1. Ia Ebera 12:1, eaa ta tatou ka rave kia tae ki te openga o te taemoemo anga?

 TE AKAAITE ra te Pipiria i to tatou oraanga Kerititiano ki tetai taemoemo anga. Te aronga oro tei tae ki te openga kua rauka te ora mutu kore ia ratou. (2 Timo. 4:7, 8) Ka tauta pakari tatou i te oro tamou marie, no te mea te vaitata nei tatou ki te openga. Kua akakite mai te apotetoro ko Paulo tei oti tana oro anga, i te ka tauturu ia tatou kia rauka te rē. Kua akakite mai aia e “e kopae atu tatou i te au mea teiaa ravarai . . . e oro tamou marie ei i teianei oroanga i tukuia mai ki mua ia tatou nei.”—E tatau ia Ebera 12:1.

2. Eaa te aiteanga e ‘kopae atu i te au mea teiaa ravarai’?

² Te tataanga a Paulo e “e kopae atu tatou i te au mea teiaa ravarai,” te karanga ra ainei aia e kare a te au Kerititiano apainga? Kare. Te karanga ra aia e e akaruke tatou i te au mea teiaa kare e anoanoia. No te mea ka tamanamanata e ka akaroiroi teia au mea ia tatou. Ka akara tatou e me te apai nei tatou i te au mea teiaa kare e anoanoia e e kopae viviki atu i te reira. Taua taime rai, ka apai tatou i te au apainga tei anoanoia. Me kare tatou e apai i teia au apainga nei, kare tatou e tae ki te openga o te oro anga. (2 Timo. 2:5) Eaa i reira te au mea ka apai tatou?

3. (a) Ia Galatia 6:5, eaa ta tatou ka apai? (e) Eaa ta tatou ka uriuri i teia atikara, e no teaa ra?

³ E tatau ia Galatia 6:5. Kua akakite mai a Paulo i  tetai mea ka apai tatou. Kua tata aia e tei “runga iaia uaorai ta te tangata ravarai apainga.” Te taiku ra a Paulo ki ta tatou uaorai apainga i mua i te Atua. I teia atikara, ka uriuri tatou eaa teia ‘au apainga,’ e akapeea tatou me apai i te reira. Ka kite katoa tatou i te apainga kare e anoanoia e akapeea me kopae atu i te reira. Te apai anga i ta tatou uaorai apainga e te kopae anga i te au mea kare e anoanoia ka tauturu ia tatou kia tae ki te openga o te taemoemo anga.

4. Eaa ra ta tatou tia akatapuanga kare i te apainga teiaa? (Akara katoa i te tutu.)

⁴ Ta tatou tia akatapuanga. Ia tatou e akatapu ra ia tatou uaorai kia Iehova, kua tia tatou i te akamori iaia e te rave i tona anoano. E akono meitaki tatou i taua tia. E apainga puapinga i te akono i ta tatou akatapuanga, e kare ra i te mea teiaa. Te tumu, kua anga a Iehova ia tatou kia rave i tona anoano. (Apo. 4:11) Kua tuku aia ki roto ia tatou te anoano  kia kite e kia akamori iaia e kua anga aia ia tatou i roto i tona uaorai tu. No reira, ka rauka ia tatou i te akavaitata atu kiaia e te rave i tona anoano ma te mataora. (Sala. 40:8) Pera katoa, me rave tatou i te anoano o te Atua e te aru i tana Tamaiti, ka rauka ia tatou “te akaangaroianga.”—Mata. 11:28-30.

5. Eaa te ka tauturu ia koe kia akono i taau akatapuanga? (1 Ioane 5:3)

⁵ Akapeea koe me apai i taau apainga? E rua mataara te ka tauturu ia koe. Mea mua, e akaketaketa i toou uaorai inangaro no Iehova. Na te akamanako oonu anga i tana i rave noou e te au akameitakianga ka rave aia. Me maata atu toou inangaro i te Atua, mama ua ia koe i te akarongo kiaia. (E tatau ia 1 Ioane 5:3.) Te rua, aru ia Iesu. Kua rauka iaia i te rave i te anoano o te Atua no te mea kua pure aia kia Iehova no te tauturu e kua akamou i tona manako ki te tutakianga. (Ebe. 5:7; 12:2) Mei ia Iesu rai, e pure kia Iehova no te maroiroi e te akamanakoanga i te ora mutu kore. E maata maira toou inangaro i te Atua e te aru i tana Tamaiti, ka rauka ia koe i te akono i taau akatapuanga.

6. Eaa tatou ka akono ei i ta tatou apainga ngutuare? (Akara katoa i te tutu.)

⁶ Ta tatou au apainga ngutuare. I roto i ta tatou oro anga no te ora, ka maata atu to tatou inangaro ia Iehova e Iesu i te inangaro i to tatou kopu tangata. (Mata. 10:37) Kare te aiteanga e ka akangaropoina tatou i ta tatou apainga ngutuare, mei te mea rai e na teia e tapupu nei ia tatou i te akamareka i te Atua e Karaiti. Kare, kia āriki rekareka mai te Atua e Karaiti ia tatou, ka rave tatou i ta tatou apainga ngutuare. (1 Timo. 5:4, 8) Ka tupu te mataora kia tatou me rave tatou i te reira. No te mea, kua kite a Iehova e ka mataora te ngutuare me aroa e me akangateitei te tane e te vaine i tetai e tetai, me tereni e me akaperepere te au metua i ta ratou tamariki, e me akarongo te tamariki ki to ratou metua.—Ephe. 5:33; 6:1, 4.

7. Akapeea koe me akono i taau tuanga i roto i te ngutuare?

⁷ Akapeea koe me apai i taau apainga? Noatu eaa taau tuanga i roto i te ngutuare, e irinaki i te akoanga meitaki a te Pipiria, auraka e irinaki ki toou uaorai manako, ki te au peu taau i mātau, me kore ki ta te aronga kite e akakite maira. (Mase. 24:3, 4) E aru meitaki i te akoanga i roto i ta tatou au puka Pipiria. Tei roto i reira te au manako meitaki akapeea me aru i te au kaveinga Pipiria. Ei akaraanga, i roto i te au atikara tukeke “Tauturu no te Ngutuare Tangata” e au kaveinga tetai te ka tauturu i te aronga akaipoipo, te au metua, e te au mapu i teia tuatau. b E aru meitaki i ta te Pipiria e akakite maira, noatu kare te au mema o te ngutuare e akarongo mai ana. Me aru koe i te reira, ka akameitakiia toou ngutuare e ka rekareka koe i ta Iehova akameitakianga.—1 Pete. 3:1, 2.

8. Akapeea ta tatou au ikianga i te akakeu anga ia tatou?

⁸ Ta tatou apainga no ta tatou au ikianga. Oronga mai a Iehova i te tu rangatira  kia tatou, e te inangaro ra aia kia mataora tatou me rave tatou i te ikianga meitaki. Inara kare aia e paruru ia tatou me iki tatou i te au ikianga tarevake. (Gala. 6:7, 8) No taua tumu, ka āriki tatou e ka tarevake ta tatou ikianga, ta tatou i tuatua, e ta tatou i rave. No runga i ta tatou i rave, penei ka kinokino to tatou akava ngakau. Inara, me kite tatou e ko tatou tei apa ka akakeu ia tatou kia aaki i ta tatou ara, akatikatika i te tarevake, e auraka e rave akaou i te reira. Ka tauturu teia ia tatou kia oro tamou marie e ora ai.

9. Eaa taau ka rave me kua tarevake taau ikianga? (Akara katoa i te tutu.)

⁹ Akapeea koe me apai i taau apainga? Me kua tarevake taau ikianga e āriki ua i te reira. No te mea kare e rauka ia koe i te taui. No reira, eiaa e kaimoumou i toou taime e te maroiroi i te akaapa ua ia koe me kore i tetai ke. Mari ra, e akakite i toou tarevake e te akatanotano i toou tu ki toou turanga. Me te kinokino ra toou manako, e pure, e akakite e e pati kia Iehova kia akakore mai i taau ara. (Sala. 25:11; 51:3, 4) E akakite ki te aronga i akatarevakeia e kua tataraapa koe, e me ka anoanoia, e pati tauturu ki te aronga pakari. (Iako. 5:14, 15) No reira e tauta pakari kia kore e rave akaou i te reira. Me akapera koe, papu e ka aroa takinga meitaki mai a Iehova ia koe e ka oronga mai i te tauturu.—Sala. 103:8-13.

10. Eaa i riro ei ei apainga teiaa e kua tavareia te au apinga i tapapaia ra? (Galatia 6:4)

¹⁰ Tavareia te au apinga i tapapaia ra. Ka riro te tavare anga o te au apinga i tapapaia ra kia akataitaia ia tatou me akaarite ki tetai e tetai. (E tatau ia Galatia 6:4.) Ka tupu te vareae e te taemoemo. (Gala. 5:26) Me aru tatou i ta tetai e rave ra ka tupu te kino. Akamanako ana eaa te ka tupu me ‘tavareia te apinga i tapapaia ra, e aati te manava,’ e kua taitaia tatou no te mea kare te reira i tupu! (Mase. 13:12) Me akapera tatou, ka akaroi e ka tuku tatou i te au no te oro tamou marie e ora ai.—Mase. 24:10.

11. Eaa te ka tauturu ia koe kia kopae kia kore e tavareia e te au apinga i tapapaia ra?

¹¹ Akapeea koe me kopae atu i taua mea teiaa? E tauta i te rave i te ka rauka ia koe no ta Iehova e umuumu maira. Kare aia e māro mai ia koe. (2 Kori. 8:12) Kare a Iehova e akaaite ana i taau e rave ra ki ta tetai ke. (Mata. 25:20-23) Te akaperepere ra aia i taau tavini anga ngakau katoa, toou tu tiratiratu, e toou tu akakoromaki. Penei ka āriki ua koe e no toou mataiti, te kopapa, te turanga kare e rauka ia koe i te rave i te au mea ravarai taau i mātau ana. Mei ia Barezilai, e akakite e kare e rauka ia koe i te rave i te reira angaanga. (2 Samu. 19:35, 36) Mei ia Mose rai, e āriki ua i te tauturu e te tuʼa i te apainga ki tetai ke. (Exo. 18:21, 22) Me akaari koe i te tu akaaka, kare koe e tapapa atu i tetai au mea te ka akaroiroi ia koe i roto i taau oro tamou marie e ora ai.

12. Kua apa ainei tatou no te ikianga a tetai ke? Akamārama mai.

¹² Manako akaapa anga no te ikianga tarevake. Kare tatou e rave i te au ikianga na etai ke; kare katoa e rauka ia tatou i te paruru ia ratou no ta ratou ikianga tarevake. Ei akaraanga, penei ka iki tetai tamaiti me kore tamaine e kare aia e akamori akaou ia Iehova. Ka mamae  ngakau te nga metua no te reira. Inara, me akaapa nga metua ia raua no te ikianga tarevake a ta raua tamaiti ka riro ïa ei apainga teiaa. Kare a Iehova e inangaro e kia manako te au metua mei te reira rai.—Roma 14:12.

13. Eaa ta te nga metua ka rave no te ikianga tarevake a te tamaiti?

¹³ Akapeea koe me kopae atu i taua mea teiaa? Kia mārama tatou e kua oronga mai a Iehova i te tu rangatira kia tatou katoatoa. Kua akatika aia e na te tangata uaorai e rave i tana ikianga. Pera katoa ta tatou akamori anga iaia. Te kite ra a Iehova e e tangata ara ua koe ei metua; inara te inangaro ra aia kia rave koe i te ka rauka ia koe. Na te tamaiti te reira apainga kare naau. (Mase. 20:11) Penei ka manata koe i taau au tarevake i rave ana ei metua. Me ko toou manako ïa, e akakite atu i te reira kia Iehova e pati kia akakore mai aia i taau ara. Kua kite aia e kare e rauka ia koe i te taui i te au mea tei tupu. Taua taime rai, kare aia e tapapa atu ia koe kia paruru i taau tamaiti mei tana i ruru. Akamanako ana me ka tauta rai taau tamaiti i te oki mai kia Iehova, ka āriki rekareka ua a Iehova iaia.—Luka 15:18-20.

14. Eaa tatou ka kopae ke ei i te au manako akaapa?

¹⁴ Te au manako akaapa. Me kua rave tatou i te ara, ka manata rai tatou. Inara, kare a Iehova e inangaro ana kia manata koe. Ka kopae tatou i teia manako akaapa. Akapeea tatou e kite ei e te akaapa ua ra tatou ia tatou? Me akakite tatou i ta tatou ara, e tataraara e auraka e rave akaou i te reira, kia irinaki tatou e ka akakore mai a Iehova i ta tatou ara. (Anga. 3:19) Muri ake te rave anga i teia au mea, kare a Iehova e inangaro kia akaapa ua tatou ia tatou. Kua kite aia eaa te ka tupu mei te manako akaapa. (Sala. 31:10) Me taitaia tatou, penei ka akaroi tatou i te oro tamou marie e ora ai.—2 Kori. 2:7.

15. Eaa te ka tauturu ia tatou kia kore e manako akaapa ua? (1 Ioane 3:19, 20) (Akara katoa i te tutu.)

 ¹⁵ Akapeea koe me kopae atu i taua manako? Me te akaapa ua ra koe ia koe, e akamanako ana e e ‘akakore ana te Atua i te ara.’ (Sala. 130:4) Me akakore aia i te ara a te aronga tataraara, taputou maira aia e: “Kare au e manako akaou i to ratou kino.” (Iere. 31:34) Teia te aiteanga, kare a Iehova e manako akaou i taau ara. No reira, auraka e manako e ko te au manamanata e tupu nei kia koe e akairo ia e kare aia i akakore mai i taau au ara. Eiaa e riri me kare aau tuanga angaanga i roto i te putuputuanga. Kare a Iehova e akamanako akaou mai i taau au ara i rave ana, auraka katoa koe.—E tatau ia 1 Ioane 3:19, 20.

16. Ei aronga oro, eaa ta tatou ka kite mai?

¹⁶ No runga i ta tatou oro anga no te ora, e mea tau kia rave tatou i te “taemoemo anga, kia rauka te korona” ia tatou. (1 Kori. 9:24) Ka rave tatou i te reira me kite tatou i te tuke i rotopu i ta tatou apainga ka apai e te au mea teiaa ka kopae. I teia atikara, kua uriuri ana tatou i tetai atu au akaraanga e eaa ta tatou ka apai e eaa te ka akaruke. Inara e au akaraanga ke atu tetai kia akamanakoia. Karanga ra a Iesu e penei ka “opue aea to [tatou] ngakau i te maata o te kai e te kona, e te pekapeka o teianei ao.” (Luka 21:34) Ka tauturu teia au irava e tetai atu au irava ia koe kia kite i te au mea ka akatikatika koe kia oro tamou marie e ora ai.

17. Eaa i papu ei ia tatou e ka rauka ia tatou te rē no te oro tamou marie e ora ai?

¹⁷ Papu ia tatou e ka rauka ia tatou te rē no te oro tamou marie e ora ai no te mea ka oronga mai a Iehova i te maroiroi kia tatou. (Isa. 40:29-31) No reira, auraka e aere marie! E aru i to te apotetoro ko Paulo akaraanga, tei aruaru kia rauka iaia te tutaki i tukuia mai ki mua iaia. (Phili. 3:13, 14) Kare na tetai ke e oro i teia oro anga, inara ma ta Iehova tauturu ka rauka ia koe te rē. Ka tauturu mai a Iehova ia koe i te apai i taau apainga e te kopae i te au mea teiaa. (Sala. 68:19) Ma Iehova i te pae ia koe, ka rauka ia koe i te oro tamou marie e rauka ai te rē!