Kua anauia au i te 1955, e ko au to matou openga i te au tamaroa e toru. Kua maata mai au i te pae taatai i Finland i roto i te oire ko Vantaa.

Kua papetitoia toku mami ei Kite no Iehova e rua mataiti i mua ake ka anauia ai au. Inara, kua patoi toku tati i te tuatua mou e kare aia i akatika ia mami kia apii i te Pipiria kia matou e kia aru matou iaia ki te au uipaanga. No reira ka apii ua a mami i te Pipiria kia matou me kare a tati i te kainga.

Mei toku tamariki anga, kua iki au i te tavini ia Iehova. Ei akaraanga e itu oku mataiti, kua riri tikai toku puapii no tei patoi au i te kai i te verilättyjä (koia oki e varaoa varaipani kairoia ki te toto). Kua roromi aia i toku paparinga, e kua tauta i te tāru i te reira kai ki roto i toku vaa. Inara kua rauka iaku i te rutu atu i tona rima.

I toku 12 mataiti, kua takake toku tati. Kua rauka i reira iaku i te aere ki te au uipaanga. Kua akaari te au taeake i to ratou aroa kiaku, e kua akamaroiroi iaku i te pae vaerua. Kua akamata au i te tatau i te Pipiria i te au rā e te apii i te au puka Pipiria. Na roto i teia au ravenga meitaki, kua papetitoia au i te rā 8 o Aukute, 1969, e 14 oku mataiti.

 Te akaoti anga taku apii tua rua, kua akamata au i te painia tamou. E rua epetoma i muri mai, kua neke au ki te ngai tei anoanoia te tauturu i Pielavesi, vaitata atu i rotopu ia Finland.

I Pielavesi, kua aravei au i taku vaine akaperepere ko Sirkka. No tona tu akaaka e tona aroa maata ia Iehova, kua inangaro au iaia. Kare aia i kimi puapinga nona uaorai e te au apinga materia. Ko to maua anoano kia tavini pu ia Iehova e te rave i tetai ua atu angaanga ta te akaaerenga ka oronga mai. Kua akaipoipo maua ia Mati 23, 1974. Kare maua i aere ana ki to maua honeymoon, mari ra kua neke maua ki tetai ngai tei anoano maataia te tauturu a te aronga tutu evangeria i Karttula.

Mei to maua akaipoipoanga, kua akaari mai a Iehova e ka akono aia ia maua me kimi maua i tona Patireia na mua. (Mata. 6:33) Ei akaraanga i Karttula kare o maua motoka. I te akamataanga, kua na runga maua i te patikara takatakai. Inara, e anu tikai te reva me tae ki te tuatau anu. No reira kua inangaroia tetai motoka no maua kia tutu aere. Kare ra e peke ia maua i te oko i te reira.

Te mea poitirere, kua atoro mai toku tuakana ia maua e kua akaruke i tona motoka no maua. Kua tutaki aia i te insurance. E tai ua a maua ko te tutaki i te penitini. Na teia mataara, kua tu maua i te motoka.

Kua akapapu a Iehova e ka akono aia ia maua. Ko ta maua angaanga ka rave, ko te tuku i te Patireia na mua.

Ia maua i ko i te Apii na te au Painia i te 1978, kua akamaroiroi to matou puapii ko Raimo Kuokkanen a ia maua kia akakī i te patianga no te aere ki te Apii Gileada. Kua apii maua i te reo Papaa kia rauka ia maua i te aere atu ki te reira apii. Inara i te 1980, kua patiia maua kia tavini ki ko i te opati Betela i Finland. I tera tuatau, kare e akatikaia te au taeake i Betela kia aere ki te Apii Gileada. No reira, kua iki maua i te tavini ki te ngai ta Iehova e anoano maira e kare ki ta maua i inangaro. Kua āriki maua i te  patianga no te aere ki Betela. Noatu ra kua apii ua rai maua i te reo Papaa e ua ake ka ārikiia maua kia aere ki te Apii Gileada.

I te au mataiti i muri mai, kua akatika te Pupu Akaaere i te au taeake i Betela kia aere ki te Apii Gileada. Kua tuku atu maua i te patianga, kare ra no te mea kua mareka kore maua i te tavini i Betela. Mataora tikai maua i reira! Kua inangaro ra maua i te tavini ki tetai ngai ka anoano maataia te tauturu. Tei tupu, kua ārikiia ta maua patianga e kua ō atu maua ki roto i te pupu apii 79 o Gileada ia Tepetema 1985. E oti kua tavini maua i Colombia.

Mea mua, kua tavini maua i ko i te opati Betela i Colombia. Kua aruaru au i te angaanga pakari i Betela, inara e tai mataiti i muri mai kua inangaro au i te taui i taku angaanga. Ko tera ua rai te taime i pati ei au i tetai angaanga ke atu. Kare i roa ana, kua tavini maua ei nga mitinari i te oire o Neiva i Huila.

E reka ua ana au i te angaanga tutu aere. Ei painia i Finland i mua ake ka akaipoipo ei au, ka tutu aere au i te popongi maiata e tae ua atu ki te aiai me akamata i te poiri. Ei nga tokorua akaipoipo, kua tutu aere maua ko Sirkka i te au rā ravarai. I tetai au atianga me tutu aere maua i te ngai mamao, ka moe ua maua ki roto i te motoka. Kare i reira e anoanoia kia akaoro mamao e ka akamata vave maua i te tutu aere i tera mai popongi.

Ei nga mitinari, kua mataora tikai maua i te rave akaou i te angaanga tutu aere. Kua maata mai te tangata i roto i te putuputuanga, e kua akaari ua rai te au taeake e te au tuaine i Colombia i te tu akangateitei, aroa e te āriki rekareka.

I te pae mai i te ngai e tavini ra maua i Neiva, e au oire tetai kare e Au Kite i reira. Kua manata au akapeea te nuti meitaki e taeria ai ki tera au oire. No te mea te tupu ra te tamaki i reira, kare i te ngai meitaki no te aronga turoto. No reira kua pure au kia riro mai tetai tangata i tera oire ei Kite. Kua manako mai au e ka anoanoia tetai tangata e noo ra i Neiva kia apii i te tuatua mou. E oti kua pure akaou au kia papetitoia aia, kia tukatau ei Kerititiano, e kia oki aia ki tona oire no te tutu aere. Inara e ravenga meitaki atu ta Iehova i akanoo ki taku e manako ra.

Kare i roa i muri mai, kua akamata au i te apii Pipiria ki tetai mapu tane ko Fernando González. Te noo ra aia ki Algeciras, ko tetai o te au oire kare e Kite i reira. Ka teretere a Fernando e 50 kiromita ki Neiva no tana angaanga. Ka akapapa meitaki aia no ta maua apii e ka tae mai aia ki te au uipaanga. Mei te epetoma mua o tana apii, kua taokotai a Fernando i te au tangata i tona oire, e kua akakite atu i tana i tamou mei tana apii Pipiria.

Kua papetitoia a Fernando ia Tianuare 1990, e ono marama i muri ake i tana apii mua. E oti, kua riro mai aia ei painia tamou. No te mea e Kite tetai i Algeciras,  kua tuku te opati Betela i te au painia takake kia tavini i tera oire. Ia Peperuare 1992, kua akamataia tetai putuputuanga.

Kua akamutu ainei a Fernando i te tutu aere i tona oire? Kare! Te akaipoipo anga aia, kua neke raua ko tana vaine ki San Vicente del Caguán, e oire kare e Au Kite i reira. Kua tauturu raua i te akamata i tetai putuputuanga i reira. I te 2002, kua ikiia a Fernando ei akaaere kotinga e te tavini nei raua ko tana vaine ko Olga i roto i te angaanga tutaka e tae ua mai ki teia rā.

Mei teia au tupuanga, kua kite au i te puapinga kia akataka meitaki i ta tatou ka pati me pure tatou. Ka rave a Iehova i te au mea kare e rauka ia tatou i te rave. No te mea nana teia angaanga e kare na tatou.—Mata. 9:38.

I te 1990, kua tavini au ei akaaere tutaka. Ko ta maua kotinga mua i tavini ei, ko te oire maata ko Bogotá. Kua mataku maua e kare e rave meitakiia te angaanga. E tu tangata ua to maua ko taku vaine e kare o maua tareni e te tu karape. Kare katoa maua i mātau i te noo ki tetai oire maata kua kī i te tangata. Inara, kua taputou mai a Iehova i roto ia Philipi 2:13: “Ko te Atua oki tei angaanga ki roto ia kotou, i te inangaro e te rave, mei tana i anoano ra.”

I muri mai, kua tavini maua i roto i te kotinga i te oire ko Medellín, tei taikuia i te akamataanga. Kua mātau ua te tangata i tera ngai i te kino e kare i poitirere i te reira. Ei akaraanga, i tetai rā te apii ra maua ko tetai tangata i te Pipiria, kua akamata tetai aronga i vao i tona are i te pupui i tetai e tetai. Kua akatopa au iaku ki te taua, inara kua noo maru ua te tangata apii e kua tatau ua atu i te parakarapa. Te akaoti anga tana tatau, kua tu aia e kua aere kia vao. Kare i roa, kua oki mai aia e tana nga tamariki meangiti. Kua pau maru mai aia, “Akakoromaki ana, no te tiki au i taku tamariki.”

E au atianga ke atu tetai mei rokoia rai maua e te tumatetenga. Te tutu aere ra maua mei tera are ki tera are, kua oro mai taku vaine ma te ruketekete. Akakite mai aia e kua tauta tetai tangata i te pupui iaia. Kua mataku tikai au. Inara i muri mai, kua kite maua e kare teia tangata e pupui ra ia Sirkka; mari ra ko tetai tangata ke i te pae mai iaia.

Aere ua rai, kua mātau ua maua i teia au kino e tupu nei. Kua akamaroiroiia maua e te tu ngakau toa o te Au Kite i tera oire tei akakoromaki i teia au turanga ngatā e te tumatetenga. E akapapuanga te reira me kua tauturu a Iehova i teia au taeake, ka tauturu katoa aia ia maua. Kua akarongo maua ki te ako a te aronga pakari, kua vai matakite e kua irinaki maua kia Iehova no te tauturu.

E tika, kare i kino te au turanga mei ta maua i manako. I tetai rā, kua rongo au i tetai nga vaine e pekapeka ra i vao i tetai  are taku i atoro. Kare au e inangaro i te akarongo i ta raua karo, kua pati mai ra te pu ngutuare kia aere maua ki vao i tona porotito. Ko taku i kite mai e nga parrot teia e aru ra i te reo o te au vaine i tera oire.

I te 1997, kua ikiia au ei puapii no te Apii Tereni Anga Orometua. b E mataora ua ana au i te aere ki te au apii na te akaaerenga. Inara kare au i manako ana e ka rauka iaku teia apainga manea kia apii atu i tetai ke.

I muri mai, kua tavini au ei akaaere tapere. Te akamutu anga tera akanoonoo anga, kua tavini akaou au ei akaaere kotinga. Kua mataora au i te tavini ei puapii e ei akaaere tutaka no tetai 30 tuma mataiti. E maata ua atu te au akameitakianga taku i rauka mai no te rave i teia. Inara kare toku oraanga i aere maru ua. Ka akamārama atu au.

E tangata mārokiakia au e te manako papu iaku uaorai. Kua tauturu teia au tu iaku me na roto i te au turanga ngatā. Inara i tetai au atianga, kua tauta maata au i te akatikatika i te au manamanata i roto i te putuputuanga. Pera katoa kua marō au i tetai pae kia akaari i te tu aroa e te takinga meitaki ki tetai ke. Te mea maromaroa ra, kare au e akaari i te reira au tu.—Roma 7:​21-23.

No toku tu apa ua, kua manako puapinga kore au iaku uaorai. (Roma 7:24) I tetai atianga, kua akakite au kia Iehova na roto i te pure e e ngari ake kia akamutu maua i ta maua angaanga mitinari e kia oki ki Finland. I te reira aiai, kua aere au ki te uipaanga. Kua akamaroiroiia au no taku i akarongo e kua rave ua rai au i taku angaanga ma te akakoromaki i toku tu apa. E tae mai ki teia rā, pumaana toku ngakau i ta Iehova pauanga ki taku pure. Pera katoa, akaperepere tikai au iaia no tana tauturu kia autu au i toku tu paruparu.

Akameitaki tikai maua ko Sirkka ia Iehova no te tikaanga manea kia tavini iaia no tetai tuatau roa. Ka akameitaki katoa au ia Iehova no taku vaine aroa e te tiratiratu.

Kare e roa atu ana, ka taeria au ki te 70 mataiti e ka akamutu au i te tavini ei puapii e te akaaere tutaka. Inara, kare au e taitaia i tera tauianga. No teaa ra? No te mea kua irinaki pu tikai au e ko te mea maata kia Iehova, kia tavini iaia ma te akaaka e te akapaapaa iaia ma te ngakau aroa e te akameitaki. (Mika 6:8; Mare. 12:​32-34) Kia akangateitei atu ia Iehova, kare e anoanoia tetai angaanga puapinga kia kiteaia mai koe.

Me akamanako au i taku au angaanga i rave, kua kite mai au e kare au i ikiia no te mea e meitaki atu au i tetai ke; me kore no toku tu karape. Kare rava! Mari ra, no to Iehova tu aroa ua i rauka ai iaku teia au apainga manea. Kua iki aia iaku noatu toku tu paruparu. Kite mai au e na roto i te tauturu a Iehova i rauka ai iaku teia angaanga. Kua akamaroiroi a Iehova iaku noatu toku tu paruparu.—2 Kori. 12:9.