1-2. Eaa ta tatou ka uriuri i roto i teia atikara?

EAA toou manako me tiaki koe i tetai apinga inara kare te reira i tae vave mai? Ka taitaia ainei koe? Karanga a Maseli 13:12: “Kia tavareia te apinga tapapaia ra, e aati te manava.” Inara, akapeea me kua kite mai koe i te tumu tikai kare te reira i tae vave mai i te tuatau i tapapa ai koe? Me tupu te reira, mea papu e ka akakoromaki koe e ka puareinga ua i te tiaki.

² I roto i teia atikara, ka akara tatou i te au kaveinga Pipiria te ka tauturu ia tatou kia akatupu e kia akaari ua i te tu “tapapa.” (Mika 7:7) Ka akara katoa tatou e rua turanga te ka anoanoia tatou kia tiaki marie ia Iehova. E oti, ka uriuri tatou i te au akameitakianga te ka orongaia ki te aronga tei tapapa ia Iehova.

3. Eaa te kaveinga i roto ia Maseli 13:11?

³ Tetai akaraanga no te akakoromaki, tei roto te reira ia Maseli 13:11. Karanga ra: “Te apinga i rauka i te ravenga puapinga kore ra, ka iti ïa: ko tei rauka ra i te rima opu tikai ra, ka maata ïa.” Te kite ra ainei koe i te kaveinga? Ka puapingaia te tangata me akakoromaki aia, me rave marie i tana angaanga.

4. Eaa te kaveinga puapinga i roto ia Maseli 4:18?

⁴ Akakite a Maseli 4:18 e “ko te arataa oki o te aronga tuatua-tika ra, e tau ïa ki te mārama kakā ra, ko tei tupu ua kakā anga e tae ua atu ki te avatea tikai ra.” Te akataka  maira teia i te ravenga e akaari mai ana a Iehova i tona akakoroanga ki te tangata—aere marie ua. Inara, ka tau katoa teia irava no tetai Kerititiano e akameitaki maira i tona turanga pae vaerua. Kare e rauka i te akarapurapu i te reira. Ka pou tetai tuatau. Me apii e me taangaanga tatou i te au kaveinga mei te Tuatua a te Atua e tana akaaerenga, ka akatupu marie tatou i te tu o Iesu. Ka tupu katoa to tatou kite no runga i te Atua. Akamanako ana i ta Iesu akatutuanga.

5. Akapeea a Iesu te akatutuanga e ka anoanoia te tuatau kia taui te tangata?

⁵ Roto i tetai akatutuanga, akaaite a Iesu i te karere Patireia e tutu aere ra tatou, ki tetai ua meangiti te ka tupu marie ki roto i te ngakau o te aronga akaaka. Karanga aia: “Te kao ra e te tupu ua ra taua ua ra, kare aia i kite i te tupu anga. Na te one uaorai oki i akatupu ake; ko te kao anga tei mua, ei reira te kaui anga, e muri ake ko te sitona pakari i roto i te kaui.” (Mare. 4:27, 28) Eaa te aiteanga o ta Iesu tuatua? Mei tetai ua rakau e tupu marie ua ra, ka tupu marie katoa te turanga pae vaerua o tetai tangata tei āriki i te karere o te Patireia. Ei akaraanga, me akavaitata ta tatou aronga apii Pipiria kia Iehova, ka kite mai tatou i te au taui anga manea ta ratou ka rave. (Ephe. 4:22-24) Inara, kia akamaara tatou na Iehova i akatupu i teia ua meangiti.​—1 Kori. 3:7.

6-7. Eaa ta tatou ka apii mai mei ta Iehova anga anga i te enua?

⁶ Te au mea pouroa tana ka rave, ka akapou a Iehova i te taime kia oti meitaki te reira. Ka rave aia i teia kia akakakāia tona ingoa tapu e kia puapingaia tetai ke. Ei akaraanga, akamanako ana akapeea a Iehova i te akapapa marie anga i te enua no te tangata.

⁷ Te akatakaanga akapeea a Iehova te anga anga i te enua, akakite te Pipiria e kua tuku aia i “te au ariteanga,” te  akamouanga i “tona au tango,” e te tukuanga i “te toka kapeutara.” (Iobu 38:5, 6) Kua akapou katoa aia i tetai tuatau kia akara i tana i rave. (Gene. 1:10, 12) Ka rauka ainei ia koe i te akamanako eaa ta te au angera e kite ra ia Iehova e rave marie ra i tana angaanga? Mei teaa rai to ratou mataora! I tetai atianga, kua ‘maeva ua ratou i te rekareka.’ (Iobu 38:7) Eaa ta tatou ka apii mai? Kua pou e tauatini ua atu mataiti kia oti ta Iehova au angaanga, inara i tona akaraanga i te reira, karanga aia “te meitaki roa ra.”​—Gene. 1:31.

8. Eaa ta tatou ka uriuri i teianei?

⁸ Mei ta tatou i kite mai mei teia au akaraanga, e maata te au kaveinga i roto i te Pipiria tei akaari mai i te puapinga o te akakoromaki. Akara tatou i teianei e rua turanga ka anoanoia tatou kia tapapa ia Iehova.

9. Eaa tetai turanga ka anoanoia tatou kia tapapa ia Iehova?

⁹ Penei ka tapapa tatou kia pauia mai ta tatou pure. Me pure tatou no te maroiroi kia autu i tetai manamanata me kore tetai tu paruparu, penei ka manako tatou kare te tauturu e tae mai. Eaa te tumu kare a Iehova e pau viviki mai i ta tatou au pure?

10. Eaa ka anoanoia ai te akakoromaki me pure tatou?

¹⁰ E akarongo meitaki ana a Iehova ki ta tatou pure. (Sala. 65:2) Te akapapu ra ta tatou au pure i to tatou akarongo kiaia. (Ebe. 11:6) Inangaro katoa a Iehova i te kite i to tatou anoano maata kia akono i ta tatou e pati ra e te rave i tona anoano. (1 Ioa. 3:22) No reira, ka anoanoia tatou kia akaari i te tu akakoromaki e te rave i ta tatou i pure kia autu i tetai tu tau kore me kore te tu paruparu. Akakite mai a Iesu e kare tetai o ta tatou pure e pau vivikiia mai. Karanga aia, “E pati, e e orongaia mai ta kotou; e kimi, e kitea ïa ia kotou; e topāpā atu, e kiritiia mai ïa te pa ia kotou: ko te aronga katoa oki i pati ra, kua rauka ïa: e ko tei kimi ra, kua kitea ïa; e tei topāpā ra, e kiritiia mai ïa te pa iaia.” (Mata. 7:7, 8) Me aru tatou i teia kaveinga e kia “tamou marie i te pure,” ka papu ia tatou e ka akarongo e ka pau mai to tatou Metua i te rangi i ta tatou pure.​—Kolo. 4:2.

11. Akapeea a Ebera 4:16 me tauturu ia tatou me kare ta tatou pure e pau vivikiia mai?

¹¹ Noatu ka manako tatou e kare a Iehova e pau viviki mai i ta tatou pure, kua taputou aia e ka pau aia i te reira i te “tuatau e tau ei ra.” (E tatau ia Ebera 4:16.) Te tumu teia kare rava tatou e akaapa ia Iehova me kare aia e pau viviki mai i ta tatou pure. Ei akaraanga, kua roa te tuatau te pure anga te tangata no te Patireia o te Atua kia takore i teia ao kino. Karanga katoa a Iesu kia pure tatou no te reira. (Mata. 6:10) Inara e mea tarevake me ka tuku tetai tangata i tona akarongo no te Atua kia akaparuparuia no te mea kare te openga i tae mai mei ta te tangata i manako! (Haba. 2:3; Mata. 24:44) E mea meitaki no tatou kia tapapa ia Iehova e kia pure kiaia. Ka tae mai te openga i te tuatau tau tikai, no te mea kua iki takere a Iehova i te ‘rā e te ora’ no te reira. E ka tau tera rā ei taime meitaki rava atu no te katoatoa.​—Mata. 24:36; 2 Pete. 3:15.

12. Eaa te turanga penei ka ngatā ia tatou i te akakoromaki?

 ¹² E akakoromaki kia akatikatikaia te au manamanata. E mea matau na te tangata i te takinokino i te au tane e te vaine e tuke to ratou tu, te reo, te peu, e te enua i aere mai ei ratou. Te takinokinoia ra tetai pae no to ratou tu pakipakitai e te apikepike o te kopapa. Manganui te au tavini o Iehova tei akakoromaki i te au tu kino no to ratou irinaki i te Pipiria. Me tupu teia kia tatou, e akamaara i te tuatua a Iesu. Karanga aia: “Kareka te tāpu tikai e tae ua atu ki te openga ra, ka ora ïa.” (Mata. 24:13) Inara, akapeea me kua kite koe i tetai tangata i roto i te putuputuanga tei rave i tetai ara kino? Me kua akakiteia te reira ki te aronga pakari, ka tiaki marie ainei koe kia akono ratou i te reira kia tau kia Iehova? Eaa te ō maira ki te reira?

13. Eaa ta Iehova akanoonooanga me rave tetai tangata i te ara kino?

¹³ Me kite te aronga pakari e kua raveia tetai ara kino i roto i te putuputuanga, ka pure ratou no “te pakari no runga maira” kia kite i to Iehova manako no te reira. (Iako. 3:17) Te akakoroanga, kia tauturu i te “akaoki mai i te tangata ara i taua apa nana ra.” (Iako. 5:19, 20) Inangaro katoa ratou i te paruru i te putuputuanga e te akapumaana i te aronga tei mamae no tei tupu. (2 Kori. 1:3, 4) Me raveia tetai tarevake kino, ka kimi te aronga pakari na mua i te tika, e penei ka pou tetai tuatau no te rave i te reira. E oti, ka pure ratou e ka kimi i te au irava mei te Pipiria no te ako atu “ma te tuatua-tau.” (Iere. 30:11) Noatu kare ratou e tukutuku i te reira no tetai tuatau ke, kare katoa te aronga pakari e rapurapu i te tuku i ta ratou ikianga. Me akatano meitakiia teia au manamanata, ka tupu te meitaki ki te katoatoa i roto i te putuputuanga. Inara, noatu ka akono meitakiia teia au manamanata, ka mamae rai tetai pae. Me kua tupu teia kia koe, eaa taau ka rave kia akaiti i toou mamae?

14. Eaa te akaraanga Pipiria te ka tauturu ia koe kia akakoromaki me tamamae tetai Kerititiano ia koe?

¹⁴ Kua tamamae ana tetai tangata me kore tetai taeake ia koe? E maata te au  akaraanga meitaki i roto i te Pipiria te ka apii mai akapeea me tapapa ia Iehova kia akatika i te au manamanata. Ei akaraanga, noatu kua takinokinoia a Iosepha e tona uaorai au tuakana, kare aia i akatika ana i te reira kia akataitaia iaia. Mari ra, kua akamou aia ki runga i tana tavini anga ia Iehova, e kua akameitakiia aia no tona tu akakoromaki. (Gene. 39:21) Aere ua rai, kua rauka ia Iosepha i te akakore i ta ratou ara e kua kite i ta Iehova akameitakianga. (Gene. 45:5) Mei ia Iosepha rai, ka pumaana tatou me akavaitata tatou kia Iehova e kia irinaki e nana e akatikatika i te au manamanata.​—Sala. 7:17; 73:28.

15. Eaa tei tauturu i te tuaine kia akakoromaki i tetai akakinoanga?

¹⁵ Te tika, kare te au tu kino e aiteite ana ki tei tupu kia Iosepha, inara ka mamae rai tatou me tupu tetai ua atu takingakino. Me tupu tetai manamanata i rotopu ia koe e tetai taeake, me kore ki tetai kare e akamori ana ia Iehova, ka puapingaia tatou me aru i te au kaveinga Pipiria. (Phili. 2:3, 4) Akamanako ana i teia tupuanga. Kua mamae tetai tuaine i te kite anga e kua tuatua pikikaa e kua akakino tetai oa angaanga iaia. Kare aia i viviki ana i te riri, mari ra kua akamanako aia i to Iesu akaraanga. Te akakinoia anga aia, kare aia i akakino atu ia ratou. (1 Pete. 2:21, 23) No reira, kare te tuaine i tuatua akakino atu. I muri mai, kua kite aia e te akakoromaki ra tona oa angaanga i tetai maki kino tei tupu kiaia e te taitaia maata ra aia. Kua manako mai te tuaine e penei kare tona oa angaanga i akakoro i te tuatua kino iaia. No reira kua mataora te tuaine no tei akakoromaki aia i teia akakinoanga, e kua rauka iaia te ngakau ‘au.

16. Eaa te ka akapumaana ia koe me tupu tetai takinokino anga? (1 Petero 3:12)

¹⁶ Me kua mamae koe no tetai takinokinoanga, e akamaara, te akavaitata ra a Iehova ki te “aronga ngakau paruparu.” (Sala. 34:18) Inangaro Aia ia koe no toou tu akakoromaki e no tei tuku i taau apainga kiaia. (Sala. 55:22) Koia te  Akava o te ao katoa nei. Te kite ra aia i te au mea e tupu ra. (E tatau ia 1 Petero 3:12.) Me e manamanata kino toou e kare e rauka i te akatikatika, ka tapapa ainei koe ia Iehova?

17. Ia Isaia 30:18, eaa te akapapuanga ta Iehova i oronga mai?

¹⁷ Kare e roa atu, ka akameitaki to tatou Metua i te rangi ia tatou na roto i tona Patireia. Karanga a Isaia 30:18: “E tapapa ra Iehova, kia takinga-meitaki aia ia kotou, e e tu aia ki runga kia aroa aia ia kotou: e Atua tuatua-tau oki a Iehova: e ao to ratou katoa tei tapapa marie iaia ra.” Te aronga tei tapapa ia Iehova, ka akameitaki maataia ratou i teianei e i roto i te ao ou.

18. Eaa te au akameitakianga ta tatou e tapapa nei?

¹⁸ Me tae te iti tangata o te Atua ki roto i te ao ou, kare rava e manamanata e te tu taitaia e tupu akaou kia ratou. Ka takoreia te au takinokinoanga e kare e mamae akaou. (Apo. 21:4) Kare tatou e noo apiapi akaou no te mea ka kī te enua i te au mea ta tatou ka anoano. (Sala. 72:16; Isa. 54:13) E akameitakianga manea tikai te reira!

19. Te akapapa ra a Iehova ia tatou i teia tuatau no teaa?

¹⁹ Me akakoromaki tatou i te au tu kino e me akatupu i te au tu meitaki i teia tuatau, te akapapa ra a Iehova ia tatou no te ora mutu kore i raro ake i tana tutaraanga. Auraka e taitaia e auraka e tuku i te ‘au. Te vaitata maira te au mea meitaki rava atu! Kia akakoromaki ua rai tatou e te tapapa marie ia Iehova kia akaoti i tana angaanga!