Kua rave tamou ana a Jack e Marie-Line i te angaanga tutu aere mei te 1988 mai. Kua kiteaia to raua tu manea, no te āriki i te au angaanga tukeke i Guadeloupe e French Guiana. Kua akaaereia teia ngai e te opati Betela o Varani. Ka uiui tatou kia Jack e Marie-Line i tetai au uianga.

Eaa tei akakeu ia korua kia rave i te angaanga orometua tamou?

Marie-Line: Toku maata mai anga i Guadeloupe, kua rave ana maua ko toku mama i te angaanga tutu aere, e e Kite maroiroi aia. E inangaro ana au i te tangata, no reira te oti anga taku apii i te 1985, kua akamata au i te painia.

Jack: Toku meangiti anga, kua piri atu au ki te au taeake e te au tuaine tei tavini tamou e te inangaro ra i te tutu aere. Ka painia tauturu au i te tuatau te orote ra te apii. I te openga epetoma, ka aru matou i te bus kia piri atu ki te au painia ki ta ratou ngai tutu aere. Ka tutu aere matou i te au rā—e ka taopenga ki taatai. E mataora tikai te reira tuatau!

I muri poto i toku akaipoipo anga ia Marie-Line i te 1988, karanga au kiaku uaorai, ‘Ka maata ta taua ka rave no te tutu aere.’ Kua rave maua ko Marie-Line i te angaanga painia. I muri mai i tetai mataiti, kua aere au ki te apii painia, kua ikiia maua ei painia takake. E maata ta maua angaanga mataora i rave ana i Guadeloupe i mua ake ka patiia maua kia neke ki French Guiana.

Tukeke ta korua angaanga i rave ana. Eaa tei tauturu ia korua kia akatanotano ki te reira?

Marie-Line: Kua kite te au taeake i te opati Betela i French Guiana i ta maua irava akaperepere ia Isaia 6:8. No reira me ringi mai ratou ia maua, ka tuatua putuputu mai ratou e, “Te maara ra ia korua ta korua irava akaperepere?” Kua kite maua i te aiteanga e ka taui ta maua angaanga, e ka karanga maua e, “Teia Maua! Ko Maua Taau e Tono!”

 Kare maua e akaaite ana i te angaanga i mua ana ki ta maua angaanga ou, no te mea e tuke te reira. Ka tauta katoa maua kia kite i to maua au taeake e te au tuaine.

Jack: I te au mataiti i topa, ka tauta tetai au taeake i te tapu iaku kia kore maua e neke. Te akaruke anga maua ia Guadeloupe, kua akamaara mai tetai taeake iaku i ta Iesu tuatua ia Mataio 13:38: “Te kainga ra, koia teianei ao.” No reira me taui ta maua angaanga, e akamaara maua e te tavini nei maua i taua ngai rai, noatu teiea maua. No te mea, ko te tangata e te ngai tutu aere te mea puapinga!

Te tae anga ki ta maua ngai ou, kua kite maua i tetai pae e noo ra i reira ma te mataora. No reira kua tauta maua i te noo mei ia ratou rai. E tuke te kai, inara ka kai maua i ta ratou e kai ra e te inu i ta ratou e inu ra, ma te matakite kare maua e rokoia e te maki. Ka tuatua meitaki maua no ta maua angaanga tutu aere.

Marie-Line: Kua apii katoa mai maua mei te au taeake i reira. Te maara nei iaku i to maua tae mua anga ki French Guiana. Kua ua maata, kua manako maua i te tiaki kia akamutu te ua e ka aere ka tutu evangeria. Inara kua karanga mai tetai tuaine kiaku, “Mai ka aere taua?” Ma te poitirere, kua tuatua atu au, “Akapeea ra?” Pau mai aia, “E apai mai i toou tamaru, ka aere taua na runga i te patikara.” Kua kite mai au akapeea me mou i toku tamaru e te akaoro i toku patikara i te reira taime. Kua apii mai au kia tutu aere i te reira tuatau uaua!

Kua neke ana korua e 15 taime. Eaa ta korua tauturu ka oronga ki tetai ke, ka neke ki tetai ngai ou?

Marie-Line: E ngata i te neke. Inara e mea puapinga i te kimi i tetai ngai tei tau noou, me oki mai mei te tutu aere anga.

Jack: E peni ana au a roto i to maua are. Ka tuatua mai te au taeake i te opati, kare korua e noo roa e “Jack, eiaa e peni i te are!”

E vaine karape a Marie-Line i te akapapa i to maua apinga! Ka tuku aia i te au mea ravarai ki roto i te pia e ka tata i te ingoa “are pai,” “pia moe,” “ngai tunu kai,” e te vai atura. No reira me tae maua ki to maua are ou, ka mama ia maua i te tuku i te au apinga  ki tona ngai. Ka tata aia i te au mea i roto i te pia, ka viviki ia maua i te kimi i te reira.

Marie-Line: No te mea kua kite maua i te akapapa i ta maua apinga, ka viviki maua i te rave i te angaanga tutu aere.

Akapeea korua me akatanotano i to korua taime kia “rave akaope takiri i to taoonga”?—2 Timo. 4:5.

Marie-Line: I te au Monite, ka akaangaroi maua e ka akapapa no te au uipaanga. Mei te Ruirua e aere ua atu, ka aere maua ka tutu aere.

Jack: Noatu e kua umuumuia maua kia akamou i te ora tau no te tutu aere i te marama tataki tai, kare maua e manata maata no te reira. Ko te angaanga tutu aere te mea puapinga i to maua oraanga. Mei te taime ka akaruke maua e ka oki mai ki to maua kainga, ka tauta maua i te tuatua ki te aronga ka aravei maua.

Marie-Line: Ei akaraanga me aere maua pikiniki ka apai au i tetai aenga pepa. Ka aravei mai tetai au tangata ia maua e ka pati mai tetai puka, noatu kare maua i akakite ana kia ratou e nga Kite maua no Iehova. No teia kua matakite maua me akamanea ia maua e to maua tu ki te tangata. Te akara maira ratou.

Jack: Ka tutu aere maua na te rave anga i te au angaanga meitaki ki to maua tangata tupu. Ka koi au i te tita, ka titiri e ka paraku i te reira takapini i to maua kainga. Ka kite mai to maua tangata tupu e ka ui mai, “E Pipiria ta korua naku?”

Tutu aere putuputu korua i te ngai mamao. Te maara ra ainei ia korua?

Jack: I Guiana, e ngata i te rave i tetai o te au ngai tutu aere. E aere putuputu ana matou e 370 maire (600 kiromita) i te epetoma na runga i te mataara vaaruarua. Te maara nei rai ia maua tetai tupuanga i St. Elie, i roto i te vao rakau Amazon. Kua roa matou i te tae anga ki reira na runga i te toroka e te poti matini. Te aronga e noo ra i reira e aronga ko koro. Ma te āriki mai i ta maua puka, ka oronga mai ratou i tetai moni koro ei tauturu! I te aiai, ka akaari maua i tetai vitio no te akaaerenga. E maata te aronga tei tae mai.

Marie-Line: I ou akenei kua patiia a Jack kia oronga i tetai ako no te Akamaaraanga i Camopi. E tae ei ki reira, ka aere maua na runga i te poti matini ki runga i te Oyapock River, e a ora te roa. E tuatau mataora tikai.

Jack: Te ngai e maro ra te vai, e te ngai taʼe ririnui te vai e te tokatoka ka riro ei ngai kino. E mea umere i te kite i te poti e teretere ra na reira. Ka anoanoia te tangata akaoro pai kia karape. Inara e akaraanga manea tikai. Noatu e 6 Kite i reira, e 50 tangata tei tae mai ki te Akamaaraanga, kapiti mai te aronga Marike Initia!

Marie-Line: Ka rauka teia i te au mapu e inangaro ra i te tavini maata ia Iehova. Ka irinaki koe ia Iehova i roto i teia au turanga e ka akaketaketaia toou akarongo. E kite ana maua i to Iehova rima tauturu.

Kua apii korua i te au reo tukeke. E mea mama ainei no korua i te tamou i te reo?

Jack: Kare. Kua apii au i teia au reo no te mea ka tauturu te reira iaku. Ka rave au i te Apii Punanga Tiaki i te reo Sranantongo * i mua ake ka tatau ei au i te Pipiria! Ka tuatua au ki tetai taeake te akapeea ra taku tuatua. Pau mai aia, “Tetai taime kare matou e mārama ana, inara te meitaki ua ra te reira.” E tauturu maata ta te tamariki ka oronga mai. Me tarevake taku tuatua, ka akatano mai ratou iaku, kare ra te aronga mamaata. Maata taku i kite mai mei te au tamariki.

Marie-Line: I tetai ngai tutu aere, e apii ana au te Pipiria i roto i te reo Varani, Portuguese e te Sranantongo. Tuatua mai tetai tuaine e akamata au te apii na roto i te reo kare au i matau meitaki e oti ka apii i te reo matauia e au. Kua mārama mai au i te pakari o teia akoanga.

 I tetai rā, kua apii au i te Pipiria i roto i te reo Sranantongo e te rua i te reo Portuguese. I te akamata anga te apii rua, karanga mai te tuaine kiaku, “Marie-Line, toku manako ka taii taua!” Kua kite mai au e te tuatua ra au i te reo Sranantongo ki tetai vaine Brazil, kare i tona reo Portuguese!

Akaperepereia korua e te aronga ta korua i akono. Akapeea korua te piri vaitata anga ki te au taeake?

Jack: Karanga a Maseli 11:25 e: “Te tangata oronga ra, e matu ïa.” Auraka tatou e emiemi i te tauturu i tetai ke. No te akono kia mā te Are Uipaanga Patireia, kua karanga mai tetai aronga: “E akaruke na te au papuritia e rave i tena.” Karanga atu au: “E papuritia katoa au. Me e angaanga tetai, ka rave rai au.” Ka anoano katoa tatou i tetai tuatau no tatou, kua akamaara rai maua eiaa te reira e riro ei tapu ia maua i te tauturu i tetai ke.

Marie-Line: Ka aruaru maua i te akaari i te inangaro ki te au taeake e te au tuaine. Na teia tu, kua kite mai maua i ta ratou e anoano ra, mei te akono i ta ratou tamariki e te tiki ia ratou i te apii. Ka akatanotano maua i ta maua ka rave no te tauturu i te au taeake. Ka akatupu teia i te pirianga vaitata e te tauturu ua rai ia ratou.

Eaa te au akameitakianga ta korua i kite mei te ngai ta korua i tavini ana?

Jack: Kua akameitakiia maua no te rave anga i te angaanga orometua tamou. E reka ana maua i te apii no runga i ta Iehova au mea i anga. Noatu te maata i te manamanata, kua rauka ia maua i te ‘au no te mea kua kite ana maua i te tauturu a te iti tangata o te Atua.

I toku mapu anga, kua tukunaia au ki roto i te are auri i French Guiana no toku tu Kerititiano. Kare au i manako ana e ka oki akaou au ki reira ei mitinari e te atoro i te au mouauri. E tika rai, maringi ua rai ta Iehova akameitakianga!

Marie-Line: Rekareka maata au no te tauturu ua rai i tetai ke. Mataora maua i roto i ta Iehova angaanga. E kua tupu te pirianga vaitata kia maua ei nga tokorua. Ka pati a Jack e kia kaikai kapiti matou e tetai nga tokorua e anoano ra i te tauturu. E pau ana au, “Manako meitaki tena!” Ka akapera maua.

Jack: I ou akenei, kua kiteaia mai e e maki oviri o te tane toku. Noatu kare a Marie-Line e inangaro ana i te akarongo i te reira, kua tuatua au kiaia: “E taku akaperepere, me ka mate au apopo, kare au e mate ‘no te ruaine anga.’ Mari ra ka mate au i te kite e kua taangaanga au i toku oraanga no Iehova.”—Gene. 25:8.

Marie-Line: Kua oronga mai a Iehova kia maua i te au angaanga tukeke e kua rave maua i te reira. Puapingaia to maua oraanga. Ma te irinaki pu ki te Atua, me pati mai tana akaaerenga kia maua kia neke, ka aere rai maua!