1-2. Akapeea e rauka ai ia tatou te aru i to Iesu takainga vaevae? Akatutu mai.

AKAMANAKO ana e te aaere ra koe e tetai pupu tangata na tetai ngai kino e te oneone. E na tetai tangata karape tukatau e arataki ia kotou. Iaia e aere atura, kua akaruke mai aia i tetai takainga vaevae i roto i te one. Aere ua rai, kare koe e kite akaou i te tangata arataki! Kare koe e mataku. No te mea, ka aru meitaki koe e te pupu tangata i te takainga vaevae o te tangata arataki!

² Ei au Kerititiano, te aaere nei tatou na roto i tetai ngai kino e te oneone—teianei ao kino. E kua oronga mai a Iehova i tetai arataki apa kore—tana Tamaiti ko Iesu kia aru tatou i tona takainga vaevae. (1 Pete. 2:21) I roto i tetai akamārama anga Pipiria, kua akaaite a Petero ia Iesu ki te arataki. Mei te arataki te ka akaruke i tona takainga vaevae ki roto i te one, kua akaruke a Iesu i tona takainga vaevae kia aru tatou. Ka uriuri tatou e toru uianga no te aru anga i tona takainga vaevae—eaa? te tumu? e akapeea?

3. Eaa te aiteanga kia aru i te takainga vaevae o tetai tangata?

³ Eaa te aiteanga kia aru i te takainga vaevae o tetai tangata? Tetai taime, kua akaaite te Pipiria i te tuatua “aaere” e te “vaevae” ki te oraanga o tetai tangata. (Gene. 6:9; Mase. 4:26) Ka akaaiteia te akaraanga ta tetai tangata i akanoo ki te takainga vaevae tana i akaruke. No reira, ko te aru anga i te takainga vaevae o tetai tangata, te aiteanga kia aru i tona akaraanga.

4. Eaa te aiteanga kia aru i to Iesu takainga vaevae?

 ⁴ Eaa te aiteanga kia aru i to Iesu takainga vaevae? Koia oki, kia aru i tona akaraanga. I roto i ta tatou tumu irava, te akakite ra te apotetoro ko Petero i te akaraanga meitaki ta Iesu i akanoo no te akakoromaki i te au mamae; inara e maata atu ta Iesu i rave te ka rauka ia tatou i te aru. (1 Pete. 2:18-25) Te au apinga pouroa ta Iesu i tuatua e i rave, e akaraanga meitaki no tatou kia aru.

5. Ka rauka ainei i te aronga apa ua i te aru i to Iesu akaraanga? Akamārama mai.

⁵ Ei tangata apa ua, ka rauka ainei ia tatou i te aru i to Iesu akaraanga? Ae. Akamaroiroi a Petero ia tatou “kia aru [i to Iesu] takainga vaevae”—aru vaitata i te reira. Me aru meitaki tatou i tona takainga vaevae, te ka rauka i te aronga apa ua, te akarongo ra tatou ki ta te apotetoro ko Ioane i tuatua: “E akaarite i tona uaorai aerenga mei [to Iesu] katoa ra aerenga e tikaʼi.”—1 Ioa. 2:6.

6-7. Akapeea te aru anga i to Iesu takainga vaevae me akapiri vaitata ia tatou kia Iehova?

⁶ Me aru i to Iesu takainga vaevae, ka akavaitata te reira ia tatou kia Iehova. No teaa ra? Mea mua, kua akanoo a Iesu i tetai akaraanga meitaki no te tu oraanga te ka akamareka i te Atua. (Ioa. 8:29) Me aru tatou i to Iesu takainga vaevae, ka akamareka tatou ia Iehova. E ka akavaitata mai aia ki te aronga te tauta ra kia riro ei oa Nona.—Iako. 4:8.

⁷ Te rua, kua aru meitaki a Iesu i te akaraanga o tona Metua. No reira a Iesu i tuatua ai: “Ko te akara mai iaku nei, kua akara ïa i te Metua.” (Ioa. 14:9) Me aru  meitaki tatou i to Iesu tu i te akono anga i tetai ke—ei akaraanga, tona tangi aroa i te tangata repera, te vaine maki atekeria, te akaaroa anga i te aronga e mii ra no tei mate—te aru katoa ra tatou i te akaraanga o Iehova. (Mare. 1:40, 41; 5:25-34; Ioa. 11:33-35) Me aru vaitata tatou ia Iehova, te akapiri vaitata atura tatou kiaia.

8. Akapeea te aru anga i to Iesu takainga vaevae me tauturu ia tatou kia autu i teianei ao?

⁸ Me aru i to Iesu takainga vaevae, ka tauturu te reira ia tatou kia tavini ua rai ia Iehova. I te po openga o tona oraanga i te enua nei, kua tuatua a Iesu: “Kua riro te re o teianei ao iaku.” (Ioa. 16:33) Te aiteanga, kua rauka iaia i te patoi i te au aereanga manako, te au akakoroanga e te au angaanga a teianei ao. Kare rava i ngaropoina ia Iesu te tumu i tonoia mai ei aia ki te enua nei—kia akakakā i te ingoa o Iehova. Akapeea tatou? I roto i teia ao, e maata te au apinga te ka tāpu i ta tatou tavini anga ia Iehova. Inara, me rave ua rai tatou i to Iehova anoano mei ia Iesu rai, ka autu katoa tatou.—1 Ioa. 5:5.

9. Eaa ta tatou ka rave kia rauka te ora mutu kore?

⁹ Me aru i to Iesu takainga vaevae, ka rauka te ora mutu kore. Te ui anga te tangata apinganui eaa tana ka rave kia rauka te ora mutu kore, pau atu a Iesu: “Ka aere mai ei ka aru mai iaku.” (Mata. 19:16-21) Ki te au ngati Iuda kare i irinaki e koia te Karaiti, akakite a Iesu: “Ka aru mai oki [taku mamoe] iaku: E oronga atu au i te ora mutu kore no ratou.” (Ioa. 10:24-29) Ki te Pharisea ko Nikodemo, tei inangaro i te kite i ta Iesu au apiianga, akakite a Iesu e ko tei “akarongo iaia,” ka “rauka ra te ora mutu kore” ia ratou. (Ioa. 3:16) Ka akaari tatou i te akarongo kia Iesu na te rave anga i tana i apii mai e te aru i tona akaraanga. Me pera tatou, ka rauka ia tatou te ora mutu kore.—Mata. 7:14.

10. Eaa ta tatou ka rave “kia kite” meitaki ia Iesu? (Ioane 17:3)

¹⁰ E rauka ai ia tatou te aru i to Iesu takainga vaevae, ka anoanoia tatou kia kite iaia. (E tatau ia Ioane 17:3.) “Kia kite” ia Iesu, ka anoanoia tatou kia apii ua rai no runga iaia—kia kite meitaki i tona au tu, tona aerenga manako e te au angaanga tana i rave. Noatu eaa te roa ia tatou i roto i te tuatua mou, ka anoanoia tatou kia kite meitaki ia Iehova e tana Tamaiti.

11. Eaa to roto i te au Evangelia e ā?

¹¹ Ei tauturu ia tatou kia kite i tana Tamaiti, kua oronga aroa mai a Iehova i te au Evangelia e ā i roto i te Pipiria. Tei  roto i reira te akakiteanga no te oraanga e te angaanga orometua a Iesu. Tana i tuatua, i rave, tona tu, e tona manako ngakau. Ka tauturu teia au puka ia tatou kia “akamaara marie” i te akaraanga o Iesu. (Ebe. 12:3) Tei roto i teia au puka te au takainga vaevae ta Iesu i akaruke mai. Na te apiianga i te au Evangelia e ā, ka kite meitaki tatou no runga ia Iesu. Ei reira e rauka ai ia tatou i te aru i tona takainga vaevae.

12. Akapeea tatou e puapingaia ai mei te au Evangelia?

¹² Kia puapinga meitakiia mei te au Evangelia, e maata atu ta tatou ka anoanoia kia rave i te tatau ua i te reira. Ka anoanoia tatou kia apii meitaki e kia akamanako oonu i te reira. (E akaaite ia Iosua 1:8.) Ka uriuri tatou e rua ravenga te ka tauturu ia tatou kia akamanako oonu e kia taangaanga i ta tatou ka tatau mei te au Evangelia.

13. Akapeea koe me tuku ia koe ki roto i te tua Evangelia?

¹³ Mea mua, e tuku ia koe ki roto i te tua. E tauta i te akamanako i taau e kite ra, e akarongo ra, e te au mea e tupu ra. Ei tauturu ia koe, e rave i tetai kimikimianga i roto i te au puka Pipiria ta te akaaerenga a Iehova i oronga mai. Kimi meitaki eaa te au mea e tupu ra—i mua ake me kore i muri ake i te tuanga taau e apii ra. Akara kia kite i te tu o te tangata e te au ngai tei taikuia. E akaaite i te tua taau e apii ra ki te tua tei aiteite i roto i tetai akaou Evangelia. Tetai taime ka tuku te tangata tata Evangelia i te au akakiteanga kua akarukeia e tetai tangata tata ki vao.

14-15. Akapeea tatou me taangaanga i te tua Evangelia i roto i to tatou oraanga?

¹⁴ Te rua, taangaanga i te tua Evangelia i roto i toou oraanga. (Ioa. 13:17) I muri ake i taau apiianga i te tua Evangelia, e ui kia koe uaorai: ‘Eaa te apiianga mei  teia tua te ka rauka iaku i te taangaanga i roto i toku oraanga? Akapeea au me taangaanga i teia tua no te tauturu i tetai ke?’ E akamanako i tetai tangata taau i kite, e oti e akakite i taau i apii mai ma te aroa e te takinga meitaki.

¹⁵ Ka uriuri tatou i tetai akaraanga akapeea me taangaanga i teia nga ravenga. Ka uriuri tatou no runga i te vaine takaua apinga kore ta Iesu i kite i ko i te iero.

16. Akakite mai eaa te tupu ra i roto ia Mareko 12:41.

¹⁶ E tuku ia koe ki roto i te tua. (E tatau ia Mareko 12:41.) Akamanako ana eaa te tupu ra. Ia Nisana 11, mataiti 33 T.N.—i te epetoma ka tamateia a Iesu. Te apii ra a Iesu i tera rā katoa i roto i te iero. Kua patoi te au arataki akonoanga iaia. Kua ui tetai pae kia Iesu i tona tikaanga kia rave i tana angaanga. E tetai au uianga tei manako ratou e kare e rauka iaia i te pau. (Mare. 11:27-33; 12:13-34) I teianei, kua neke a Iesu ki tetai ngai ke mai i roto i te iero. Penei i roto i te Paepae o te au Vaine, te kite atura aia i te pia akaputu moni. Te noo ra aia ki raro e te akara ra i te au tangata e tuku ra i ta ratou moni ki roto i te pia. E maata te aronga moni tana e kite atura. Penei te noo vaitata ra aia ki reira e te akarongo ra i ta ratou moni e topa ra ki roto i te pia.

17. Eaa ta te vaine takaua apinga kore i roto ia Mareko 12:42 i rave?

¹⁷ E tatau ia Mareko 12:42. I muri mai, kua kite atu a Iesu i tetai vaine. E “vaine takaua apinga kore.” (Luka 21:2) Kare tona oraanga e meitaki ana; penei kare e rava ana tana moni no te oko i te au apinga ka anoano aia no te oraanga. Noatu te reira, te aere ra aia ki ko i tetai pia e te tuku ngaro ua ra i tana nga moni meangiti, penei kare e rongoia mai me topa ki roto. Te kite atura a Iesu i tana i tuku—e rua nga lepeta, ko te moni meangiti rava atu teia e taangaangaia ana i tera tuatau. Kare te reira e rava no te oko e tai manu rikiriki, te manu māmā rava atu no te oko ei kai.

18. Ia Mareko 12:43, 44, eaa ta Iesu i tuatua no te moni ta te vaine takaua i oronga?

¹⁸ E tatau ia Mareko 12:43, 44. Kua umere a Iesu i te tu o teia vaine. Kua kapiki aia i tana au pipi kia akara iaia, e kua karanga: “E maata ta te vaine takaua apinga kore nei i tuku ki roto, i ta ratou ravarai.” Akamārama aia: “No roto oki i te toenga i to ratou apinga maata ta [te aronga moni] i tuku mai ki roto; kareka aia nei, kua ope roa tona apinga rikiriki rava kore, i te tukuia e ia ki roto.” Te oronga anga aia i tana moni katoa, irinaki aia ia Iehova kia akono iaia.—Sala. 26:3.

19. Eaa te apiianga puapinga mei ta Iesu i tuatua no te vaine takaua apinga kore?

¹⁹ Taangaanga i te tua i roto i toou oraanga. E ui kia koe uaorai, ‘Eaa te apiianga mei ta Iesu tuatua no te vaine takaua apinga kore?’ Akamanako ana i tera vaine. Penei kua inangaro aia i te oronga maata atu kia Iehova. Inara, kua oronga aia i tana ka rauka; tana mea meitaki rava atu. Kite a Iesu e te mareka maira tona Metua i tana i oronga. Teia te apiianga puapinga: Ka mareka a Iehova me oronga tatou i te mea meitaki rava atu—ta tatou tavini ngakau katoa anga iaia. (Mata. 22:37; Kolo. 3:23) Ka mataora aia me rave tatou i ta tatou ka rauka! Kia taangaanga katoa tatou i teia kaveinga  i roto i ta tatou akamorianga, te angaanga orometua e te au uipaanga.

20. Akapeea koe me taangaanga i te apiianga o te tua no te vaine takaua apinga kore? Oronga i tetai akaraanga.

²⁰ Akapeea koe me taangaanga i te apiianga mei te tua o te vaine takaua? E akamanako i tetai tangata te ka akamaroiroiia me kite aia e te mareka maira a Iehova i tana tauta anga. Ei akaraanga, kua kite ainei koe i tetai tuaine pakarikari tei manako puapinga kore, no te mea kare ona maroiroi akaou no te tutu aere mei to mua ana? Kua kite ainei koe i tetai taeake tei akaparuparuia e tona maki mamae, no te mea kare aia e tae akaou ana ki te au uipaanga? E tauturu i teia aronga na roto i te au “tuatua meitaki.” (Ephe. 4:29) E akakite kia ratou i te apiianga akapumaana mei te tua o te vaine takaua apinga kore. Ka riro taau tuatua i te akamaroiroi ia ratou kia kite e te mareka maira a Iehova me oronga ratou i te mea meitaki rava atu kiaia. (Mase. 15:23; 1 Tesa. 5:11) Me akameitaki koe i tetai ke no tei oronga i ta ratou mea meitaki rava atu kia Iehova—noatu te meangiti—te aru ra koe i to Iesu takainga vaevae.

21. Eaa taau ka tauta i te rave?

²¹ Kua oronga mai te au Evangelia i te au akakite anga no to Iesu oraanga, kia rauka ia tatou i te aru iaia—tona takainga vaevae! No reira e akanoo i tetai taime no te apii i te au Evangelia i roto i taau Akamorianga Ngutuare. Kia puapingaia tatou, ka anoanoia kia tuku ia tatou ki roto i te tua e kia taangaanga i te reira i roto i to tatou oraanga. Kapiti mai ki te aru anga i ta Iesu i rave, ka anoanoia tatou kia akarongo ki tana i tuatua. I te atikara ka aru mai, ka uriuri tatou i ta Iesu au tuatua openga i te enua nei.