1. Eaa ta Iehova i oronga ki tona au tavini tiratiratu?

ORONGA aroa ua mai a Iehova ki tona au tavini tiratiratu i tetai tuanga i roto i tana putuputuanga. Noatu te tukeke, ka akaperepere maata tatou i tetai e tetai. Kua tauturu mai te apotetoro ko Paulo ia tatou kia kite i teia apiianga puapinga. Akapeea?

2. Kia tau kia Ephesia 4:16, eaa te tumu ka akaperepere tatou i tetai e tetai e te angaanga kapiti kia ratou?

² Mei ta te tumu irava e akakite ra, karanga a Paulo e auraka tetai e akavaavaa i te tavini o Iehova e ka tuatua e “kare ua atu rai korua iaku nei.” (1 Kori. 12:21) Me ka ‘au ua te putuputuanga, ka akaperepere tatou i tetai e tetai e ka angaanga kapiti ki tetai e tetai. (E tatau ia Ephesia 4:16.) Me taokotai tatou, ka ruperupe te putuputuanga, ka maringi ua te aroa.

3. Eaa ta tatou ka uriuri i teia atikara?

³ Eaa tetai ngai ka akangateitei tatou i te au Kerititiano i roto i te putuputuanga? I roto i teia atikara, ka uriuri tatou akapeea te aronga pakari me akangateitei tetai e tetai. Ka akara tatou akapeea te katoatoa me akaperepere i te au taeake e te au tuaine kare i akaipoipo. Ka apii tatou akapeea me akaperepere i te aronga apiipii, kare e taka meitaki ana i te tuatua i to tatou reo.

4. Eaa ta Paulo akoanga ia Roma 12:10 ka aru te aronga pakari?

⁴ Kua ikiia te aronga pakari i roto i te putuputuanga e te  vaerua tapu o Iehova. Tukeke ta ratou au tuanga. (1 Kori. 12:17, 18) Tetai pae ia ratou koi iki uaia e e ou ratou. Tetai ia ratou kua kotingaia no to ratou mataiti e te oraanga. Noatu rai, kare okotai aronga pakari e akavaavaa i tetai e tetai e ka karanga e ‘kare ua atu rai kotou iaku nei.’ Mari ra, ka aru te aronga pakari tataki tai i ta Paulo i tata ia Roma 12:10.—E tatau.

5. Akapeea te aronga pakari me akangateitei i to ratou au taeake pakari, eaa i puapinga ai?

⁵ Ka akaari te aronga pakari e te akangateitei ra ratou i to ratou au taeake pakari na te akarongo meitaki i to ratou manako. E mea puapinga me aravei te aronga pakari ei kopapa okotai i te uriuri i te au manako puapinga. No teaa ra? Akara ana i Te Punanga Tiaki reo Papaa o Okotopa 1, 1988, karanga ra: “Ka kite te aronga pakari i ta Iesu aratakianga, na roto i te vaerua tapu, me akakeu i te manako o tetai tangata pakari i roto i te pupu kia oronga mai i te kaveinga Pipiria tei anoanoia kia akakoromaki i tetai turanga me kore kia tuku i te ikianga puapinga. (Anga. 15:6-15) Ka tauturu te vaerua tapu i te katoatoa o te aronga pakari kia tuku i te ikianga puapinga.”

6. Akapeea te aronga pakari me angaanga taokotai, eaa te puapinga ki te putuputuanga?

⁶ Ka akangateitei tetai tangata pakari i tona au taeake, kare e tuatua viviki i roto i ta ratou uipaanga. Kare aia e māro e nana ua te tuatua, e kare e irinaki e nana te tikaanga openga. Mari ra, ka akakite maru aia i tona manako. Ka akarongo meitaki aia i te manako o tetai ke. Mea maata, ka rekareka aia i te akaari i te au kaveinga Pipiria e te aru i te aratakianga a “te tavini akono meitaki e te pakari.” (Mata. 24:45-47) Me uriuri te aronga pakari i te au manako ma te aroa e te maru, ka tauturu te vaerua tapu o te Atua ia ratou kia tuku i te ikianga meitaki te ka akamaroiroi i te putuputuanga.—Iako. 3:17, 18.

7. Eaa to Iesu manako i te aronga kare i akaipoipo?

⁷ Ka kapiti mai ki te putuputuanga te aronga akaipoipo e te ngutuare tangata, e te au taeake e te au tuaine kare i akaipoipo. Eaa to tatou manako i te aronga kare i akaipoipo? Akara i to Iesu manako ia ratou. Iaia e rave ra i tana angaanga orometua, kare a Iesu i akaipoipo ana. Kua akono aia i te oraanga kare i akaipoipo kia pou tona tuatau no tana angaanga. Kare a Iesu i apii ana e ka anoanoia tetai kia akaipoipo e kare. Kua karanga aia e ka iki tetai Kerititiano kia kore e akaipoipo. (Mata. 19:11, 12) Kua akangateitei a Iesu i te aronga kare i akaipoipo. Kare aia i manako ana i te aronga kare i akaipoipo e e aronga akaaka e kua ngere i te oraanga mataora.

8. Kia tau kia 1 Korinetia 7:7-9, eaa ta Paulo i akamaroiroi i te au Kerititiano kia akamanako?

⁸ Mei ia Iesu, kua rave a Paulo i tana angaanga orometua ma te kore i akaipoipo. Kare rava a Paulo i apii ana e mea tarevake kia kore tetai Kerititiano e akaipoipo. Kua kite aia e na tetai te reira ikianga. Noatu rai kare a Paulo i akamaroiroi i te au Kerititiano kia tavini ia Iehova ei tangata kare i akaipoipo. (E tatau ia 1 Korinetia 7:7-9.) Papu rai kare a Paulo i akavaavaa i te au Kerititiano kare i akaipoipo. Kua iki aia i te mapu ko Timoteo e taeake kare i akaipoipo kia akono i te au apainga maata i roto i te putuputuanga. * (Phili. 2:19-22) No reira e mea tarevake i te manako e ka tau tetai taeake i te angaanga me akaipoipo aia me kare e akaipoipo.—1 Kori. 7:32-35, 38.

9. Eaa ta tatou ka tuatua no te oraanga akaipoipo e kare?

⁹ Kare a Iesu e Paulo i apii ana kia akaipoipo tetai Kerititiano e kia kore e akaipoipo. Eaa tatou ka tuatua ai no te oraanga akaipoipo e kare? Akamārama maira Te Punanga Tiaki reo Papaa o Okotopa 1, 2012, i teia tu: “Te akatakaia maira te [oraanga akaipoipo e kare] e apinga aroa no ko mai i te Atua. . . . Kare a Iehova i manako ana i te [oraanga kare i akaipoipo] e tumu anga kia akama e kia taitaia.” No te reira, ka akangateitei  tatou i te turanga o te au taeake e te au tuaine kare i akaipoipo i roto i te putuputuanga.

10. Akapeea tatou me akangateitei i to tatou au taeake e te au tuaine kare i akaipoipo?

¹⁰ Akapeea tatou me akangateitei i te manako e te oraanga o te au taeake e te au tuaine kare i akaipoipo? Ka akamanako tatou e kua iki tetai Kerititiano kia kore e akaipoipo. Ka inangaro tetai pae Kerititiano i te akaipoipo, kare i kite ake to ratou tokorua tau. Penei tetai pae kua takake to ratou akaperepere. Noatu to ratou turanga, kua tau ainei tetai i roto i te putuputuanga i te ui ki tetai Kerititiano kare i akaipoipo, eaa aia i kore ei i akaipoipo me kore ka tauturu iaia i te kimi i tetai tokorua? E tika ka pati tetai Kerititiano i te tauturu. Me kare te tauturu i patiia atu, eaa te manako o te reira au taeake me pera atu koe? (1 Tesa. 4:11; 1 Timo. 5:13) Ka uriuri tatou i te manako o tetai aronga kare i akaipoipo, tei vai tiratiratu.

11-12. Akapeea tatou me akataitaia i te aronga kare i akaipoipo?

¹¹ Manako tetai akaaere kotinga tei karape i te rave i tana apainga e e puapinga maata te turanga kare i akaipoipo. Inara kua kite mai aia ka riro e mea maromaroa me ui tetai au taeake kiaia: “Eaa koe kare i akaipoipo?” Karanga mai tetai taeake kare i akaipoipo i te opati Betela e: “Kua akariro tetai au taeake e te au tuaine e e turanga kino te oraanga kare i akaipoipo. Akaraanga e mea taitaia te turanga kare i akaipoipo, kare e e apinga aroa.”

¹² Karanga tetai tuaine e angaanga ra i Betela e: “Manako tetai pae e te kimi ra te aronga kare i akaipoipo i tetai tokorua e ka kitea te tokorua i te ngai tarekareka anga. I te aere anga ki tetai enua no taku angaanga, kua tae atu au i te po uipaanga. Kua akakite mai te tuaine e akono ra iaku no te nga taeake i roto i te putuputuanga aiteite ua to matou mataiti. Karanga mai aia e kare aia e kimi ana i tetai tokorua noku. I te taeanga maua ki te Are Uipaanga Patireia, kua akaaravei aia iaku ki te nga taeake. Akatupu teia i te tu akama kia matou katoatoa.”

13. Eaa te au akaraanga tei akamaroiroi i tetai tuaine kare i akaipoipo?

¹³ Kua akakite tetai tuaine kare i akaipoipo e tavini ra i Betela: “Kua kite ana au i te au painia pakarikari kare i akaipoipo, e tu meitaki to ratou, kua akaatinga ia ratou uaorai e kua mataora i te tavini e te tauturu i te putuputuanga. Akara anga tau to ratou turanga, kare e manako akatietie kua iki ratou i te oraanga kare i akaipoipo e te kore e anau tamariki.” No reira rai tetai putuputuanga e mataora ei no te mea te akaperepere ra te katoatoa e te akangateitei ra ia ratou. Kare koe e manako e te tangi aroaia ra koe, te vareae, te kopaeia ra e te akapaapaaia ra koe. Kua kite ana koe e te akaperepereia ra koe.

14. Akapeea tatou me akangateitei i te aronga kare i akaipoipo?

¹⁴ Ka mareka ua tatou i to tatou au taeake e te au tuaine kare i akaipoipo, me akaperepere tatou ia ratou no to ratou au tu manea, kare no to ratou turanga. Kare e ka tangi ia ratou, ka meitaki tatou me akaperepere i to ratou tu tiratiratu. Tei tupu mai, kare rava to tatou au taeake e te au tuaine kare i akaipoipo e manako e te tuatua ra tatou no  ratou: “Kare ua atu rai [kotou] iaku nei.” (1 Kori. 12:21) Mari ra, ka akaperepereia ratou e e tuanga meitaki ta ratou i roto i te putuputuanga.

15. Eaa ta tetai i rave no te akamaata i ta ratou angaanga orometua?

¹⁵ I ou akenei, kua iki tetai papuritia i te apii i te reo ke, kia rauka ia ratou i te akamaata i ta ratou angaanga tutu aere. Ka anoanoia ratou kia rave i te au tauianga. Kua akaruke teia au taeake e te au tuaine, i te putuputuanga reo tupuna, kia tavini ki roto i te putuputuanga reo ke ke e te anoano maata ra i te tauturu. (Anga. 16:9) Kua iki rai teia au Kerititiano i teia, no te akamaata i ta ratou angaanga Patireia. Noatu ka roa te tuatau ia ratou i te apii meitaki i te reo ou, e maata ta ratou ka rave. To ratou au tu meitaki e te au akaraanga ka akamaroiroi i te putuputuanga. Ka akaperepere tatou i te au taeake e te au tuaine tei akaatinga ia ratou uaorai!

16. Eaa te ka akariro e kua tau tetai taeake i te tavini ei tangata pakari e ei tavini tauturu?

¹⁶ Kare te pupu o te aronga pakari e tapupu i te iki i tetai taeake kia tavini e ei tangata pakari me kore ei tavini tauturu no te mea kare aia i kite ake i te reo o te putuputuanga. Ka akamou te aronga pakari i ta ratou ikianga, ki runga i te au Tuatua Tapu no te aronga ka riro ei tangata pakari me kore ei tavini tauturu, e kare ki runga i to ratou kite i te reo o te putuputuanga.—1 Timo. 3:1-10, 12, 13; Tito 1:5-9.

17. Eaa te au uianga ka iki tetai ngutuare me neke ki tetai enua ke?

¹⁷ Kua neke tetai ngutuare Kerititiano ki tetai enua no te akaruru anga e te kimi ravenga. No teia tumu, ka apiiia ta ratou tamariki i te reo o te reira enua. Ka apii katoa te au metua i te reira reo ou ei tauturu ia ratou no te kimi i tetai angaanga. Akapeea me e putuputuanga tetai i reira e e pupu e tuatua ra i to ratou reo? Ko teea putuputuanga ka aere te ngutuare tangata? Ko te reo ainei o te enua i reira me kore ko te reo tupuna?

18. Kia tau kia Galatia 6:5, akapeea tatou me akangateitei i te ikianga a te upoko ngutuare?

¹⁸ Ka iki te upoko ngutuare e ko teea putuputuanga ka aere tona ngutuare. No te mea e na ratou rai teia ikianga, ka akamanako aia i te mea meitaki no te katoatoa i roto i te ngutuare. (E tatau ia Galatia 6:5.) Ka anoanoia tatou kia āriki i te ikianga a te upoko ngutuare. Noatu e eaa tana ka iki, ka āriki tatou i tana ikianga e ka āriki maoraora ia ratou ei aronga akaperepereia i roto i te putuputuanga.—Roma 15:7.

19. Eaa ta te upoko ngutuare ka pure meitaki?

 ¹⁹ I tetai tua, te tavini ra tetai ngutuare i roto i te putuputuanga e tuatua ra i te reo o te nga metua, inara kare te tamariki e kite meitaki i te reira reo. Me e putuputuanga tetai i te reo o te nga metua i te enua e tuatuaia ra te reo matauia o ta raua tamariki, penei ka ngata i te tamariki i te mārama i te au uipaanga e kare e akariro i te tuatua mou na ratou. No teaa ra? Penei te aere ra te tamariki ki te apii e tuatua ra i te reo matauia i reira kare ra i te reo o to ratou nga metua. No te reira tumu, ka anoanoia te upoko o te ngutuare kia pure meitaki e eaa ta ratou ka rave no te tauturu i ta ratou tamariki kia akavaitata kia Iehova e tona iti tangata. Ka aruaru ratou i te apiipii i ta ratou tamariki kia kite i to ratou reo me kore ka neke ki te putuputuanga e tuatua ra i te reo o ta ratou tamariki. Noatu eaa ta te upoko ikianga, ka akaperepere e ka akangateitei te putuputuanga e tavini ra ratou i ta ratou ikianga.

20. Akapeea tatou me akaari e te akangateitei ra tatou i to tatou au taeake e te au tuaine e apii ra i te reo ou?

²⁰ No te au tumu tukeke i uriuri mai tatou, i roto i te au putuputuanga e manganui, te vaira tetai au taeake e te au tuaine ka taii ratou i te apii i te reo ou. Penei ka ngata ia ratou i te akakite mai i to ratou manako. Inara, me kare tatou e akara i to ratou ngai paruparu, ka kite tatou i to ratou inangaro ia Iehova e te tavini iaia. Me kite tatou i teia au tu, ka akaperepere maata tatou i teia au taeake e te au tuaine. Kare tatou e karanga e “kare ua atu rai [kotou] iaku nei” no te mea kare ratou i kite i te tuatua taka meitaki i toou reo.

21-22. Eaa te au akameitakianga manea tei ia tatou?

²¹ Akaperepere maira a Iehova ia tatou e kua oronga mai i tetai tuanga na tatou i roto i tana putuputuanga. Me e tane e e vaine, kare i akaipoipo e kua akaipoipo, mapu e te pakarikari, kite meitaki i te tuatua i tetai reo ke e kare, akaperepereia tatou e Iehova e te katoatoa.—Roma 12:4, 5; Kolo. 3:10, 11.

²² E taangaanga ua rai tatou i te apiianga mei ta Paulo akatutuanga no te kopapa tangata. Na teia tu, ka kimi ravenga tatou i te akaperepere i ta tatou tuanga e ta tetai ke, i roto i ta Iehova putuputuanga.