Te aiteanga o te taputou ki mua i te tangata, koia oki kia tia, me kore kia taputou ki mua i te Atua, na roto i te tuatua me kore te tataanga.

Ka manako tetai pae e mea tarevake kia taputou no te mea kua karanga a Iesu: “Auraka e taputou, auraka rava . . . Kia riro ra ta kotou Koia, ei koia; e ta kotou Kare, ei kare; e te vai atu rai te tuatua, no roto ïa i te kino.” (Mata. 5:33-37) Kua kite a Iesu e ka umuumuia te taputou i tetai au atianga i raro i te Ture a Mose, e kua taputou katoa ana tetai au tavini tiratiratu o te Atua. (Gene. 14:22, 23; Exo. 22:10, 11) Kite katoa aia e kua taputou ana rai a Iehova. (Ebe. 6:13-17) No reira, kare a Iesu i karanga ana e auraka rava tatou e taputou. Mari ra, te akamatakite maira aia i te rave anga i te au taputou puapinga kore. Kia riro te rave anga i ta tatou i tuatua ei mea tapu. Ta tatou koia, ei koia.

Eaa i reira taau ka rave me patiia koe kia taputou? Mea mua, kia akapapu e ka rauka ia koe i te akatupu i te reira. Me kare e rauka, e mea meitaki auraka koe e taputou. Akamatakite te Pipiria: “E ngari ake kia kore koe e tia, ko te tia aea koe e kare e akatae.” (Kohe. 5:5) Te rua, e akamanako i te au kaveinga Pipiria no runga i taau ka taputou, e toou akava ngakau. Eaa te au kaveinga Pipiria te ka tauturu ia koe?

Te rotai ra te taputou ki te anoano o te Atua . Ei akaraanga, e tia ana te Au Kite o Iehova me akaipoipo ratou. Kua aite teia tia ki te taputou rai. I mua i te Atua e te tangata, ka tia te tane e te vaine akaipoipo e ka akaari raua i te aroa, ka akaperepere e ka akangateitei i tetai e tetai “no te katoa anga o to raua oraanga.” (Penei kare tetai nga tokorua akaipoipo e tuatua akapera, inara ka tia rai raua ki mua i te Atua.) Me akakiteia ki te katoatoa e e tane e te vaine akaipoipo raua, ka tinamou to raua akaipoipo. (Gene. 2:24; 1 Kori. 7:39) Kua tau e kua rotai teia tia akaipoipo ki te anoano o te Atua.

Kare e rotai ana tetai au taputou ki te anoano o te Atua. Kare tetai Kerititiano mou e taputou kia tamaki no tona patireia me kore kia akakore i tona akarongo i te Atua. Kare teia e tau ki te akauenga a Iehova. “Kare [te au Kerititiano] i to teianei ao,” no reira kare tatou e piri ki roto i te au pekapeka o teianei ao.—Ioa. 15:19; Isa. 2:4; Iako. 1:27.

Te ō maira to tatou akava ngakau i roto i tetai au taputou. I tetai au taime, ka akamanako  meitaki tatou i ta Iesu ako kia “apai mari i ta Kaisara kia Kaisara; e ta te Atua ra, e apai ïa ki te Atua.”—Luka 20:25.

Ei akaraanga, me tauta tetai Kerititiano kia rauka mai tetai passport me kore tetai tikaanga nona kia noo i tetai enua ke, penei ka anoanoia aia kia taputou e ka vai tiratiratu aia ki tera patireia. Me te anoano ra te kavamani o te enua kia taputou aia i tetai apinga tei aati i te ture a te Atua, kare tona akava ngakau e akatika iaia kia rave i te reira. Inara, penei ka akatika te kavamani iaia kia taui i te tuatua o te taputou kia aru i tona akava ngakau.

Penei ka tau teia taputou ou ki te kaveinga ia Roma 13:1, te na ko ra: “Kia kauraro marie te tangata katoatoa i te aronga mana taoonga ra.” No reira, penei ka iki tetai Kerititiano i te rave i teia taputou no te mea kua rotai te reira ki te akauenga a te Atua.

E mea puapinga katoa kia aru i toou akava ngakau me patiia koe kia taangaanga i tetai apinga no te taputou ki mua i te tangata. I te tuatau taito, kua taangaanga te iti tangata Roma e te Sekuti i te koke me taputou ratou, no te kapiki i to ratou atua tamaki ei akapapu i te reira. Kua akateitei to Ereni i to ratou rima ki te rangi me taputou ratou. Irinaki ratou e atua tetai te akarongo maira ki ta ratou taputou e ka tutaki me kore ka akautunga ia ratou.

Me taputou tetai tavini o Iehova ki mua i te tangata, kare aia e taangaanga i tetai apinga no roto mai i te akamorianga pikikaa. Inara, akapeea me patiia koe i roto i te are akavaanga kia tuku i toou rima ki runga i te Puka Tapu ma te tia e ka akakite koe i te tika? Penei ka iki koe kia pera no te mea te akakite maira te Pipiria e kua rave ana tetai au tavini o te Atua i tetai mea aiteite. (Gene. 24:2, 3, 9; 47:29-31) Kia akamaara, me taputou koe i teia, te tia nei koe ki mua i te Atua kia akakite i te tika. Ka anoanoia koe kia pau tika i te au uianga katoatoa.

No te mea te akaperepere ra tatou i to tatou pirianga kia Iehova, ka tau tatou kia pure ma te akamanako meitaki i mua ake ka taputou ei. Kia akapapu e kua rotai te reira ki te au kaveinga Pipiria e to tatou akava ngakau. Me taputou koe, e akatupu rai koe i te reira.—1 Pete. 2:12.