Roto i te reira atikara, kua apii mai tatou no runga i tetai māroanga te ō maira te au mea ora kite: koia oki ko te akatapu anga i te ingoa o Iehova. Te māroanga o te tu ngateitei, ta Iehova tutaraanga meitaki roa atu, e au tuanga ïa o te māroanga maata. Pera katoa, te tu tiratiratu o te tangata.

Eaa ra matou ka tuatua ai e ko te māroanga maata i reira e no runga i te ingoa o Iehova e te akatapu anga i te reira? Akamanako ana tatou e toru tumu.

Mea mua, kua akakino a Satani i te ingoa o Iehova e tona tu, i te kainga i Edene. Kua akariro ta Satani uianga kikite kia Eva e e Atua karapii a Iehova e kua tāpu i te meitaki mei Tona iti tangata. Kua patoi a Satani i ta Iehova au tuatua i te akaapa anga e e pikikaa te Atua. No reira kua akakino aia i to Iehova ingoa. E kua riro aia ko “te Diabolo,” te aiteanga e “pikikaa.” (Ioa. 8:44) No te mea kua irinaki a Eva i ta Satani pikikaa, kua akarongo kore ki te Atua, kua patoi aia i te tu ngateitei o Iehova. (Gene. 3:1-6) Teianei te akakino nei rai a Satani i te ingoa o te Atua, e te tuatua pikikaa ra no runga ia Iehova. Ko te aronga irinaki i te reira te patoi ra ratou ia Iehova. No reira, ki te iti tangata o te Atua e mea tika kore te reira e kua akakinoia te ingoa tapu o Iehova. Ko te tumu ïa i maata ai te taitaia e te kino i teianei ao.

Te rua, e puapinga ai te au mea ora, kua inangaro a Iehova i te akatika i tona ingoa, e kia akatapuia. E mea puapinga maata kia Iehova. Karanga aia: “E akatapu oki au i toku ingoa maata.” (Eze. 36:23) Kua akakite a Iesu i te mea mua ka tuatua i roto i te pure a te au tavini tiratiratu o Iehova i te na ko anga: “Kia tapu toou ingoa.” (Mata. 6:9) Kua akakite mai te Pipiria i te puapinga kia akakakāia te ingoa o Iehova. Ko tetai au akaraanga: “E o atu kia Iehova i te kakā e tau ki tona ra ingoa.” (1 Para. 16:29; Sala. 96:8) “E imene ei akakakā i tona ingoa.” (Sala. 66:2) “E akakakā rai au i to ingoa e tuatau ua atu.” (Sala. 86:12) I te tuatau i tuatua mai ei a Iehova mei te rangi i te iero i Ierusalema, kua karanga a Iesu: “E taku Metua, e akakakā i toou ingoa.” Pau mai a Iehova: “Kua akakakā au, e ka akakakā akaou atu rai au.”—Ioa. 12:28. a

Te toru, ka ō ua mai ki ta Iehova akakoroanga tona ra ingoa. Akamanako ana: I muri ake i te timata anga openga e te Tutaraanga Tauatini Mataiti a Karaiti, eaa te ka aru mai? Ka vai ainei te ke ki te au mea ora kite no te māroanga maata, kia  akatapuia te ingoa o Iehova? Ei pau i tera uianga, ka uriuri tatou i te au tuanga e rua—te tu tiratiratu o te au tangata e te tutara ngateitei i te ao katoa. Ka anoanoia ainei te aronga tiratiratu kia vai tiratiratu ua atu? Kare. E aronga tiama ratou e kua timataia. Tei ia ratou te ora mutu kore. Ka riro ainei te māroanga o te tutara ngateitei o te ao katoa ei mea ka akatakake i te au mea ora kite? Kare. Kua akatinamouia te tika e te tu ngateitei o ta Iehova tutaraanga e tuatau ua atu. Akapeea ra te ingoa o Iehova?

Ka akatapuia te ingoa o Iehova ma te kore e akakino akaouia. Ka akamaara ua rai te aronga tiratiratu i te rangi e te enua i te ingoa o Iehova. No teaa ra? Ka kite ratou ia Iehova te raveanga i te au angaanga meitaki rava. Akamanako: Ka akaoki a Iesu ma te akaaka i te tutaraanga kia Iehova, e “ko te Atua i rungao i te au mea katoa i te au ngai ravarai.” (1 Kori. 15:28) Muri mai i te reira, ka rekareka te tangata i te enua i “te rangatira meitaki o te tamariki a te Atua ra.” (Roma 8:21) I reira a Iehova ka akatupu ei i tana akakoroanga kia taokotai te au mea kite katoatoa to te rangi e to te enua ei pamiri katoa.—Ephe. 1:10.

Akapeea te reira me akakeu i to Iehova pamiri i te rangi e to te enua? Ka akamaroiroi ia tatou kia vai teateamamao ma te inangaro i te akapaapaa i te ingoa manea o Iehova. Tata te tata salamo e: “Kia akameitakiia te Atua . . . Kia akameitakiia oki tona ingoa kakā e tuatau ua atu.” (Sala. 72:18, 19) Ka rauka ua ia tatou te au tumu ou e te mataora no te rave i te reira.

Te akakite maira te ingoa o Iehova i te au mea no runga iaia, no tona aroa ia tatou. (1 Ioa. 4:8) Ka maara ua rai ia tatou e kua anga a Iehova ia tatou no tona aroa, kua oronga mai i te atinga oko no tona aroa, e kua akaari mai i te tika o tana tutaraanga no tona aroa. Ka kite ua rai tatou akapeea a Iehova me aroa ua mai i tana au mea i anga. E tuatau ua atu, ka akakeuia tatou kia piri vaitata kiaia ei Metua no tatou e te imene akapaapaa i tona ingoa kakā.—Sala. 73:28.