Au Uianga a te Aronga Tatau
I mua ake ka mate ei a Iesu, eaa aia i taiku ei i te tuatua a Davida i roto ia Salamo 22:1?
I mua ake ka mate ei a Iesu, kua tuatua aia i roto ia Mataio 27:46: “E taku Atua, e taku Atua, eaa koe i akaruke mai ei iaku?” Na te tuatua anga i teia, kua akatupu a Iesu i te tuatua tei tataia e Davida i roto ia Salamo 22:1. (Mare. 15:34) Kare e tau kia manako e ko te tumu i taiku ei a Iesu i tera au tuatua no te mea kua mareka kore aia me kore kua paruparu tona akarongo. Kua mārama meitaki a Iesu i te tumu ka anoanoia aia kia mate, e kua puareinga ua i te rave i te reira. (Mata. 16:21; 20:28) Kua kite katoa aia e i te tuatau o tona matenga, kare a Iehova e tuku i tetai paruruanga ‘koropini’ iaia. (Iobu 1:10) Ka anoanoia a Iesu kia akapapu i tona tu tiratiratu kia Iehova noatu te tu kino me tamateia aia.—Mare. 14:35, 36.
Eaa i reira a Iesu i tuatua ai i teia salamo? Noatu kare i papu ia tatou, ka akamanako tatou i teia au tumu. *
Na roto i teia tuatua, te akapapu maira ainei a Iesu e kare a Iehova e paruru iaia me tamateia aia? Ka anoanoia a Iesu kia oronga i te atinga oko ma te kore e tauturu no ko mai ia Iehova. Ka anoanoia aia kia “akakoromaki i taua mate ra” no te katoatoa—Ebe. 2:9.
Na te taikuanga i teia salamo, te inangaro ra ainei a Iesu kia akamanakoia te katoaanga o te salamo? I tera tuatau, e maata te au salamo tei tamou ngakauia e te ngati Iuda. Me rongo ratou e tai ua irava i roto i tetai salamo, ka akamanako ratou i te katoaanga o tera salamo. Me ko teia ta Iesu i tamanako, kua rauka iaia i te tauturu i tana au pipi kia akamaara i te au totou tei tataia i roto i teia salamo no runga i tona mate. (Sala. 22:7, 8, 15, 16, 18, 24) Pera katoa, i roto i te au irava openga o te salamo, te akataka ra e ka tutara to Iehova Patireia ki rungao i te au pa enua ravarai o te ao nei.—Sala. 22:27-31.
Na te taikuanga i te au tuatua a Davida, te akakite ra ainei a Iesu e kare aia i apa? I mua ake ka tamateia ai a Iesu, kua akautungaia aia i roto i tetai akavaanga tau kore no te akakino i te Atua. (Mata. 26:65, 66) Kua rave rapurapuia teia akavaanga i te roaanga po e kare i aruia te au akanoonooanga tika o te ture. (Mata. 26:59; Mare. 14:56-59) Na te ui anga i teia uianga, penei te akakite ra a Iesu e kare aia i rave ana i tetai kino tei tau kia akautungaia aia kia mate na roto i teia tu.
Te akamaara ra a Iesu i etai ke e te tamamaeia anga a Davida, tei tata i teia salamo, ko te aiteanga ainei e kare a Iehova e mareka ana iaia? Kare ta Davida uianga i akaari mai e kua paruparu tona akarongo. I muri ake i tana uianga, kua akakite aia i tona irinaki papu i roto i to Iehova mana akaora e kua akameitaki a Iehova iaia. (Sala. 22:23, 24, 27) Mei te reira katoa a Iesu, “te Tamaiti a Davida,” noatu kua mamae tikai aia i runga i te rakau tamamae, kare ko te aiteanga e kare a Iehova e mareka ana iaia.—Mata. 21:9.
Te akaari ra ainei a Iesu i tona mamae otooto no te mea kare a Iehova i paruru ana iaia, kia rauka iaia te vai tiratiratu? Kare a Iehova i akakoro ana kia tamamaeia e kia tamateia tana Tamaiti. Ka anoanoia ra te reira kia tupu no te mea kua akarongo kore a Adamu e Eva. Kare a Iesu ara i rave ana, inara ka anoanoia kia tamamaeia e kia tamateia aia kia rauka i te pau i te au akaapaanga a Satani e kia oronga i te atinga oko tei anoanoia no te tutaki i ta te tangata i ngere. (Mare. 8:31; 1 Pete. 2:21-24) Te ravenga ua e tupu ei teia, me kare a Iehova e paruru ia Iesu no tetai tuatau poto.
Te tauturu ra ainei a Iesu i tana au pipi kia kite i te tumu i akatika ai a Iehova iaia kia mate na roto i teia tu? * Kua kite a Iesu e ka turoriia te maataanga me tamateia aia ei tangata rave kino i runga i te rakau tamamae. (1 Kori. 1:23) Me mārama tana au pipi i te tumu i tamateia ai aia, ka kite ratou i te puapinga o te reira. (Gala. 3:13, 14) Ka mārama ratou e koia te Akaora e kare aia i te tangata rave kino.
Noatu eaa te tumu i taiku ei a Iesu i teia au tuatua, kua kite ra aia e te rave ra aia i to Iehova anoano. I muri poto ua ake i te taikuanga aia i teia salamo, kua karanga a Iesu e: “Kua oti.” (Ioa. 19:30; Luka 22:37) No te mea kare a Iehova i paruru ana ia Iesu, kua rauka ia Iesu i te akatupu pouroa i tana i anoanoia kia rave i runga i te enua nei. Kua rauka katoa iaia i te akatupu i te au mea tei tataia no runga iaia i “roto i te ture a Mose ra, e te au peroveta ra, e i te Salamo.”—Luka 24:44.
^ para. 2 Akara katoa i te parakarapa 9 e te 10 o te atikara “Apiianga Mei ta Iesu au Tuatua Openga” i roto i teia makatini.
^ para. 4 I roto i tana angaanga orometua, kua tuatua e kua ui a Iesu i tetai au uianga tei kore i akaari tika mai i tona manako no te reira. Kua rave ra aia i teia kia akakite mai tana au pipi i to ratou manako.—Mare. 7:24-27; Ioa. 6:1-5; akara i Te Punanga Tiaki, Okotopa 15, 2010, kapi 4-5.
