Te mea maromaroa, te tae anga toku mataiti ki te 13, kua akamata toku pirianga kia Iehova i te akaparuparu. I te akaraanga, kua rauka i toku au oa apii te au apinga ta ratou i inangaro e kua ngere au i te reira. Manako mai au e penei e ngatā roa te ture a toku nga metua, te au apainga Kerititiano, e te tavinianga ia Iehova. Noatu e kua kite au ia Iehova, kare oku pirianga vaitata kiaia.

Kare au i akamutu i te tutu aere, mari ra kua akaiti ua i taku tavinianga ia Iehova. Kare katoa au e akapapa meitaki ana no te reira. Tei tupu, kare taku angaanga tutu aere i puapingaia e kare au i mataora ana. Kua ui au kiaku uaorai, ‘Akapeea e rauka ai i tetai tangata i te tutu aere i te au epetoma e te au marama ravarai?’

Te tae anga toku mataiti ki te 17, kua inangaro au i te rave i taku i inangaro. No reira, kua akaruke au i to matou kainga, e kua neke atu ki Autireria. Kua maromaroa e kua manamanata toku nga metua te akaruke  anga au. Inara kua manako raua e ka tavini ua rai au ia Iehova.

I Autireria, kua paruparu atu taku tavini anga ia Iehova. Kare au e aere putuputu ana ki te au uipaanga. E kua piri au ki tetai au mapu te mataora ua ra i te aere ki te uipaanga, e oti ka aere ki te ngai tamataora no te ura e te kai kava. Me akamanako au i tera tu oraanga, kite mai au e tai oku vaevae i roto i te tuatua mou e tai i roto i teianei ao, e kare au i mareka ana.

E rua mataiti i muri mai, kua aravei au i tetai tuaine tei tauturu iaku kia akamanako i te tu oraanga taku e noo ra. Te noo kapiti ra au ki te au tuaine kare i akaipoipo, e kua pati matou i te akaaere kotinga e tana vaine ko Tamara kia noo ki to matou kainga no tetai epetoma. Me rave tana tane i te au angaanga na te putuputuanga, kua reka tikai au i ta matou pukapuka anga ko Tamara. E vaine oaoa e te mataora aia. Kua umere tikai au i te kite e ka mataora rai koe i te kapiti ki te aronga te tavini tamou ra ia Iehova.

E tu maoraora tikai to Tamara. Kua kite au i tona inangaro no te tuatua mou e te angaanga tutu aere. Mataora aia i te oronga i tana au mea meitaki kia Iehova, inara kare au i mataora i te oronga i taku mea iti. Kua riro tona tu manea e te mataora i te akakeu i toku oraanga. Kua tauturu tona akaraanga iaku kia akamanako i teia irava puapinga: Te inangaro ra a Iehova ia tatou katoatoa kia tavini iaia “ma te pereperekavana” e “ma te imene.”—Sala. 100:2.

Inangaro au i te tu mataora tei rauka ia Tamara, inara e rauka ai te reira, ka anoanoia au kia rave i tetai au tauianga. Kua pou tetai tuatau, e kua rave au i te au tauianga rikiriki. Kua akapapa au no te angaanga tutu aere, e kua painia tauturu i tetai au taime. Kua tauturu teia iaku kia kore e rū e kia rauka te tu papu. Kua taangaanga  putuputu au i te Pipiria, e kua reka mai au i te tutu aere. Kare i roa kua painia tauturu au i te au marama ravarai.

Kua iki au i te au taeake te tavini mataora ra ia Iehova ei oa noku. Kua tauturu to ratou akaraanga meitaki iaku kia akamanako i te mea puapinga rava atu i roto i toku oraanga. Kua akanoo au i tetai apii Pipiria meitaki naku. E kua maata mai toku mataora i roto i te angaanga tutu aere, e aere ua rai kua akamata au i te painia tamou. I teia taime, kua kite tikai au i te tu mataora e te meitaki i roto i te putuputuanga.

E tai mataiti i muri mai, kua aravei au ia Alex, e taeake meitaki tei inangaro ia Iehova e te angaanga tutu aere. E tavini tauturu aia e kua painia ana no tetai ono mataiti. Kua tavini ana aia i Malawi no tetai tuatau, i te au ngai te anoanoia ra te tauturu. Kua angaanga kapiti ana aia ki tetai au mitinari tei tauturu e tei akamaroiroi iaia kia akariro i te tavini anga ia Iehova ei mea mua i roto i tona oraanga.

I te 2003, kua akaipoipo maua ko Alex e mei te reira taime mai, kua tavini tamou maua. E maata ta maua i apii mai, e kua akameitaki a Iehova i ta maua tautaanga i roto i te au turanga tukeke.

I te 2009, kua patiia maua kia tavini ei nga mitinari i Timor-Leste, e enua meangiti i Indonesia. Kua tupu te tu poitirere, te mataora e te mataku kia maua. E rima marama i muri mai, kua tae maua ki roto i te oire maata ko Dili.

E tuke te oraanga i reira ki ta maua i matau. Kua anoanoia maua kia akatanotano ki te peu ou, te reo, te kai e te turanga o te oraanga. I roto i te angaanga tutu  aere, kua aravei maua i te aronga putaua, kare i aere ana ki te apii, e tei takinokinoia. E pera te aronga kua tupu te kino kia ratou i te pae kopapa e te ngakau no te tamaki e te tā ua. *

Mataora tikai te angaanga tutu aere! Ei akaraanga, kua aravei au ia Maria, e tamaine e 13 ona mataiti. * Kua mate tona mami, e kare aia e kite putuputu ana i tona tati. Mei tetai au tamariki rai i tona uki, kare a Maria i kite eaa tana ka inangaro. I tetai atianga, kua aue aia i te akakite anga mai i tona manako. Kare au i kite eaa aia i aue ei no te mea kare oki au i mārama i tona reo. Kua pure au kia Iehova no te tauturu kia akamaroiroi iaia, e kua tatau au i tetai irava akapumaana. I te au mataiti i muri mai, kua riro te tuatua mou i te taui i to Maria tu, tona akaraanga e tona oraanga katoa. Kua papetitoia aia e te rave nei i tana uaorai apii Pipiria. Teia rā, e kopu tangata pae vaerua to Maria e te kite ra i to ratou aroa nona.

Te akameitaki ra a Iehova i te angaanga tutu aere i Timor-Leste. Noatu e maata te au papuritia tei papetitoia i roto i te tai ngauru mataiti, te tavini ra tetai pae ei painia, ei tavini tauturu, e ei aronga pakari. Te angaanga ra tetai pae i roto i te opati uri reo. E reka ana au i te akarongo ia ratou me imene i ko i te au uipaanga, te kite atu i to ratou mata katakata, e to ratou tupu anga i te pae vaerua.

E tuke to maua oraanga i Timor-Leste ki te oraanga i Autireria, inara kare atu e oraanga mataora mei teia rai. Tetai taime ka na runga maua i tetai bus meangiti kua ki i te tangata, te ika tamarō e te kai no ko i te makete. I tetai au rā, ka rave maua i te apii Pipiria i roto i tetai kainga meangiti ua, e repo te taʼua e te vera, e te au moa e oro aere ra. Noatu teia au turanga, kua manako ua rai au, ‘Teia tikai te oraanga!’

Me akamanako au i te au mea tei tupu, ka akameitaki au i toku nga metua no te apii iaku no runga ia Iehova e te tauturu anga iaku i te tuatau i paruparu ei toku pirianga kia Iehova. Kua tano te tuatua ia Maseli 22:6 kiaku. Kua mataora toku nga metua ia maua ko Alex; te kite anga e te taangaanga ra a Iehova ia maua. Mei te 2016 mai, te tavini nei maua i roto i te angaanga kotinga i raro ake i te opati Betela o Autireria.

I mua ana, kare au e reka ana i te aere i te tutu aere. Teianei, mataora tikai taku angaanga tutu aere! Kite mai au e noatu eaa te ka tupu, ka rauka te mataora me tavini koe ia Iehova ma te ngakau katoa. E 18 mataiti ia maua ko Alex te tavini anga ia Iehova, e kua mataora tikai maua. I teianei, kua mārama au i ta Davida i tuatua kia Iehova: “Ko te aronga katoa ra e irinaki ia koe ra, kia rekareka ïa, kia akateitei i te reo i te rekareka . . . e te aronga katoa i inangaro i to ingoa ra, kia rekareka anake ïa ia koe.”—Sala. 5:11.