapapu anga e e oa piri ratou no Iesu? (e) Eaa ta tona au oa i akatupu kia Iesu?

¹¹ I te tuatau i to Iesu tutu aere anga ma te ngata, kua riro te au apotetoro tiratiratu ei oa piri tikai kia Iesu. E au akaraanga memeitaki ratou i roto i te maseli tei karanga: “Te vai nei ra te oa e piri meitaki tona i to te taeake.” (Mase. 18:24) Akaperepere tikai a Iesu i tona au oa. I te tuatau o tana angaanga tutu aere, kare okotai o tona au teina i irinaki ana iaia. (Ioa. 7:3-5) I tetai atianga, kua manako tona kopu tangata e kua auouoia aia. (Mare. 3:21) Ei akatuke anga, kua rauka ia Iesu i te karanga ki te au apotetoro tiratiratu i te po i mua ake i tona matenga: “Ko kotou ko te aronga e noo tamou i vaitata iaku i toku au timataanga nei.”—Luka 22:28.

¹² Kua poitirere putuputu a Iesu i te au apotetoro, inara kare aia i akamou ana ki runga i to ratou au tu apa, e kua kite i to ratou akarongo ki roto iaia. (Mata. 26:40; Mare. 10:13, 14; Ioa. 6:66-69) I te po openga kia ratou i mua ake ka tamateia ai aia, karanga a Iesu ki teia au tangata akarongo mou e: “Kua karanga ra au kia kotou e, e oa; kua akakite oki au kia kotou i te au tuatua ravarai taku i kite i taku Metua ra.” (Ioa. 15:15) Kare e ekoko, kua riro te au oa o Iesu ei akamaroiroianga kiaia. Kua riro te tauturu ta ratou i oronga kiaia i roto i te angaanga tutu aere, ei akarekareka ia Iesu ma te ngakau tae.—Luka 10:17, 21.

¹³ I te pae i te au apotetoro, e au oa ke atu to Iesu, te tane e te vaine, tei tauturu iaia i  roto i te angaanga tutu aere, e tetai atu angaanga ke. Kua āriki tetai pae iaia ki to ratou ngutuare, kia kaikai kapiti ratou. (Luka 10:38-42; Ioa. 12:1, 2) Kua aru tetai pae iaia e kua tuʼa kapiti i ta ratou apinga. (Luka 8:3) Kua riro a Iesu ei oa meitaki no te mea e oa meitaki aia kia ratou. Kua rave aia i tetai au mea meitaki no ratou e kare aia i anoano ia ratou kia pera katoa mai kiaia. E apa kore a Iesu, inara kua āriki ua aia i ta ratou tauturu nona. E kua tauturu ratou iaia kia noo ‘au ua.

14-15. Akapeea tetai e riro ei ei oa meitaki, e akapeea ratou me tauturu ia tatou?

¹⁴ Ka tauturu te au oa meitaki ia tatou kia vai tiratiratu kia Iehova. E riro ei, ei au oa meitaki kia akaari katoa tatou i te pirianga oa meitaki. (Mata. 7:12) Ei akaraanga, te akamaroiroi maira te Pipiria ia tatou kia taangaanga i to tatou taime e te maroiroi i te tauturu i tetai ke, i te aronga “i ngere” tikai rai. (Ephe. 4:28) Kua kite ainei koe i tetai tangata i roto i te putuputuanga te inangaro tauturu maira? Kia oko mai ainei i ta ratou kai no te mea kare te taeake e meitaki i te aere? Ka rauka ainei ia koe te akapapa i tetai kai na tetai ngutuare tangata kare e rava ana ta ratou moni? Me kua kite koe akapeea me taangaanga i ta tatou website jw.org^® e te JW Library^® app, ka rauka ainei ia koe te tauturu i tetai ke i roto i te putuputuanga kia kite i te reira? Me maroiroi tatou i te tauturu i tetai ke, maata atu to tatou mataora.—Anga. 20:35.

¹⁵ Ka tauturu to tatou au oa ia tatou me ō atu tatou ki roto i te manamanata e ka tauturu katoa ratou ia tatou kia ngakau ‘au ua.  Mei ia Eliu rai i akarongo i te tuatua anga a Iobu i tona timataanga, ka tauturu katoa to tatou au oa ia tatou na te akarongo marie anga, ia tatou e akakite ra i to tatou manako. (Iobu 32:4) Kare tatou e āriki ua i te au manako a to tatou au oa, mari ra ka āriki tatou i ta ratou tauturu no roto mai i te Pipiria. (Mase. 15:22) Mei te Ariki ko Davida rai tei āriki akaaka i te tauturu a tona au oa, ka āriki katoa tatou i te tauturu a to tatou au oa me pati mai ratou. (2 Samu. 17:27-29) E oa meitaki tikai ratou no ko mai ia Iehova.—Iako. 1:17.

16. Kia tau kia Philipi 4:6, 7, eaa te ravenga anake no tatou kia rauka te ‘au? Akamārama mai.

¹⁶ E tatau ia Philipi 4:6, 7. No teaa ra a Iehova i akakite mai ei kia tatou, kia āriki i te ‘au tana i oronga mai “i te Mesia nei ia Iesu”? No te mea ka rauka ia tatou te manako ngakau ‘au me mārama tatou e te irinaki i ta Iesu i akatupu ra. Ei akaraanga, na roto i te atinga oko o Iesu, kua akakoreia ta tatou ara. (1 Ioa. 2:12) E mea pumaana tikai te reira! Ei Ariki no te Patireia o te Atua, ka akakore a Iesu i te au angaanga kino ta Satani e tona akaaerenga i akatupu kia tatou. (Isa. 65:17; 1 Ioa. 3:8; Apo. 21:3, 4) Eaa te manakonakoanga ta tatou e tapapa atu nei! E noatu kua oronga mai a Iesu i ta tatou angaanga, ka ō mai rai te manamanata, tei ia tatou aia, e tauturu ia tatou i teia tuatau openga. (Mata. 28:19, 20) Oronga mai teia i te tu ngakau toa kia tatou! Ka anoano tatou i te tu maru, te manakonakoanga, e te ngakau toa ei tauturu ia tatou kia rauka te manako ngakau ‘au.

17. (a) Akapeea tetai Kerititiano me akatupu i te ngakau ‘au? (e) Tei taputouia ia Ioane 16:33, eaa te ka rauka ia tatou te rave?

¹⁷ Akapeea koe me noo ‘au ua me tupu te taitaia kia koe no te au timataanga ngata? Na te aru anga i te akaraanga o Iesu. Mea mua, pure tamou marie. Te rua, akarongo kia Iehova, e te tutu aere ma te maroiroi noatu me tupu te turanga ngata. E te toru, e kimi i te tauturu mei toou au taeake me na roto koe i te au timataanga. E na te ‘au o te Atua e akamaroiroi i toou ngakau e te manako. Mei ia Iesu rai, ka riro te re kia koe no tetai ua atu timataanga.—E tatau ia Ioane 16:33.