1. Tei akamāramaia mai ia Ephesia 6:10-13, eaa tetai tu aroa rava atu ta Iehova i akaari mai kia tatou? Akamārama mai.

TETAI tu aroa rava atu ta Iehova i akaari ki tona au tavini, na te tauturu anga ia tatou akapeea me patoi i to tatou au enemi. Ko Satani e te au temoni to tatou enemi maata. Kua akamatakite mai a Iehova ia tatou no te reira, e te oronga maira aia tei anoanoia ei patoi ia ratou. (E tatau ia Ephesia 6:10-13.) Me āriki tatou i ta Iehova tauturu e kia irinaki pu iaia, ka autu tatou i te patoi i te Tiaporo. Ka aite to tatou tu papu mei to te apotetoro rai, ko Paulo. Tata aia: “No tatou te Atua ra, ka tika iaai kia māro mai?”—Roma 8:31.

2. Eaa ta tatou ka uriuri i roto i teia atikara?

² Ei au Kerititiano mou, kare tatou e akara atu i ta Satani peu e tana au temoni. Ka akamou tatou i to tatou akarongo ki runga i te apii anga ia Iehova e te tavini atu iaia. (Sala. 25:5) Inara, ka anoanoia tatou kia kite i te au mataara ta Satani e rave ra. Eaa te tumu? Kia kore tatou e rauka aeaia e ïa. (2 Kori. 2:11) I roto i teia atikara, ka uriuri tatou i te mataara maata e tauta ana a Satani e tana au temoni i te akavare i te tangata. Ka uriuri katoa tatou akapeea me patoi atu ia ratou.

3-4. (a) Eaa te angaanga purepure? (e) Mei teaa te maata o te irinakianga ki roto i te angaanga purepure?

³ Tetai mataara maata ta Satani e tana au temoni e akavare ra i te tangata, na roto i te angaanga purepure. Te karanga ra te aronga angaanga purepure e te kite ra e te akatere ra ratou i te au mea, kare te tangata i kite tikai e kare katoa i kite i te akatere. Ei akaraanga, te karanga ra tetai pae e kua kite ratou  i te tuatau ki mua na te taangaanga anga i te tauraatua me kore te akara etu. Tetai pae te akameamea ra e te tuatua ra ratou ki te aronga tei mate. Te rave ra tetai pae i te angaanga taunga me kore manamana, e penei ka tauta ratou i te tuku i te manamana ki runga i tetai tangata. *

⁴ Mei teaa te maata o te irinakianga ki roto i te angaanga purepure? Kua raveia tetai tare anga i te 18 enua i te tua Apatonga o Marike e te Caribbean, kua kiteaia mai e tai toru o te tangata te irinaki ra i te angaanga manamana, te peu a te vaine tautau, te akarakara, e te irinaki katoa ra e ka rauka i te tangata i te karangaranga atu ki te au vaerua. Kua rave akaouia tetai tare anga i te 18 enua i Aperika. E tere atu i te apa o te tangata tei tareia, te irinaki ra ratou i te angaanga vaine tautau. Noatu ta tatou ngai e noo ra, kia paruru tatou ia tatou uaorai mei te angaanga purepure. Mei tera te tu, te kimi ra a Satani i te akavare i “te ao katoatoa nei.”—Apo. 12:9.

5. Eaa to Iehova manako no runga i te angaanga purepure?

⁵ E “Atua tuatua-mou” a Iehova. (Sala. 31:5) Eaa i reira tona manako no te angaanga purepure? Te makitakita ra aia i te reira! Akakite a Iehova ki te ngati Iseraela: “Auraka rava tetai e kitea i rotopu ia kotou e apai i tana tamaiti e tana tamaine kia na roto i te ai, auraka ei tauraatua, e te akara tumurangi, e te purepure, e te akarakara, e te kebere, e tei kimi i te vaerua kino, e te peu purepure, e tei ui ki tei mate ra. Ko te aronga katoa oki i rave i te reira au peu e aronga viivii ïa na Iehova.” (Deu. 18:10-12) Kare te au Kerititiano i raro ake i te Ture ta Iehova i oronga ki te ngati Iseraela. Inara, kua kite tatou e kare tona manako i taui no runga i te angaanga purepure.—Mala. 3:6.

6. (a) Akapeea a Satani me taangaanga i te angaanga purepure ei takinokino i te tangata? (e) Kia tau kia Koheleta 9:5, eaa te tuatua tika no runga i te turanga o te aronga tei mate?

⁶ Te akamatakite maira a Iehova kia patoi tatou i te angaanga purepure, no te mea kua kite aia e te taangaanga ra a Satani i te reira ei takinokino i te tangata. Te taangaanga katoa ra a Satani i te angaanga purepure ei akamaata atu i te pikikaa—pera katoa te pikikaa, e te ora ra tei mate i tetai ngai ke. (E tatau ia Koheleta 9:5.) Te taangaanga katoa ra a Satani i te angaanga purepure kia tamataku i te tangata e kia akaariu ke ia ratou mei ia Iehova. Tona akakoroanga, kia irinaki te tangata tei taangaanga i te angaanga purepure kia irinaki ki roto i te au vaerua kikino, kare ia Iehova.

7. Eaa ta Iehova e akakite maira kia tatou?

⁷ Mei tei akakiteia atu, te akakite maira a Iehova i ta tatou ka anoanoia kia kite, kia kore tatou e akavareia e Satani e tana au temoni. Ka akamanako ana i tetai au takainga tau e rauka ai i te patoi atu ia Satani e tana au temoni.

8. (a) Eaa te mataara meitaki roa atu ka rauka ia tatou i te patoi i te au vaerua kikino? (e) Akapeea ra a Salamo 146:4 te akakite mai anga i te tika no runga i ta Satani pikikaa no te mate?

⁸ E tatau i te Tuatua a te Atua e e akamanako oonu i te reira. Ko te mataara meitaki roa atu teia, no te patoi i te pikikaa a te au vaerua kikino. Ka aite te Tuatua a te Atua, mei tetai koke koi te ka takore i te au pikikaa a Satani. (Ephe. 6:17) Ei akaraanga, ka akakite mai te Tuatua a te Atua i te tika no runga i te pikikaa  e te karangaranga ra te aronga mate ki te aronga ora. (E tatau ia Salamo 146:4.) Te akamaara katoa maira te reira e ko Iehova anake tei kite i te tuatau ki mua. (Isa. 45:21; 46:10) Me tatau putuputu tatou i te Tuatua a te Atua ma te akamanako oonu i te reira, ka papa tatou i te patoi e te makitakita atu i te au pikikaa ta te au vaerua kikino ka inangaro ia tatou kia irinaki.

9. Eaa te au tu peu purepure ta tatou ka kopae?

⁹ E patoi i te au tu angaanga purepure ravarai. Ei au Kerititiano mou, kare rava tatou e rave i tetai ua atu angaanga purepure. Ei akaraanga, kare tatou e atoro i tetai ua atu taunga e kare e karangaranga atu ki te aronga tei mate. Mei tei uriuriia i te atikara i mua ake, kare tatou e aru i te au peu no te tanumanga, tei akatumuia ki runga i te irinakianga e te ora ra te aronga tei mate i te ngai ke. E kare tatou e akara etu me kore e kimi manuia na te tauta anga kia kite i te tuatau ki mua. (Isa. 8:19) Kua kite tatou e e kino tikai te reira au peu e ka akapiri atu te reira ia tatou kia Satani e tana au temoni.

10-11. (a) Eaa ta tetai pae i te anere mataiti mua i rave te apii anga ratou i te tuatua mou? (e) Kia tau kia 1 Korinetia 10:21, eaa ra tatou ka aru ei i te akaraanga o te au Kerititiano mua, e akapeea tatou me rave i te reira?

¹⁰ E takore i te au apinga manamana e te purepure. Kua rave tetai aronga tei noo ana i Ephesia i te anere mataiti mua, i te angaanga purepure. Te apii anga ratou i te tuatua mou, kua kopae ratou i te reira. “E manganui oki te aronga peu tu ke i apai mai i ta ratou au buka, kua tutungi iora i te ai ki mua i te aroaro o te tangata ravarai.” (Anga. 19:19) Kua patoi pakari teia aronga i te au vaerua kikino. E ngauru ua atu tausani moni tei pou no teia au puka purepure. Inara kare ratou i akaputu ana i teia au puka e kua oko atu ki tetai ke, mari ra kua tutungi ratou i te reira. Kua inangaro tikai ratou i te akamareka ia Iehova, e kare i kaimoumou i teia au puka oko maata.

¹¹ Akapeea tatou me aru i te akaraanga o te reira au Kerititiano i te anere mataiti mua?  E mea meitaki i te takore atu i tetai ua atu apinga purepure. Te ei, te apinga akamanea, e tetai ua atu apinga e aaoia ra, me kore te akariro ra te tangata ei paruru ia ratou mei te au vaerua kikino.—E tatau ia 1 Korinetia 10:21.

12. Eaa te au uianga ka ui tatou no runga i ta tatou angaanga tarekareka?

¹² E akara matatio i taau angaanga tarekareka. E ui kia koe uaorai: ‘Te tatau ra ainei au i te au puka, te au makatini, me kore te au atikara i runga i te Initaneti no runga i te au peu purepure? Akapeea te au imene taku e akarongo ana, te au teata e te au teata tivi, me kore te au vitio kangakanga? E angaanga purepure ainei tetai i roto i taku au tarekareka anga? E vampire, e tupapaku, e e au apinga tuke ua ake ainei tetai i roto? Te akaari maira ainei i te au tuku anga manamana, me kore te au taumaa ei apinga kangakanga ua?’ E tika, kare te katoa anga o te au tarekareka anga maani ua e te ō maira te angaanga purepure. Me akara matatio koe i taau tarekareka anga, e iki meitaki kia akaatea mai mei tetai ua atu apinga te makitakita ra a Iehova. Ka rave meitaki tatou “eiaa ei apa i [te] akava-ngakau i te Atua.”—Anga. 24:16. *

13. Eaa ta tatou ka kopae i te rave?

¹³ Auraka e akakite aere i te au tua no runga i te temoni. Ka inangaro tatou i te aru i te akaraanga o Iesu. (1 Pete. 2:21) I mua ake ka aere mai ei aia ki te enua nei, i noo ana a Iesu i te rangi, e kua kite rai aia ia Satani e tana au temoni. Inara kare aia i akakite i te au tua no runga i te au vaerua kikino e ta ratou i rave. Kua inangaro a Iesu kia riro aia ei kite no Iehova, kare no Satani. Ka aru tatou ia Iesu auraka e akakite aere i te au tua no runga i te  temoni. Mari ra, ka akaari tatou na roto i ta tatou au tuatua “te pupu nei [te] ngakau i te tuatua meitaki,” koia oki, te tuatua mou.—Sala. 45:1.

14-15. (a) Eaa tatou ka kore ei e mataku i te au vaerua kikino? (e) Eaa te au akakite anga tika te vaira e te paruru ra a Iehova i tona iti tangata i teia tuatau?

¹⁴ Auraka e mataku i te au vaerua kikino. Ka tupu te au mea kino kia tatou i teianei ao. Ka tupu te au tumatetenga, te maki, me kore ka tupu viviki ua te mate. Inara auraka tatou e manako e na te au vaerua kitea koreia e akatupu ana i te reira. Te akataka maira te Pipiria “e tuatau ra, e te manuia ua, to te tangata katoa ra.” (Kohe. 9:11) Kua akaari mai a Iehova e e ririnui maata atu aia i te au temoni. Ei akaraanga, kare te Atua i akatika ana ia Satani kia tamate ia Iobu. (Iobu 2:6) I to Mose tuatau, kua akaari a Iehova e e ririnui atu aia i te au taunga manamana e te purepure i Aiphiti. (Exo. 8:18; 9:11) No tei akamanaia e Iehova, kua akaari a Iesu kakā ra i tona mana ririnui ki rungao ia Satani e te au temoni, i te uri anga mai ia ratou mei te rangi ki te enua nei. A te tuatau ki mua, ka uriia ratou ki roto i te vaarua takere kore, te ngai kare ratou e takinokino akaou i te tangata.—Apo. 12:9; 20:2, 3.

¹⁵ Te kite ra tatou i te tika taka meitaki e te paruru ra a Iehova i tona iti tangata i teia tuatau. Akamanako ana: Te tutu aere ra e te apii ra tatou i te tuatua mou ki te au pa enua. (Mata. 28:19, 20) Tei tupu, te akakite ra tatou e tarevake te au angaanga kikino a te Tiaporo. Papu, me ka rauka ia Satani, ka arai aia i ta tatou angaanga katoatoa, inara kare e rauka iaia. No reira kare tatou e anoanoia kia mataku i te au vaerua kikino. Kua kite tatou e “te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.” (2 Para. 16:9) Me vai tiratiratu tatou kia Iehova, kare e rauka i te au temoni i te takinokino ia tatou.

16-17. Oronga mai i te akaraanga ngakau toa kia patoi i te au vaerua kikino?

¹⁶ Ka anoanoia te tu ngakau toa no te patoi i te au vaerua kikino, me patoi tikai mai te au oa me kore te au kopu tangata ia tatou. Inara te akameitaki ra a Iehova i te aronga tei akaari  i teia tu ngakau toa. Akamanako ana i te akaraanga o tetai tuaine, ko Erica tona ingoa, e noo ana aia ki Ghana. E 21 o Erica mataiti te āriki anga aia i tetai apii Pipiria. Ei tamaine na tetai orometua angaanga purepure, kua anoanoia aia kia aru i tetai peu purepure kia kai i te kiko manu tei orongaia ei atinga ki te au atua o tona papa. Te patoi anga a Erica, kua akakite te ngutuare tangata o Erica e te akakino ra aia i to ratou atua. Kua irinaki te ngutuare tangata e ka akautunga te au atua ia ratou ki te au maki manako e te pae kopapa.

¹⁷ Kua tauta te ngutuare tangata o Erica i te māro iaia kia aru i te reira peu, inara kare aia i tuku ana i te ‘au, noatu e ka anoanoia aia kia akaruke i tona kainga. Kua apai tetai Au Kite iaia kia noo ki ko ia ratou. Mei tera te tu, kua akameitaki a Iehova ia Erica ma te ngutuare ou—e au taeake irinaki tei riro mai ei au taeake e te au tuaine nona. (Mare. 10:29, 30) Noatu e kua tuaru tona kopu tangata iaia, e kua tutungi i tona au apinga, kua vai tiratiratu ua a Erica kia Iehova, e kua papetitoia, e e painia tamou aia i teianei. Kare aia e mataku ana i te au temoni. Kua karanga a Erica no runga i tona ngutuare tangata e: “Te pure nei au i te au rā e kia kite toku ngutuare tangata i te akameitakianga a Iehova e kia rauka te tu rangatira no te tavini i te Atua aroa.”

18. Eaa te au akameitakianga ta tatou ka rauka na te irinakianga ia Iehova?

¹⁸ Kare te katoa anga ia tatou e aro atu i tetai tu mei teia, te ka timata i to tatou akarongo. Inara, te anoano pouroaia ra tatou kia patoi i te au vaerua kikino e kia irinaki ia Iehova. Me pera tatou, ka rauka ia tatou te au akameitakianga e manganui, e kare tatou e akavareia e te au pikikaa a Satani. Pera katoa, kare tatou e mataku i te au temoni. Tei maata roa atu, ka ketaketa atu to tatou pirianga taeake kia Iehova. “E tenana e kauraro atu kotou i te Atua” i tata ei te pipi ko Iakobo, “e patoi atu i te diabolo, e nana e rere ke atu. E akavaitata atu ki te Atua, e nana e akavaitata mai kia kotou na.”—Iako. 4:7, 8.