KO TE akarongo, e tu ririnui teia. Ei akaraanga, noatu te inangaro ra a Satani i te tamate ia tatou i te pae vaerua, na te akarongo “e mate ei te au tao ai ravarai a te vaerua kino ra.” (Ephe. 6:16) Me rauka te akarongo, ka akakoromaki tatou i te au manamanata mamaata. Akakite a Iesu ki tana au pipi: “Angairi e akarongo to kotou mei tetai ua sinapi nei, ka tika ia kotou kia karanga atu ki teianei maunga, Ka aere i ko atu; e nana e aere ua.” (Mata. 17:20) Mei te mea ka akamaroiroi te akarongo ia tatou i te pae vaerua, ka akamanako tatou i teia au uianga: Eaa te akarongo? Akapeea to tatou ngakau me akakeuia e te akarongo? Akapeea tatou me akamaroiroi i to tatou akarongo? E koai ta tatou ka akarongo?—Roma 4:3.

E maata atu to roto i te akarongo, kare ko te irinaki anake e kare ko te āriki ua anga i te tuatua mou, no te mea “kua akarongo katoa oki te au demoni i te reira [e te vaira te Atua], e kua rurutakina.” (Iako. 2:19) Eaa i reira te akarongo?

Te akakite ra te Pipiria e e rua tuanga o te akarongo. Te mea mua, “ko te akarongo nei, ko te tumu tikai ïa i te au mea i tatariia nei.” (Ebe. 11:1a) Me e akarongo toou, ka irinaki koe i te au mea ravarai ta Iehova e karanga ra e e tika e ka akatupuia te reira. Ei akaraanga, kua akakite a Iehova ki to Iseraela: “Kia tika ia kotou kia akaatikau i taku nei koreromotu i te ao nei, e taku nei koreromotu i te po nei, e auraka ua atu ei ao e te po i to raua tuatau: Ei reira taku koreromotu ki toku tavini nei kia Davida e akaatikau katoaiaʼi.” (Iere. 33:20, 21) E mataku ana koe me kare te ra e iti mai e e opu atu, kare atura e ao e te po? Me kare koe e ekoko i te au ture o te mareva tei akono i te enua kia vai i tona ngai i te pae i te ra, ka ekoko ainei koe e ka rauka i Tei Anga i teia au ture i te akatupu i tana tuatua? Kare!—Isa. 55:10, 11; Mata. 5:18.

Te rua, ko te akarongo, “te kite ïa i te au mea kare i akaraia nei.” Te akarongo, ko “te kite ïa” me kore ko te kite irinakiia, o te au mea kare e akaraia e te mata, inara e tika te reira. (Ebe. 11:1e) Mei teea te tu? Akapeea me ui mai tetai tamaiti kia koe, ‘Akapeea koe i kite ei e te vaira te matangi?’ Noatu kare koe i kite ana i te matangi, ka tauturu koe i te tamaiti kia mārama e te vaira te reira—na te akaea anga i te angiangi matangi, e te vai atura. Me mārama te tamaiti i te reira, ka āriki aia e te vaira tetai apinga kare aia e kite mata ana. Pera katoa, kua akatumuia te akarongo ki runga i te kite tei irinakiia.—Roma 1:20.

Mei te mea kua akatumuia te akarongo ki runga i te kite, e rauka ai te akarongo, ka anoanoia tetai tangata na mua kia “kite i te tuatua-mou.” (1 Timo. 2:4) Inara kare te reira e rava ua. Tata te apotetoro ko Paulo e: “Ko te ngakau oki to te tangata nei e akarongo.” (Roma 10:10) Kare tetai tangata e irinaki ua i te tuatua mou, mari ra ka akaperepere katoa i te reira. Ka akakeuia aia kia taangaanga i te akarongo, koia oki, kia taangaanga i te tuatua mou na te akamareka anga i te Atua. (Iako. 2:20) Ko te tangata kare e akaperepere ana i te tuatua mou, ka kopae aia i te kite  irinakiia, me aru aia i tona au manako e tona au anoano tau kore. (2 Pete. 3:3, 4; Iuda 18) No reira i te au tuatau Pipiria, kare e akarongo o tetai aronga tei kite i te au temeio. (Nume. 14:11; Ioa. 12:37) Na te vaerua tapu o te Atua e akakeu i tetai tangata kia akarongo e kia akaperepere i te tuatua mou.—Gala. 5:22; 2 Tesa. 2:10, 11.

Ko tetai tei tinamou tona akarongo, ko te Ariki ko Davida. (Ebe. 11:32, 33) Inara, kare i rauka ana i te katoa anga o to Davida ngutuare, teia akarongo. Ei akaraanga, i tetai atianga, ko Eliaba, te tuakana o Davida, kare ona akarongo i tona akoanga ia Davida kia tamaki ia Golia. (1 Samu. 17:26-28) Kare e tangata i anauia mai ma te akarongo; e kare katoa i rauka mai te akarongo mei te nga metua, no reira kua rauka to Davida akarongo no tona pirianga ki te Atua.

Ia Salamo 27, te akaari maira a Davida i te tumu i tinamou ei tona akarongo. (Irava 1) Kua akamanako oonu a Davida no runga i tei tupu kiaia, e ta Iehova tauturu anga iaia mei tona au enemi. (Irava 2, 3) Kua akaperepere aia i ta Iehova ngai akamorianga. (Irava 4) Kua akamori kapiti a Davida e tona au taeake i te Atua i ko i te puakapa. (Irava 6) Kua kimi pu tikai aia ia Iehova na roto i te pure. (Irava 7, 8) Inangaro katoa a Davida e kia apiiia aia e te Atua. (Irava 11) E puapinga teia tu kia Davida i tona ui anga: “Eaa ua au nei me kare oku akarongo?”​—Irava 13 (NW)

Ka rauka te akarongo mei to Davida rai me aru koe i tona aerenga manako e tona tu tei akakiteia ia Salamo 27. Mei te mea kua akatumuia te akarongo ki runga i te tuatua mou, ko te maata atu taau apii i te Tuatua a te Atua e te au puka Pipiria, ka māmā i reira i te taangaanga i teia ua o te vaerua o te Atua. (Sala. 1:2, 3) E akamanako oonu i taau e apii ra. Me akamanako oonu tatou, ka aiteia ki te one, te ngai e tupu ei te inangaro ia Iehova. I toou inangaro ia Iehova e maata maira, ka maata atu te anoano no te taangaanga i te akarongo na te akamorianga iaia i te au uipaanga putuputuanga, e te akakite i toou manakonakoanga ki tetai ke. (Ebe. 10:23-25) Pera katoa, ka akaari tatou i te akarongo me “tamou marie [tatou] i te pure, auraka e maromaroa.” (Luka 18:1-8) “Auraka e tukutuku i te pure” kia Iehova, ma te irinaki “koia oki te tiaki mai ia [tatou].” (1 Tesa. 5:17; 1 Pete. 5:7) Ka akakeu te akarongo ia tatou kia angaanga, e ka akamaroiroi te reira i to tatou akarongo.—Iako. 2:22.

I te po i mua ake ka mate ei aia, akakite a Iesu ki tana au pipi: “Ka akarongo i te Atua, ka akarongo katoa mai iaku.” (Ioa. 14:1) No reira ka anoanoia tatou kia taangaanga i te akarongo i roto ia  Iehova e Iesu. Akapeea koe me taangaanga i te akarongo i roto ia Iesu? Ka uriuri tatou e toru mataara.

Te mea mua, akamanako i te oko, e apinga aroa na te Atua kia koe. Karanga te apotetoro ko Paulo: “Te ora nei au i te akarongo i te Tamaiti a te Atua, ko tei aroa mai iaku, e kua oronga mai iaia uaorai noku.” (Gala. 2:20) Me taangaanga koe i te akarongo ki roto ia Iesu, ka irinaki papu koe i tona oko tei orongaia noou, kua akakoreia taau ara, kua orongaia mai te manakonakoanga no te ora mutu kore, e ko to te Atua aroa maata rava atu te reira noou. (Roma 8:32, 38, 39; Ephe. 1:7) Ka akamaroiroi teia ia koe, auraka e manako atu i te au manako tau kore.—2 Tesa. 2:16, 17.

Te rua, e akavaitata kia Iehova na roto i te pure, ma te irinaki i te atinga oko o Iesu. No te oko, ka pure tatou kia Iehova “kia aroaia mai tatou nei, e kia rauka te meitaki ei tauturu mai ia tatou i te tuatau e tau ei ra.” (Ebe. 4:15, 16; 10:19-22) Na te pure e akamaroiroi ia tatou kia patoi i te timata anga kia ara.—Luka 22:40.

Te toru, e akarongo ia Iesu. Tata te apotetoro ko Ioane: “Ko te akarongo i te Tamaiti ra, e ora mutu kore tona: e te kore e akarongo i te Tamaiti ra, kare aia e kite i te ora; te vai ra ïa te riri o te Atua ki runga iaia.” (Ioa. 3:36) Akakite a Ioane e ka tupu te akarongo kore me kare e akarongo. No reira, ka taangaanga koe i te akarongo ki roto ia Iesu me akarongo iaia. Ka akarongo koe ia Iesu na te aru anga i “te ture a te Mesia,” koia oki, ko tana pouroa i apii e i akaue mai. (Gala. 6:2) Ka akarongo katoa koe kia Iesu na te aru anga i te aratakianga a “te tavini akono meitaki e te pakari.” (Mata. 24:45) Na te akarongo anga kia Iesu, ka rauka te maroiroi no te akakoromaki i te au manamanata mamaata.—Luka 6:47, 48.

Kua kapiki tetai tangata kia Iesu: “Kua akarongo au; ka tauturu mai koe i toku nei akarongo mea ngiti.” (Mare. 9:24) E akarongo rai tona, inara kua anoano aia kia maata atu tona akarongo. Mei teia tangata rai, ka anoano pouroa tatou kia maata atu te akarongo. Ka akamaroiroi tatou pouroa i to tatou akarongo i teianei. Mei ta tatou i kite mai, ka akamaroiroiia to tatou akarongo me apii tatou i te Tuatua a te Atua e te akamanako oonu i te reira, e ka akamareka maata atu tatou ia Iehova. Ka ketaketa atu to tatou akarongo, pera katoa to tatou au taeake, no te akamori ia Iehova, te akakitekite i to tatou manakonakoanga, e te tamou marie i te pure. Pera katoa, me akamaroiroi tatou i to tatou akarongo, ka rauka te tutaki maata. Akamaroiroi maira te Tuatua a te Atua ia tatou: “E aku au akaperepere e, i te patu anga ia kotou uaorai, i to kotou akarongo tapu maata ra, . . . Tamou tikai kotou i to kotou uaorai inangaro i te Atua.”—Iuda 20, 21.