1. Eaa te ka tauturu ia tatou kia mataora i te apii i te totou Pipiria?

 “E REKA ana au i te apii i te totou Pipiria,” i karanga ai te mapu ko Ben. Ka āriki ainei koe i tona manako? Me kua mataku ainei koe i te apii i te au totou Pipiria? Penei ka manako koe e kare e reka ana i te apii i te au totou Pipiria. Inara me kite koe i te tumu i tata ei a Iehova i te reira i roto i tana Tuatua ka taui koe i toou manako.

2. Eaa ta teia atikara ka uriuri?

² I teia atikara, ka uriuri tatou eaa ra tatou ka apii ei i te au totou Pipiria e ka akapeea me apii i te reira. E oti ka uriuri katoa tatou i te nga totou e rua i roto i te puka o Daniela e akapeea te reira me tauturu ia tatou i teianei.

3. Eaa ta tatou ka rave kia mārama i te totou Pipiria?

³ Ka pati tatou i te tauturu kia mārama i te totou Pipiria. Akamanako ana i teia akatutuanga. Te teretere ra koe ki tetai ngai kare koe i kite inara kua mātau toou oa i te reira ngai. Kite aia e teiea koe e te au mataara ka aere na runga. Ka mataora koe e kua āriki e kua aru mai toou oa ia koe! Mei tera katoa a Iehova kua kite aia i te aerenga o to tatou tuatau e te ka tupu ki mua. No reira kia mārama i te totou Pipiria, e pati akaaka tatou i ta Iehova tauturu.—Dani. 2:28; 2 Pete. 1:19, 20.

4. Eaa ra a Iehova i tata ei i te au totou ki roto i tana Tuatua? (Ieremia 29:11) (Akara katoa i te tutu.)

⁴ Mei te au metua meitaki rai, inangaro a Iehova e kia rauka i tana tamariki te oraanga mataora ki mua. (E tatau ia Ieremia 29:11.) Kare mei te au metua rai, ka rauka ia Iehova te totou meitaki i te tuatau ki mua. Kua  tataia te au totou i roto i tana Tuatua kia kite tatou i te au mea puapinga i mua ake ka tupu ei te reira. (Isa. 46:10) E mea akaperepereia te au totou Pipiria no ko mai i to tatou Metua i te rangi. Akapeea tatou e papu ei e ka tupu ta te Pipiria i totou mai?

5. Eaa ta tetai mapu ka apii mai mei te akaraanga o Max?

⁵ I te apii, e piri mai ana te aronga kare e akangateitei ana i te Pipiria ki ta tatou au mapu. Ta ratou tuatua e to ratou tu ka akatupu i te manako ekoko ki te au mapu e Kite ratou. Akara ana i tei tupu kia Max. Karanga mai aia, “I toku mapu anga, kua akamata au i te ekoko e te apii maira toku nga metua i te akonoanga mou e me kua akauruia rai te Pipiria e te Atua.” Eaa ta tona nga metua i rave? Akakite mai aia, “Maru ua to raua tu, noatu kua kite au e te taitaia ra raua.” Kua pau te nga metua o Max i tana uianga no roto mai i te Pipiria. Kua rave rai a Max i tetai angaanga. “Kua apii au i te au totou Pipiria,” i nana ei, “e kua uriuri i taku i kite mai ki tetai au mapu.” Eaa tei tupu? Karanga mai a Max, “Aere ua rai, kua tupu toku irinakianga e e mea akauruia te Pipiria e te Atua!”

6. Eaa taau ka rave me manako ekoko koe, e no teaa ra?

⁶ Mei ia Max rai, penei ka ekoko koe me e tika rai te au tuatua mou i roto i te Pipiria. Inara ka anoanoia koe kia taui viviki i te reira manako. Kua akaaiteia te manako ekoko mei tetai paka auri. Me kare e tamaia, ka akape te reira i tetai apinga. Kia akakore i te au manako ekoko o toou akarongo, ka ui koe, ‘Te irinaki ra ainei au i ta te Pipiria e akakite ra no te tuatau ki mua?’ Me kare i papu, ka anoanoia koe kia apii i te au totou Pipiria tei tupu takere ana. Akapeea koe me rave i teia?

7. Eaa te akaraanga ta Daniela i akaari mai no te apii i te totou? (Daniela 12:10) (Akara katoa i te tutu.)

⁷ Akaari mai a Daniela i te akaraanga meitaki akapeea me apii i te au totou. Kua rave aia i teia ma te akakoroanga tau, kia kite i te tuatua mou. E tu akaaka to Daniela, te kite anga e ka oronga mai a Iehova i te mārama ki te aronga tei apii e tei akono katoa i tana au kaveinga meitaki. (Dani. 2:27, 28; e tatau ia Daniela 12:10.) Akaari mai a Daniela e e tu akaaka tona na te irinaki anga kia Iehova no te tauturu. (Dani. 2:18) Kua akapapu meitaki katoa a Daniela i te au tataanga. Kua kimikimi marie aia no runga i te au Tuatua Tapu tei rauka iaia. (Iere. 25:11, 12; Dani. 9:2) Akapeea koe me aru ia Daniela?

8. Eaa tetai pae i patoi ei e kua tupu ana te au totou Pipiria, inara eaa ta tatou ka rave?

⁸ Akara meitaki i toou akakoroanga. Kua akakeuia ainei taau apiianga i te  totou Pipiria e toou inangaro i te kite i te tuatua mou? Me e ae, ka tauturu a Iehova ia koe. (Ioa. 4:23, 24; 14:16, 17) Eaa atu tetai tumu i apii ei te tangata i te au totou? Ei akaapa anga kare te Pipiria i akauruia e te Atua. No te reira, kua manako ratou e kua tau rai ta ratou iki anga kia rave no te tika e te tarevake. Inara ka anoanoia tatou kia akara meitaki ma te akakoroanga tau. E pera katoa, ka anoanoia tetai tu puapinga kia mārama i te totou Pipiria.

9. Eaa te tu puapinga ka anoanoia kia mārama i te totou Pipiria? Akamārama mai.

⁹ Kia akaaka. Taputou mai a Iehova i te tauturu i te aronga akaaka. (Iako. 4:6) No reira ka pure tatou no Tana tauturu kia mārama i te au totou Pipiria. Ka āriki katoa tatou i te tauturu a te pupu aronga ta Iehova e taangaanga ra no te oronga mai i te au kai pae vaerua i te tuatau tau. (Luka 12:42) E Atua mako a Iehova, ka tau rai e ka taangaanga aia i tetai pupu aronga kia tauturu ia tatou kia mārama i te au tuatua mou i roto i tana Tuatua.—1 Kori. 14:33; Ephe. 4:4-6.

10. Eaa taau i kite mai mei te akaraanga o Esther?

¹⁰ E akapapu meitaki. Iki i tetai totou e reka ana koe e oti e kimikimi marie no runga i te reira. Ko teia ta Esther i rave. Kua inangaro aia i te kite no runga i te au totou o te Mesia. Karanga aia, “I toku 15 mataiti, kua kimikimi au i te au akakiteanga e kua tataia teia totou i mua ake i to Iesu taime.” Ko tana i kite mai mei te tatau anga i te Pokaikai Tuatua Tai Mate kua irinaki aia. Karanga mai aia: “Ko tetai o te reira kua tataia i mua ake i to Karaiti tuatau, no reira no ko mai i te Atua te au totou i tataia ra.” Akakite mai a Esther, “Kua tatau taokioki au i te reira kia mārama au.” Mataora aia e kua rave aia i te reira. Muri mai i te apii anga i tetai mai au totou Pipiria, i karanga ai aia, “kua kite meitaki mai au e e tuatua mou te Pipiria!”

11. Akapeea tatou e puapingaia ai mei te akapapu anga e e tuatua mou te Pipiria?

¹¹ Me kite tatou e kua tupu tetai au totou i roto i ta te Atua Tuatua, ka akatupu te reira i te irinaki anga mou kia Iehova e tana aratakianga. Pera katoa, kua riro te au totou Pipiria ei tauturu ia tatou kia akara papu ki te tuatau ki mua, noatu eaa te manamanata. Ka uriuri ana tatou i te nga totou e rua ta Daniela i tata e e akatupuia nei. Te mārama anga i te reira ka tauturu ia tatou kia rave i te au ikianga meitaki.

12. Eaa te akatutuia maira e te vaevae “auri tetai pae, e karakaraea tetai pae”? (Daniela 2:41-43)

¹² E tatau ia Daniela 2:41-43. Roto i te moemoea ta Daniela i akamārama ki  te Ariki ko Nebukanesa, kua kite atu te ariki i te vaevae o te tiki e “auri tetai pae, e karakaraea tetai pae.” Na te akaaite anga i teia totou ki tetai atu au puka o Daniela e Apokalupo, ka kite mai tatou e te akatutu maira te vaevae i te Mana Tutara Peritane-Marike, te tutara maata o teia tuatau. No teia mana tutara, karanga a Daniela e ko “taua basileia nei, e riro i te maroiroi tetai pae, e ngaangaa tetai pae.” Eaa i ngaangaa ei tetai pae? No te mea kua akatupu te iti tangata, tei akatutuia mai e te karakaraea, i te manamanata kia kore e maroiroi ta te reira tutara anga mei te auri rai. b

13. Eaa te au tuatua mou ta tatou i mārama mai no te kite anga i teia totou?

¹³ Mei ta Daniela i akataka mai no te tiki e tona vaevae kua kite mai tatou i teia au tuatua mou. Mea mua, kua akaari mai ana te Mana Tutara Peritane-Marike i tona mana. Ei akaraanga, kua upokotu te reira i te Tamaki I e te II o te Ao. Inara kua akaparuparuia teia mana tutara e te au manako tauetono i roto i tona iti tangata. Te rua, ko teia mana te tutara openga i mua ake ka takore ei te Patireia o te Atua i te au kavamani a te tangata. Noatu ka tamaki mai tetai pa enua i teia Mana Tutara Peritane-Marike, kare te reira e monoia. Kua kite tatou i teia e na “te toka” tei akatutu mai i te Patireia o te Atua e akapueurikiriki i te vaevae o te tiki tei akatutu mai i te Tutara Peritane-Marike.—Dani. 2:34, 35, 44, 45.

14. Akapeea toou mārama anga i te totou no te vaevae auri e te karakaraea i te tauturu i taau ikianga?

¹⁴ Irinaki ainei koe e e tika tikai ta Daniela totou no te vaevae auri e te karakaraea? Ae ka akakeu te reira i taau ikianga i roto i toou oraanga. Kare e aruaru i te au mea o teianei ao te ka akapueurikirikiia. (Luka 12:16-21; 1 Ioa. 2:15-17) Te mārama anga i teia totou ka tauturu katoa ia koe kia kite i te puapinga o te angaanga tutu aere e te apiianga. (Mata. 6:33; 28:18-20) Aru mai i te apii anga i teia totou, e ui kia koe, ‘Te akaari maira ainei taku ikianga e kua irinaki au e ka takore te Patireia o te Atua i te au kavamani a te tangata?’

15. Koai “te ariki no apatokerau” e “te ariki i apatonga” i teia tuatau? (Daniela 11:40)

¹⁵ E tatau ia Daniela 11:40. Taiku ra a Daniela pene 11 i te nga ariki e rua, te mana poritiki, te putoto ra tetai e tetai kia tutara i teianei ao. Na te akaaite anga i teia totou ki tetai i roto i te Pipiria, ka kite mai tatou e ko Rutia e tona mema “te ariki no apatokerau” e “te ariki i apatonga” ko te Mana Tutara Peritane-Marike. c

16. Eaa te kino e tupu nei ki to te Atua iti tangata i te enua o “te ariki no apatokerau”?

¹⁶ Te akakoromaki ra te iti tangata o te Atua i raro i te tutara a “te ariki no apatokerau” i tana takinokino anga. Kua papaia tetai Au Kite e kua peiia ki roto i  te are auri no to ratou akarongo. Kare to tatou au taeake i mataku, kua riro te au angaanga a “te ariki no apatokerau” i te akamatutu i to ratou akarongo. No teaa ra? Kua kite to tatou au taeake e te akatupu ra to ratou takinokino anga i ta Daniela au totou. d (Dani. 11:41) Te kite anga i te reira ka tauturu katoa ia tatou kia akamatutu i to tatou manakonakoanga e kia vai tiratiratu.

17. Eaa te au timataanga te tupu nei ki to te Atua iti tangata i te enua o “te ariki i apatonga”?

¹⁷ I mua ana, kua takinokino “te ariki i apatonga” i te iti tangata o Iehova. Ei akaraanga, i te akamata anga o te 20 anere mataiti, kua tapekaia te au taeake e manganui no te vai takake anga ei au Kerititiano e kua akaateaia te au tamariki a te Au Kite mei te apii. Te tupu nei rai te au timataanga kikite ki te au tavini o Iehova me ka vai tiratiratu ratou ki te Patireia o te Atua, i raro i te tutara  anga a te reira ariki. Ka timataia tetai Kerititiano kia turu i te pupu poritiki me kore te arataki anga a tetai tutara i te tuatau ikianga. Penei kare aia e voti; kareka ra tona ngakau e tona manako ka iki i tetai tua. E mea puapinga kia vai takake tatou i te pae poritiki i roto i ta tatou e rave ra, e e manako ngakau ra!—Ioa. 15:18, 19; 18:36.

18. Eaa to tatou manako i te tamaki i rotopu i “te ariki no apatokerau” e tona enemi? (Akara katoa i te tutu.)

¹⁸ Ka taitaia maata te aronga kare e irinaki ana i te totou Pipiria me kite ratou i “te ariki i apatonga” e putoto ra ma “te ariki no apatokerau.” (Dani. 11:40) E au apinga nukiria ta teia nga ariki te ka takore i te oraanga i te enua nei. Inara kua kite tatou kare a Iehova e akatika i te reira kia tupu. (Isa. 45:18) No reira, eiaa e taitaia i te kino e tupu nei i rotopu i “te ariki no apatokerau” e “te ariki i apatonga” mari ra e akamatutu i to tatou akarongo. Te akapapu maira te reira e te vaitata mai nei te openga o teia akatereanga.

19. Eaa ta tatou i kite no te totou Pipiria?

¹⁹ Kare tatou e kite e ka akapeea tetai au totou Pipiria me akatupuia. E kare katoa te peroveta ko Daniela i mārama ana i tana i tata. (Dani. 12:8, 9) Noatu kare tatou e mārama e ka akapeea tetai totou me akatupuia, ka tupu rai teia. No reira, e irinaki kia Iehova e ka akakite mai aia i te reira i te tuatau tau mei tana i rave ana.—Amo. 3:7.

20. Eaa te au totou Pipiria ka akatupuia e eaa ta tatou ka rave?

²⁰ Aere ua rai ka rongo tatou i te kapiki anga e “e au, e kare e kino.” (1 Tesa. 5:3) Aru mai ka uri e ka takore te mana poritiki o teianei ao i te au akonoanga pikikaa. (Apo. 17:16, 17) E oti, ka tamaki ratou i to te Atua iti tangata. (Eze. 38:18, 19) Ka taki atu teia au tupuanga ki te tamaki openga o Aramagido. (Apo. 16:14, 16) Papu ia tatou e kare e roa atu ka tupu teia. No reira, e akaperepere i to tatou Metua i te rangi na te apii meitaki anga i te au totou Pipiria e te tauturu i tetai pae kia kite i te reira.