1. Koai ma tei tauturu i te akamata i te putuputuanga i Philipi?

TE TAE anga te apotetoro ko Paulo, Sila, Luka e Timoteo ki te oire ko Philipi o Roma, e maata ta ratou tangata i kite, tei inangaro i te karere o te Patireia. Kua tauturu teia au taeake maroiroi e a i te akamata i tetai putuputuanga, e kua akaputuputu mai te au pipi no te uipaanga, i te kainga o tetai vaine aroa taeake ko Ludia.—Anga. 16:40.

2. Eaa te manamanata tei tupu ki te putuputuanga?

² Kare i roa, kua tupu te manamanata ki teia putuputuanga. Kua akakeu a Satani i te au enemi o te tuatua mou, kia patoi pakari i te angaanga tutu aere a teia au Kerititiano tiratiratu. Kua opuia a Paulo raua ko Sila, kua pāpāia ki te rakau e kua tiria ki roto i te are auri. I muri ake i to raua tuku angaia ki vao, kua atoro atu raua i te au pipi ou e kua akamaroiroi ia ratou. Kua akaruke a Paulo, Sila, e Timoteo i te oire e kua noo atu a Luka. I teianei, eaa ta te putuputuanga ou ka rave? Ma te tauturu o te vaerua o Iehova, kua aruaru te au taeake ou i te tavini ia Iehova. (Phili. 2:12) Kua ngakau parau a Paulo ia ratou!

3. Mei tei akatakaia ia Philipi 1:9-11, eaa ta Paulo i pure?

³ Mei te tai ngauru mataiti i muri mai, kua tata a Paulo i tetai reta ki te putuputuanga i Philipi. Ia koe e tatau ra i te reta, ka kite viviki koe i to Paulo aroa no tona au taeake. Tata aia, “e anoano maata rava toku ia kotou ravarai ma te aroa ngakau o Iesu Mesia.” (Phili. 1:8) Kua tata aia kia ratou e kua pure no ratou. Kua pati aia kia Iehova kia tauturu  ia ratou kia maata ua atu rai te aroa, kia rave i te au mea e maata ua atu te meitaki, kia apa kore, auraka e akaturori i tetai ke, e kia akauua i te tuatua tika. Kare e ekoko anga e ka puapinga tatou mei te au tuatua pumaana a Paulo. No reira ka tatau tatou i ta Paulo i tata ki te au taeake i Philipi. (E tatau ia Philipi 1:9-11.) Ka akara tatou i te au manako tana i taiku e ka uriuri akapeea me taangaanga i te reira.

4. (a) Kia tau kia 1 Ioane 4:9, 10, akapeea a Iehova te akaari anga i tona aroa no tatou? (e) Eaa te maata i to tatou aroa no te Atua?

⁴ Kua akaari mai a Iehova i tona aroa maata no tatou, na te tono anga mai i tana Tamaiti ki te enua nei, kia mate no ta tatou ara. (E tatau ia 1 Ioane 4:9, 10.) Kua akakeu to te Atua aroa maata ia tatou kia aroa iaia. (Roma 5:8) Eaa te maata i to tatou aroa no te Atua? Pau a Iesu i te uianga i tona akakite anga ki tetai Pharisea: “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.” (Mata. 22:36, 37) Kia aroa tatou i te Atua ma te ngakau katoa. Ka inangaro tatou i to tatou aroa nona kia maata ua atu i te au rā. Akakite a Paulo ki to Philipi e ‘kia tupu e kia maata ua atu rai’ to ratou aroa. Eaa ta tatou ka rave kia maata ua atu to tatou aroa no te Atua?

5. Akapeea to tatou aroa e maata ua atu ei?

⁵ Ka anoanoia tatou kia kite i te Atua e rauka ai ia tatou i te aroa iaia. Karanga te Pipiria: “Ko tei kore e aroa ra, kare ïa i kite i te Atua; ko te Atua oki te aroa.” (1 Ioa. 4:8) Akakite mai te apotetoro ko Paulo e ka maata ua atu rai to tatou aroa no te Atua me rauka “te kite, e te utoa o te ngakau” no runga Iaia. (Phili. 1:9) I to tatou apii mua anga i te Pipiria, kua tupu te aroa no te Atua na roto i to tatou kite no tona au tu manea. Ko te maata atu i ta tatou ka apii no runga ia Iehova, ko te maata atu ïa to tatou aroa nona. No reira ka akariro tatou i te apii tamou i te Pipiria e te akamanako oonu i te Tuatua a te Atua, kia maata ua atu te meitaki i to tatou oraanga!—Phili. 2:16.

6. Kia tau kia 1 Ioane 4:11, 20, 21, akapeea to tatou aroa e maata atu ei?

⁶ Ka akakeu to te Atua aroa ia tatou kia aroa katoa i to tatou au taeake. (E tatau ia 1 Ioane 4:11, 20, 21.) Penei ka manako tatou e ka māmā ua i te aroa i to tatou au taeake e te au tuaine. Mei tera te tu, ka akamori tatou ia Iehova e ka tauta i te aru i tona au tu meitaki. Ka aru tatou i to Iesu akaraanga, e no tona aroa maata kua oronga mai aia i tona oraanga no tatou. Inara, penei ka ngata ia tatou i te aru i te akauenga kia aroa i tetai e tetai. Akamanako ana i te akaraanga o te putuputuanga i Philipi.

7. Eaa ta tatou ka apii mai mei ta Paulo akoanga ia Euodia e Sunetuke?

⁷ E nga tuaine maroiroi a Euodia e Sunetuke tei tavini kapiti ma te “rave katoa” i te angaanga ki te apotetoro ko Paulo. Inara, penei kua tupu te manamanata kia raua e kua tupu te ke i rotopu ia raua. I roto i tana reta ki te putuputuanga, kua taiku a Paulo ia Euodia e Sunetuke e kua oronga i te akoanga “kia okotai rai o raua ngakau.” (Phili. 4:2, 3) Kua akakeuia a Paulo kia ako i te putuputuanga: “E rave i te au mea ravarai ma te urutoe kore, e te taumāro kore.” (Phili. 2:14) Kare e ekoko anga, kua tauturu ta Paulo akoanga i teia nga tuaine tiratiratu e te putuputuanga katoa kia akaketaketa i to ratou aroa i tetai e tetai.

8. Eaa i ngata ei ia tatou kia aroa i te au taeake, e eaa te ka tauturu ia tatou?

 ⁸ Mei ia Euodia e Sunetuke, penei e ngata ia tatou i te aroa i to tatou au taeake, no te mea kua akara ua tatou i te tarevake. E tarevake ana tatou i te au rā ravarai. Me akamou tatou i to tatou manako ki runga i te au tarevake o tetai ke, ka kore to tatou aroa no ratou. Ei akaraanga, penei ka tupu te riri kia tatou me kua ngaropoina i tetai taeake i te tauturu mai i te tāmā i te Are Uipaanga Patireia. Me akamata tatou i te akapapa mai i te au tarevake o te taeake, ka kino atu to tatou riri e ka kore to tatou aroa iaia. Me e manamanata toou mei teia te tu, e akamanako i teia: Te kite maira a Iehova i to tatou tarevake e to te taeake. Inara, noatu teia au tarevake, te aroa maira aia i to tatou taeake e tatou katoa. No te reira tumu, ka anoanoia tatou kia aru i to Iehova tu aroa, e te akamanako i te au tu meitaki o te au taeake. Me aroa tatou i te au taeake, ka ketaketa atu to tatou tatua aroa e te taokotai.—Phili. 2:1, 2.

9. Eaa “te au mea e maata ua atu te meitaki” ta Paulo i taiku i roto i tana reta ki to Philipi?

⁹ Kua akauru te vaerua tapu ia Paulo kia tuatua ki te aronga i Philipi, koia oki te au Kerititiano pouroa—kia rave i “te au mea e maata ua atu te meitaki.” (Phili. 1:10) I roto i teia au mea e maata ua atu te meitaki, ko te akatapu anga i to Iehova ingoa, te akatupu anga i tona au akakoroanga, e te ‘au e te rotai anga o te putuputuanga. (Mata. 6:9, 10; Ioa. 13:35) Me riro teia au mea ei mea puapinga i roto i to tatou oraanga, te akaari ra tatou i to tatou aroa no Iehova.

10. Eaa ta tatou ka rave kia riro ei aronga tuatua mou?

¹⁰ Karanga katoa a Paulo kia riro tatou ei “aronga tuatua-mou.” Kare te aiteanga e kia apa kore tatou. Kare tatou e aite mei ia Iehova rai te apa kore. Inara ka akara a Iehova ia tatou ei aronga apa kore me rave tatou i te ka rauka, kia oonu atu to tatou aroa, e kia rave i te au mea e maata ua atu te meitaki. Tetai mataara no te akaari i to tatou aroa, na te kopae anga i te akaturori i tetai ke.

11. Eaa tatou ka kopae ei i te akaturori i tetai ke?

¹¹ Te ikuikuanga kia kopae i te akaturori i tetai ke, e akamatakite anga teia. Akapeea tatou me akaturori i tetai ke? Me iki tatou i te angaanga tamataora, to tatou kakau, e ta tatou ngai angaanga. Penei kare tatou e rave ra i tetai apinga tei akaapaia e Iehova. Inara, me ka riro ta tatou iki anga ei akaturori i te akava ngakau o tetai ke, e mea kino te reira. Karanga a Iesu e e ngari ake tatou kia riia tetai toka tavirianga ki runga i to tatou kaki, e kia akamaremoia ki raro i te moana me akaturori tatou i tana mamoe!—Mata. 18:6.

12. Eaa ta tatou ka apii mai mei te akaraanga o te nga tokorua painia?

¹² Akara akapeea tetai nga tokorua painia, te aru anga i ta Iesu akamatakiteanga. Kua tavini raua i roto i tetai putuputuanga e te nga tokorua tei papetito ouia, e kua utuutuia mai te reira nga tokorua ou i roto i tetai ngutuare, kua tureia te au mea pouroa. Irinaki teia nga tokorua ou e kare te au Kerititiano e aere ana ki te teata—noatu e e au teata meitaki teia. Kua poitirere raua e kua aere teia tokorua painia ki te teata. I muri mai, kare te tokorua painia i aere ana ki te teata, kia kite roa te tokorua ou i te tereni i to raua akava ngakau e kia kite i te tuke. (Ebe. 5:14) Na roto i ta raua i tuatua e i rave,  kua akaari te tokorua painia e te aroa ra raua i to raua taeake e te tuaine ou.—Roma 14:19-21; 1 Ioa. 3:18.

13. Akapeea tatou me akakeu i tetai kia rave i te ara?

¹³ Tetai mataara ke, penei ka akaturori tatou i tetai ke na roto i te akakeu anga iaia kia rave i te ara. Akapeea ra? Akamanako ana i teia turanga. I muri ake i te tauta anga, kua rauka i tetai tangata apii i te Pipiria i te akakore i tona kaki i te inu maata i te kava. Kua mārama aia e kare rava aia e inu kava akaou. E kua taui i tona oraanga kia tau aia kia papetitoia. I muri akera, kua pati mai tetai taeake iaia ki tetai tamataora anga e kua akakeu i te taeake ou kia āriki i te kava, i te tuatua anga: “E Kerititiano koe i teianei, tei ia koe to Iehova vaerua. Tetai ua o te vaerua tapu, ko te akono meitaki. Me e tu akono meitaki toou, ka rauka ia koe i te vaito i taau kava e inu ra.” Ka rauka ia tatou i te akamanako i te kino ka tupu mai me akarongo te taeake ou i teia akoanga tarevake!

14. Akapeea te au uipaanga Kerititiano me tauturu ia tatou kia taangaanga i te au ikuikuanga ia Philipi 1:10?

¹⁴ Ka tauturu te au uipaanga Kerititiano ia tatou kia taangaanga i te au ikuikuanga tei orongaia ia Philipi 1:10 na roto i tetai au mataara ke. Te mea mua, ka riro ta tatou uriuri anga pae vaerua i te au uipaanga ei mea puapinga kia Iehova. Te rua, ka apii tatou akapeea me riro mai ei aronga tuatua mou. E te toru, “kia maata [to tatou] aroa, e i te angaanga memeitaki ra.” (Ebe. 10:24, 25) Me akamaroiroiia tatou e te au  taeake, ka maata ua atu to tatou aroa no to tatou Atua e te au taeake. Me aroa tatou i te Atua e te au taeake, ka rave tatou i tei rauka ia tatou kia kopae i te akaturori i to tatou au taeake.

15. Eaa te aiteanga “kia akakiia oki i ta te tuatua-tika”?

¹⁵ Kua pure akatenga a Paulo “kia akakiia oki i ta te tuatua-tika” to Philipi. (Phili. 1:11) Kare e ekoko anga ka kapiti mai ki roto i teia “tuatua-tika,” te aroa no Iehova e tona iti tangata. Ka kapiti mai ta ratou tuatua anga i to ratou akarongo ki roto ia Iesu e to ratou manakonakoanga manea. Taangaanga a Philipi 2:15 i tetai akaou akatutuanga, ‘kia kakā mei te rama i teianei ao.’ E tau rai teia, no te mea kua kapiki a Iesu i tana au pipi ei “mārama o te ao nei.” (Mata. 5:14-16) Kua akaue katoa aia i tana au pipi e ‘e akariro i te tangata ei pipi,’ e kua karanga aia e ka riro ratou “ei kite oki . . . e tae ua atu ki te openga o te enua ra.” (Mata. 28:18-20; Anga. 1:8) Ka uua tatou i te “tuatua-tika” me piri maroiroi tatou ki roto i teia angaanga puapinga.

16. Akapeea a Philipi 1:12-14 te akaari mai anga e ka kakā tatou ei aronga rama, noatu te manamanata? (Akara i te tutu i te kapi mua.)

¹⁶ Noatu to tatou turanga, ka akakakā ua tatou mei te aronga rama rai. I tetai taime, ka riro te arairai anga ki ta tatou angaanga tutu aere, ei akatupu i tetai tuatau no tatou kia tutu ua atu rai i te nuti meitaki. Ei akaraanga, kua tapekaia te apotetoro ko Paulo i tona kainga i Roma, i tona tata anga i tana reta ki to Philipi. Inara kare tona turanga i tapupu ana iaia, mei te tutu aere anga ki te aronga tei tiaki iaia e te au manuiri. Kua tutu aere a Paulo ma te maroiroi, e kua riro teia ei akamaroiroi i te au taeake kia ngakau toa i te “apii i te tuatua [a te Atua] ma te mataku kore.”—E tatau ia Philipi 1:12-14; 4:22.

17. Oronga mai i tetai akaraanga o teia tuatau, kia tutu aere noatu te manamanata.

 ¹⁷ E maata te tuatau no to tatou au taeake e te au tuaine, kia aru i te akaraanga ngakau toa o Paulo. Te noo ra ratou i te au enua, kare e akatikaia i te tutu aere ki te ngai tangata e ki tera are ki tera are, no reira ka kimi ratou i te au mataara ke, kia akakite i te nuti meitaki. (Mata. 10:16-20) I tetai enua, kua akakite te akaaere kotinga e kia tutu aere te au papuritia tataki tai ki tana uaorai “tuanga ngai” te ka kapiti mai i tona kopu tangata, te au tangata tupu, te au oa apii, te au oa angaanga, e te au oa ke. I roto i te rua mataiti, kua maata mai te numero o te au putuputuanga o te reira kotinga. Penei kare tatou e noo ana i te enua kare e akatikaia te tutu aere ki te ngai tangata. Inara, ka apii tatou i tetai apiianga puapinga mei te akaraanga o teia au taeake e te au tuaine: E kimi ua rai i te au ravenga no te tutu aere, ma te irinaki e ka oronga mai a Iehova i te maroiroi noatu te manamanata.—Phili. 2:13.

18. Eaa ta tatou ka aruaru i te rave?

¹⁸ I teia taime tikai, kia aruaru ua atu tatou i te taangaanga i te akoanga akauruia i roto i ta Paulo reta ki to Philipi. Kia rave tatou i te au mea e maata ua atu te meitaki, kia riro ei aronga tuatua mou, auraka e akaturori i tetai ke, e kia uua i te tuatua tika. I reira ka maata ua atu rai to tatou aroa e ka akangateitei i to tatou Metua, ko Iehova.