1-2. Ia Angaanga 8:27-31, 35-38, eaa tei akakeu i te eunuka Etiopia kia papetito?

KA INANGARO ainei koe kia papetitoia ei pipi na Karaiti? Kua akakeu te aroa e te tu āriki i te manganui kia rave i te reira. Akamanako ana i te akaraanga o te eunuka tei tavini ana i te ariki vaine o Etiopia.

² Kua papetito te tangata Etiopia i tona mārama anga i te au Tuatua Tapu. (E tatau ia Angaanga 8:27-31, 35-38.) Eaa tei akakeu iaia? No tona inangaro i te Tuatua a te Atua; te tatau ra aia i te puka o Isaia i runga i tona kariota. Te tuatua anga a Philipi kiaia, kua mareka taua tangata i ta Iesu i rave nona. No teaa ra aia i aere ei ki Ierusalema? No tona inangaro ia Iehova. Akapeea tatou e kite ei? No te akamori mai aia ia Iehova i Ierusalema. Kua taui teia tangata i tana akonoanga e kua piri atu ki te iti tangata e tavini ra i te Atua mou. No tona inangaro ia Iehova i akakeu iaia kia papetito e kia riro mai ei pipi na Karaiti.—Mata. 28:19.

3. Eaa te ka tapupu i tetai kia kore e papetito? (Akara i te pia “ Eaa to Roto i Toou Ngakau?”)

³ No to tatou inangaro ia Iehova i akakeu ia tatou kia papetito. Inara penei ka tapupu teia inangaro ia koe kia kore e papetito? Akapeea? Akamanako ana i teia au akaraanga. Penei te inangaro ra koe i toou kopu tangata e te au taeake, e penei me papetito koe, ka riri mai ratou  ia koe. (Mata. 10:37) Te reka ra koe i te au peu ta te Atua e rikarika ana, e penei ka ngata ia koe kia akamutu i te reira. (Sala. 97:10) Penei kua maata mai koe i te akamaara anga i te au peu akonoanga pikikaa. Penei te akamaara ra koe i te au tuatau mataora o te reira au peu. No te reira, ka ngata ia koe i te akaruke i teia au peu te akamareka kore ra ia Iehova. (1 Kori. 10:20, 21) Te uianga i reira, “Koai taku e inangaro maata ra?”

4. Eaa te tumu puapinga te ka akakeu ia koe kia papetito?

⁴ E maata taau au mea e inangaro ra e e mareka ra. Ei akaraanga, i mua ake ka apii ei koe ki te Au Kite o Iehova, penei kua akaperepere koe i te Pipiria. Kua akaperepere koe ia Iesu. Kua kite koe i teianei i te Au Kite o Iehova, kua inangaro koe i te kapiti kia ratou. Inara kare te reira e akakeu ia koe kia akatapu ia koe uaorai kia Iehova e kia papetitoia. Te tumu puapinga te ka arataki ia koe kia papetito koia oki ko te akaperepere i te Atua ko Iehova. Me akaperepere koe ia Iehova anake, kare koe e tuku i tetai apinga kia tapupu ia koe kia tavini iaia. Ka riro toou akaperepereanga ia Iehova ei akakeu ia koe kia papetito e kia tavini i te Atua.

5. Eaa te au uianga ka uriuri tatou?

⁵ Karanga a Iesu e kia anoano tatou ia Iehova ma te ngakau katoa, ma te vaerua katoa, ma te manako e te ririnui katoa. (Mare. 12:30) Akapeea koe me akaperepere e te akangateitei ia Iehova? Me akamanako tatou i to Iehova akaperepereanga ia tatou, ka akakeu ia tatou kia akaperepere katoa iaia. (1 Ioa. 4:19) Eaa atu tetai au tu te ka aru mai me akatupu koe i teia aroa puapinga rava? *

6. Ia Roma 1:20, eaa tetai mataara no te apii ia Iehova?

⁶ Apii ia Iehova no tana i anga. (E tatau ia Roma 1:20; Apo. 4:11) E akamanako i te pakari o te au mea ta Iehova i anga mei te au tiare e te au manu. E apii katoa i te manea o to tatou kopapa vavaria. (Sala. 139:14) E akamanako i te ririnui ta Iehova i tuku ki roto i te ra, e ko teia tetai o te pirioni ua atu etu tana i anga. * (Isa. 40:26) Ia koe e pera ra, ka maata atu taau akaperepere ia Iehova. Inara, te kite anga koe e e pakari e e ririnui a Iehova, ko tetai tuanga ua teia o toou pirianga kiaia. Kia akatupu i te inangaro ketaketa ia Iehova, ka anoanoia koe kia kite maata atu iaia.

7. Kia akaperepere ia Iehova eaa taau ka anoanoia kia irinaki?

⁷ Ka anoanoia koe kia papu e te akaperepere maira a Iehova ia koe. E ngata ainei ia koe i te irinaki e kua kite Tei Anga i te rangi e te enua ia koe e te akaperepere maira aia ia koe? Me koia ia, e akamaara kare a Iehova “i atea ke atu ia tatou katoa nei.” (Anga. 17:26-28) E “kimi oki a Iehova i te ngakau katoa ra,” e te taputou maira aia kia koe, mei ta Davida i akakite kia Solomona, e “kia kimi koe iaia ra, ka kitea atu aia e koe.” (1 Para. 28:9) Te tumu tikai i apii ei koe i te Pipiria, mei ta Iehova e karanga ra, “i akatae mai ei au ia koe.” (Iere. 31:3) Ko  te maata atu taau i kite i ta Iehova i rave noou, ka maata atu taau akaperepere anga iaia.

8. Akapeea koe me ariu ki to Iehova aroa?

⁸ Tetai mataara no te ariu ki to Iehova aroa na te tuatua anga kiaia na roto i te pure. Ka maata atu toou aroa i te Atua ia koe e akakite ra i toou manako e te akameitaki iaia no tana i rave noou. Ka ketaketa atu toou pirianga kia Iehova iaia e pau maira i taau pure. (Sala. 116:1) Ka papu ia koe e te mārama maira aia ia koe. Kia piri vaitata kia Iehova, ka anoanoia koe kia mārama i tona manako. Kia kite eaa tana e inangaro maira ia koe. Te ravenga ua rai e kite ei koe na te apiianga i tana Tuatua, te Pipiria.

9. Akapeea koe me akaari e te akaperepere ra koe i taau Pipiria?

⁹ E akaperepere i te Tuatua a te Atua, te Pipiria. Tei roto te tuatua mou no Iehova e tona akakoroanga i te Pipiria. Akaari koe e te akaperepere ra koe i te Pipiria na te tatau anga i te reira i te au rā, te tamou anga i taau apii Pipiria, e te taangaanga anga i te reira. (Sala. 119:97, 99; Ioa. 17:17) E papaanga ainei taau no te tatau Pipiria? E aru ana ainei koe i te reira, no te tatau i te Pipiria i te au rā?

10. Eaa tetai tuanga meitaki o te Pipiria?

¹⁰ Tetai tuanga meitaki o te Pipiria ko te au akaraanga o Iesu. Ko te papaanga tika rava atu te reira ta Iesu i rave. Ia koe e apii ra i ta Iesu i tuatua e i rave, ka akakeuia koe kia piri vaitata kiaia ei oa.

11. Akapeea koe me apii kia akaperepere ia Iehova?

¹¹ E apii kia akaperepere ia Iesu, ka maata atu toou aroa no Iehova. Eaa te tumu? No te mea kua aru a Iesu i te au tu meitaki o tona Metua. (Ioa. 14:9) No reira te maata atu i taau apii ia Iesu, ko te meitaki atu toou mārama e te mareka ia Iehova. Akamanako i te aroa ta Iesu i akaari ki te aronga i akavaavaaia e tetai ke—te putaua, te makimaki, e te paruparu. Akamanako katoa, i te puapinga o tana ako no to tatou oraanga  me akarongo tatou kiaia.—Mata. 5:1-11; 7:24-27.

12. Me apii koe no runga ia Iesu, eaa taau ka rave?

¹² Me maata atu taau akaperepere ia Iesu ka maata atu taau akamanako oonu anga i te atinga tana i oronga no te akakore i ta tatou ara. (Mata. 20:28) Me kite koe e kua mate a Iesu noou, penei ka tataraara koe e ka pati ia Iehova kia akakore mai i taau ara. (Anga. 3:19, 20; 1 Ioa. 1:9) Ia koe e akaperepere ra ia Iesu e Iehova, ka akaperepere koe i te aronga tana e akaperepere ra.

13. Eaa ta Iehova i oronga mai noou?

¹³ E apii kia akaperepere i to Iehova ngutuare tangata. Penei kare toou ngutuare tangata e toou au oa e mārama i te tumu ka akatapu koe ia koe uaorai kia Iehova. Penei ka patoi mai ratou ia koe. Ka tauturu a Iehova ia koe na te oronga anga mai i tetai ngutuare tangata pae vaerua noou. Me noo tamou koe ki teia ngutuare pae vaerua, ka kite koe i te aroa e te tauturu taau e anoano ra. (Mare. 10:29, 30; Ebe. 10:24, 25) Penei ka piri mai toou ngutuare tangata kia koe i te tavini anga ia Iehova e te akono i tana au kaveinga.—1 Pete. 2:12.

14. Ia 1 Ioane 5:3, eaa taau i kite mai no to Iehova au turanga?

¹⁴ E apii kia akaperepere e te taangaanga i ta Iehova au akauenga. I mua ake ka kite ei koe ia Iehova, e au turanga rai taau, inara kua kite mai koe e meitaki atu ta Iehova. (Sala. 1:1-3; e tatau ia 1 Ioane 5:3.) E akamanako i te ako a te Pipiria no te au tane, te au vaine, te au metua, e te tamariki. (Ephe. 5:22–6:4) Ia koe e taangaanga ra i teia ako, te kite ra ainei koe i te au ngai te mako maira te oraanga? Ia koe e aru ra i ta Iehova arataki anga kia iki i te au oa pakari, kua meitaki mai ainei toou tu? Te mataora ra ainei koe? (Mase. 13:20; 1 Kori. 15:33) Papu te pauanga, ae.

15. Eaa taau ka rave me taangaanga i te au kaveinga Pipiria?

¹⁵ Tetai taime ka ngata ia koe i te taangaanga i te au kaveinga Pipiria taau e apii ra. No reira a Iehova i taangaanga ai i tana akaaerenga kia oronga mai i te au puka Pipiria te ka tauturu ia koe kia kite eaa te mea tika e te tarevake. (Ebe. 5:13, 14) Me tatau koe e te apii i teia, ka kite koe i te puapinga o te reira, e ka inangaro koe i te kapiti ki ta Iehova akaaerenga.

16. Akapeea a Iehova i te akaaere anga i tona iti tangata?

¹⁶ E akaperepere e te turuturu i ta Iehova akaaerenga. Kua akapapa a Iehova i tona iti tangata ki roto i te au putuputuanga; ko tana Tamaiti, ko Iesu, te upoko o te reira. (Ephe. 1:22; 5:23) Kua iki a Iesu i tetai pupu tane meangiti tei akatainuia kia akaaere i tana angaanga. Kapiki aia i teia pupu tane e ko “te tavini akono meitaki e te pakari,” e te rave meitaki ra ratou i ta ratou apainga kia angai e kia paruru ia koe i te pae vaerua. (Mata. 24:45-47) Tetai mataara e tauturu ana te tavini akono meitaki ia koe na te iki anga i te aronga pakari tau ei tiaki ia koe. (Isa. 32:1, 2; Ebe. 13:17; 1 Pete. 5:2, 3) Te anoano ra te aronga pakari i te tauturu, i te akapumaana ia koe, e kia piri vaitata koe kia Iehova. Ko tetai mea puapinga rava atu ta ratou ka rave koia oki kia tauturu ia koe kia apii ia Iehova ki tetai ke.—Ephe. 4:11-13.

17. Ia Roma 10:10, 13, 14, eaa tatou ka tuatua ai no runga ia Iehova ki tetai ke?

 ¹⁷ Tauturu i tetai ke kia akaperepere ia Iehova. Akakite a Iesu ki tana au pipi kia apii ia Iehova ki tetai ke. (Mata. 28:19, 20) Ka rauka rai i te aru i teia akauenga. Me maata mai toou inangaro ia Iehova, ka kite koe i ta te apotetoro ko Petero e Ioane i tuatua: “Kare oki matou e tika kia kore e tuatua i ta matou i akara akenei, e ta matou i akarongo akenei.” (Anga. 4:20) Ka mataora tatou i te tauturu i tetai kia akaperepere ia Iehova. Akamanako ana i to Philipi rekareka, te tauturu anga i te eunuka Etiopia kia apii i te tuatua mou mei te Tuatua Tapu e kua papetitoia! Me aru koe ia Philipi e te rave i ta Iesu akauenga kia tutu aere, ka inangaro koe kia riro ei Au Kite no Iehova. (E tatau ia Roma 10:10, 13, 14.) A te reira taime, ka ui koe i teia uianga mei te eunuka Etiopia e: “Eaa au nei e kore ei e bapetizoia?”—Anga. 8:36.

18. Eaa ta tatou ka uriuri i roto i te atikara ka aru mai?

¹⁸ Ka rave koe i te takainga puapinga rava atu i toou oraanga me papetito koe. No te mea e takainga puapinga teia, ka anoanoia koe kia akamanako marie eaa te ō maira. Eaa taau ka anoanoia kia kite no te papetito? Eaa taau ka rave i mua ake e a muri ake i te papetito anga? Ka pauia teia nga uianga i te atikara ka aru mai.