MEA matauia i to Paulo tuatau no te paî i te tari apinga, kare i te tangata. Me ka inangaro tetai tangata i te aere ki tetai enua, ka pati aia ki tetai tangata me e paî tari apinga (tari kako) tetai ka aere ki te reira enua, ka aru aia me āriki mai ratou i tetai tangata ki runga. (Anga. 21:2, 3) Noatu me kare te reira paî e aere tika ki te enua e inangaro ra aia i te tapae, ka eke aia ki raro i te ngai tapae anga paî, e ka akara akaou i tetai paî te ka apai atu iaia ki te ngai e inangaro ra aia i te aere.—Anga. 27:1-6.

Kare te paî e teretere putuputu ana na te moana, no reira kare i papu me e paî tetai me kare ra. Tetai taime kare te au mataro e teretere ana na te moana, no te kinokino i te reva e no to ratou irinaki i te angaanga purepure, mei tetai manu e aue ra i runga i te taura o te paî, me kare me kite atu ratou i tetai paî ngaangaa kua iri ki uta i te enua. Tetai rai, ka aru te au mataro i te matangi meitaki no te teretere, me tano ana, ka teretere ratou. Me kite tetai tangata teretere i te paî te ka apai iaia, ka tiaki aia e tana pute apinga i ko i te ava, me aere te kapiki anga e ka vaitata tetai paî i te teretere ka kake atu aia ki runga.

“Kua maani te oire o Roma i te au ngai tapae anga paî no te aronga ka teretere na te moana, kua tauturu teia i te aronga ka teretere,” i karanga ai a Lionel Casson e tangata tata tuatua enua. “Tetai ngai tapae anga tei Tiber. I roto i teia oire ko Ostia, ka kitea te au opati no te au paî tuke tuke e teretere ra na reira. Tetai i teia au opati no te au paî tari apinga tuke tuke, e tāpu ana na konei: tetai paî no Narbonne [ko Varani i teianei], e tetai paî no Carthage [ko Tunisia i teianei], . . . e te vai atura. Me inangaro tetai tangata i te aere na runga i te paî, ka tapae aia ki teia au opati noatu te oire, ka akara i te au paî ka ano ki te ngai e inangaro ra aia i te aere atu ki reira.”

Ka rava te taime me teretere tetai na te moana, inara ka tupu rai te kino. Maata te taime, kua na roto ana a Paulo i te irianga to ratou paî e kua ngaangaa, iaia e rave ra i tana angaanga mitinari.—2 Kori. 11:25.