I teia turanga, ka āriki te putuputuanga e kua motu te akaipoipo mua no te mea kua mana te rua o te akaipoipo. Kia mārama i te tumu o teia, ka akara tatou i ta Iesu i tuatua no runga i te kopae e te akaipoipo akaou.

Ia Mataio 19:9, kua akamārama mai a Iesu i te tumu okotai a te Pipiria no te kopae i toou tokorua akaipoipo. Karanga aia: “Tei kopae i tana vaine, auraka ra no te akaturi, ka akaipoipo ei i tetai, kua akaturi ïa.” Ka apii tatou mei ta Iesu tuatua, (1) ko te akaturi anake te tumu Pipiria ka rauka i tetai i te kopae i tona tokorua akaipoipo e te (2) ko te tangata tei kopae i tana vaine ma te kore e tumu Pipiria e ka akaipoipo i tetai ke, kua akaturi aia. a

Ta Iesu tuatua no te tangata tei akaturi e tei kopae i tana vaine, ko te aiteanga e kua tau ainei ki te Pipiria kia akaipoipo aia i tetai ke? Kare. Me akaturi tetai tane i roto i te akaipoipo, na tona tokorua tei vai tiratiratu e iki me ka akakore aia i te ara a te tane me ka tatara iaia. Me kopae te vaine i tana tane e kua tatara kia tau ki te ture, ka rauka ia raua i te akaipoipo i tetai ke.

I tetai tua, penei ka inangaro te tokorua tei vai tiratiratu kia noo akaipoipo rai raua, no reira ka akakite aia e ka akakore aia i te ara a tana tane. Akapeea i reira me kare te tane e āriki i te akakoreanga ara a te vaine e ka tauta i te tatara kia tau ki te ture? No te mea kua inangaro te vaine i te akakore i te ara e kia noo akaipoipo rai raua, kare te tane i tau ki te Pipiria kia akaipoipo i tetai ke. Me ka māro aia i tana i inangaro e ka akaipoipo atu rai i tetai ke, kua akaturi akaou aia, ka anoanoia te aronga pakari o te putuputuanga kia akanoo i tetai kumiti tukuanga tika no te ako iaia.—1 Kori. 5:1, 2; 6:9, 10.

Me akaipoipo tetai tangata e kare e tumu Pipiria, eaa to te putuputuanga manako no te akaipoipo mua e te akaipoipo ou? Kia tau ki te Pipiria, te mana ra ainei te akaipoipo mua? Ka rauka ainei i te tokorua tei vai tiratiratu kia akakore i te ara me kore kia kopae i tana tane? Ka riro ainei te akaipoipo ou ei mea akaturi i roto i te mata o te putuputuanga?

I mua ana, kua akara te putuputuanga i tetai akaipoipo ou ei mea akaturi me te ora ra rai te tokorua tei vai tiratiratu, kare aia i akaipoipo akaou, e kare aia i akaturi ana. Inara, kare a Iesu i taiku ana i te tokorua tei vai tiratiratu te tuatua anga no runga i te kopae e te akaipoipo akaou. Mari ra, kua karanga aia e ko te tangata tei kopae i tana vaine ma te kore e tumu Pipiria e kua akaipoipo i tetai ke, kua akaturi aia. Ka riro teia kopae e te akaipoipo akaou ta Iesu i akaaite ki te akaturi, i te akaope i te akaipoipo mua.

 Me ope tetai akaipoipo na roto i te tatara kia tau ki te ture e kua akaipoipo akaou, kare e anoanoia te akakoreanga ara a te tokorua tei vai tiratiratu. Kare aia e anoanoia kia iki me ka akakore i te ara a te tane, me ka kopae iaia. Pera katoa, kare te manako o te putuputuanga no te akaipoipo ou e taui noatu me kua mate te tokorua tei vai tiratiratu, me kua akaipoipo akaou aia, me kore kua akaturi. b

I teia akaraanga, ko te tane tei akaturi, e kua tatara te nga tokorua kia tau ki te ture. Akapeea i reira me kare te tane i akaturi ana, inara kua tatara rai aia mei tana vaine e kua akaipoipo i tetai ke? Akapeea me kare te tane i akaturi ana i mua ake ka tatara ei, inara kua rave i te reira i muri mai e kua akaipoipo i tetai ke noatu kua inangaro te vaine i te akakore i tana ara? I teia au turanga, ko te tatara e te akaipoipo akaou i tetai ke, e akaturi te reira, ka akaope teia i te akaipoipo mua. E kua mana te akaipoipo ou i roto i te ture. Akakite The Watchtower o Noema 15, 1979, kapi 32, “i teianei, tei roto aia i tetai akaipoipo ou e kare e rauka iaia kia akaope i te reira e te oki ki tana vaine mua; kua ope te akaipoipo mua na roto i te tatara anga, te akaturi e te akaipoipo i tetai ke.”

Auraka teia akamāramaanga ou e akakeu i tetai Kerititiano kia manako e kare te akaipoipo e tapu akaou ana me kore kua akaitiia te kino o te akaturi. Me kopae tetai tane i tana vaine e ka akaipoipo i tetai ke ma te kore e tumu Pipiria, ka akanoo te aronga pakari i tetai kumiti tukuanga tika no te mea kua akaturi aia. (Me e Kerititiano te tokorua akaipoipo ou, ka ako katoaia aia no te akaturi.) Noatu kare teia akaipoipo ou i te mea akaturi, kare te tane e tau kia rave i tetai apainga i roto i te putuputuanga no tetai tuatau roa me kore i mua ake ka ngaro ei te mamae ngakau o te aronga tei riri no tana i rave. I mua ake ka oronga ai te aronga pakari i tetai apainga ki te tane, ka akamanako ratou i te turanga o te vaine mua tei akono tau koreia e pera te au tamariki rikiriki tana i kopae.—Mala. 2:14-16.

No te kino ta te tatara e te akaipoipo akaou ka akatupu, e mea meitaki kia aru te au Kerititiano i ta Iehova i akanoo na te akariroanga i te akaipoipo ei mea tapu.—Kohe. 5:4, 5; Ebe. 13:4.