1. Eaa taau i apii mai no runga i Tei Anga?

ME KUA utuutuia mai koe ei Kite, e mea papu kua apiiia koe no runga ia Iehova mei toou meangiti anga mai. Kua apiiia koe, e koia Tei Anga, e au tu manea tikai tona e e akakoroanga meitaki tona no te tangata.​—Gene. 1:1; Anga. 17:24-27.

2. Eaa te manako o tetai pae no te aronga tei irinaki i Tei Anga?

² Maata te tangata kare e irinaki ana e e Atua tetai, ko Tei Anga i te au mea ravarai. Mari ra, irinaki ratou e kua tupu manako kore ua mai te oraanga e kua taui mei te au oraanga rikiriki ua ki te mea mamaata. Apiiia tetai o teia aronga i ko i tetai apii teitei. Karanga ratou e kua akapapu te taieni e kua tarevake te Pipiria, e ko tei irinaki i Tei Anga, e aronga kite kore ratou e kua akavareia.

3. Eaa i puapinga ai kia akamatutuia to tatou akarongo?

³ Ka akaparuparu ainei te tuatua a tetai pae i to tatou irinaki e ko Iehova Tei Anga i te au mea ravarai? Tei runga te reira i te tumu o toou irinakianga. Ko te tumu ainei e kua akaue ia tatou kia irinaki i te reira, me kua kimi matatio tatou i te au akapapuanga? (1 Kori. 3:12-15) Noatu eaa te roa ia tatou i roto i te tuatua mou, ka anoanoia tatou kia akamatutu ua rai i to tatou akarongo. Me pera tatou, kare tatou e akavareia e “te tuatua pakari e te pikikaa puapinga kore” a te aronga tei patoi i te Pipiria. (Kolo. 2:8; Ebe. 11:6) Ei tauturu ia tatou, ka uriuri teia atikara (1) i te tumu kare te maata anga i irinaki i Tei Anga, (2) akapeea koe me akamatutu i toou akarongo ki roto ia Iehova, ko Tei Anga, e te (3) akapeea me akamatutu ua atu rai i toou akarongo.

4. Ia Ebera 11:1, kua akatumuia te akarongo mou ki runga i teaa?

⁴ Manako tetai pae e ko te akarongo, ko te irinaki anga i tetai apinga noatu kare e akapapuanga. Inara, karanga te Pipiria e kare te reira i te akarongo mou. (E tatau ia Ebera 11:1.) Ko te akarongo i roto i te au mea kare i akaraia, mei ia Iehova, Iesu, e te Patireia i te rangi, kua akatumuia te reira ki runga i te au mea papu tikai. (Ebe. 11:3) Karanga tetai Kite, e biochemist aia: “Kare to tatou akarongo i te mea poiri tei kopae i te au akakiteanga taieni.”

5. Eaa te maata anga kare i irinaki e na te Atua i anga i te au mea katoa?

⁵ Penei ka ui tatou, ‘Me e akapapuanga tetai no runga i Tei Anga, eaa te maata anga kare i irinaki e na te Atua i anga i te au mea katoa?’ Kare roa tetai pae i kimi ana i te au akapapuanga. Karanga a Robert, e Kite no Iehova i teianei: “No te mea kare te au mea tei angaia i taikuia ana i te apii, kua manako mai au e kare te reira i tupu ana. E 20 oku mataiti i aravei ei au i te Au Kite o Iehova, e kua akarongo i te au akapapuanga a te Pipiria no runga i te au mea tei angaia.” *​—Akara i te pia “ E Patianga ki te au Metua.”

6. Eaa tetai pae kare e irinaki ana i Tei Anga?

⁶ Karanga tetai pae e kare ratou e irinaki ana i Tei Anga, no te mea ka irinaki ua ratou ki ta ratou e kite mata ra. Inara, te irinaki ra ratou i tetai au mea kare e kiteaia ana, mei te matangi, noatu e mea papu  teia. Ko te akarongo tei taikuia i roto i te Pipiria, te ō maira te akapapuanga o te “au mea kare i akaraia.” (Ebe. 11:1) Ka pou tetai tuatau e te maroiroi kia kite i te au akapapuanga, e kare te maata anga e inangaro i te rave i te reira. Ko te tangata kare e kimi i te au akapapuanga, ka karanga aia e kare e Atua.

7. Te patoi ra ainei te aronga kite e na te Atua i anga i te ao katoa e pini ua ake? Akamārama mai.

⁷ Te apiianga tetai au taineti i te au akapapuanga, kite mai ratou e na te Atua i anga i te ao katoa e pini ua ake. * Mei ia Robert, tei taikuia i mua ana, kare tetai pae i irinaki e e Atua tetai, no te mea kare te au mea angaia i apiiia ana i ko i te  apii teitei. Inara, e maata te au taineti tei apii e tei inangaro ia Iehova. Mei teia au taineti rai, kia akamatutu tatou pouroa i to tatou akarongo no te Atua, noatu to tatou tu kite i te apii. Kare e rauka i tetai ke i te rave i te reira no tatou.

8-9. (a) Eaa te uianga ta tatou ka uriuri i teianei? (e) Akapeea tatou e puapingaia ai me apii i te au mea tei angaia?

⁸ Akapeea koe me akamatutu i toou akarongo i roto i Tei Anga? Ka akara tatou e ā ravenga.

⁹ Apii i te au mea tei angaia. Ka rauka ia koe i te akamatutu i toou akarongo i roto i Tei Anga na roto i te akara matatio anga i te au manu, au rakau e te au etu. (Sala. 19:1; Isa. 40:26) Me apii maata atu koe i teia au mea, ka papu ia koe ko Iehova Tei Anga. E maata te au atikara te uriuri ra no runga i te au tuanga tukeke o te au mea tei angaia. Auraka e kopae i te tatau i teia au atikara. Tauta kia kite i te reira. E akara katoa i te au vitio manea i runga i ta tatou website, jw.org, no runga i te au mea i angaia ta tatou i kite ana i ko i ta tatou uruoaanga.

10. Oronga mai i tetai akaraanga akapeea te au mea i angaia i te akapapu anga e te vai ra Tei Anga. (Roma 1:20)

¹⁰ Me apii tatou i te au mea tei angaia, e akara meitaki i ta te reira e apii maira no runga i Tei Anga. (E tatau ia Roma 1:20.) Ei akaraanga, kua kite tatou i te meitaki ta te rā ka oronga mai, inara e kino katoa tetai, tei kapiki ia e ko te ultraviolet rays. Ka anoanoia te tangata kia paruruia mei te reira. E te vaira te paruru. Eaa te reira? E paruru tetai tei tukuia ki vao i to tatou paraneta​—ko te ozone layer te ka tamaru ia tatou mei teia vera kino tikai. Me pakari atu te vera o te ultraviolet rays, ka matutu atu te paruru anga o te ozone layer. Teianei, ka āriki ainei koe e e kite pakari e te aroa to Tei Anga i teia au mea?

11. Ka kiteaia te au akakiteanga no te au mea i angaia kiea? (Akara i te pia “ Au Apinga Apii no te Akamatutu i te Akarongo.”)

¹¹ Ka rauka i te akamatutu i toou akarongo na te akaraanga ki roto i te Watch Tower Publications Index e i runga i te jw.org. E akamata ki te au atikara e te au vitio i roto i te tuanga “E Mea Maaniia Ainei?” E au atikara poto ua teia tei akaari mai i te au mea umere no runga i te au manu e te au mea ke. Akakite katoa te reira akapeea te au taineti te kopi anga i ta ratou i kite mai mei te au mea i angaia.

12. Me apii tatou i te Pipiria, eaa te au mea ta tatou ka akara?

¹² Apii i te Pipiria. Te biochemist tei taikuia i mua ana, kare aia i irinaki ana e te vaira Tei Anga. Inara, i muri mai, kua rauka iaia te akarongo. Karanga aia: “Kare toku akarongo i akatumu uaia ki runga i te taieni. Mari ra, ki runga katoa i te apii meitaki anga i te Pipiria.” Penei kua kite takere koe i te au apiianga Pipiria. Noatu ra, ka anoanoia koe kia akamatutu i toou akarongo i roto i Tei Anga, na te apii ua rai i te Tuatua a te Atua. (Iosu. 1:8; Sala. 119:97) Akara i ta te Pipiria i akakite no te au mea tei tupu i taito. E pera te au totou tei akatupuia, e te tu rotai o te aronga tata. Ka riro teia i te akamatutu i toou akarongo ki roto i Tei Anga, e nana i akauru i te Pipiria. *​—2 Timo. 3:14; 2 Pete. 1:21.

13. Eaa tetai akaraanga o te kite pakari i roto i te Tuatua a te Atua?

 ¹³ Me apii koe i te Tuatua a te Atua, e akamanako i te puapinga o te au akoanga. Ei akaraanga, kua akamatakite mai te Pipiria e ka akatupu te inangaro maata o te moni i te “iriea e manganui.” (1 Timo. 6:9, 10; Mase. 28:20; Mata. 6:24) Kua tika ainei teia akamatakiteanga i teia tuatau? Akakite te puka The Narcissism Epidemic: “Te aronga tei anoano maata i te au mea materia, kare ratou e mataora ana. E te aronga tei inangaro maata i te moni, kua tuia ratou e te maki manako; e te au maki kopapa.” E akamatakiteanga puapinga ta te Pipiria i oronga mai no te aronga tei inangaro maata i te moni. E au kaveinga Pipiria ke atu ainei tetai te ka puapingaia koe? Me akaperepere tatou i te au akoanga a te Pipiria, ka irinaki maata atu tatou ki te pakari ta Tei Anga ka oronga mai. (Iako. 1:5) Te ka tupu, ka mataora to tatou oraanga.​—Isa. 48:17, 18.

14. Eaa taau ka kite mai no runga ia Iehova me apii koe i te Pipiria?

¹⁴ Apii i te Pipiria ma te akakoroanga tau—kia kite ia Iehova. (Ioa. 17:3) Ia koe e apii ra i te Pipiria, ka kite mai koe i te au tu manea o Iehova—te au tu taau ka kite katoa i roto i te au mea tei angaia. Taka meitaki e au tu teia no te Atua, e kare te reira i te mea manako ua no tetai tangata. (Exo. 34:6, 7; Sala. 145:8, 9) Te maata atu taau ka apii no runga ia Iehova, ka matutu atu toou akarongo, ka maata atu toou inangaro nona, e ka matutu atu toou pirianga kiaia.

15. Akapeea koe e puapingaia ai me akakite aere koe i toou akarongo?

¹⁵ Akakite i toou irinaki no te Atua ki tetai ke. Me pera koe, ka akamatutuia toou akarongo. Inara, akapeea me ka ui mai tetai tangata taau e tutu aere ra no runga i te Atua e kare koe e kite i te pau i te reira? E tauta i te kimi i te pauanga a te Pipiria i roto i ta tatou au puka, e oti e akakite atu ki tera tangata. (1 Pete. 3:15) Ka rauka katoa ia koe i te pati i te tauturu a tetai taeake tukatau. Me ka āriki tera tangata i te pauanga a te Pipiria e me kare, ka puapingaia rai koe mei taau kimikimianga. E ka matutu atu toou akarongo. Te ka tupu, kare koe e akavareia e te au pikikaa a te aronga tei manako e e kite maata to ratou tei karanga, kare e Atua, Tei Anga i te au mea ravarai.

16. Eaa te ka tupu me kare tatou e akamatutu ua atu rai i to tatou akarongo?

¹⁶ Noatu eaa te roa to tatou tavini anga ia Iehova, ka anoanoia tatou kia akamatutu ua atu rai i to tatou akarongo. No teaa ra? No te mea, me kare tatou e matakite, ka akaparuparuia te reira. E akamaara, ko te akarongo, te ō maira te au mea akara koreia. Me kare tatou e kite mata i tetai apinga, ka akangaropoina tatou i te reira. Karanga a Paulo no te akarongo paruparu, e ko “te ara e rokoia ngoie ei tatou nei.” (Ebe. 12:1) Akapeea tatou me kopae i teia ereere?​—2 Tesa. 1:3.

17. Eaa te ka tauturu i te akamatutu i to tatou akarongo?

¹⁷ Mea mua, pati putuputu no to Iehova vaerua tapu. Eaa te tumu? No te mea e tuanga te akarongo no te ua o te vaerua. (Gala. 5:22, 23) Kare e rauka ia tatou i te akatupu e te akamatutu i te akarongo me  kare te vaerua tapu e tauturu mai. Me pati ua rai tatou kia Iehova no tona vaerua, ka oronga mai aia i te reira. (Luka 11:13) Ka rauka ia tatou i te pure: “E akamaata mai i to matou akarongo.”​—Luka 17:5.

18. Ia Salamo 1:2, 3, eaa te tikaanga manea tei rauka ia tatou?

¹⁸ Pera katoa, e apii putuputu i te Tuatua a te Atua. (E tatau ia Salamo 1:2, 3.) Te tataia anga teia salamo, e iti ua te tangata i Iseraela tei rauka ia ratou te katoaanga o te Ture a te Atua. Inara, ka rauka i te au ariki e te au taunga i te reira, e i te openga o te itu mataiti, ka akanooia kia akarongo “te tane, e te vaine, e te tamariki,” e te au tangata ke o Iseraela ki te tatauanga i te Ture a te Atua. (Deu. 31:10-12) I to Iesu tuatau, e iti ua te tangata e pokaikai Tuatua Tapu ta ratou e pera i roto i te au sunago. Inara i teia tuatau, e maata te tangata ka rauka ia ratou i te tatau i te Tuatua a te Atua. E tikaanga manea tikai teia. Akapeea tatou me akaari e te akaperepere ra tatou i te reira?

19. Eaa ta tatou ka rave kia matutu ua atu rai to tatou akarongo?

¹⁹ Ka akaari tatou i te tu akaperepere no te Tuatua a te Atua na te tatau putuputu anga i te reira. Kare tatou e tukutuku i te rave i ta tatou uaorai apii, e ka rave ua me e taime toou. Me apii putuputu tatou i te Pipiria, ka matutu ua atu rai to tatou akarongo.

20. Eaa ta tatou ka tauta i te rave?

²⁰ Ei tuke ki te “aronga kite e te pakari” o teianei ao, e akarongo matutu to tatou tei akatumuia ki runga i te Tuatua a te Atua. (Mata. 11:25, 26) Me apii tatou i teia puka, ka kite mai tatou i te tumu i kino ei te turanga o te enua, e ta Iehova ka rave. No reira, kia maroiroi tatou i te akamatutu i to tatou akarongo e kia tauturu i te au tangata kia irinaki ki roto i Tei Anga. (1 Timo. 2:3, 4) E kia tapapa ua atu rai tatou i te tuatau ka kapiki ei te au tangata tei ora mai i runga i te enua, i te tuatua ia Apokalupo 4:11: “E tau te kakā ia koe, e te Atu . . . naau oki i anga i te au mea ravarai nei.”