1. Eaa ta tatou akameitakianga?

E AKAMEITAKIANGA ta tatou i te kite e e tuanga ta tatou i roto i ta Iehova putuputuanga! Mataora tatou i te pae vaerua ia tatou e tavini ra ia Iehova i roto i te putuputuanga. Eaa taau tuanga i roto i te putuputuanga?

2. Eaa ta Paulo akatutuanga i tata i roto i tana au reta akauruia?

² E maata ta tatou ka apii mei te akatutuanga ta te apotetoro ko Paulo i taiku i roto i tana au reta akauruia. Roto i teia au reta, kua akaaite a Paulo i te putuputuanga ki te kopapa tangata. Kua akaaite aia i te au tangata tataki tai o te putuputuanga ki te au mero kopapa.—Roma 12:4-8; 1 Kori. 12:12-27; Ephe. 4:16.

3. Eaa nga apiianga e toru ka uriuri tatou?

³ I roto i teia atikara, ka uriuri tatou e toru apiianga puapinga ka kite tatou mei ta Paulo akatutuanga. Mea mua, ka kite tatou tataki tai e e tuanga * ta tatou i roto i ta Iehova putuputuanga. Te rua, ka uriuri tatou e eaa ta tatou ka rave me ngata ia tatou i te kite i teia. E te toru, te tumu ka rave maroiroi tatou i ta tatou tuanga i roto i ta te Atua putuputuanga.

4. Eaa ta Roma 12:4, 5 e apii maira kia tatou?

⁴ Te apiianga mua ka kite tatou mei ta Paulo akatutuanga, e tuanga puapinga ta tatou tataki tai i roto i to Iehova ngutuare. Akamata a Paulo i tana akatutuanga na te taikuanga: “Mei ia tatou oki e manganui te melo i te kopapa okotai nei, kare ra e okotai rai taoonga to taua au melo katoa nei: Koia katoa oki tatou, i maata ua rai tatou, okotai ïa kopapa i te Mesia, e e melo oki tatou no tatou uaorai e ope rava ake.” (Roma 12:4, 5) Eaa ta Paulo e akakite ra? Tukeke ta tatou tuanga ka rave i roto i te putuputuanga, e puapinga maata tatou.

5. Eaa “te meitaki” ta Iehova i oronga ki te putuputuanga?

⁵ Me akamanako koe i te aronga e tuanga ta ratou i te putuputuanga, ka viviki koe i te akamanako i te aronga e arataki ra i te putuputuanga. (1 Tesa. 5:12; Ebe. 13:17) Na roto ia Karaiti, kua oronga mai a Iehova i “te meitaki i te tangata” ki Tana putuputuanga. (Ephe. 4:8) Ko “te meitaki i te tangata” ka kapiti mai i te au taeake i roto i te Pupu Akaaere, e te au taeake tauturu no te Pupu Akaaere, te au taeake o te Kumiti Betela, te au akaaere kotinga, te au taeake apiipii no te angaanga tutu evangeria, te aronga pakari o te putuputuanga, e te au tavini tauturu. Kua ikiia teia au taeake e te vaerua tapu kia akono i ta Iehova au mamoe akaperepere e te tiaki i te putuputuanga.—1 Pete. 5:2, 3.

6. Kia tau kia 1 Tesalonia 2:6-8, eaa ta te au taeake ikiia e te vaerua tapu ka aruaru i te rave?

⁶ Ikiia te au taeake e te vaerua tapu kia rave i te au apainga tukeke. Mei te tuanga tukeke o te kopapa, te rima e te vaevae, ka angaanga kapiti kia puapinga te kopapa, te au taeake tei ikiia e te vaerua tapu ka angaanga maroiroi i te akamatutu i te putuputuanga. Kare ratou e akapaapaa ia ratou uaorai. Mari ra, ka akamaroiroi i te au taeake e te au tuaine. (E tatau ia 1 Tesalonia 2:6-8.) Ka akameitaki tatou ia Iehova no teia au taeake i te pae vaerua tei inangaro ua i te tauturu!

7. Eaa te au akameitakianga e rekareka ana te aronga tavini tamou?

⁷ Tetai aronga i roto i te putuputuanga te tavini ra ei mitinari, e painia takake, me kore e painia tamou. I teianei ao, kua akariro teia au taeake e te au tuaine i te angaanga tutu aere e te akariro i te tangata ei pipi, ei oraanga no ratou. No te reira, e maata ta ratou aronga i tauturu kia riro mai ei pipi na Iesu Mesia. Noatu e e iti ua ta ratou i te pae kopapa, kua akameitaki a Iehova ia ratou. (Mare. 10:29, 30) Ka akaperepere tatou i teia au taeake e te au tuaine, mareka tatou e te tauturu maira ratou i te putuputuanga!

8. Eaa i akaperepereia ai te au taeake tutu aere i te nuti meitaki kia Iehova?

⁸ Ko te au taeake ainei tei ikiia e te aronga rave i te angaanga tamou, te aronga e e tuanga ta ratou i roto i te putuputuanga? Kare! E tuanga puapinga ta te katoatoa e tutu aere i te evangeria ki te Atua e te putuputuanga. (Roma 10:15; 1 Kori. 3:6-9) Ko tetai angaanga puapinga a te putuputuanga ko te akariro anga i te tangata ei pipi na to tatou Atu ko Iesu Mesia. (Mata. 28:19, 20; 1 Timo. 2:4) Te au taeake i roto i te putuputuanga, tei papetitoia e kare ake  i papetitoia, ka tuku ratou i teia angaanga e ko te mea mua, i roto i to ratou oraanga.—Mata. 24:14.

9. Eaa tatou ka akaperepere ei i to tatou au tuaine Kerititiano?

⁹ Kua oronga mai a Iehova i tetai tuanga meitaki na te au tuaine Kerititiano i roto i te putuputuanga. Akaperepere aia i teia au vaine, au mama, au takaua, e te au tuaine kare i akaipoipo ake tei tavini tiratiratu iaia. Kua taiku te Irava i teia au vaine manea tei akapaapaa i te Atua. Ka akameitaki ia ratou no to ratou tu pakari, akarongo, tu maroiroi, ngakau toa, oronga ua e te angaanga memeitaki. (Luka 8:2, 3; Anga. 16:14, 15; Roma 16:3, 6; Phili. 4:3; Ebe. 11:11, 31, 35) Ka akameitaki tatou ia Iehova no teia au vaine Kerititiano i roto i te putuputuanga, tei akaari katoa i teia au tu manea!

10. Eaa tatou ka akaperepere ei i te aronga pakarikari?

¹⁰ Kua akameitakiia tatou e e aronga pakarikari tetai i roto i te putuputuanga. Tei tavini tiratiratu ia Iehova i roto i to ratou oraanga. Tetai pae ia ratou koi apii akera i te tuatua mou. Noatu e eaa te tu, ka tupu rai te oraanga apikepike e te makimaki kia ratou. Ka riro teia turanga ei arairai i ta ratou ka rave i roto i te putuputuanga e te angaanga tutu aere. Noatu rai, kua rave teia aronga i te ka rauka ia ratou i te tutu aere, te akamaroiroi e te tereni i tetai ke! Te puapinga nei tatou mei to ratou akaraanga. Akaperepereia ratou e Iehova e tatou katoa.—Mase. 16:31.

11-12. Akapeea te au mapu i roto i te putuputuanga i te akamaroiroi ia koe?

¹¹ Pera katoa te aronga mapu. Ka tupu te au turanga ngata kia ratou e maata maira i roto i teia ao tutaraia e Satani te Tiaporo e tei akavareia e tana au apiianga pikikaa. (1 Ioa. 5:19) Inara ka akapumaanaia tatou me akarongo ki te au mapu e paupau ra i te uipaanga, te tutu aere ra, e te paruru ra i to ratou irinakianga. Ae ko kotou e te au mapu,  e tuanga puapinga ta kotou i roto i ta Iehova putuputuanga!—Sala. 8:2.

¹² Inara ka ngata i tetai au taeake e te au tuaine i te āriki e e tuanga akaperepereia ta ratou i roto i te putuputuanga. Eaa te ka tauturu ia tatou tataki kia āriki e e tuanga rai ta tatou? Ka akara ana tatou.

13-14. Eaa te tumu ka manako tetai pae kare ratou e puapinga ana ki te putuputuanga?

¹³ Ka akara tatou i te rua o te apiianga mei ta Paulo akatutuanga. Akakite mai aia i te manamanata e tupu ana ki tetai; kua ngata ia ratou i te āriki e te akaperepereia ra ratou i roto i te putuputuanga. Tata a Paulo e: “Kia karanga oki te vaevae e, Kare au i to te kopapa, no te mea kare au i te rima; kare tika aina aia i to te kopapa i reira? Kia tuatua oki te taringa e, Kare au i to te kopapa, no te mea kare au i te mata; kare tika aina aia i to te kopapa i reira?” (1 Kori. 12:15, 16) Eaa ta Paulo e apii maira?

¹⁴ Me akaaite koe ia koe ki tetai i roto i te putuputuanga, ka manako koe kare koe e puapinga ana. Tetai pae i roto i te putuputuanga e karape ratou ei puapii, e akaaere meitaki me kore e tiaki akamaroiroi. Penei ka manako koe kare koe i aite mei tera te tu. Te akaari maira te reira i toou tu akaaka e te mako. (Phili. 2:3) Inara kia matakite. Me akaaite putuputu koe ia koe ki te au taeake karape, ka maromaroa koe. Ka manako koe, mei ta Paulo i taiku, e kare aau tuanga i roto i te putuputuanga. Eaa te ka tauturu ia koe kia akakore i te reira manako?

15. Kia tau kia 1 Korinetia 12:4-11, eaa ta tatou ka āriki no ta tatou apinga aroa?

¹⁵ Akamanako ana i teia: Kua oronga a Iehova ki te au Kerititiano i te anere mataiti te apinga aroa o te vaerua tapu, inara kare e aiteite ana ta ratou apinga aroa. (E tatau ia 1 Korinetia 12:4-11.) Oronga mai a Iehova i te apinga aroa e te  tu karape tukeke kia ratou, akaperepere aia ia ratou tataki tai. Teia tuatau, kare teia apinga aroa semeio o te vaerua tapu ia tatou. Inara te aiteite ra te apiianga. Penei kare e aiteite ana to tatou tareni, akaperepere a Iehova ia tatou tataki tai.

16. Eaa ta Paulo akoanga ka aru tatou?

¹⁶ I te mea e ka akaaite tatou ia tatou ki tetai au Kerititiano, ka anoanoia tatou kia taangaanga i ta Paulo akoanga akauruia: “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke.”—Gala. 6:4.

17. Akapeea tatou e puapingaia ai me aru i ta Paulo akoanga?

¹⁷ Me aru tatou i ta Paulo akoanga akauruia e te akara meitaki i ta tatou angaanga, ka kite tatou e ka rauka rai ia tatou i te rave i te reira. Ei akaraanga, penei kare tetai tangata e karape roa ana i te ako mai i runga i te paata, inara e karape aia i te akariro i tetai ei pipi. Penei kare aia e mako ana i te akanoonoo i te au mea i roto i te putuputuanga mei tetai, inara e metaki aia i te akamaroiroi i tetai e kua inangaro te au papuritia i tana tauturu i te pae vaerua. Penei e rongo meitaki tona no te aroa taeake. (Ebe. 13:2, 16) Me taka meitaki ia tatou i to tatou maroiroi e te ka rauka ia tatou, e tumu anga meitaki ïa no tatou i te tauturu i te putuputuanga. Kare i reira tatou e vareae i to tatou au taeake e ta ratou au tareni tukeke.

18. Akapeea tatou me akameitaki atu i to tatou tu ei puapii?

¹⁸ Noatu ta tatou tuanga i roto i te putuputuanga, ka aruaru tatou katoatoa i te akamaata i to tatou karape i te tutu aere e te apii. Ei tauturu ia tatou, ka tereni a Iehova ia tatou na roto i tana akaaerenga. Ei akaraanga i ta tatou uipaanga i te epetoma, ka apiipii tatou akapeea me akamaata i to tatou karape i te angaanga tutu aere. Te tereni ra ainei koe ia koe i te taangaanga i te reira?

19. Akapeea e rauka ai ia koe te aere ki te Apii na te Aronga Tutu Evangeria o te Patireia?

¹⁹ Tetai porokaramu terenianga, ko te Apii na te Aronga Tutu Evangeria o te Patireia. Te aronga ka aere ki teia apii ko te au taeake e te au tuaine e rave ra i te angaanga tamou e 23 ki te 65 o ratou mataiti. Penei ka manako koe kare e rauka ia koe teia turanga. I te mea e ka manako koe kare e rauka, e tata i te au tumu ka inangaro koe i te aere. E oti e rave i taau ka rauka kia tae ki reira. Ma te tauturu a Iehova e te angaanga maroiroi, ka rauka ia koe.

20. Eaa ta tatou ka kite mai ia Roma 12:6-8?

²⁰ Te toru o te apiianga ka kite mai tatou mei te akatutuanga a Paulo ia Roma 12:6-8. (E tatau.) I konei te akaari maira a Paulo i te au taoonga tukeke tei rauka i tetai tangata i roto i te putuputuanga. Teianei te ako maira aia ia tatou kia taangaanga i ta tatou apinga aroa no te akamatutu e te akamaroiroi i te putuputuanga.

21-22. Eaa te apiianga ka mou mai mei ia Robert e Felice?

²¹ Akamanako ana i te akaraanga o te taeake ko Robert. I muri ake i tona tavini anga i tetai enua ke, kua tukunaia aia ki Betela i tona enua anau. Noatu kua akakiteia te tumu i tauiia ai tana tavini anga, karanga aia: “Kua tupu te manako ekoko kiaku—te manako puapinga kore—no tetai au marama. Kua akakeu iaku kia  akaruke i taku angaanga i Betela.” Akapeea aia i mataora akaou ei? Kua akamārama tetai tangata pakari kiaia e kua tereni a Iehova ia tatou i roto i ta tatou angaanga o mua ana ei tauturu ia tatou i roto i ta tatou angaanga ou. Kua kite mai a Robert e ka anoanoia aia kia kore e akara ki muri, mari ra kia akamou i tona manako ki mua ki tana ka rauka i te rave i teianei.

²² Kua tupu teia ki te Taeake Felice Episcopo. Kua oti mai raua ko tana vaine i te Apii Gileada i te 1956 e kua rave i te angaanga akaaere kotinga i Bolivia. I te 1964 kua anau tamariki raua. Karanga a Felice: “Kua ngata ia maua i te akaruke i ta maua angaanga akaperepere. Kua tangi au iaku uaorai no tetai tuatau roa. Mari ua ake te tauturu a Iehova, kua taui au i toku tu e kua akono i taku apainga ei metua i teianei.” Kua mārama ainei koe i to Robert e Felice turanga? E taitaia ana ainei koe no te mea kare e aiteite ana taau akameitaki anga mei taau angaanga o mua ana ki teianei? Me koia ia, ka mataora maata koe me taui i toou manako e te akamou ki runga i taau ka rauka i te rave i teianei i te tavini ia Iehova e toou au taeake. Kia angaanga maroiroi, taangaanga i toou tareni i te tauturu i tetai ke, ka rekareka koe ia koe e akamaroiroi ra i te putuputuanga.

23. Eaa ta tatou ka akamaara, e eaa ta tatou ka uriuri i te atikara ka aru mai?

²³ Te akaperepere ra a Iehova ia tatou tataki tai. Inangaro aia ia tatou kia riro ei tuanga i tona ngutuare. Me akamaara tatou i ta tatou ka rave no te akamaroiroi i to tatou au taeake e te au tuaine, e te angaanga maroiroi i te akatupu i te reira, ka kore te manako ekoko e kare a tatou tuanga i roto i te putuputuanga! Akapeea tatou me akara i tetai i roto i te putuputuanga? Akapeea tatou me akaari e te akaperepere ra tatou ia ratou? Ka uriuri te atikara ka aru mai i teia manako.