1. Eaa ta te au tavini o te Atua ka inangaro i te rave, e no teaa ra? (Akara i te tutu i te kapi mua.)

KUA akaue a Iesu i tana au pipi kia “aere . . . e akariro i to te pa enua katoa ei pipi.” (Mata. 28:19) Inangaro te au tavini tiratiratu o te Atua i te apii akapeea ratou me “rave akaope takiri” i teia angaanga tutu aere tei orongaia kia ratou. (2 Timo. 4:5) Mei tera te tu, e angaanga puapinga maata teia, ka pauna rai te taime e e angaanga akarapurapuia teia. Inara, ka ngata rai me ka inangaro tatou i te akapou maata i te taime ki roto i te angaanga tutu aere.

2. Eaa te au turanga ngata, ta tatou ka aro atu me rave akaope takiri i ta tatou angaanga tutu aere?

² Te vaira te au angaanga puapinga te ka anoanoia to tatou taime e te maroiroi. Penei ka anoanoia tatou kia angaanga maata, kia rauka te au apinga tei anoanoia no te oraanga. Penei ka ngata rai te akono i te au apainga i te ngutuare, te maki, te taitaia, me kore te mamae o te tu ruaine. Akapeea tatou me rave akaope takiri i ta tatou angaanga tutu aere, ia tatou e akakoromaki ra i te au turanga ngata?

3. Eaa te manako o ta Iesu tuatua ia Mataio 13:23?

³ Me kotingaia to tatou taime no te tavini ia Iehova, auraka tatou e taitaia. Kua kite a Iesu e kare e aiteite ana ta tatou tataki tai ka rave, i te uua maata mai i te angaanga Patireia. (E tatau ia Mataio 13:23.) Te akaperepere ra a Iehova i ta tatou angaanga e rave ra tatou nona, e te rave ra tatou ma te meitaki. (Ebe. 6:10-12) I tetai tua, ka manako tatou e rauka ia tatou i te akamaata atu i ta tatou ka rave. I roto i teia atikara, ka akara matatio tatou akapeea me tuku i te angaanga tutu aere  ki te ngai mua i to tatou oraanga, te akamāmā anga i to tatou oraanga e te akamaata atu i to tatou tu karape no te tutu aere e te apii. Te mea mua, eaa te aiteanga kia rave akaope takiri i ta tatou angaanga tutu aere?

4. Eaa te aiteanga kia rave akaope takiri i ta tatou angaanga tutu aere?

⁴ Kia rave akaope takiri tatou i ta tatou angaanga tutu aere, ka maroiroi tatou i te rave i ta tatou angaanga tutu aere e te apii i te tangata. Inara e maata te ō maira i te akapou ua i to tatou taime i te tutu aere. E mea puapinga kia Iehova te tumu i rave ei tatou i teia. No to tatou inangaro ia Iehova e to tatou tangata tupu, ka maroiroi tatou ma te ngakau tae i te rave i ta tatou angaanga Kerititiano. * (Mare. 12:30, 31; Kolo. 3:23) Kia tavini i te Atua ma te ngakau tae, tona aiteanga, kia oronga ia tatou uaorai e kia taangaanga i to tatou maroiroi ki roto i tana angaanga. Me āriki tatou i te akameitakianga no te rave i te angaanga tutu aere, ka tauta tatou i te oronga i te nuti meitaki ki te tangata e manganui.

5-6. Akataka mai akapeea tetai tangata kua kotingaia tona taime me tuku i te angaanga tutu aere ei mea puapinga rava i tona oraanga.

⁵ Akamanako ana i tetai mapu tane tei rekareka ana i te akatangi kita. Rekareka ua aia i te akatangi imene. Kare i roa, kua rauka tana ngai angaanga no te akatangi kita ki roto i tetai café i te openga epetoma. Inara, kare e rava ana tana moni e koi ra. No reira e angaanga ana aia ei cashier ki roto i te are toa oko kai, mei te Monite ki te Varaire. Noatu e e akapou ana aia i te maata anga o tona taime ki roto i te are toa, te maaraara ua ra aia i tana angaanga akatangi imene. Te anoano ra aia i te akameitaki atu i tona tu karape e kia riro mai aia ei tangata akatangi imene. Noatu ra, e rekareka ana aia i te akatangi imene, noatu no tetai tuatau poto.

⁶ Pera katoa, penei ka kotingaia toou taime no te angaanga tutu aere. Inara, ko te reira tikai taau ka inangaro i te rave. Ka tauta koe i te akameitaki atu i toou tu karape no te itae i te ngakau o te tangata ki te nuti meitaki. No te maata o te angaanga taau e rave ra, penei ka  manako koe, akapeea ra koe me tuku i te angaanga tutu aere e ko te mea puapinga rava.

7-8. Akapeea tatou me aru i to Iesu tu no te angaanga tutu aere?

⁷ Kua akanoo a Iesu i te akaraanga puapinga no te angaanga tutu aere. Kua akariro aia i te tuatua ua anga no runga i te Patireia o te Atua, ei mea puapinga rava atu i tona oraanga. (Ioa. 4:34, 35) Kua aaere aia e anere ua atu maire no te tutu aere ki te tangata e manganui. Kua tuatua ua aia i te ngai tangata e ki te kainga o te tangata. Kua rave ua a Iesu i te angaanga tutu aere.

⁸ Ka rauka ia tatou i te aru i te akaraanga o Karaiti, na te akakite anga i te nuti meitaki ki tetai tangata, i tetai ua atu taime e tetai ua atu ngai. Te puareinga ua ra tatou i te akaatinga ia tatou uaorai no te rave i te angaanga evangeria. (Mare. 6:31-34; 1 Pete. 2:21) Ka tavini tetai pae i roto i te putuputuanga ei painia takake, painia tamou, me kore painia tauturu. Kua apii tetai pae i te reo ke me kore kua neke ki te ngai te anoanoia ra te aronga tutu aere. Inara, te raveia ra te maata anga o te angaanga evangeria e te au papuritia tamou o te Patireia. Noatu eaa te tu, kare a Iehova e pati maata mai i te ka kore e rauka ia tatou. Te inangaro ra aia ia tatou katoatoa kia rekareka i ta tatou angaanga tapu, me tutu aere i “te tuatua meitaki kakā a te Atua mataora ra.”—1 Timo. 1:11, NW; Deu. 30:11.

9. (a) Akapeea a Paulo te tuku anga i te angaanga tutu aere ei mea puapinga rava noatu e kua anoanoia aia kia angaanga? (e) Eaa ta Angaanga 28:16, 30, 31 e akaari maira no to Paulo tu i tana angaanga tutu aere?

⁹ Kua akanoo te apotetoro ko Paulo i te akaraanga meitaki, te akariro anga i te angaanga tutu aere ei mea puapinga rava i tona oraanga. Iaia i Korinetia i te rua o tona tere mitinari, e iti ua tana moni, e kua anoanoia aia kia maani i te au puakapa. Inara, kare a Paulo i akariro ana i te angaanga maani puakapa ei mea puapinga rava i tona oraanga. Kua rave aia i teia ei turu iaia uaorai i roto i te angaanga tutu aere kia rauka iaia i te tutu aere i te nuti meitaki ki to Korinetia “auraka ei oko.” (1 Kori. 9:18) Noatu e kua anoanoia a Paulo kia angaanga i te maani are kakau, kua aruaru rai aia i te tuku i te angaanga tutu aere e ko te mea puapinga roa atu, e kua tutu aere aia i te au Tapati ravarai. Muri mai te meitaki anga tona turanga, kua rauka ia Paulo te rave maata i tana angaanga tutu aere. Kua “riro rava atura te vaerua o Paulo, kua akakite ua atura ki te ngati Iuda e, ko Iesu te Mesia.” (Anga. 18:3-5; 2 Kori. 11:9) I muri mai, i tona tapekaia anga i Roma no tetai rua mataiti, kua tutu aere a Paulo ki te au manuiri e kua tata i te au reta. (E tatau ia Angaanga 28:16, 30, 31.) Kare rava a Paulo i tuku ana i tetai apinga kia tamanamanata i tana angaanga tutu aere. Tata aia: “Tei ia matou mai nei teianei taoonga, . . . kare atura matou i roiroi.” (2 Kori. 4:1) Mei ia Paulo rai, noatu e ka rave tatou i teia angaanga, ka rauka rai ia tatou i te akariro i te angaanga Patireia ei angaanga puapinga rava i to tatou oraanga.

10-11. Akapeea tatou me rave akaope takiri i ta tatou angaanga tutu aere me e tu apikepike to tatou?

¹⁰ Me kua kotingaia ta tatou angaanga tutu aere, mei tera are ki tera are no te oraanga ruaine, me kore no te apikepike maki, ka rekareka ua tatou i te rave i te au angaanga tukeke no te tutu aere. Kua tutu aere te aronga evangeria o te anere mataiti mua ki te au ngai tangata. Kua tuatua ua ratou i te tuatua mou—mei tera are ki tera are, i te ngai tangata, i tetai ua atu taime—ki te au tangata ta ratou “i aravei atu.” (Anga. 17:17; 20:20) Me kare tatou e tau i te aere, penei ka noonoo tatou i te ngai tangata e  ka tutu aere atu kia ratou. Me kore, ka tuatua i tetai ua atu taime, te tata reta, me kore te tutu aere na runga i te tereponi. E manganui te au papuritia mei teia te tu, te kite ra i te rekareka i roto i teia angaanga tutu aere tuke tuke.

¹¹ Noatu te tu apikepike o te kopapa, ka rauka rai ia koe i te rave akaope takiri i taau angaanga tutu aere. E akamanako akaou ana i te akaraanga o te apotetoro ko Paulo. Karanga aia: “E tika iaku te au mea ravarai nei i te Mesia, ko tei akamaroiroi mai iaku nei.” (Phili. 4:13) Kua anoano a Paulo i te reira maroiroi, te rokoia anga aia e te maki, i tona tere mitinari. Kua akamārama aia ki to Galatia: “Ma te paruparu o te kopapa nei i akakite atu ei au kia kotou i te evangelia i muatangana.” (Gala. 4:13) Pera katoa, penei ka riro toou tu apikepike o te kopapa ei au atianga no te tutu aere i te nuti meitaki ki tetai ke, mei te taote, te neti, e te aronga akono i te aronga maki. Tei te ngai angaanga teia au tangata, me atoro te au papuritia i to ratou kainga.

12. Eaa te aiteanga kia “meitaki” toou mata?

¹² Karanga a Iesu: “Ko te mata to te kopapa nei mārama, te meitaki ra to mata, kua mārama ïa to kopapa katoa.” (Mata. 6:22) Eaa te aiteanga o tana tuatua? Te aiteanga, te anoanoia ra tatou kia akamāmā mai i to tatou oraanga me kore kia akamou ki runga i te akakoroanga, me kore te manako okotai, auraka e apiapi e e akavareia. Kua akamou a Iesu i te akaraanga no te angaanga tutu aere, e kua apii i tana au pipi kia tavini ia Iehova e Tona Patireia. Ka aru tatou ia Iesu na te rave anga i te angaanga Kerititiano, ‘e na mua ra i te kimi i te basileia o te Atua, e te tuatua-tika nana ra.’—Mata. 6:33.

13. Eaa te ka tauturu ia tatou kia rave i ta tatou angaanga Kerititiano?

 ¹³ Tetai mataara kia rave ua i ta tatou angaanga tutu aere, me akamāmā tatou i te oraanga e kia akapou maata i te taime no te tauturu i tetai ke kia kite e kia inangaro ia Iehova. * Ei akaraanga, ka rauka ainei ia tatou i te akaiti mai i te ora angaanga no te akapou maata atu i te taime no te angaanga tutu aere i te epetoma? Ka rauka ainei ia tatou i te akaiti mai i ta tatou angaanga tarekareka, penei te pou ra te taime ki reira?

14. Eaa te au akatano anga ta tetai tokorua i rave kia maata atu to raua taime no te angaanga tutu aere?

¹⁴ Teia ta tetai tangata pakari, ko Elias, e tana vaine i rave. Akamārama aia: “Kare e rauka ia maua i te painia i te reira taime, inara kua anoanoia maua kia akamata. No reira kua rave maua i te au takainga rikiriki no te akamaata atu i to maua taime i roto i te angaanga tutu aere. Ei akaraanga, kua akaiti maua i ta maua apinga ka oko, kua akaiti mai i te angaanga tarekareka, e kua pati i to maua pu angaanga kia akaiti mai i to maua ora angaanga. Tei tupu, kua rauka ia maua i te piri ki roto i te angaanga tutu aere i te aiai, te rave maata atu i te apii Pipiria, pera katoa kia piri ki roto i te angaanga tutu aere o te epetoma e rua taime i te marama. Mei teaa atura te rekareka!”

15-16. Kia tau kia 1 Timoteo 4:13, 15, akapeea tatou me karape ei aronga kave evangeria? (Akara katoa i te pia “ Au Akakoroanga no te Rave Akaope Takiri i Taku Angaanga Tutu Aere.”)

¹⁵ Tetai akaou mataara no te rave akaope takiri i ta tatou angaanga tutu aere, koia oki kia karape atu tatou i te tutu aere. Te anoanoia ra te tangata i te au ngai angaanga karape kia apiiia e kia tereniia kia maata atu to ratou  kite e te tu karape. E tika katoa teia, no te aronga tutu aere i te Patireia. Te anoanoia ra tatou kia apii e kia karape atu i roto i te angaanga tutu aere.—Mase. 1:5; e tatau ia 1 Timoteo 4:13, 15.

¹⁶ Akapeea ra tatou me tere ki mua i ta tatou angaanga tutu aere? Na te akarongo meitaki anga i te au ikuiku anga i ko i te Uipaanga Oraanga Kerititiano e te Angaanga Orometua. Te oronga maira teia uipaanga i te terenianga puapinga ei tauturu ia tatou kia karape atu i ta tatou angaanga tutu aere. Ei akaraanga, me ako te tiamana i te aronga tei oronga i ta ratou ako, ka rauka ia tatou i te apii mai i te reira ei akamako rai i ta tatou angaanga tutu aere. Ka taangaanga tatou i te reira au manako me tutu aere tatou i te nuti meitaki ki te tangata. Ka pati tauturu tatou ki te akaaere tutu aere, me kore te angaanga kapiti kiaia e ki tetai papuritia tukatau, tetai painia, e te akaaere kotinga. Ia tatou e karape maira i te taangaanga i te au Apinga Apii, ka rekareka maata atu tatou i ta tatou angaanga tutu aere e te apii aere.

17. Eaa taau ka kite me rave akaope takiri koe i taau angaanga tutu aere?

¹⁷ Mei teaa atura te akameitakianga e kua akatika a Iehova ia tatou ei au “oa rave angaanga” nona! (1 Kori. 3:9) Me riro “te au mea e maata ua atu te meitaki” ei mea puapinga rava ma te rave i te angaanga Kerititiano, ka “akamori [koe] ia Iehova ma te pereperekavana.” (Phili. 1:10; Sala. 100:2) Ei au orometua no te Atua, ka papu ia koe e ka oronga mai aia i te maroiroi ei rave akaope takiri i taau angaanga tutu aere, noatu te au akaaoanga me kore te au kotinga. (2 Kori. 4:1, 7; 6:4) Noatu e ka rauka tetai tuatau poto me kore tuatau maata no te tutu aere, ‘e rekareka anga’ toou me rave koe i taau angaanga tutu aere ma te ngakau tae. (Gala. 6:4) Me rave akaope takiri koe i taau angaanga tutu aere, te inangaro ra koe ia Iehova e toou tangata tupu. “Tei te akapera oki e oraʼi koe, e te aronga katoa e akarongo mai ia koe ra.”—1 Timo. 4:16.