1. Eaa a Iehova i anga ai i te oraanga?

KUA vai ua ana a Iehova. Kare ra teia i akamaromaroa iaia no te mea e tu merengo tona. Noatu rai kua inangaro te Atua e kia rekareka te tangata i te oraanga. Tei akakeuia e te aroa, kua anga iora a Iehova i te au mea ora.—Sala. 36:9; 1 Ioa. 4:19.

2. Eaa to Iesu e te au angera tu no te au angaanga a Iehova?

² Mea mua, kua anga a Iehova i tana Tamaiti. Na roto iaia, kua “anga[ia] te apinga tini ravarai,” te au mea akara koreia e mirioni ua atu. (Kolo. 1:16) Mataora a Iesu i te angaanga kapiti ki tona Metua. (Mase. 8:30) Pera katoa te au tamariki angera a te Atua, rekareka katoa ratou. Kua kite ratou ia Iehova e te Pu Angaanga ko Iesu i te anga mai anga i te rangi e te enua. Eaa te tu o te au angera? Kua “maeva ua” ratou i te angaia anga te enua, pereperekavana ratou ia Iehova e angaanga ra, e te anga mai anga i te tangata nei. (Iobu 38:7; Mase. 8:31) Akaari maira teia au angaanga i to Iehova aroa e te pakari.—Sala. 104:24; Roma 1:20.

3. Ia 1 Korinetia 15:21, 22, eaa tei akatupuia e te atinga oko o Iesu?

³ Kua akakoro a Iehova i te tangata ravarai kia rekareka i te oraanga mutu kore i te enua nei. I te kore anga a Adamu e Eva i akarongo ki to raua Metua, kua iri mai te  ara e te mate ki te tangata katoatoa. (Roma 5:12) Eaa ta Iehova i rave? Karanga aia e ka akaora aia i te au tangata ravarai. (Gene. 3:15) Kua oronga mai a Iehova i te oko te ka akarangatira i te uanga a Adamu e Eva mei te ara e te mate. Tuku atura aia i te au tangata kia iki i te tavini Iaia e kia rauka te ora mutu kore.—Ioa. 3:16; Roma 6:23; e tatau ia 1 Korinetia 15:21, 22.

4. Eaa te au uianga ka uriuri tatou i teia atikara?

⁴ Ka ui tetai pae i te au uianga tukeke no runga i ta te Atua taputou no te akatu mai i tei mate. Ei akaraanga, akapeea te tuakaouanga me akatupuia? Ka taka ainei ia tatou to tatou aronga akaperepere me akatuia mai ratou? Akapeea te tuakaouanga me apai mai i te rekareka kia tatou? Akapeea te akamanako anga i te tuakaouanga me akakeu ia tatou kia akaperepere i to Iehova aroa, pakari, e te akakoromaki? Ka uriuri tatou i teia au uianga tataki tai.

5. Eaa i tau ei kia irinaki e ka akatuia te tangata na roto i te tu mako?

⁵ Me akatu mai a Iehova i te au mirioni tangata na roto i tana Tamaiti, penei ka tamanako tatou kare ratou e ora mai i te taime okotai. Eaa te tumu? No te mea ka tupu te manamanata no te rairai i te tangata i te enua nei. Kare a Iehova i te Atua kononinoni ua. Kite aia e mou ei te ‘au, ka anoanoia te tu mako no te akaaere i te au mea ravarai. (1 Kori. 14:33) E Atua pakari e te akakoromaki a Iehova i to raua angaanga kapiti anga ko Iesu, i te anga mai anga i te enua na roto i te ta tuatau anga i te au mea angaia, i mua ake  ka angaia ai te tangata. Ka akaari mai a Iesu i teia tu i te Tauatini Mataiti o Tona Tutaraanga, ka angaanga kapiti ki te aronga tei ora mai ia Aramagido, no te akapapa i te enua no te aronga ka akatuia mai.

6. Ia Angaanga 24:15, koai ma te ka akatuia e Iehova?

⁶ Mea puapinga maata, ko te aronga ka ora atu ia Aramagido ka apii ratou i te Patireia o te Atua e ta Iehova e anoano ra, ki te aronga tei akatuia mai. No teaa ra? No te mea ka kapitiia mai “te aronga tuatua-tika kore” ki roto i te aronga te ka akatuia mai. (E tatau ia Angaanga 24:15.) Ka rave ratou i te au tauianga e puapingaia ai mei te atinga oko o Iesu. Akamanako ana i te apiianga i te tuatua mou a te Atua ki te mirioni ua atu tangata kare ake i kite ia Iehova. Ka apiiia ratou mei te tu e apii ana tatou i te Pipiria ki te tangata i teia tuatau? Ka aere ainei teia aronga ou ki te putuputuanga e ka tereniia kia apii i te aronga ka akatuia mai? Ka tapapa marie tatou i te reira. Inara kua kite tatou me tae ki te openga o te Tauatini Mataiti o ta Karaiti Tutaraanga, “ka ki te enua i te kite ia Iehova.” (Isa. 11:9) E atianga mataora tikai te tauatini mataiti!

7. Eaa te iti tangata o te Atua ka akaari ei i te aroa taeake me apii i te aronga tei akatuia mai?

⁷ I te Tauatini Mataiti o ta Karaiti Tutaraanga, ka anoanoia te au tamariki a Iehova i te enua nei kia taui i to ratou tu no te akamareka iaia. Ka akaari ratou i te aroa taeake ia ratou e tauturu ra i te aronga tei akatuia kia kopae i te au tu tau kore e te akono i ta Iehova au kaveinga. (1 Pete. 3:8) Kare e ekoko anga ka akavaitata te aronga tei akatuia mai ki te iti tangata akaaka o Iehova, e ka “rave akaoti ua i to [ratou] uaorai ora.”—Phili. 2:12.

8. Eaa i tau ei e ka taka meitaki ki te aronga ka aravei i te aronga akaperepere te ka akatuia mai?

⁸ E maata te tumu, papu tatou e ka taka meitaki ia tatou te aronga akaperepere te ka akatuia mai. Ei akaraanga, no te tuakaouanga tei tupu ana i mua ana, kua akatu mai a Iehova i te reira tangata ma tona au tu matauia, tana tuatua, tona manako i mua ake ka mate ei aia. E akamaara kua akaaite a Iesu i te mate ki te moe, na roto i te tuakaouanga ka akaaraia tei mate. (Mata. 9:18, 24; Ioa. 11:11-13) Me ara mai te tangata, kare ratou e taui i to ratou akaraanga i te tuatau moe anga, ka vai rai to ratou tu i mua ana. Akamanako ana i te akaraanga o Lazaro. Kua mate aia e a rā, e kua akamata tona kopapa i te pe. I te akatuanga a Iesu iaia, kua taka meitaki aia ki tona nga tuaine, e kua kite rai a Lazaro ia raua.—Ioa. 11:38-44; 12:1, 2.

9. No teaa ra kare e orongaia te manako e te kopapa matutu ki te aronga tei akatuia mai?

⁹ Kua taputou a Iehova kare e aronga i raro i ta Iesu tutaraanga e tuatua: “Kua maki au.” (Isa. 33:24; Roma 6:7) Ka orongaia te kopapa matutu ki te aronga tei akatuia mai mei te mate. Inara, ka tupu marie teia tu. Me kore ra, kare e taka meitaki e koai ratou ki to ratou aronga akaperepere. I te akaraanga e ka rauka te oraanga apa kore ki te tangata ravarai i te Tauatini Mataiti o ta Karaiti Tutaraanga. I te openga o te tauatini mataiti ka oronga a Iesu i te Patireia ki  tona Metua. Kua akatupu te Patireia i to Iehova akakoroanga, kapiti mai i te akariro anga i te tangata ravarai ei aronga apa kore.—1 Kori. 15:24-28; Apo. 20:1-3.

10. Akapeea te tuakaouanga me akakeu ia koe?

¹⁰ Akamanako ana mei teaa te tu me aravei akaou i toou aronga akaperepere. Ka mataora ainei koe me ka aue? Ka mataora ainei koe e ka imene akapaapaa ia Iehova? Okotai mea papu, ka inangaro maata koe i toou Metua e tana Tamaiti no te apinga aroa o te tuakaouanga.

11. Kia tau kia Iesu ia Ioane 5:28, 29, eaa ta te aronga akono i ta te Atua kaveinga tuatua tika ka kite?

¹¹ Akamanako ana i te rekareka o te aronga tei akatuia, ia ratou e taui ra i to ratou tu taito e te akono i ta te Atua kaveinga tuatua tika. Te aronga te ka taui i to ratou oraanga ka tau ki te tuakaouanga ora. Kareka ra, te aronga kare e taui i to ratou tu, kare ratou e tikaia kia tamanata i te oraanga ‘au i te Parataito.—Isa. 65:20; e tatau ia Ioane 5:28, 29.

12. Akapeea te aronga i te enua me akameitakiia e Iehova?

¹² Raro i te Tutaraanga Patireia, ka kite te iti tangata o te Atua i te tikaanga o te tuatua a Maseli 10:22: “Na Iehova te meitaki i apingaʼi te apinga, kare oki e kapiti katoaia mai te kino i te reira.” Ma te tauturu a te vaerua o Iehova, ka puapingaia te iti tangata o te Atua i te pae vaerua, ka riro to ratou turanga mei te Mesia te tu, ka rauka te oraanga apa kore. (Ioa. 13:15-17; Ephe. 4:23, 24) I te au rā tataki tai ka matutu ua atu ratou e ka meitaki to ratou tu. Mei teaa te mataora te oraanga a te reira tuatau! (Iobu 33:25) Akapeea te akamaaraara anga no te tuakaouanga me tauturu ia koe i teianei?

13. Ia Salamo 139:1-4, akapeea te tuakaouanga me akaari mai e kua kite a Iehova ia tatou?

¹³ Mei ta tatou i uriuri akenei, me akatu a Iehova i te tangata, ka akaoki mai aia i to ratou au manako e to ratou au tu tei matauia ana. Eaa te aiteanga o te reira. Akaperepere maata a Iehova ia koe e te kite maira i taau e manako ra, toou ngakau, taau e tuatua ra e te rave ra. Me akatu mai aia ia koe, ka māmā ua iaia i te akaoki mai i toou au manako, au tu akono e te au tu tangata. Kite meitaki te Ariki ko Davida i to Iehova inangaro ia tatou tataki tai. (E tatau ia Salamo 139:1-4.) Eaa toou manako me kite koe e te kite maira a Iehova ia koe?

14. Eaa to tatou manako me kite tatou e kua kite meitaki a Iehova ia tatou?

¹⁴ Me akamaaraara tatou e kua kite meitaki a Iehova ia tatou, kare tatou e taitaia. No teaa ra? E akamaara te akaperepere maata ra a Iehova ia tatou. Akaperepere aia i to tatou tu manea. Kite meitaki aia i ta tatou e rave ra i roto i to tatou oraanga. E mea pumaana tikai! Kare rava tatou e manako maromaroa. I te au taime ravarai, te akara maira a Iehova e te inangaro ra i te tauturu ia tatou.—2 Para. 16:9.

15. Akapeea te tuakaouanga i te akaari mai i to Iehova pakari?

¹⁵ Ka paruparu tetai me tamatakuia e ka tamateia. Te aronga i raro i ta Satani akaaere anga kua akakeu i tetai pae kia  tuatua pikikaa i to ratou au oa me kore kia akaruke i te akarongo. Inara kare e rauka ia ratou i te māro ia tatou kia pera. Kua kite tatou me tamate to tatou au enemi ia tatou, ka akatu mai a Iehova ia tatou. (Apo. 2:10) Papu ia tatou kare e rauka ia ratou i te akatakake ia tatou mei ia Iehova. (Roma 8:35-39) E Atua pakari a Iehova i te oronga mai i te manakonakoanga no te tuakaouanga kia tatou! No teia kua akakore Aia i ta Satani ravenga tamaki e kua akamaroiroi ia tatou kia ngakau toa e kia tiratiratu.

16. Eaa taau uianga ka ui, akapeea taau pauanga me akaari mai e te irinaki ra koe ia Iehova?

¹⁶ Me tamataku mai te enemi o Iehova ia koe ki te mate, ka irinaki ainei koe ia Iehova? Akapeea koe e kite ei? E ui kia koe, ‘Te akaari maira ainei taku ikianga e te irinaki ra au ia Iehova?’ (Luka 16:10) Tetai akaou uianga, ‘Te akaari maira ainei toku oraanga e te irinaki ra au i ta Iehova taputou, ka akono mai aia iaku me tuku au i te Patireia na mua?’ (Mata. 6:31-33) Me ae te pauanga, te akaari ra koe e te irinaki ra koe ia Iehova, e kua papa koe me tupu te manamanata.—Mase. 3:5, 6.

17. (a) Akapeea te tuakaouanga i te akaari mai e e akakoromaki to Iehova? (e) Akapeea tatou me akaperepere i to Iehova tu akakoromaki?

¹⁷ Kua iki ke ana a Iehova i te rā e te ora no te takore i teia akatereanga. (Mata. 24:36) Kare aia e viviki i te akatupu i teia kia tae roa ki te reira atianga. Inangaro maata aia i te akatu i tei mate, ka akakoromaki ra aia. (Iobu 14:14, 15) Te tapapa ra aia i te taime tau no te akatu mai ia ratou. (Ioa. 5:28) E tumu meitaki ta tatou kia akaperepere i to Iehova tu akakoromaki. Akamanako ana: No to Iehova tu akakoromaki, kua orongaia te tuatau ki te tangata ravarai e tatou, “kia rauka katoatoa ra te tataraara.” (2 Pete. 3:9) Inangaro a Iehova e kia maata te tangata ka āriki i te oraanga mutu kore. No reira e akaari tatou e te akaperepere ra tatou i tona akakoromaki. Akapeea? Na te kimi maroiroi i te “aronga akonoia no te ora mutu kore” e te tauturu ia ratou kia akaperepere ia Iehova e te tavini iaia. (Anga. 13:48) I reira ratou e puapinga ai i te akakoromaki o Iehova, mei ia tatou katoa.

18. Eaa tatou ka akaari ua rai i te akakoromaki ki tetai?

 ¹⁸ Ka tapapa marie a Iehova e tae ua atu ki te openga o te tauatini mataiti e rauka ai ia tatou te oraanga apa kore. A te reira tuatau, ka akakore a Iehova i ta tatou au ara. No reira e tumu meitaki ta tatou no te akara i te meitaki i roto i tetai e te akakoromaki i to ratou tu. Akamanako ana i te akaraanga o tetai tuaine, kua rokoia tana tane e te maki taitaia maata e kua akamutu i te aere ki te uipaanga. “Ngata tikai teia tu kiaku,” karanga ai aia. “Kua taui to maua oraanga e kare e marikonga te tu.” Noatu te reira kua akaari ua teia vaine i te tu akakoromaki. Kua irinaki aia kia Iehova, e kare i tuku ana i te au. Mei ia Iehova rai, kua akamou aia i tona manako ki runga i te tu meitaki o tana tane. Karanga aia, “E au tu manea ta taku tane e te tauta ra aia kia meitaki mai.” E mea puapinga maata kia akaari ua rai tatou i te akakoromaki ki to tatou ngutuare e te au taeake i roto i te putuputuanga!

19. Eaa ta tatou ka aruaru i te rave?

¹⁹ Rekareka a Iesu e te au angera i te angaia anga te enua. Akamanako ana i to ratou rekareka i te kite anga i te au tangata apa kore i te enua nei, te akaperepere ra e te tavini ra ia Iehova. Akamanako ana i te tu rekareka o te aronga no te enua mai te ka tutara kapiti kia Iesu, i te kite anga i te tangata ravarai e puapinga ra mei ta ratou angaanga. (Apo. 4:4, 9-11; 5:9, 10) Akamanako ana i te oraanga mataora kare e aue, mamae, e maki e mii e te mate kua kore te au mea taito. (Apo. 21:4) No reira, ka aruaru tatou i te aru i te akaraanga o to tatou Metua aroa, pakari e te akakoromaki. Me pera tatou, ka rekareka ua rai tatou, noatu te au manamanata. (Iako. 1:2-4) Ka akaperepere tatou i ta Iehova taputou “e tuakaouanga to tei mate”!—Anga. 24:15.