1-2. Eaa ta tatou ka rave ia tatou e tapapa ra i te ao ou?

 KA AKAPEREPERE tatou i ta Iehova taputou kia tupau i teia akatereanga ki tetai ao ou tuatua tika. (2 Pete. 3:13) Noatu e kare tatou i kite e aea teia ao ou e tupu ei, te akaari maira te au mea e tupu nei i teia tuatau e kare e roa atu ka tupu te reira.​—Mata. 24:32-34, 36; Anga. 1:7.

² I teianei, noatu mei teaa te roa ia tatou i roto i te tuatua mou, ka inangaro tatou katoatoa i te akamatutu i to tatou akarongo i roto i taua taputou. No teaa ra? No te mea ka paruparu rai te akarongo matutu. E tika, kua kapiki te apotetoro ko Paulo i te akarongo paruparu e ko “te ara e rokoia ngoie ei tatou nei.” (Ebe. 12:1) Kia kore to tatou akarongo e paruparu, ka inangaro tatou i te akamanako pakari i te au mea e tupu nei ei akapapu anga e te vaitata maira te ao ou.​—Ebe. 11:1.

3. Eaa ta tatou ka uriuri i roto i teia atikara?

³ I teia atikara, ka uriuri tatou e toru mataara no te akamatutu i to tatou akarongo no ta Iehova taputou no tetai ao ou: (1) na te akamanako pakari anga i te oko, (2) na te akamanako anga i to Iehova mana, e te (3) na te rave anga i te au angaanga pae vaerua. E oti ka uriuri tatou akapeea ta Iehova karere kia Habakuka i te akamatutu anga i to tatou akarongo i teia tuatau. Mea mua, ka akara tatou i tetai au turanga e tupu ra kia tatou te ka anoanoia te akarongo matutu no te taputou e te vaitata maira te ao ou.

 TE AU TURANGA KA ANOANOIA TE AKARONGO MATUTU

4. Eaa te au ikianga te anoanoia ra te akarongo matutu?

⁴ I te au rā ravarai, ka rave tatou i te au ikianga te anoanoia ra te akarongo matutu. Ei akaraanga, ka rave tatou i te ikianga te ō maira to tatou au oa, te tamataoraanga, te apii, te akaipoipo, te tamariki e te angaanga. Ka ui tatou i teia au uianga: ‘Te akaari maira ainei taku ikianga e kua papu tikai iaku e e poto ua te tuatau o teia akatereanga e te vaitata maira to te Atua ao ou? Me kare, te aru ra ainei au i te manako o te au tangata kare e irinaki ana e ka ora ratou e tuatau ua atu?’ (Mata. 6:19, 20; Luka 12:16-21) E ikianga meitaki ta tatou ka rave ei akamatutu i to tatou akarongo no te vaitata anga mai o te ao ou.

5-6. Eaa tatou ka inangaro ei i te akarongo matutu i te tuatau manamanata? Akatutu mai.

⁵ Ka tupu katoa te au manamanata te anoanoia ra te akarongo matutu. Penei ka tupu mai te takinokinoanga, te maki kino, e tetai atu au mea te ka akataitaia ia tatou. I te akamataanga, penei kua rauka ia tatou i te akakoromaki ua i to tatou manamanata. Inara me ka roa atu​—ka tupu putuputu ua te au manamanata​—ka inangaro tatou i te akarongo matutu kia akakoromaki e kia tavini ua atu rai ia Iehova ma te rekareka.​—Roma 12:12; 1 Pete. 1:6, 7.

⁶ I te tuatau e tupu ra te manamanata, penei ka manako tatou e kare to Iehova ao ou e tae mai. Ko te aiteanga ainei e e paruparu to tatou akarongo? Kare. Akamanako ana i tetai akatutuanga. I te tuatau anu pakari tikai, ka manako tatou e kare te tuatau maana e tae mai. Inara kua tae mai te tuatau maana. Mei te reira katoa, me taitaia tikai tatou, ka manako tatou e kare te ao ou e tae mai. Me matutu to tatou akarongo, kua kite tatou e ka akatupuia ta te Atua au taputou. (Sala. 94:3, 14, 15; Ebe. 6:17-19) Na te irinakianga i te reira, ka tuku tatou i te akamorianga ia Iehova ko te mea mua i roto i to tatou oraanga.

7. Eaa te manako ka kopae tatou?

⁷ Akamanako ana i tetai ngai ka anoanoia te akarongo matutu​—te angaanga tutu aere. E maata te au tangata ta tatou e tutu aere ana te manako ra ratou e ko te “evangelia” no te ao ou o te Atua e vaitata maira kare ïa e tae mai. (Mata. 24:14; Eze. 33:32) Auraka e akatika i to ratou manako ekoko kia akakeu ia tatou. Kia kore te reira e tupu, e akamatutu i to tatou akarongo. Ka uriuri tatou e toru ravenga.

AKAMANAKO PAKARI I TE OKO

8-9. Akapeea te akamanako pakari anga i te oko me akamatutu i to tatou akarongo?

⁸ Tetai atu mataara ka akamatutu tatou i to tatou akarongo koia oki na te akamanako pakari anga i te oko. Te akapapu maira te oko e ka tupu te taputou a te Atua. Me akamanako meitaki tatou i te akakoroanga o te oko e eaa te ō maira, ka akamatutuia to tatou akarongo, e e mea papu e ka akatupuia te taputou a te Atua no te oraanga mutu kore i te ao meitaki rava atu. Eaa tatou i tuatua akapera ai?

⁹ No reira, eaa te ō maira ki te oko? Kua tono mai a Iehova i tana Tama mua akaperepereia, tona oa piri vaitata, mei te rangi mai kia anauia ei tangata apa kore. Iaia i te enua nei, kua akakoromaki a Iesu i te au turanga ngatā. E kua mamae e kua tamateia. E tutaki anga maata tikai teia kia Iehova! Kare roa te Atua aroa e akatika kia  mamae e kia mate tana Tamaiti e kia rauka ua mai tetai oraanga poto ua e te meitaki no tatou. (Ioa. 3:16; 1 Pete. 1:18, 19) Kua oronga mai a Iehova i tana Tamaiti akaperepere ei tauturu ia tatou, no reira Nana e akapapu mai e ka noo tatou i roto i te ao ou tika tikai e tuatau ua atu.

AKAMANAKO ANGA I  TO IEHOVA MANA

10. Ia Ephesia 3:20, eaa te ka rauka ia Iehova i te rave?

¹⁰ Te rua o te mataara no te akamatutu i to tatou akarongo koia oki na te akamanako anga i to Iehova mana. Tei iaia te mana no te akatupu i te au mea ravarai tana i taputou. Inara ki tetai aronga kua manako ratou e kare e tupu te taputou no te oraanga ope kore i roto i tetai ao ou. E taputou putuputu mai ana a Iehova i te au mea kare e rauka i te tangata i te rave. No te mea koia te Atua Mana Katoatoa. (Iobu 42:2; Mare. 10:27) No reira kare tatou e poitirere me taputou mai aia i te au mea umere tikai!​—E tatau ia Ephesia 3:20.

11. Akakite mai i tetai akaraanga no tetai au taputou umere tikai a te Atua. ( Akara i te pia “Kua Tupu Tetai au Taputou Umere Tikai.”)

¹¹ Akamanako ana i tetai au mea ta Iehova i taputou ki tona iti tangata i mua ana, kare i manakoia ana e ka tupu mai. Kua akapapu aia kia Aberahama e Sara e ka anau mai raua i tetai tamaiti i to raua ruaine anga. (Gene. 17:15-17) Kua akakite katoa aia kia Aberahama e ka orongaia te enua o Kanaana ki tana uanga. I te au mataiti e tuikaa ra te uanga a Aberahama, te ngati Iseraela, i Aiphiti, penei kua manakoia e kare taua taputou e akatupuia. Inara kua tupu te reira. Kua akakite a Iehova kia Elisabeta e noatu kua ruaine aia ka anau aia i tetai tamaiti. Kua akakite katoa aia kia Maria, kare i noo tane ake, e ka anau aia i tana uaorai Tamaiti, ta Iehova i taputou e tauatini ua atu mataiti i te kainga Edene​—kua akatupuia te taputou!​—Gene. 3:15.

12. Eaa ta Iosua 23:14 e Isaia 55:10, 11 e akapapu maira kia tatou no to Iehova mana?

¹² Ka matutu atu to tatou akarongo no ta Iehova taputou no tetai ao ou me akamanako tatou i tana i rave e ka akatupu na roto i tona mana ririnui. (E tatau ia Iosua 23:14; Isaia 55:10, 11.) Kua papa ua tatou i te tauturu i tetai ke kia mārama ratou e ko taua ao ou kare i te moemoea. Te akakite maira a Iehova no runga i te rangi ou e te enua ou e: “E tuatua-mou oki teianei au tuatua e te pikikaa kore.”​—Apo. 21:1, 5.

RAVE ANGA I  TE AU ANGAANGA PAE VAERUA

13. Akapeea te au uipaanga me akamatutu i to tatou akarongo? Akamārama mai.

¹³ Te toru o te mataara ka akamatutu tatou i to tatou akarongo na te akapou anga i te taime i roto i te au angaanga pae vaerua. Ei akaraanga, akamanako ana i te puapinga no ta tatou au uipaanga. Karanga ra a Anna, tei akapou i te tuatau roa i te rave i te angaanga tutu aere e: “Kua tauturu mai te au uipaanga kia vai maroiroi ua rai toku akarongo. Noatu kare te vaa tuatua e tukatau roa ana i te apii me kore kare e apinga ou i akakiteia mai, e rongo putuputu ana au i te au mea te ka tauturu mai iaku kia mārama meitaki au i te tuatua mou Pipiria, e na te reira e akamatutu i toku akarongo.” b Kare e ekoko e ka āriki rekareka katoa tatou i te au pauanga a te katoatoa te ka akamatutu i to tatou akarongo.​—Roma 1:11, 12; 10:17.

14. Akapeea te angaanga tutu aere me akamatutu i to tatou akarongo?

 ¹⁴ Ka akamatutu katoa tatou i to tatou akarongo me rave tatou i te angaanga tutu aere. (Ebe. 10:23) Karanga ra a Barbara, tei tavini ia Iehova no tetai 70 mataiti e: “Kua kite mai au e kua riro te angaanga tutu aere ei akamatutu i toku akarongo. Me maata atu toku taime i te akakite ki tetai ke no ta Iehova au taputou umere, ka matutu atu toku akarongo.”

15. Akapeea ta tatou uaorai apii i te akamatutu anga i to tatou akarongo? (Akara katoa i te au tutu.)

¹⁵ Akamanako ana i tetai atu angaanga pae vaerua te ka akamatutu i to tatou akarongo: ta tatou uaorai apii. Kite mai a Susan e e meitaki tikai kia akapapa aia i tana apii. Karanga aia: “I te Tapati, ka apii au i te apii o tera atu epetoma no te Apii Punanga Tiaki. I te Monite e te Ruirua, ka akapapa au no te uipaanga epetoma. Te toenga o te au rā, ka rave au i taku uaorai apii kimikimianga.” Na te aru putuputu anga i te apii i akanooia, kua rauka ia Susan i te akamatutu i tona akarongo. Te akakite maira a Irene, tei tavini ana i ko i te opati maata o te Au Kite no tetai tuatau roa, e kua akamaroiroiia tona akarongo no te apii anga i te totou Pipiria. Karanga aia: “Umere tikai au e kua akatupuia ta Iehova au totou na roto i te au mea rikiriki.” c

“E TAE TIKA MAI ÏA”

16. E puapinga ainei tikai ta Iehova akapapu anga kia Habakuka no tatou i teia tuatau? (Ebera 10:36, 37)

¹⁶ Tetai au tavini o Iehova kua roa ratou i te tiaki anga e aea e ope ei teia akatereanga. Ta te tangata e manako ra, akara anga e te tavarevare nei a Iehova i te akatupu i tana taputou. Inara, kua kite a Iehova i teia no reira aia i akapapu ei ki te peroveta ko Habakuka e: “Te tuatau i  akonoia ra taua orama nei, ei te openga ra e tuatua mai ei e kare e pikikaa; roa oti, ka tapapa atu rai; e tae tika mai ïa, e kare e tavarevare.” (Haba. 2:3) Kua oronga mai ainei te Atua i taua akapapu anga no Habakuka ua? Me kare e puapinga ainei Tana Tuatua no tatou? Kua akauruia te apotetoro ko Paulo kia akakite i taua au tuatua ki te au Kerititiano, tei tapapa atu i tetai ao ou. (E tatau ia Ebera 10:36, 37.) Ae, papu tikai ia tatou e noatu e akara anga roa tei taputouia mai ka “tae tika mai ïa, e kare e tavarevare.”

17. Akapeea tetai tuaine te aru anga i te akoanga ta Iehova i oronga kia Habakuka?

¹⁷ E maata te au tavini o Iehova kua aru i ta Iehova akoanga kia “tapapa atu rai”​—noatu kua roa te tuatau. Ei akaraanga, kua akamata a Louise i te tavini ia Iehova i te 1939. Karanga aia: “I taua tuatau, kua manako au e ka tae mai a Aramagido i mua ake ka akamutu au i taku apii teitei. Kare te reira i tupu ana. I te au mataiti i aereia, kua kite mai au e e mea meitaki kia tatau au i taku i kapiki e ko ‘te au papaanga tapapaia’​—te au akakite anga a te Pipiria no Noa, Aberahama, Iosepha, e tetai atu aronga kua roa te tiaki anga kia rauka ia ratou ta Iehova akameitakianga tei taputouia mai. Te tapapa ua anga i te reira kua tauturu mai iaku e i tetai ke kia akamou ki runga i te ao ou e vaitata maira.” E maata te aronga tei tavini ia Iehova no tetai tuatau roa kua āriki ratou i te reira!

18. Akapeea te akara anga i te au mea i angaia ei akamatutu i to tatou akarongo no te ao ou e vaitata maira?

¹⁸ E tika, kare ake te ao ou i tae mai. Inara, ka akara ana i tetai au mea e kiteaia nei​—te au etu, te au rakau, te au animara, e te au tangata. Kare tetai e ekoko ana i te reira, noatu e i tetai taime kare te reira i vai ana. Te kite nei tatou ia ratou no te mea na Iehova i anga mai i te reira. (Gene. 1:1, 26, 27) Kua taputou katoa mai to tatou Atua e ka akatinamou aia i tetai ao ou. Ka akatupu aia i taua taputou. I roto i te ao ou, ka mataora te tangata i tetai oraanga ope kore ma te kopapa meitaki. I te tuatau tei tau ki te Atua, ka riro mai te ao ou ei mea tika tikai mei te ao takapini ia tatou i teia tuatau.​—Isa. 65:17; Apo. 21:3, 4.

19. Akapeea koe me akamatutu i toou akarongo?

¹⁹ I teianei, e tauta i te akamatutu i toou akarongo. E āriki rekareka i te oko. E akamanako i to Iehova mana. E rave i te au angaanga pae vaerua. Me rave koe i te reira, ko koe tetai i roto “i te aronga i rauka tei tuatuaia maira i te akarongo e te akakoromaki.”​—Ebe. 6:11, 12; Roma 5:5.