1. Eaa te manako o tetai pae no te angaanga tutu aere? (Akara katoa i te tutu.)

 EI ITI tangata no Iehova, ka tutu aere tatou no to tatou inangaro i to tatou Metua i te rangi e kia tauturu i te tangata kia kite iaia. E maata te au papuritia tei mataora i te angaanga tutu aere. Inara e ngatā i tetai pae te rave i te reira. Eaa te tumu? Penei kua akama tetai pae e kare ratou i tukatau i te tutu aere. Penei ka rū tetai pae i te aere ki te ngutuare o te tangata me kare ratou i patiia mai. Ka mataku tetai pae me patoiia ratou. Kua apiiia tetai pae auraka e akariri atu i tetai ke. Noatu e inangaro maata to ratou ia Iehova, e ngatā no teia au taeake e te au tuaine kia tutu aere i te nuti meitaki ki te aronga kare ratou i kite. Inara, kua kite ratou i te puapinga o teia angaanga, e ka rave putuputu ratou i te reira. E mea mataora kia Iehova!

2. Me kare koe e mataora i te angaanga tutu aere, eaa te ka tauturu ia koe auraka e taitaia?

² E ngatā ainei ia koe kia mataora i te tutu aere noatu teia au turanga? Auraka e taitaia. Penei te akaari ra koe i te tu akaaka e kare koe e manako maata ia koe uaorai. Kare katoa koe e inangaro i te akatupu pekapeka ki te tangata. E kare tetai ua atu tangata e inangaro kia patoiia me te tauta ra aia i te rave i te meitaki ki tetai ke. Kua kite toou Metua i te rangi i toou turanga, e ka tauturu mai aia ia koe. (Isa. 41:13) I teia atikara, ka uriuri tatou e rima ravenga akapeea koe me autu i teia au turanga e kia mataora i te angaanga tutu aere.

 KIA AKAMAROIROI TE TUATUA A TE ATUA IA KOE

3. Eaa tei tauturu i te peroveta ko Ieremia kia tutu aere ki tetai ke?

³ I te tuatau i aereia, kua akamaroiroi te karere a te Atua i tona au tavini, kia akaoti i ta ratou au apainga ngatā. E akamanako i te akaraanga o te peroveta ko Ieremia. Kua taitaia aia i te akakite anga a Iehova e kia tutu aere aia ki te ngati Iseraela. Karanga a Ieremia: “Kare au i kite i te tuatua: e tamaiti ua oki au nei.” (Iere. 1:6) Eaa tei tauturu iaia kia ngakau toa? Kua akamaroiroiia aia e ta Iehova tuatua. Karanga aia: “Riro atura ra mei te ai ka i roto i toku ngakau ra, kua popaniia ki roto i toku ra au ivi; roiroi akera au i te akakoromaki ua anga.” (Iere. 20:​8, 9) Noatu ka ngatā ia Ieremia i te tutu aere ki teia aronga, kua akamaroiroi te karere tana i akakite iaia kia rave i tana angaanga.

4. Eaa te ka tupu me tatau e me akamanako oonu tatou i te Tuatua a te Atua? (Kolosa 1:​9, 10)

⁴ Ka akamaroiroiia te au Kerititiano e te karere a te Atua. Te tata anga aia ki te putuputuanga i Kolosa, kua karanga te apotetoro ko Paulo e me apii ratou i to Iehova anoano, ka tau to ratou aerenga i te Atu e ka rave ratou i “te au angaanga meitaki katoa.” (E tatau ia Kolosa 1:​9, 10.) Ko teia angaanga meitaki te kapiti maira te tutu aere anga i te nuti meitaki. No reira me tatau e me akamanako oonu tatou i te Tuatua a te Atua, ka akamatutuia to tatou irinaki ia Iehova e ka mārama tatou i te tumu i puapinga ai kia tutu aereia te karere Patireia.

5. Akapeea tatou e puapinga ai mei ta tatou e tatau ra e te apii Pipiria?

⁵ Kia puapingaia e te Tuatua a te Atua, auraka tatou e rapurapu i te tatau, te apii e te akamanako oonu i te reira. Mari ra e aere marie. Me tatau koe i tetai irava e kare i mārama, eiaa e akaruke i te reira. E kimi i te aiteanga o te irava i roto i te Watch Tower Publications Index e te Research Guide for Jehovah’s Witnesses. Me rave koe i teia, ka akamaroiroiia toou irinaki e e tuatua mou te Tuatua a te Atua. (1 Tesa. 5:21) Mea papu, ka rekareka koe i te akakite i taau i apii mai ki tetai ke.

 E AKAPAPA MEITAKI NO TE ANGAANGA TUTU AERE

6. Eaa tatou ka akapapa meitaki ei no te angaanga tutu aere?

⁶ Me akapapa meitaki koe no te angaanga tutu aere, ka mama ua ia koe i te tutu aere ki te tangata. Kua akapapa a Iesu i tana au pipi, i mua ake ka tono ei aia ia ratou kia tutu aere. (Luka 10:​1-11) No te mea kua taangaanga ratou i ta Iesu i apii, e maata te angaanga meitaki i raveia e kua mataora ratou.—Luka 10:17.

7. Akapeea tatou me akapapa no te angaanga tutu aere? (Akara katoa i te tutu.)

⁷ Akapeea tatou me akapapa no te angaanga tutu aere? Ka anoanoia tatou kia akamanako meitaki eaa ta tatou ka tuatua. Me akamārama tatou i te tuatua mou, e mea meitaki kia akapapa tatou e rua me kore e toru manako no te tuatua atu ki te tangata. E oti e akamanako akapeea tatou me pau ia ratou, ma te akaari i te tu maru, te mata katakata e te oaoa.

8. Akapeea te au Kerititiano i aite ei ki te au āriki karakaraea tei taikuia e te apotetoro ko Paulo?

⁸ Kua akakite te apotetoro ko Paulo ki tona au taeake e te au tuaine Kerititiano: “Te āriki nei ra matou i taua apinga nei i te āriki karakaraea nei.” (2 Kori. 4:7) Eaa taua apinga nei? Ko te tutu aere anga i te karere Patireia te ka akaora i te tangata. (2 Kori. 4:1) Eaa te āriki karakaraea? Te akatutu ra te reira i te au tavini o te Atua, te akakite ra i te nuti meitaki ki tetai ke. I to Paulo tuatau, kua taangaanga te aronga okooko i te au āriki karakaraea ei apai i te au apinga mei te kai, te wina e te moni. Mei te reira rai, kua oronga mai a Iehova i te karere puapinga o te nuti meitaki kia tatou. Ma te tauturu a Iehova, ka akamaroiroiia tatou kia akakite aere i te karere ma te tiratiratu.

PURE KIA NGAKAU TOA

9. Akapeea tatou me autu i te mataku i te tangata me kare e ārikiia mai? (Akara katoa i te tutu.)

⁹ I tetai taime ka mataku tatou i te tangata me kare e ārikiia mai. Akapeea tatou me autu i te reira? Akamanako ana i te pure a te au apotetoro tei akoia auraka ratou e tutu aere. Kare ratou i mataku e kare i akamutu i te tutu aere mari  ra kua pati ratou kia Iehova “kia tuatua i te tuatua a te Atua ma te mataku kore.” E kua pau mai a Iehova i ta ratou pure. (Anga. 4:​18, 29, 31) Me mataku tatou i te tangata e me emiemi i te tutu aere, e pure kia Iehova. E pati Iaia kia akamatutu i toou inangaro no te tangata e kia kore e mataku i te tutu aere kia ratou.

10. Akapeea a Iehova me tauturu ia tatou kia riro ei au Kite nona? (Isaia 43:​10-12)

¹⁰ Kua iki a Iehova ia tatou kia riro ei au Kite nona, te taputou e te tauturu maira aia ia tatou kia ngakau toa. (E tatau ia Isaia 43:​10-12.) Kua oronga mai aia e ā ravenga ei tauturu ia tatou. Mea mua, te vaitata ua ra a Iesu kia tatou me tutu aere i te nuti meitaki. (Mata. 28:​18-20) Te rua, kua tono mai a Iehova i te au angera. (Apo. 14:6) Te toru, kua oronga mai a Iehova i tona vaerua tapu ei tauturu ia tatou kia akamaara i ta tatou i apii. (Ioa. 14:​25, 26) Te ā, kua oronga mai a Iehova i to tatou au taeake e te au tuaine. Ma te tauturu a Iehova e to tatou taokotai anga taeake ka rauka ia tatou i te tutu aere ma te ngakau toa.

KIA PAPA UA I TE TAUI, E KIA MANAKO PAPU

11. Eaa te taime tau ka aravei koe i te tangata i te ngutuare? (Akara katoa i te tutu.)

¹¹ Ka maromaroa ainei koe me kare e tangata i te kainga? E ui kia koe uaorai: ‘Teiea te tangata i teianei?’ (Anga. 16:13) ‘Tei te ngai angaanga ainei ratou, me tei te ngai okooko?’ Me koia ïa, ka rauka ainei ia koe i te tutu aere i te ngai tangata? Karanga tetai taeake ko Joshua, “Kua rauka iaku te au atianga no te tutu aere i ko i te au are toa e i te ngai paka anga motoka.” Kua aravei katoa raua ko tana vaine ko Bridget, i te au tangata i to ratou ngutuare me tutu aere i te aiai e pera i te avatea Tapati.—Ephe. 5:​15, 16.

12. Akapeea tatou i kite ei eaa ta te tangata i irinaki ra e te manako ra?

¹² Me kare te tangata e inangaro, e akamanako eaa ta ratou e irinaki ra e te manako ra. E taangaanga ana a Joshua e Bridget i te uianga i te kapi mua o te aenga pepa me akamata raua i te pukapuka ki te tangata. Ei akaraanga, me taangaanga raua i te aenga pepa Eaa toou  manako no runga i te Pipiria? karanga raua: “Irinaki tetai pae no ko mai i te Atua te Pipiria, tetai pae e puka na te tangata. Eaa toou manako?” Ka taki atu teia ki tetai pukapukaanga.

13. Akapeea tatou e puapinga ai me tutu aere noatu kare te tangata e akarongo mai? (Maseli 27:11)

¹³ Noatu kare te tangata e akarongo mai me tutu aere tatou, kua akatupu tatou i ta tatou i akakoro. Eaa te reira? Kua rave tatou i ta Iehova e tana Tamaiti i pati mai koia oki kia akakite i te nuti meitaki. (Anga. 10:42) Noatu kare e tangata i te kainga me kore kua patoiia ta tatou karere, ka rekareka tatou no te mea te akamareka ra tatou i to tatou Metua i te rangi.—E tatau ia Maseli 27:11.

14. Eaa tatou ka mataora ai me kite tetai papuritia ke i tetai tangata tei inangaro i te karere i te ngai tutu aere?

¹⁴ Ka mataora katoa tatou me aravei tetai papuritia i tetai tangata tei inangaro i te karere i te ngai tutu aere. Kua akaaite Te Punanga Tiaki i ta tatou angaanga ki te kimi anga i tetai tamaiti tei ngaro. E maata te ō maira no te kimi iaia i te au ngai ravarai. Me kitea mai te tamaiti, ka mataora te katoatoa. Mei te reira katoa, ka tauturu te katoatoa i tetai kia riro ei pipi na Iesu. Ka anoanoia te katoatoa kia tutu aere ki te tangata e te rekareka me aere mai tetai tangata ou ki te au uipaanga.

AKAMOU KI RUNGA I TOOU INANGARO IA IEHOVA E TOOU TANGATA TUPU

15. Ia Mataio 22:​37-39, akapeea tatou e mataora ai i te angaanga tutu aere? (Akara katoa i te tutu.)

¹⁵ Ka mataora tatou i te angaanga tutu aere me akamou ki runga i to tatou inangaro ia Iehova e te tangata tupu. (E tatau ia Mataio 22:​37-39.) E akamanako ana i to Iehova mataora te kite anga ia tatou e rave ra i te angaanga e te mataora me akamata tetai ke i te apii i te Pipiria! E akamaara katoa me āriki tetai i te karere e te tavini ia Iehova, ka ora ratou e tuatau ua atu.—Ioa. 6:40; 1 Timo. 4:16.

16. Akapeea tatou e mataora ai i te tutu aere me noo ua i te kainga e kare e rauka i te akaruke? Oronga mai i tetai akaraanga.

¹⁶ Kua anoanoia ainei koe kia noo ua i  te kainga e kare e rauka i te akaruke? Me koia ïa, e akamanako i taau ka rauka i te rave no toou inangaro ia Iehova e te tangata tupu. I te tuatau o te maki kino COVID-19, kare i rauka ia Samuel e Dania i te akaruke i to raua kainga. I tera taime, kua ringi putuputu raua i te tangata, tata i te au reta e te rave i te au apii Pipiria na runga i te Zoom. Kua tutu aere a Samuel ki te aronga tana i aravei i te aremaki iaia e rapakauia ra no tona cancer. Karanga aia: “Ka paruparu maua i te pae manako, pae kopapa e te pae vaerua me tupu te au manamanata. No reira, ka anoanoia tatou kia kimi i te mataora me tavini tatou ia Iehova.” I taua taime rai, kua topa a Dania ki raro e kare i rauka i te aaere no tetai toru marama. Kua taangaanga aia i te pereoo no tetai ono marama. Karanga a Dania: “Kua tauta au i te rave i taku ka rauka. Kua tutu aere au ki tetai neti tei atoro mai iaku e te aronga kave apinga ki to maua kainga. Kua pukapuka katoa maua ko tetai vaine angaanga i te ngai rapakau maki na runga i te tereponi.” Noatu kare i rauka ana ia Samuel e Dania i te rave i tetai au angaanga inara kua mataora raua i tei rauka ia raua i te rave.

17. Akapeea koe e puapinga ai mei teia au ravenga tei taikuia i roto i teia atikara?

¹⁷ E tauta tatou i te taangaanga i teia au ravenga e rima i roto i teia atikara. Kua akaaiteia teia au ravenga mei te au kai kua kairoia. Ka reka te reira i te kai me kairo pouroaia. Me taangaangaia teia, ka tauturu ia tatou kia kopae i te au manako tarevake e kia mataora i te angaanga tutu aere.