“E tu takinga meitaki to te Au Kite ki te au tu tangata ravarai, e pera ki taku nga puakaoa. I tetai rā, kua oronga mai a Elaine i tetai kai na taku nga puakaoa. I muri mai, me oki akaou matou na reira, ka inangaro ua rai taku nga puakaoa i te aere ki ‘te ngai te reira te kai.’

“Te au marama i muri mai, kua reka taku nga puakaoa i ta raua kai, e kua mataora katoa au i te pukapuka ki te Au Kite. Inara, kua emiemi au i te akaoaoa atu kia ratou. E 70 tuma oku mataiti, e kare i papu iaku eaa ta te Au Kite e irinaki ana. No toku mareka kore i te akonoanga Porotetani, kua manako au i te apii i te Pipiria ko au anake ua.

“I taua tuatau ra, kua kite au i tetai akaou Au Kite o Iehova i tetai ngai ke o te oire e ta ratou pereoo puka. E tu oaoa katoa to ratou. Ka taangaanga ua rai ratou i te Pipiria no te pau i taku au uianga, e kua akamata au i te irinaki ia ratou.

“I tetai rā, kua ui mai a Elaine, ‘Te irinaki ra ainei koe e apinga aroa te manu no ko mai i te Atua?’ Kua pau atu au, ‘Ae!’ E oti, kua tatau a Elaine ia Isaia 11:6-9. Mei reira mai, kua inangaro au i te apii i te Pipiria, inara kare rai au i apai ana i ta ratou au puka.

“Te au rā i aereia, kua reka au i te uriuri manako kia Elaine e tana tane ko Brent. Kua pati mai raua iaku kia tatau i te puka o Mataio ki te puka o Angaanga kia kite eaa te ka anoanoia kia riro mai ei Kerititiano. Kua rave au i te reira. Kare i roa i muri mai, i te 2016, kua apii au i te Pipiria kia Brent e Elaine.

“Kua reka tikai au i taku apii Pipiria, e te aere ki te uipaanga i ko i te Are Uipaanga Patireia. Mataora katoa au i taku i kite mai i roto i te Pipiria. E tai mataiti i muri mai, kua papetitoia au ei Kite no Iehova. E 79 oku mataiti i teianei, kua papu iaku e ko te tuatua mou teia. Kua akameitaki mai a Iehova iaku na te tauturu anga iaku kia riro mai ei tavini nona.”