1. Eaa ta Iesu akaueanga ki tana au pipi? (Akara i te kapi mua.)

I TE po i mua ake ka mate ei a Iesu, kua akaue aia i tana au pipi. Akakite aia kia ratou: “Mei iaku i aroa ia kotou na, e aroa katoa oki kotou ia kotou uaorai.” Karanga katoa aia: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”—Ioa. 13:34, 35.

2. Eaa i puapinga ai kia akaari i te aroa ki tetai e tetai?

² Karanga a Iesu e ka kitea tana au pipi mou me akaari ratou i teia aroa. Kua tika te reira i te anere mataiti mua, e teia tuatau. Mei teaa atura te puapinga kia akakoromaki i tetai ua atu akaaoanga e kia akaari i te aroa ki tetai e tetai!

3. Eaa ta tatou ka uriuri i teia atikara?

³ No to tatou tu ara ua, e ngata ia tatou i te aroa maata i tetai e tetai. Noatu eaa te tu, ka tauta tatou i te aru ia Karaiti. I teia atikara, ka uriuri tatou akapeea te aroa me tauturu ia tatou kia riro ei aronga akamoeau, kia papakitai kore, e kia oronga ua. Ia koe e apii ra i teia tuanga apii, e ui kia koe uaorai: ‘Eaa taku ka apii mei te au taeake e te au tuaine tei akaari i te aroa noatu te au akaaoanga?’

4. Ia Mataio 5:23, 24, eaa tatou ka akatupu ei i te ‘au ki te taeake tei akariri mai ia tatou?

⁴ Apii a Iesu i te puapinga kia akatupu tatou i te ‘au ki  te taeake tei akariri mai ia tatou. (E tatau ia Mataio 5:23, 24.) Akakite aia e e akono tatou i te pirianga meitaki ki tetai ke kia akamareka i te Atua. Te mataora ra a Iehova me akatupu tatou i te ‘au ki to tatou au taeake. Kare aia e āriki i ta tatou akamorianga me akamoupuku tatou.—1 Ioa. 4:20.

5. Eaa te mea i ngata ai i tetai taeake kia akatupu i te ‘au?

⁵ Penei ka ngata ia tatou i te akatupu i te ‘au. Eaa ra? Akamanako ana i tei tupu kia Mark. * Kua mamae te aviri anga tetai taeake iaia e kua akakino iaia ki tetai i roto i te putuputuanga. Akapeea a Mark te ariu atu anga? “Kua ngaro toku manako e kua riri tikai au,” i nana ai. I muri mai, kua tataraara a Mark e kua tauta i te akatupu i te ‘au ki te taeake. Kua kopae te taeake ia Mark. I te akamata anga, manako a Mark, ‘Eaa au ka tauta ua atu ei me kare aia e inangaro?’ Inara, kua akamaroiroi te akaaere kotinga iaia, auraka e tuku i te ‘au. Eaa ta Mark i rave?

6. (a) Akapeea a Mark te aruaru anga i te akatupu i te ‘au? (e) Akapeea a Mark i te taangaanga anga ia Kolosa 3:13, 14?

⁶ Akamanako akaou anga a Mark, kare aia e akaaka ana e kua manako e e meitaki atu aia i tetai ke. Ka anoanoia aia kia taui i tona tu. (Kolo. 3:8, 9, 12) Kua aravei akaaka akaou aia i te taeake e kua tataraara. Kua tata a Mark i te au reta ki te taeake, te akakite anga e kua tataraara aia e te anoano ra kia oaoa akaou raua. Kua oronga a Mark i te au apinga aroa rikiriki tana i manako e ka reka te taeake. Ma te tangi, kua akamoupuku ua atu te reira taeake. Kua akarongo ua a Mark i te akaueanga a Iesu kia aroa i tona taeake e kia akakore i tana ara.  (E tatau ia Kolosa 3:13, 14.) Me kare tetai e ariu mai kia akatupu i te ‘au, ka riro te aroa Kerititiano mou ei akakore i ta ratou ara e kia pure no te ‘au.—Mata. 18:21, 22; Gala. 6:9.

7. (a) Eaa ta Iesu i raurau ia tatou kia rave? (e) Eaa te turanga ngata ta tetai tuaine i aro atu?

⁷ Akamaroiroi a Iesu kia akono tatou i tetai mei ta tatou i anoano kia akonoia mai. Karanga aia, auraka tatou e aroa ua i te aronga tei aroa mai ia tatou. (Luka 6:31-33) Akapeea me ka mata piko tetai ia koe e kare e aroa mai ia koe? Kua kite a Lara i teia. Akakite aia: “Kua mata piko tetai tuaine iaku, kare au i kite eaa te tumu. Kua apiapi au e kare au i aere ana ki te uipaanga.” Manako a Lara, ‘Kare noku te apa. Kite tetai pae i roto i te putuputuanga e e manga tuke rai teia tuaine.’

8. Eaa ta Lara i rave no te akatupu i te ‘au, e eaa ta tatou ka apii mai?

⁸ Kua aere a Lara i te akatupu i te ‘au. Pure aia kia Iehova e kua tuatua ki te tuaine. Kua tuatua raua no te manamanata, kua takave, e kua akatupu i te ‘au. Mako ua te au mea. Akakite a Lara: “I muri mai, kua akaari akaou mai teia tuaine i taua tu rai mei to mua ana. Kua taitaia tikai au.” I te akamata anga, kua manako a Lara e ka mataora ua aia me ka taui teia tuaine i tona tu. I te openga, kite mai a Lara ko te ravenga meitaki anake kia aroa i te tuaine e kia “akakore oki i [tana] ara.” (Ephe. 4:32–5:2) Maara ia Lara e kare te aroa Kerititiano e “manako kino ia etai ke; E tapoki i te au mea katoa, e akarongo i te au mea katoa, e manakonako i te au mea katoa, e akakoromaki i te au mea katoa.” (1 Kori. 13:5, 7) Kare a Lara i manata akaou ana i te reira. I muri mai, kua oaoa mai te tuaine kiaia. Me aruaru koe i te akaau i toou au taeake e te au tuaine ma te aroa ia ratou, papu “e noo ïa te Atua nona te aroa e te au i rotopu ia kotou.”—2 Kori. 13:11.

9. Ia Angaanga 10:34, 35, eaa tatou i anoanoia ai kia papakitai kore?

⁹ Kare a Iehova e papakitai ana. (E tatau ia Angaanga 10:34, 35.) Me papakitai kore tatou, te akapapu ra tatou e e tamariki tatou nana. Te akarongo ra tatou i te akauenga kia aroa i to tatou tangata tupu, e kia akatupu i te ‘au i roto i te ngutuare pae vaerua.—Roma 12:9, 10; Iako. 2:8, 9.

10-11. Akapeea tetai tuaine te akakore anga i tona tu akavaavaa?

¹⁰ Kare i te mea māmā kia vai papakitai kore. Akamanako ana i te akaraanga o te tuaine ko Ruth. I tona tamariki anga, kua tupu te manamanata ki tetai tangata mei tetai enua ke. Eaa tei tupu? Akakite a Ruth: “Riri tikai au i te au mea pouroa o te reira enua. Manako au, e aiteite pouroa ratou, e te au taeake e te au tuaine.” Akapeea a Ruth te akakore anga i tona au manako tau kore?

¹¹ Kite mai a Ruth e kia akamutu aia i tona tu akavaavaa. Kua tatau aia i te au akakiteanga e te au ripoti o te Yearbook no te reira enua. Karanga aia: “Tauta au kia manako meitaki i te iti tangata o te reira enua. Kite mai au e e au taeake e te au tuaine maroiroi i te tavini ia Iehova. Taka meitaki e e au taeake ratou i te ao katoa.” Aere ua rai, kite a Ruth, kia akaari aia i te aroa. Akakite aia: “Me aravei au i te au taeake e te au tuaine o te reira enua, ka akaoaoa au ia ratou. Kua tuatua au kia ratou e kua mataora matou.” Eaa tei tupu? Karanga a Ruth: “Kua ngaro atura toku tu akavaavaa.”

12. Eaa to Sarah manamanata?

¹² Penei te papakitai ra tetai pae. Ei akaraanga, manako a Sarah e e tu papakitai kore tona, kare aia e akava ana i te tangata no to ratou katiri, turanga puapinga, e te taoonga. Akakite aia: “Kite mai au e e tu papakitai toku.” Akapeea? No roto mai a Sarah i tetai ngutuare tangata apii teitei e e reka ana aia i te piri ki te reira aronga. Akakite aia ki tona oa: “E piri ana au ki te au taeake e apii teitei ta ratou. Kare ki tetai ke.” Ka anoanoia a Sarah kia taui i tona tu? Akapeea?

13. Eaa ta tatou ka apii te taui anga a Sarah i tona tu?

¹³ Na tetai akaaere kotinga i tauturu ia Sarah kia akara matatio i tona tu. Akakite aia: “Akameitaki mai aia i taku angaanga tiratiratu, taku pauanga meitaki, e te kite i te au Tuatua Tapu. E oti akamarama aia, i to tatou kite e maata maira, ka anoano katoaia tatou kia taangaanga i te au tu mei te tu akaaka, te maru, e te tu akaaroa.” Taangaanga a Sarah i te au tuatua a te akaaere kotinga. Karanga aia: “Kite mai au e ko te mea puapinga kia akaari ua rai tatou te tu takinga meitaki e te aroa.” Akamata aia i te mārama i tona au taeake e te au tuaine. Akakite aia: “Tauta au kia aroa i te au tu tangata ta Iehova e akaperepere ra.” Akapeea tatou? Kare rava tatou e akavaavaa i tetai ke no ta tatou apii teitei! Me maata to tatou “aroa i te au taeake,” ka kopae tatou i te tu papakitai.—1 Pete. 2:17.

14. Ia Ebera 13:16, eaa to Iehova manako me oronga ua tatou ki tetai?

¹⁴ Rekareka a Iehova me oronga ua tatou. (E tatau ia Ebera 13:16.) E  tuanga te reira no ta tatou akamorianga, me tauturu tatou i te matiroeroe. (Iako. 1:27; 2:14-17) Te akamaroiroi maira te au Tuatua Tapu ia tatou kia “akamatau rai i te takinga meitaki i te tangata ke ra.” (Roma 12:13) Ka akaari tatou i te aroa, te inangaro, e te akaoaoa me oronga ua tatou. Te mareka ra a Iehova me oronga tatou i te kai e te vai, te taime e te aroa i tetai. (1 Pete. 4:8-10) Inara, penei te vaira te au manamanata te ka ngata ia tatou i te oronga ua.

15-16. (a) Eaa tetai pae ka tapupu ei i te oronga ua? (e) Eaa tei tauturu ia Edit kia oronga ua?

¹⁵ Penei ka emiemi tatou i te oronga ua. Akamanako ana i te akaraanga o te takaua ko Edit tona ingoa. I mua ake ka riro mai ei ei Kite, kare aia e reka ana i te piri atu ki tetai ke. Manako a Edit, e e ngari ake na tetai pae e oronga atu ki tetai.

¹⁶ Te riro anga mai aia ei Kite, kua taui a Edit i tona manako. Reka aia i te oronga ua. Akakite aia: “Te akatu angaia to matou Are Uipaanga Patireia, pati mai tetai tangata pakari e ka anoano tetai tokorua akaipoipo i te ngai moe anga e rua epetoma. Maara iaku to Iehova akameitaki anga i te takaua o Zarephata.” (1 Ari. 17:12-16) Akatika a Edit i te akono i te tokorua. Akameitakiia ainei aia? Akakite aia: “E rua epetoma e tae ua atu ki te rua marama. I te reira tuatau, kua piri vaitata matou.” Akameitaki katoaia a Edit ma te au oa i roto i te putuputuanga. E painia aia i teianei e te reka ra i te āriki i te au taeake kia aere mai ki te kainga ka katikati ratou. Karanga aia: “Reka tikai au i te oronga ua! Kite au i te au akameitakianga.”—Ebe. 13:1, 2.

17. Eaa ta Luke e tana vaine i kite mai?

¹⁷ Penei e tu oronga ua to tatou, ka rauka ainei i te akameitaki atu i te reira? Ei akaraanga, e nga tokorua oronga ua a  Luke raua ko tana vaine. Kua matau raua i te pati i to raua nga metua, te kopu tangata, te au oa, e te akaaere kotinga e tana vaine ki to raua kainga. Karanga a Luke, “Kite mai maua e te pati ua ra maua i te aronga vaitata kia maua.” Akapeea a Luke e tana vaine te akameitaki mai anga i to raua tu?

18. Akapeea a Luke e tana vaine te akameitaki anga i to raua tu?

¹⁸ Taui a Luke e tana vaine, te akamanako anga i ta Iesu tuatua: “Ko ta kotou e aroa atu, eaa ta kotou tutaki i reira?” (Mata. 5:45-47) Kite mai raua e ka anoanoia raua kia aru i to Iehova tu oronga ua. No reira kua pati raua i te au taeake e te au tuaine kare raua i pati i mua ana. Karanga a Luke: “Te mataora nei matou. Akamaroiroiia te katoatoa.”

19. Akapeea tatou me akapapu e e pipi tatou na Iesu, e eaa ta tatou ka aruaru?

¹⁹ Kua akara matatio tatou akapeea te aroa maata te tauturu anga ia tatou kia akatupu i te ‘au, kia papakitai kore, e kia oronga ua. Kua akakore tatou i tetai ua atu manako tau kore e e aroa maata i to tatou au taeake e te au tuaine ma te ngakau tae. Me pera tatou, ka mataora tatou e e pipi tatou na Iesu.—Ioa. 13:17, 35.