1. Eaa ta te au taeake mapu ka rauka i te rave?

E TE au taeake mapu, e maata ta kotou ka rauka i te rave. No te mea te vai maroiroi e te matutu ra kotou. (Mase. 20:29) Ka tauturu maata kotou i te putuputuanga. Penei ka inangaro kotou kia riro mai ei tavini tauturu. Inara, penei ka manako tetai pae e e tu tamariki ua e te kamakura to kotou kia akono i te au apainga puapinga. Noatu e mapu ua kotou, ka rauka rai ia kotou te rave i te au angaanga te ka tau kia irinakiia e kia akangateiteiia e te putuputuanga.

2. Eaa ta tatou ka uriuri i roto i teia atikara?

² I teia atikara, ka uriuri tatou i te oraanga o te Ariki ko Davida. Ka akara katoa tatou i te oraanga o te nga ariki o Iuda, ko Asa e Iehosaphata. Ka akamanako tatou i te au manamanata ta ratou i na roto ana, ta ratou i rave, e te apiianga no te au taeake mapu.

3. Eaa tetai mataara ka tauturu te au taeake mapu i te aronga pakarikari i roto i te putuputuanga?

³ I tona mapu anga, kua rauka ia Davida te au tu karape e te pirianga vaitata kia Iehova. Kua kite aia i te akatangi imene e kua taangaanga i tona tareni ei tauturu ia Saula, te  ariki akatainuia o te Atua. (1 Samu. 16:16, 23) E tu karape ainei to kotou ei tauturu i te putuputuanga? Ae. Ei akaraanga, penei ka inangaro tauturu te aronga pakarikari no te taangaanga i ta ratou tablet e te au apinga electronic no ta ratou apii Pipiria e te uipaanga. Ka rauka ia koe te tauturu ia ratou no toou tu karape i te taangaanga i te au apinga electronic.

4. Mei ia Davida rai, eaa te au tu ta te au taeake mapu ka akatupu? (Akara i te tutu i te kapi mua.)

⁴ I roto i tona oraanga, kua riro a Davida ei tangata akono meitaki e te irinakiia. Ei akaraanga, i tona mapu anga, kua akono aia i te mamoe a tona metua, tei riro ei apainga maata. Akamārama aia ki te Ariki ko Saula: “I tiaki ana oki to tavini i te mamoe a tona metua, e kua aere maira te liona e te daba, e kua rave i tetai punua mamoe no taua anana ra: Kua aru atura au i te reira e kua ta, e kua rave mai i taua punua mamoe ra no roto i tona vaa.” (1 Samu. 17:34, 35) Kua akono e kua paruru ngakau toa a Davida i te mamoe. Ka rauka i te au taeake mapu i te aru i te akaraanga o Davida me rave i te au angaanga ka orongaia kia ratou.

5. Ia Salamo 25:14, eaa te mea puapinga rava atu ka rauka i te au taeake mapu i te rave?

⁵ E pirianga vaitata tikai to Davida kia Iehova. E puapinga ake teia pirianga i to Davida tu ngakau toa me kore i tona tu karape i te akatangi imene. Ko Iehova to Davida Atua e koia tona Oa piri mou tikai. (E tatau ia Salamo 25:14.) E te au taeake mapu, te mea puapinga rava atu ka rauka ia koe i te rave, ko te akaketaketa i toou pirianga ki toou Metua i te rangi. Ei reira e orongaia mai ei te au akameitakianga kia koe.

6. Eaa te manako tarevake o tetai pae no Davida?

⁶ Kua akakoromaki a Davida i te au manako tarevake o tetai ke no runga iaia. Ei akaraanga, te inangaro anga a Davida i te tā ia Golia, kua tāpu te Ariki ko Saula iaia e kua karanga: “E tangata ou oki koe.” (1 Samu. 17:31-33) Kua akaapa ana to Davida tuakana iaia ei tamaiti mako kore. (1 Samu. 17:26-30) Inara, kare a Iehova i manako ana e tu tamariki e te mako kore to Davida. Kite meitaki aia ia Davida. Na te irinaki anga kia Iehova no te maroiroi, kua tamate a Davida ia Golia.—1 Samu. 17:45, 48-51.

7. Eaa taau ka apii mei te tua o Davida?

 ⁷ Eaa taau ka apii mei te akaraanga o Davida? Ka anoanoia tatou kia akakoromaki. Penei ka pou tetai tuatau no te aronga tei matau ia koe mei toou tamariki anga mai, kia āriki e e tangata mamaata koe i teianei. Inara e mea papu, kare a Iehova e akara ua i te tu o vao. Kua kite meitaki aia ia koe e taau ka rauka i te rave. (1 Samu. 16:7) E akaketaketa i toou pirianga ki te Atua. Kua rave a Davida i te reira na te akara meitaki anga i ta Iehova au mea i anga, e ta te reira i apii no runga ia Iehova. (Sala. 8:3, 4; 139:14; Roma 1:20) Ka rauka katoa ia koe i te pati kia Iehova no te maroiroi. Ei akaraanga, te aviri ra ainei toou au oa apii ia koe no te mea e Kite koe no Iehova? Me koia, e pure kia Iehova no te tauturu kia akakoromaki. E taangaanga katoa i te tauturu taau ka kite mai mei tana Tuatua, ta tatou au puka Pipiria e te au vitio. Me kite koe i ta Iehova tauturu, ka matutu atu toou irinaki iaia. Pera katoa, me kite tetai ke ia koe e irinaki ra ia Iehova, ka irinaki katoa ratou ia koe.

8-9. Eaa tei tauturu ia Davida kia tiaki marie kia riro mai ei ariki, e eaa ta te au taeake mapu ka apii mai mei tona akaraanga?

⁸ Akamanako i tetai atu manamanata tei tupu kia Davida. I muri ake i tona akatainuia anga ei ariki, kua tiaki a Davida no tetai tuatau roa i mua ake ka tutara ai aia ei ariki no Iuda. (1 Samu. 16:13; 2 Samu. 2:3, 4) Eaa tei tauturu iaia kia tiaki ma te akakoromaki? Kare a Davida i taitaia ana, mari ra kua akamanako i tana ka rauka i te rave. Ei akaraanga, iaia e oro ra ki te enua o Philiseti, kua taangaanga a Davida i tera tuatau no te tamaki i te au enemi o Iseraela e kua paruru katoa i te au kotinga o Iuda.—1 Samu. 27:1-12.

⁹ Eaa ta te au taeake mapu ka apii mai mei te akaraanga o Davida? E rave i taau ka rauka i te tauturu i toou au taeake. Akamanako i tei tupu ki te taeake ko Ricardo. * I tona mapu anga, kua inangaro aia i te tavini ei painia tamou. Inara, kare aia i tau ake. Kare aia i maromaroa me kore i riri ana, mari ra kua akamaata aia i tana angaanga tutu aere. Karanga aia: “Me akamanako au i te tuatau i aereia mai, kua anoanoia au kia rave i tetai au tauianga. Kua tauta au i te atoro akaou i te aronga tei akaari i te inangaro no te karere e kua akamata i taku apii Pipiria mua. Kua tukatau mai au i te rave i te angaanga tutu aere.” I teianei, te tavini ra a Ricardo ei painia tamou meitaki e ei tavini tauturu.

10. Eaa ta Davida i rave i mua ake ka rave ei i te ikianga puapinga?

¹⁰ Akamanako ana i tetai akaou apinga tei tupu kia Davida. I te tuatau e oro ra aia e te au tane tei aru iaia, kua akaruke ratou i to ratou ngutuare tangata no te tamaki. E oti, kua aere mai te au enemi kua takinokino i to ratou ngutuare e kua apai ei tuikaa. Penei no tona tu karape ei tumutoa, ka rauka ia Davida i te akamanako i tetai ravenga meitaki no te akaora i te au tuikaa. Inara, kua pati a Davida i ta Iehova aratakianga. Ma te tauturu a te taunga ko Abiatara, kua ui a Davida kia Iehova: “E aru ainei au i teianei takanava, ka rokoia atu e au?” Akakite a Iehova kia Davida e arumaki aia e ka akaora aia i to ratou ngutuare tangata. (1 Samu. 30:7-10) Eaa taau ka apii mai mei teia tupuanga?

11. Eaa taau ka rave i mua ake ka rave ei i tetai ikianga?

 ¹¹ E pati i te tauturu a toou nga metua e ta te aronga pakari tukatau i mua ake ka rave ei koe i tetai ikianga. Te irinaki ra a Iehova i teia au taeake, e kia pera katoa koe. Kua oronga mai a Iehova ia ratou e au tangata “meitaki” i roto i te putuputuanga. (Ephe. 4:8) Ka puapingaia koe me aru i to ratou akarongo e te akarongo ki ta ratou aratakianga. Teianei, akara tatou eaa te apiianga mei te Ariki ko Asa.

12. Eaa to te Ariki ko Asa tu i te akamataanga tana tutara?

¹² Ei tangata mapu, e tu akaaka e te ngakau toa to te Ariki ko Asa. Ei akaraanga, te mono anga aia i tona metua ko Abia, kua takore aia i te au itoro i roto i tona patireia. Kua “akaue atura [aia] ia Iuda e kimi i te Atua no to ratou ai metua ia Iehova, e e akono oki i te ture e te akauenga ra.” (2 Para. 14:1-7) Te aere anga mai a Zera o Kusa e tona vaeau e 1,000,000 i te tamaki ia Iuda, kua pati a Asa i te tauturu a Iehova, na ko atura: “E Iehova e, kare te mea ravengata ia koe kia tupae mai i te riri iti i rotopu i te aronga katoa e manganui: e tauturu mai ia matou, e to matou Atua, e Iehova e; te irinaki nei oki matou ki runga ia koe.” Te akaari maira te au tuatua manea a Asa i tona irinaki ia Iehova kia akaora ia ratou. Kua irinaki a Asa i tona Metua i te rangi, e kua “mate iora to Kusa ia Iehova.”—2 Para. 14:8-12.

13. Eaa tei tupu kia Asa i muri mai, e no teaa ra?

¹³ Kare e ekoko, ka mataku koe i te kite atu e 1,000,000 au vaeau, noatu te reira kua autu rai a Asa. Inara te mea taitaia, te tupu anga tetai manamanata iti ake, kare a Asa i irinaki ana ia Iehova. Te aere anga mai te Ariki o Iseraela ko Baasa i te tamaki ia Iuda, kua pati a Asa i te tauturu a te ariki o Arama. Kua riro tera ikianga ei tumatetenga nona! Na roto i te peroveta ko Hanani, akakite a Iehova kia Asa: “No te mea kua irinaki koe i te ariki o Arama ra, kare i irinaki i to Atua ia Iehova, e teianei, kua ora te nuku o te ariki o Arama i to rima na.” Mei reira mai, kare e ope te au tamaki anga a Asa. (2 Para. 16:7, 9; 1 Ari. 15:32) Eaa te apiianga?

14. Akapeea koe me irinaki ia Iehova, e ia 1 Timoteo 4:12, eaa taau ka rave?

 ¹⁴ Kia vai akaaka e kia irinaki ua rai koe ia Iehova. Te papetito anga koe, kua akaari koe i te akarongo mou e te irinaki ia Iehova. E kua mataora a Iehova i te āriki mai ia koe ki roto i tona ngutuare. Ko te mea puapinga, kia irinaki ua rai koe ia Iehova. Penei ka mama ia koe te irinaki ia Iehova me rave i te au ikianga puapinga. Akapeea i reira i tetai taime ke atu? Kia irinaki koe ia Iehova me rave i te au ikianga no te tamataora, te ngai angaanga, e taau au akakoroanga! Auraka e irinaki ki toou uaorai pakari. Mari ra, e kimi i te au kaveinga Pipiria te ka tauturu ia koe e oti e taangaanga i te reira. (Mase. 3:5, 6) Me rave koe i teia, ka akarekareka koe i te ngakau o Iehova e ka irinaki mai te au taeake i roto i te putuputuanga ia koe.—E tatau ia 1 Timoteo 4:12.

15. Ia 2 Paraleipomeno 18:1-3; 19:2, eaa te ikianga tarevake ta te Ariki ko Iehosaphata i rave?

¹⁵ E tu apa ua toou mei ia tatou katoatoa rai e ka rave rai koe i te tarevake i tetai au taime. Inara, kare teia e tāpu ia koe kia tavini meitaki ia Iehova. Akamanako i te akaraanga o te Ariki ko Iehosaphata. E maata tona au tu meitaki. Ei mapu, kua “kimi atura ra [aia] i te Atua o tona metua, e kua aere i tana au akauenga.” Pera katoa, kua tono aia i te au aronga mamaata ki te au oire o Iuda i te apii i te tangata no runga ia Iehova. (2 Para. 17:4, 7) Noatu tona tu meitaki, kua rave rai a Iehosaphata i te au ikianga tarevake. Tei tupu, kua akoia a Iehosaphata e tetai peroveta a Iehova. (E tatau ia 2 Paraleipomeno 18:1-3; 19:2.) Eaa taau ka apii mai mei teia tua?

16. Eaa taau ka apii mai mei te akaraanga o Rajeev?

¹⁶ E āriki e kia taangaanga i te ako ka orongaia mai. Penei ka ngata ia koe i te akariro i te tavini anga ia Iehova ei mea puapinga i toou oraanga. Auraka e taitaia. Akamanako i tei tupu ki te taeake ko Rajeev i tona mapu anga. Karanga aia: “I tera au mataiti, kare au i kite eaa taku ka rave. Mei te au mapu rai, e maata atu toku inangaro i te piri ki te au tipoti e te tamataora, i te aere ki te au uipaanga e te tutu aere.” Eaa tei tauturu  iaia? Kua ako tetai tangata pakari iaia. Akakite a Rajeev: “Kua tauturu aia iaku kia akamanako i te kaveinga ia 1 Timoteo 4:8.” Kua āriki a Rajeev i te ako e kua akamanako i te au mea puapinga i roto i tona oraanga. Karanga aia: “Kua iki au e ko te tavini ia Iehova te mea puapinga rava atu.” Tei tupu mai? Karanga a Rajeev, “I tetai au mataiti i muri mai, kua riro mai au ei tavini tauturu.”

17. Eaa te manako o te aronga pakarikari no te au mapu tane e tavini ra ia Iehova?

¹⁷ Te akaperepere maata ra te aronga pakarikari ia kotou e te au mapu tane te tavini ra ia Iehova “ma te manako okotai”! (Zepha. 3:9) Te reka ra ratou i to kotou vaerua maroiroi e te oraora i te rave i ta kotou angaanga. Te mareka ra ratou ia kotou.—1 Ioa. 2:14.

18. Ia Maseli 27:11, eaa to Iehova manako no te au mapu tane e tavini ra iaia?

¹⁸ E te au taeake mapu, auraka e ngaropoina e te inangaro e te irinaki maira a Iehova ia kotou. Totou aia e i taua tuatau openga ra, ka puareinga ua te au mapu tane i te oronga ia ratou uaorai. (Sala. 110:1-3) Kua kite aia i toou aroa e toou inangaro i te tavini iaia. No reira, e akakoromaki i te tu apa o etai ke e toou uaorai. Me rave koe i te tarevake, e āriki i te apiianga e te ako no ko ia Iehova. (Ebe. 12:6) E akono meitaki i te angaanga ka orongaia kia koe. E tei puapinga rava atu, i roto i taau apinga katoatoa ka rave, e akarekareka i toou Metua i te rangi.—E tatau ia Maseli 27:11.