ATIKARA APII 34
Kia Mataora i Roto i Tetai Angaanga Ou
“Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na.”—EBE. 6:10.
IMENE 38 Ka Akamaroiroi a Iehova ia Koe
I ROTO I TEIA APII *
1-3. Eaa tetai au tumu ka akaruke ei te au tavini tamou i ta ratou angaanga?
“KUA pou ia maua e 21 mataiti manea, i te tavinianga ei mitinari, kua makimaki to maua roa rai nga metua,” i na Robert e Mary Jo ei. “Kua mataora maua i te akono ia ratou. Noatu te reira, kua miimii maua i te akaruke i ta maua ngai tutu aere ei mitinari.”
2 “To maua kiteanga e kua rokoia maua e te maki, e kare e meitaki no te rave akaou i ta maua angaanga tamou, kua aue maua,” i na William e Terrie ei. “Kua akamutu ta maua tavini anga ia Iehova i tetai enua ke.”
3 “Kua kite matou e kua inangaro te aronga takinokino i te topiri i te opati Betela, te ngai e tavini ra au,” i karanga ai a Aleksey. “E mea poitirere teia e kua akaruke matou i te Betela.”
4. Eaa te au uianga ka uriuriia i roto i teia atikara?
4 I te pae mai i teia au tupuanga, kua orongaia te au angaanga ou, ki te tauatini ua atu au mema o te ngutuare Betela. * Penei ka ngata i teia au taeake e te au tuaine tiratiratu i te akaruke i ta ratou angaanga tei akaperepereia. Eaa te ka tauturu ia ratou kia akakoromaki i teia taui anga? Akapeea tatou me tauturu ia ratou? Ka riro te au pauanga ki teia au uianga ei tauturu ia tatou katoatoa kia akakoromaki me taui te au turanga i te oraanga.
AKAPEEA ME AKONO I TE AU TAUI ANGA KA TUPU MAI
Me akaruke i tetai angaanga tavini tamou eaa ra ka ngata ei i tetai aronga? (Akara i te parakarapa 5) *
5. Eaa ta tatou ka rave me taui te angaanga?
5 Noatu e te tavini ra tatou i roto i te angaanga tutu aere me kore i te Betela, ka apii tatou kia inangaro i te tangata e te ngai e tavini ra tatou. Me ka akaruke tatou i ta tatou ngai e tavini ra, ka ati ngakau tatou. Ka miimii tatou i te au taeake e ka manata atu tatou ia ratou, me akaruke tatou no te takinokino anga tei tupu. (Mata. 10:23; 2 Kori. 11:28, 29) Me orongaia mai tetai angaanga ou—e me oki ki te enua anau—ka tupu rai te taitaia kia tatou. “Kare maua i matau ki ta maua uaorai peu e te tutu aere i to maua reo,” i karanga ai a Robert e Mary Jo. “Mei te tuitarere rai maua.” Penei ka rokoia tetai pae e te au manamanata i te pae o te moni. Penei ka emiemi ratou, ka taitaia e ka manako apiapi. Eaa te ka tauturu ia ratou?
E mea puapinga i te akavaitata kia Iehova e te irinaki iaia (Akara i te parakarapa 6-7) *
6. Akapeea tatou me akavaitata kia Iehova?
6 E akavaitata kia Iehova. (Iako. 4:8) Akapeea tatou me rave i teia? Na te irinaki anga iaia e koia “tei akarongo i te pure ra.” (Sala. 65:2) “E riringi i to kotou ngakau,” i karanga ai a Salamo 62:8. E “maata ua atu [ta Iehova] kia rave i te au mea katoa ta tatou e pati nei, e ta tatou e manako nei.” (Ephe. 3:20) E maata ua atu ta Iehova ka oronga mai me pati tatou na roto i te pure. Penei ka tauturu aia na te akatikatika anga i to tatou manamanata.
7. (a) Eaa te ka tauturu ia tatou kia noo vaitata kia Iehova? (e) Ia Ebera 6:10-12, eaa te ka tupu me rave tiratiratu ua rai tatou i te tavini ia Iehova?
7 Kia noo vaitata kia Iehova, e tatau i te au Tuatua Tapu i te au rā e te akamanako i te reira. Karanga tetai mitinari: “E aru i tetai akanoonooanga no te akamorianga ngutuare e e akapapa no te uipaanga, mei taau i matau i te ngai i tavini ana koe.” Pera katoa, e piri ua atu rai i te tutu aere i te nuti meitaki i roto i taau putuputuanga ou. Te maara ra ia Iehova i te aronga tei tavini tiratiratu iaia, noatu me kare e rauka ia ratou i te rave pu i ta ratou i rave i mua ana.—E tatau ia Ebera 6:10-12.
8. Akapeea te tuatua ia 1 Ioane 2:15-17 te tauturu anga ia tatou kia akono i te oraanga māmā?
8 Akono i te oraanga māmā. Auraka e tuku i te au apiapi o to Satani ao kia “pokia” taau angaanga pae vaerua. (Mata. 13:22) E patoi i te au taomi anga a teianei ao, a te au oa meitaki e te au kopu tangata te kimi ra i te puapinga i roto i to Satani akatereanga. (E tatau ia 1 Ioane 2:15-17.) E irinaki ia Iehova, tei taputou i te akono i to tatou anoano pae vaerua, pae ngakau, e te pae kopapa i “te tuatau e tau ei ra.”—Ebe. 4:16; 13:5, 6.
9. Ia Maseli 22:3, 7, eaa i puapinga ai auraka e kaiou moni me kare e anoanoia, e eaa te ka tauturu ia tatou kia rave i te au iki anga pakari?
9 Auraka e kaiou moni me kare e anoanoia. (E tatau ia Maseli 22:3, 7.) Ka pou te moni me neke tatou ki tetai ngai ke, e e māmā ua i te kaiou. Kia akaiti mai i te kaiou, auraka e kaiou moni i te oko apinga kare e anoanoia. Me taitaiaia tatou no te akono i te aronga akaperepere tei maki, penei ka ngata ia tatou i te akamanako, eaa te maata o te moni ka kaiou tatou. I teia au turanga, ‘e akakite ua i te pure,’ ei tauturu ia tatou kia rave i te au iki anga pakari. Ei pau i taau pure, ka oronga mai a Iehova i te ‘au te ka “akamaroiroi mai i to kotou ngakau e to kotou manako,” e kia akamanako meitaki ma te maru.—Phili. 4:6, 7; 1 Pete. 5:7.
10. Akapeea tatou me akaoaoa i te au oa ou?
10 E kapiti ki te aronga te ka akamaroiroi ia koe. E akakite i toou manako e te au manamanata ki te au taeake meitaki, te aronga tei matau i toou turanga. Ka riro teia ei akamaru i toou taitaia. (Kohe. 4:9, 10) Ka riro ua rai toou au oa i te angaanga o mua ana ei oa noou. I teianei, ka anoanoia koe kia akaoaoa i te au taeake ou. E akamaara me inangaro koe i tetai oa, ka anoanoia koe kia riro ei oa ki tetai ke. Akapeea koe me akaoaoa i te au oa ou? E akakite kia ratou no runga i taau tavini anga ia Iehova, e kia kite ratou i toou mataora i te tavini anga iaia. Noatu me kare tetai au taeake e mārama i toou tu mataora no te tavini tamou, penei ka riro toou akaraanga ei akakeu ia ratou, kia riro mai ei au oa meitaki noou. Kia matakite, auraka e tuatua maata no runga ia koe uaorai e taau i rave ana, e auraka e akamou ua ki runga i te au manako tau kore.
11. Akapeea toou oraanga akaipoipo e mataora ai?
11 Me ka akaruke koe i taau angaanga no te turanga makimaki o toou tokorua, auraka e akaapa iaia. Me e turanga makimaki toou, auraka e akaapa ia koe uaorai, e kua akataitaia koe i toou tokorua. E akamaara, “ei kopapa okotai” korua, e kua tia korua ki mua ia Iehova e ka akono korua i tetai e tetai noatu eaa te tu. (Mata. 19:5, 6) Me ka akaruke korua i ta korua angaanga no te mea kua nui te vaine, e akakite ki ta korua tama e e puapinga atu aia kia korua. E akakite kiaia e “e tutaki ïa” aia no ko mai i te Atua. (Sala. 127:3-5) I taua taime rai, e akakite kiaia i te au tupuanga meitaki i roto i ta korua angaanga. Ka akamaroiroi te reira i ta korua tama kia tavini ia Iehova ma te rekareka mei ta korua i rave ana.
AKAPEEA TETAI ARONGA ME TAUTURU
12. (a) Akapeea tatou me tauturu i te aronga e tavini tamou ra kia rave ua atu i ta ratou angaanga? (e) Akapeea tatou me tauturu ia ratou kia māmā mai te taui anga no tetai angaanga ou?
12 Ma te tau, e maata te au putuputuanga e te au taeake, te tauturu ra i te aronga tavini tamou kia rave ua atu i ta ratou angaanga. Ka pera ratou na te akamaroiroi anga i te au taeake, na te oronga anga i te moni tauturu, te au apinga tauturu, e te akono i to ratou ngutuare tangata i to ratou enua. (Gala. 6:2) Me kua taui te angaanga a te au taeake tavini tamou i taau putuputuanga, auraka e manako i teia taui anga e kua puapinga kore ta ratou angaanga e kua akoia ratou. * Inara, e tauturu ia ratou kia māmā mai te au taui anga. E āriki meitaki ia ratou e e akameitaki ia ratou no te angaanga ta ratou i rave, noatu e ka meangiti mai ta ratou ka rave i teianei no te apikepike o te kopapa. E pukapuka kia ratou. E apii kia kite i to ratou tu karape, te tereni anga, e te tupuanga.
13. Eaa ta tatou ka oronga, ei tauturu i te aronga e angaanga ou ta ratou?
13 I te akamata anga, ka anoano teia au taeake i te tauturu kia rauka mai tetai are, te motoka, te ngai angaanga, e tetai ua atu apinga. Ka anoano katoa ratou i te au pepa tutaki tero, e te pepa insurance. Tei puapinga maata, ka anoanoia tatou kia mārama i to ratou turanga. Penei e turanga makimaki to ratou e to te kopu tangata. Penei te miimii ra e kua takake to ratou aronga akaperepere. * Penei te miimii katoa ra ratou i to ratou ngutuare pae vaerua i ta ratou angaanga mua. Ka anoanoia te tuatau no te akakoromaki i teia au turanga mirimiringata.
14. Akapeea te au papuritia i te tauturu anga i te tuaine kia akatanotano ki tana angaanga ou?
14 Ka riro toou akaraanga ei tauturu ia ratou kia akatanotano i to ratou manako. “I taku angaanga i mua ana, kua apii au i te Pipiria i te au rā,” i karanga ai tetai tuaine tei tavini no tetai au mataiti i te enua ke. “I taku angaanga ou, e ngata i te tatau i tetai irava Pipiria me kore te akaari i tetai vitio. Inara kua pati mai te au papuritia iaku ki ta ratou atoro akaou anga e te au apii. Te kite anga au i te au taeake e te au tuaine maroiroi e te ngakau toa, i te rave anga i te au apii Pipiria, kua akamaroiroi iaku. Kua apii au kia kite akapeea me akamata i te au pukapuka anga i roto i te ngai ou no te tutu aere. Kua tauturu teia iaku kia mataora akaou.”
E ARUARU UA ATU I TE RAVE I TE MEA MEITAKI!
Tamata i te au ravenga ke no te tutu aere ki tetai i toou ngai (Akara i te parakarapa 15-16) *
15. Akapeea koe e puapinga ai i taau angaanga ou?
15 Ka puapinga rai koe i taau angaanga ou. Auraka e manako e kua riro tetai taui anga ei mea puapinga kore. E akamanako i to Iehova rima tauturu i toou oraanga e e rave ua atu i te angaanga tutu aere. E aru i te akaraanga o te au Kerititiano tiratiratu o te anere mataiti mua. Noatu teiea ratou, kua “aere atura [ratou] e akakite aere i te tuatua e pini rava ake te enua katoa.” (Anga. 8:1, 4) Me tutu aere ua atu koe ka kite koe i te au tupuanga meitaki. Ei akaraanga, te au painia tei tuaruia mei tetai enua, kua neke ratou ki te enua i te pae mai, te anoano ra i te tauturu. I roto i tetai nga marama, kua akamataia tetai au pupu ou.
16. Akapeea koe me kite i te mataora i roto i taau angaanga ou?
16 “Ko te rekareka ra no ko ia Iehova ra to kotou ïa maroiroi.” (Nehe. 8:10) Ka rekareka tatou i te tavini ia Iehova, kare i ta tatou angaanga, noatu ta tatou akaperepere i te reira. No reira, e aaere ma Iehova, e akara kiaia no te pakari, te aratakianga, e te tauturu. E akamaara e kua reka koe i taau angaanga mua no te mea kua inangaro koe i te tauturu i te tangata i reira. E akono i taau angaanga ou e na Iehova e tauturu ia koe kia akaperepere i te reira.—Kohe. 7:10.
17. Eaa ta tatou ka akamaara no ta tatou angaanga i teianei?
17 E akamaara e ka tavini tatou ia Iehova e tuatau ua atu, e ka taui ua ta tatou angaanga. I te ao ou, ka tauiui ta tatou angaanga. Irinaki a Aleksey, e te akapapa nei teia iaia no tana angaanga ou a te tuatau ki mua. “Kua kite au e e tika tikai a Iehova e te ao ou, inara e mamao te reira,” i karanga ai a Aleksey. “I teianei, te kite nei au ia Iehova i mua iaku e te vaitata maira te ao ou.” (Anga. 2:25) Noatu ta tatou angaanga, e aaere ua atu ma Iehova. Kare rava aia e akaruke ia tatou, inara ka tauturu aia ia tatou kia mataora i ta tatou e rave ra nona, noatu eaa te reira.—Isa. 41:13.
IMENE 90 Akamaroiroi i Tetai e Tetai
^ para. 5 I tetai taime, ka akaruke te au taeake e te au tuaine i ta ratou angaanga tavini tamou, e ka orongaia tetai angaanga ou na ratou. Ka uriuri teia apii i te au tu ngata ka tupu kia ratou, e ka akapeea ratou me akatanotano ki to ratou turanga ou. Ka akara katoa teia e eaa ta tetai ke ka rave, ei akamaroiroi ei tauturu ia ratou, e te akono i te au kaveinga Pipiria me taui te turanga.
^ para. 4 Pera katoa, me pakarikari mai tetai au taeake, ka oronga ratou i ta ratou angaanga ki te au taeake mapu. Akara i te au atikara i te reo Papaa, “Older Christians—Jehovah Treasures Your Loyalty,” i roto i The Watchtower o Tepetema 2018, e te “Akono Tamou i te ‘Au Noatu te au Taui Anga,” i roto i Te Punanga Tiaki o Okotopa 2018.
^ para. 12 Kia tata viviki te aronga pakari i roto i te putuputuanga ta ratou e tavini ra, i tetai reta akakite anga, kia rauka viviki i teia au taeake i te tavini ei painia, ei tangata pakari, e ei tavini tauturu.
^ para. 13 Akara i te tuanga i te reo Papaa “Help for Those Who Grieve,” i roto i te 2018 Awake! No. 3.
^ para. 57 AKATAKA ANGA TUTU: Aroa atura te nga tokorua tei akaruke i ta raua angaanga mitinari i te putuputuanga o reira.
^ para. 59 AKATAKA ANGA TUTU: I to raua enua anau, kua pure ua rai te nga tokorua kia Iehova, kia tauturu mai ia raua e na roto ra i te au tu ngata.
^ para. 61 AKATAKA ANGA TUTU: Kua tauturu a Iehova ia raua, kua rave te nga tokorua i te angaanga tutu aere. Kua pukapuka raua i te nuti meitaki ki tetai tangata no te enua mai i angaanga ana raua ei mitinari.
