1. Eaa tei papu ia tatou?

 EI ITI tangata no Iehova, kua kite tatou e te akaperepere maira aia ia tatou e kua inangaro i te oraanga meitaki no tatou. (Roma 8:35-39) Papu katoa ia tatou e ka puapingaia tatou me aru i te au kaveinga Pipiria. (Isa. 48:17, 18) Akapeea me tupu poitirere ua mai te au manamanata?

2. Eaa te au manamanata ka tupu kia tatou, e eaa ta teia ka akatupu kia manako tatou?

² E tupu ana te manamanata ki te au tavini o Iehova. Ei akaraanga, ka mamae tatou no te tu o tetai mema o te ngutuare. Penei ka tupu te maki te ka akaiti i ta tatou angaanga na Iehova. Penei ka na roto tatou i te au tumatetenga natura. E penei ka takinokinoia tatou no to tatou irinakianga. Me tupu teia au manamanata kia tatou, ka manako tatou e: ‘Eaa teia i tupu ei kiaku? Kua rave ainei au i te kino? Te akaari maira teia e kare a Iehova e akameitaki mai ana iaku?’ I manako ana koe mei tera rai? Eiaa e taitaia. E manganui te au tavini tiratiratu o Iehova tei na roto ana i teia au turanga.​—Sala. 22:1, 2; Haba. 1:2, 3.

3. Eaa ta tatou ka kite mai mei ia Salamo 34:19?

³ E tatau ia Salamo 34:19. Akara ana e rua manako puapinga i roto i teia salamo: (1) E tupu ana te manamanata ki te au tangata tuatua tika. (2) Ka akaora a Iehova ia tatou mei te reira. Akapeea aia me rave i teia? Tetai mataara ka tauturu aia kia rauka ia tatou te manako tau no teia akatereanga. Akakite mai a Iehova e ka mataora tatou i te tavini iaia inara ka tupu rai te oraanga manamanata kia tatou. (Isa. 66:14) Akamaroiroi aia ia tatou kia akara ki mua​—ki te oraanga tana i inangaro no tatou  kia rekareka e tuatau ua atu. (2 Kori. 4:16-18) I teianei, ka tauturu aia ia tatou kia kore e tuku i te ’au i te au rā ravarai.​—Aue. 3:22-24.

4. Eaa ta tatou ka uriuri i teia atikara?

⁴ Ka uriuri ana tatou i te au apiianga mei te akaraanga o te au tavini tiratiratu o Iehova, i te tuatau Pipiria e to tatou tuatau. Mei ta tatou ka kite mai, ka tupu ua te manamanata kia tatou. Me irinaki ra tatou kia Iehova, ka tauturu ua rai aia ia tatou. (Sala. 55:22) Ia tatou e uriuri nei i teia au akaraanga, e ui: ‘Eaa toku manako me tupu teia turanga kiaku? Akapeea teia akaraanga me akamaroiroi i toku irinakianga ia Iehova? Eaa te au apiianga ka taangaanga au?’

5. Eaa te manamanata tei tupu ua kia Iakoba no ta Labana i rave? (Akara i te tutu i te kapi mua.)

⁵ Kua tupu ua te au manamanata ki te au tavini o Iehova i te tuatau Pipiria. Akara ana ia Iakoba. Kua akaueia aia e tona metua tane kia rave mai i tetai vaine mei te au tamariki tamaine a Labana, e kopu tangata akamori, e ka akameitaki a Iehova iaia. (Gene. 28:1-4) Kua rave a Iakoba i te reira. Kua akaruke aia i te enua o Kanaana e kua teretere atu ki te enua o Labana, e rua ana nga tamaine​—ko Lea e Rahela. Kua inangaro a Iakoba i te tamaine openga a Labana, ko Rahela, e kua angaanga no tetai itu mataiti i te akaipoipo iaia. (Gene. 29:18) Inara kare te reira i tupu ana mei ta Iakoba i manako. Kua pikikaaia aia e Labana kia akaipoipo i te tamaine mua, ko Lea. Kua akatika a Labana kia akaipoipo a Iakoba ia Rahela no tetai itu akaou mataiti. (Gene. 29:25-27) Kua pikikaa katoa a Labana iaia i roto i tana angaanga pitiniti kia Iakoba. I te katoaanga, kua pikipikikaa a Labana ia Iakoba no tetai 20 mataiti!​—Gene. 31:41, 42.

6. Eaa atu tetai manamanata ta Iakoba i akakoromaki?

⁶ Kua akakoromaki a Iakoba i te au manamanata tukeke. E ākā ngutuare maatamaata tona, inara kare tana au tamariki tamaroa i mataora ana i tetai e tetai. Kua oko ratou i to ratou teina ko Iosepha ei tuikaa. E rua tamaroa a Iakoba, ko Simeona e Levi, kua apai mai i te kino ki te kopu tangata e ki to Iehova ingoa. E tetai katoa, kua mate te vaine akaperepere a Iakoba, ko Rahela, iaia e anau ra i te rua o ta ratou tamaiti. No te pakari o te onge, kua neke atu a Iakoba ki te enua o Aiphiti i tona ruaine anga.​—Gene. 34:30; 35:16-19; 37:28; 45:9-11, 28.

7. Akapeea a Iehova i te akaari anga kia Iakoba Tona marekaanga?

⁷ Noatu teia au tupuanga, kua irinaki ua rai a Iakoba kia Iehova e Tana au taputou katoa. Aru mai, kua akaari a Iehova kia Iakoba Tona marekaanga. Ei akaraanga, noatu te tu pikikaa o Labana, kua akameitaki ua a Iehova ia Iakoba i te pae kopapa. E kua mataora a Iakoba ia Iehova i te kite akaou anga aia ia Iosepha​—tana i manako ana e kua mate! Kua akariro to Iakoba pirianga oa kia Iehova kia akakoromaki aia i tona au manamanata tukeke. (Gene. 30:43; 32:9, 10; 46:28-30) Me piri vaitata tatou kia Iehova, ka autu tatou i te au manamanata.

8. Eaa ta te Ariki ko Davida i inangaro i te rave?

⁸ Kare e rauka i te Ariki ko Davida i te rave i te au angaanga pouroa no te tavini anga ia Iehova. Ei akaraanga, kua inangaro a Davida i te pātu i te iero no tona  Atua. Kua akakite aia i teia ki te peroveta ko Natana. I te pau anga, kua karanga atu a Natana: “Ko ta to ngakau e manako ra, e rave ia; tei ia koe oki te Atua.” (1 Para. 17:1, 2) Kua riro te reira au tuatua ei akamaroiroi maata ia Davida. Penei kua akapapa aia i te parani no teia angaanga puapinga.

9. Eaa to Davida manako no te nuti maromaroa?

⁹ Kare i roa kua oki mai ta Iehova peroveta ma te nuti maromaroa. “Kia tae ra ki te reira po,” kua akakite a Iehova kia Natana kare e na Davida e pātu i te iero; mari ra, na tetai o tana au tamaiti e rave. (1 Para. 17:3, 4, 11, 12) Eaa to Davida manako i teia karere? Kua akatanotano aia i tona akakoroanga. Kua akapou aia i tona tuatau no te akaputu i te au moni e te au apinga ka anoanoia e tana tamaiti ko Solomona no te angaanga pātu anga.​—1 Para. 29:1-5.

10. Akapeea a Iehova te akameitakianga ia Davida?

¹⁰ Muri ake i te akakite anga kia Davida e kare aia e pātu i te iero, kua papau a Iehova i tetai koreromotu kiaia. Kua taputou a Iehova kia Davida e ka tutara tetai o tana uanga e tuatau ua atu. (2 Samu. 7:16) I te ao ou, akamanako ana i to Davida mataora me kite mai aia e te rekareka ra aia i te oraanga i raro ake i te Tutara Anga Tauatini Mataiti a Iesu, e Ariki mei tona kopu! Te tauturu mai nei teia akaraanga ia tatou me kare e rauka ia tatou te rave i tei anoanoia no Iehova, penei e akameitakianga ke ta Iehova no tatou.

11. Akapeea te au Kerititiano o te anere mataiti mua i te akameitakiia anga noatu kare te Patireia i tae mai mei ta ratou i manako ana? (Angaanga 6:7)

¹¹ Kua tupu rai te manamanata ki te au Kerititiano o te anere mataiti mua. Ei akatauanga, kua tapapa ratou no te Patireia o te Atua kia tae mai, inara kare ratou i kite e aea te reira e tupu ei. (Anga. 1:6, 7) Eaa i reira ta ratou i rave? Kua rave maroiroi ratou i te angaanga tutu aere. I te nuti meitaki e akakiteia ra, kua kite atu ratou i te au akapapuanga e te akameitaki ra a Iehova i ta ratou angaanga.​—E tatau ia Angaanga 6:7.

12. Eaa ta te au Kerititiano o te anere mataiti mua i rave te tupu anga te onge?

¹² I tetai atianga, kua tupu te onge maata “i te pa enua ravarai.” (Anga. 11:28) Kua tupu rai te reira ki te au Kerititiano o te anere mataiti mua. Akamanako ana e kua tupu te mamae kia ratou no te rava kore i te kai. Kua taitaia te au upoko ngutuare akapeea e rauka ai te kai ei angai i to ratou ngutuare. Akapeea te au mapu tei inangaro i te tutu aere i te au ngai ke? Penei kua manako ratou e kare ratou e rave i te reira? Noatu to ratou au turanga, kua akatanotano te au Kerititiano ki te reira. Kua tutu aere ua atu ratou, e kua tuʼa ma te mataora i ta ratou au apinga ki te au taeake irinaki i Iudea.​—Anga. 11:29, 30.

13. Eaa te au akameitakianga tei tupu ki te au Kerititiano i te tuatau onge?

¹³ Eaa te au akameitakianga tei tupu ki te au Kerititiano i te tuatau onge? Kua kite te aronga tei rauka ia ratou te au apinga i to Iehova rima tauturu. (Mata. 6:31-33) Penei kua akapiri vaitata ratou ki to ratou au taeake irinaki tei tauturu mai. Kua kite te aronga tei oronga ua mai e tei rave i te au angaanga pātu anga i te mataora mei te oronga anga. (Anga. 20:35) Kua akameitaki a Iehova ia ratou katoatoa tei akatanotano ki to ratou turanga ou.

14. Eaa tei tupu kia Banaba e Paulo, e eaa te akameitakianga? (Angaanga 14:21, 22)

 ¹⁴ E takinga kino uaia ana te au Kerititiano o te anere mataiti mua, i tetai au taime kare i manakoia ana. Akamanako ana i tei tupu kia Banaba e Paulo ia raua e tutu aere ra i Lusetera. I te akamataanga, kua āriki pumaanaia raua e te aronga tei akarongo atura. Inara i muri mai, kua “akanauru atura [te aronga patoi] i taua aronga ra,” e tetai ia ratou kua peî i te toka kia Paulo e kua akaruke iaia kia mate. (Anga. 14:19) Inara kua tutu aere ua rai a Banaba raua ko Paulo ki tetai ngai ke. Eaa te akameitakianga? E “manganui oki tei apiiia,” e kua riro ta raua au tuatua e te akaraanga ei akamaroiroi i to raua au taeake irinaki. (E tatau ia Angaanga 14:21, 22.) E manganui tei puapingaia no te mea kare a Banaba raua ko Paulo i tuku i te ’au noatu te takinokino anga. Me kare tatou e tuku i te ’au no te rave i ta Iehova angaanga, ka akameitakiia rai tatou.

15. Eaa taau i apii mai mei te akaraanga o te Taeake ko A. H. Macmillan?

¹⁵ I te au mataiti aere ua atu ki te 1914, kua tapapa te iti tangata o Iehova i tetai au mea kia tupu. Ei akaraanga, akamanako ana i te Taeake ko A. H. Macmillan. Mei te manganui o te reira tuatau, kua manako te Taeake ko Macmillan e ka rauka vave mai tana tutaki anga i te rangi. Iaia e oronga ra i tetai akoanga ia Tepetema 1914, karanga aia: “Penei ko teia taku akoanga openga ka oronga atu ki te katoatoa.” Kare ra te reira i tupu ana. I muri mai kua tata te Taeake ko Macmillan e: “Penei kua rapurapu tetai pae ia matou i te manako e ka aere vave matou ki te rangi.” Karanga katoa aia: “Te angaanga meitaki kia rave matou koia oki kia rave maroiroi i te angaanga a te Atu.” Kua rave rai te Taeake ko Macmillan i te reira. Kua maroiroi aia i te angaanga tutu aere. Kua akamaroiroi i te au taeake e manganui i roto i te are auri kia vai takake. E kua aere putuputu ki te au uipaanga i tona au mataiti ruaine anga. Akapeea te Taeake ko Macmillan i te puapinga anga mei te akapou meitaki anga i tona tuatau iaia e tapapa marie ra i tana tutaki? I mua ake i tona mate anga i te 1966, kua tata aia: “Maroiroi tikai toku akarongo i teianei mei to mua ana.” E akaraanga meitaki tikai aia no tatou​—i te mea e te akakoromaki nei tatou no tetai tuatau roa!​—Ebe. 13:7.

16. Eaa te au manamanata tei tupu kia Herbert Jennings e tana vaine? (Iakobo 4:14)

¹⁶ E manganui te iti tangata o Iehova te akakoromaki ra i te au manamanata kino i te pae kopapa. Ei akaraanga, i roto i tona oraanga, kua akakite mai te Taeake ko Herbert Jennings b i to raua mataora ko tana vaine i ta raua angaanga mitinari i Ghana. Aere ua rai, kua kiteaia mai e e maki kino pakari tikai tona. Te taikuanga i te au tuatua o Iakobo 4:14, kua kapiki te Taeake ko Jennings i teia tupuanga “e ‘apopo’ kare maua i tapapa ana.” (E tatau.) Kua tata aia: “Te āriki anga i tei tupu, kua akapapa maua i te akaruke ia Ghana e to maua au taeake piri vaitata no te oki atu ki Kanata [kia rapakauia].” Kua tauturu a Iehova i te Taeake ko Jennings e tana vaine kia tavini iaia ma te tiratiratu noatu te manamanata o te maki.

17. Akapeea te akaraanga o te Taeake ko Jennings i te akamaroiroi i te au taeake?

¹⁷ Kua riro te au manako tika o te Taeake ko Jennings i roto i tona tua oraanga  ei akamaroiroi tikai i tetai pae. Kua tata mai tetai tuaine: “Kua pakia tikai toku ngakau i te tatau anga au i teia atikara. . . . Te tatau anga e kua akaruke te Taeake ko Jennings i tana angaanga no te akono i tona maki, kua tauturu iaku kia akamanako meitaki katoa i toku turanga.” Pera katoa, kua tata mai tetai taeake e: “Muri mai i te tavini anga ei tangata pakari i roto i te putuputuanga no tetai tai ngauru mataiti, kua akaruke au i te reira akameitakianga no toku maki manako. Pakari tikai toku manako puapinga kore iaku e kua riro ei akateiaa iaku i te tatau i te au atikara tua oraanga. . . . Inara kua riro te tu tamou marie o te Taeake ko Jennings ei akamaroiroi iaku.” Te akamaara mai nei teia kia tatou e me akakoromaki tatou i te au manamanata, ka akamaroiroi katoa tatou i tetai pae. Noatu me ka tupu ua mai tetai manamanata, ka riro rai tatou ei akaraanga meitaki no te akarongo e kia tamou marie.​—1 Pete. 5:9.

18. Mei tei akaariia mai e te tutu, eaa ta tatou i apii mai mei te akaraanga o te vaine takaua i Nigeria?

¹⁸ Kua tupu te au tumatetenga mei te maki kino COVID-19 ki te manganui o te iti tangata o Iehova. Ei akaraanga, ko tetai vaine takaua i Nigeria kare i rava ana tana kai. I tetai popongi, kua ui tana tamaine kiaia i ta raua ka kai i muri ake i te tunu anga i ta raua kapu raiti openga. Kua akakite te tuaine ki tana tamaine kare a raua moni e kare katoa e kai inara kia aru raua i te akaraanga o te vaine takaua o Zarephata​—ka akapapa i ta raua kai openga e kia irinaki pu kia Iehova no te tauturu. (1 Ari. 17:8-16) I mua ake ka manako akapera raua no ta raua ka kai i tera rā, kua tae mai te au apinga tauturu mei te au taeake akarongo. Kua rava te au kai no tetai rua epetoma mei ta raua apinga tauturu. Karanga mai te tuaine  kare aia i manako ana e te vaitata ra a Iehova i te akarongo ua mai i tana tuatua ki tana tamaine. Ae, me irinaki tatou kia Iehova ka riro to tatou manamanata i te oraanga ei akavaitata ia tatou kiaia.​—1 Pete. 5:6, 7.

19. Eaa te takinga kino anga ta Aleksey Yershov i akakoromaki?

¹⁹ I te au mataiti akenei, e manganui to tatou au taeake e te au tuaine tei akakoromaki ua i te au takinga kino anga. Akamanako ana i te akaraanga o te Taeake Aleksey Yershov, i Rutia. Kua rauka te tu rangatira i te iti tangata o Iehova i te papetitoia anga te Taeake ko Yershov i te 1994. Inara i te au mataiti i aereia mai kua taui te turanga i Rutia. I te 2020, kua tomoia e kua eruia te kainga o te Taeake ko Yershov, e kua raveia tana au apinga. I nga marama i muri mai, kua akaapa te kavamani iaia no te au angaanga kino. Ei akakino atu te turanga, kua rauka mai te au akaapa anga mei tetai vitio tei neneiia e tetai tangata tei akavare e te inangaro ra aia i te apii i te Pipiria no tetai mataiti. E angaanga kino tikai!

20. Akapeea te Taeake ko Yershov i te akamaroiroi anga i tona pirianga kia Iehova?

²⁰ E apinga meitaki ainei tetai tei tupu ki te Taeake ko Yershov? Ae. Kua maroiroi tona pirianga kia Iehova. “E pure putuputu ana maua ko taku vaine,” karanga ai aia. “Kite mai au e kare e rauka iaku te akakoromaki i teia mari ua ake te tauturu a Iehova.” E oti: “Kua tauturu taku apii naku uaorai iaku kia akakoromaki i te au manako paruparu. Kua akamanako au i te au akaraanga o te au tavini tiratiratu o mua ana. E maata te au akaraanga tei tataia i roto i te Pipiria kia apii mai iaku te puapinga kia noo maru ma te irinaki tikai ia Iehova.”

21. Eaa ta tatou i apii mai mei teia atikara?

²¹ Eaa ta tatou i apii mai mei teia atikara? Ka tupu ua te manamanata i roto i teia akatereanga. Noatu te reira ka tauturu ua rai a Iehova i tona au tavini me irinaki ratou kiaia. Mei ta tatou tumu irava e karanga ra, e “manganui to te tangata tuatua-tika ra mate; e akaoraia ra aia e Iehova i taua au mea katoa ra.” (Sala. 34:19) Kia akara ua rai tatou ki to Iehova mana akaora no te tauturu. Mei ia Paulo rai, ka tuatua tatou: “E tika iaku te au mea ravarai nei i te Mesia, ko tei akamaroiroi mai iaku nei.”​—Phili. 4:13.