1-2. Koai te ka rauka i te tauturu i te tangata apii Pipiria kia papetito?

“E REKA tikai au i taku i kite mai i roto i taku apii Pipiria,” i karanga ai a Amy e noo ra i Viti. “Kua kite au e ko te tuatua mou teia. Inara te akapou maata anga toku taime ki te au taeake e te au tuaine, kua tauturuia au kia rave i te au taui anga e kia papetito.” Te apii maira teia i tetai apiianga puapinga: Ka tupu te inangaro o te tangata apii Pipiria no te papetito me tauturu tetai ke i roto i te putuputuanga iaia.

² Ka tauturu te au papuritia i te aronga ou kia tomo mai ki roto i te putuputuanga. (Ephe. 4:16) Akakite a Leilani, e painia e noo ana i Vanuatu: “E tuatua tetai, ka tauturu te oire i te utuutu i tetai tamaiti. Kua aite teia ki te akariro anga i te tangata ei pipi; na te putuputuanga e apai mai tetai tangata ki roto i te tuatua mou.” E tuanga ta te au ngutuare tangata, au oa, e te au puapii i te apii no te tauturu i te tamaiti kia riro mai ei tangata mamaata. Ka akamaroiroi e ka apii ratou iaia i te au apiianga puapinga. Mei te reira rai, ka rauka te au papuritia i te tauturu, akamaroiroi, e te akanoo i te akaraanga meitaki no te tangata apii Pipiria kia rauka iaia i te papetito.—Mase. 15:22.

3. Eaa taau i apii mei ta Ana, Dorin, e Leilani i tuatua?

³ Eaa ra tetai puapii apii Pipiria ka inangaro ei i te au papuritia kia tauturu i te tangata apii Pipiria? Akakite a Ana, e painia takake i Moldova e, “Ka ngata e okotai tangata  i te oronga i te tauturu ki te tangata apii Pipiria kia tere aia ki mua.” Karanga a Dorin, e painia takake i taua enua e, “Ka tuatua tetai au papuritia i tetai apinga kare au i manako ana, te ka pakia te ngakau o te tangata apii.” Akakite mai a Leilani tetai akaou tumu, “Ka riro te aroa e te inangaro tei akaariia ki te tangata apii, i te tauturu iaia kia kite e koai te iti tangata o Iehova.”—Ioa. 13:35.

4. Eaa ta tatou ka uriuri i roto i teia apii?

⁴ Penei ka manako koe, ‘Akapeea au me tauturu i te tangata apii Pipiria me kare e naku e rave i tana apii?’ Ka uriuri tatou akapeea me tauturu i te tangata apii Pipiria i ko i tana apii e me aere mai aia ki te uipaanga. Ka akamanako katoa tatou akapeea te aronga pakari me tauturu i te aronga apii Pipiria kia papetito.

5. Eaa taau ka rave me patiia koe ki tetai apii Pipiria?

⁵ I ko i te apii Pipiria, na te puapii te apainga kia tauturu i te tangata apii kia mārama i te Tuatua a te Atua. Me pati te puapii kia aru koe iaia ki tana apii, ko taau tuanga koia oki, ei tauturu iaia. (Kohe. 4:9, 10) Akapeea koe me tauturu kia puapingaia te apii Pipiria?

6. Me patiia koe ki tetai apii Pipiria, akapeea koe me taangaanga i te kaveinga ia Maseli 20:18?

⁶ Akapapa no te apii Pipiria. E ui ki te puapii eaa te tu o te tangata apii Pipiria. (E tatau ia Maseli 20:18.) Penei ka ui koe: “Eaa taau i kite no runga i te tangata apii? Eaa te apii ta korua ka rave? Eaa tana ka inangaro i te tangata apii kia mārama? E apinga ainei tetai ka tau kia tuatua e kia rave au, me kore kare e tau kia tuatua e kia rave i ko i te apii? Eaa taku ka rave ei akamaroiroi i te tangata apii?” Kare te puapii e oronga i te au akakiteanga katoatoa, mari ra ko te akakiteanga te ka tauturu ia koe. E uriuri ana tetai mitinari ko Joy, i teia au manako ki te aronga te ka aru iaia ki te apii Pipiria. Karanga aia: “Kua tauturu teia uriurianga ma toku taeake tauturu kia inangaro aia i te tangata apii e kia kite eaa tana ka tuatua i ko i te apii.”

7. Eaa ra te au taeake tauturu ka anoanoia ai kia akapapa no te apii?

⁷ Me patiia koe ki tetai apii, e mea meitaki kia akapapa koe i te apii te ka uriuriia. (Ezera 7:10) Karanga a Dorin, te taeake tei taikuia i mua ana: “E reka ana au me akapapa toku taeake tauturu no te apii. Ka rauka iaia i te oronga mai i tetai tuatua akamaroiroi.” Ka kite mai te tangata apii e kua akapapa meitaki raua  no te apii, e ka riro teia ei akaraanga meitaki nona. Noatu kare e rauka ia koe i te akapapa meitaki no te apii, kia kite ra koe i te au manako puapinga o te reira.

8. Akapeea taau pure e puapingaia ai i ko i te apii Pipiria?

⁸ E tuanga puapinga te pure i roto i te apii Pipiria, no reira i mua ake ka aere ei koe ki te apii, e akamanako eaa taau ka tuatua me patiia koe kia pure. Ka riro i reira taau pure ei mea puapinga. (Sala. 141:2) Te maara nei ia Hanae, te noo ra i Tiapani, i te pure a tetai tuaine tei aru i tona puapii ki tana apii. Karanga aia: “Kua kite au i tona pirianga oa matutu kia Iehova e kua inangaro au kia riro mai mei iaia rai. Kua kite au i tona inangaro iaku no te mea kua taiku aia i toku ingoa i roto i tana pure.”

9. Ia Iakobo 1:19, eaa taau ka rave ei taeake tauturu i ko i te apii Pipiria?

⁹ Tauturu i te puapii. “Ka aru meitaki te taeake tauturu i te apii,” i karanga ai a Omamuyovbi, e painia takake i Nigeria. “Ka oronga aia i tetai au tuatua akamaroiroi, kare ra aia e tuatua maata e kua kite aia e na te puapii e rave i te apii.” Eaa te taime tau noou kia tuatua, e eaa taau ka tuatua? (Mase. 25:11) E akarongo meitaki me tuatua te puapii e te tangata apii. (E tatau ia Iakobo 1:19.) I reira koe e kite ei i te taime tau no te tauturu. Inara, kia akamanako koe na mua. Ei akaraanga, kare koe e inangaro i te tuatua maata, te tamanata i ta te puapii akamārama anga, me kore te taui i te aerenga manako. Penei na roto i tetai tuatua poto, akatutuanga, me kore uianga, ka rauka ia koe i te akataka meitaki i te manako. Tetai taime, penei kare e rauka ia koe i te oronga maata i te tauturu. Inara me akameitaki koe i te tangata apii e te akaari i toou inangaro nona, e maata taau e rave ra no te tauturu iaia.

10. Akapeea te au mea tei tupu kia koe me tauturu i te tangata apii Pipiria?

¹⁰ Akakite i tei tupu kia koe. Me ka tau, e akakite poto akapeea koe i te tomo anga mai ki roto i te tuatua mou, akapeea koe i te autuanga i te au timataanga, e akapeea a Iehova i te tauturu anga ia koe. (Sala. 78:4, 7) Penei ka tauturu te reira iaia. Ka akaketaketa teia i tona akarongo, e ka akamaroiroi iaia kia tauta ua atu rai kia papetito. E ka tauturu katoa te reira iaia kia autu i tetai timataanga tana e na roto ra. (1 Pete. 5:9) Maara ia Gabriel, te tavini ra ei painia i Brazil, eaa tei tauturu iaia i tona tuatau i apii ei i te Pipiria. Karanga aia: “Te akarongo anga au i tei tupu ki te au taeake, kua kite au e te akara maira a Iehova  i to tatou au manamanata. Me kua rauka ia ratou i te akakoromaki i te reira, ka rauka katoa iaku.”

11-12. Eaa ra tatou ka āriki pumaana ai i te aronga apii Pipiria ki te au uipaanga?

¹¹ E rauka ai i te tangata apii Pipiria kia papetitoia, ka anoanoia aia kia aere putuputu ki te au uipaanga e kia puapingaia mei te reira. (Ebe. 10:24, 25) Ka pati te puapii iaia kia aere mai ki te uipaanga. Me aere mai aia, ka rauka ia tatou i te akamaroiroi iaia kia aere ua mai rai ki te Are Uipaanga Patireia. Akapeea tatou me rave i te reira?

¹² Āriki pumaana i te tangata apii Pipiria. (Roma 15:7) Me āriki pumaana tatou i te tangata apii ki te uipaanga, ka akakeu te reira iaia kia aere ua mai ki te Are Uipaanga Patireia. Auraka e taakama iaia, mari ra e akaaravei iaia ki tetai ke. Auraka e manako e te mako ua ra aia; penei kare tona puapii i tae mai ake me kore te rave ra aia i tana au apainga. E akarongo meitaki kiaia, e e akaari i te inangaro nona. Eaa ta te āriki pumaana ka akatupu? Teia te akaraanga o Dmitrii, tei papetitoia i nga mataiti i topa ake nei e te tavini nei ei tavini tauturu. Tona aere anga mua ki te uipaanga, karanga aia: “Kua kite mai tetai taeake iaku e noo akama ua ra i vao i te Are Uipaanga Patireia e kua taki iaku ki roto. Maata te aronga tei aravei iaku e kua poitirere tikai au. Kua reka tikai au i te reira, e kua inangaro au kia raveia te uipaanga i te au rā ravarai o te epetoma. Kare teia i tupu ana kiaku i tetai ua atu ngai.”

13. Akapeea toou akaraanga meitaki me akakeu i te tangata apii Pipiria?

¹³ Akanoo i te akaraanga meitaki. Ka riro toou tu i te akapapu ki te tangata apii Pipiria e ko te tuatua mou teia. (Mata. 5:16) Karanga a Vitalii, te tavini ra ei painia i Moldova: “Kua kite tikai au i te aerenga manako, te tu, e te oraanga o tetai ke i roto i te putuputuanga. Kua akapapu mai teia e tei te Au Kite o Iehova te akonoanga mou tikai.”

14. Akapeea toou akaraanga me tauturu i tetai kia papetito?

¹⁴ I mua ake ka papetito te tangata apii Pipiria, ka anoanoia aia kia taangaanga i tana i apii. Kare teia i te mea māmā. Me kite te tangata apii e kua puapingaia koe mei te au kaveinga Pipiria, ka akakeu te reira iaia kia aru i toou akaraanga. (1 Kori. 11:1) Akamanako i tei tupu kia Hanae, tei taikuia i mua ana. Karanga aia: “Te rave ra te au taeake e te au tuaine i te  au apinga katoatoa taku e apii ra. Kua kite au akapeea me akamaroiroi, me akakore i te ara, e me akaari i te aroa. Ka tuatua akameitaki ratou no tetai ke. Inangaro au i te aru i to ratou akaraanga.”

15. Eaa a Maseli 27:17 i akakite ei, kia akaoaoa tatou ki te aronga apii Pipiria me aere mai ki te uipaanga?

¹⁵ Akaoaoa ki te tangata apii. Me aere ua mai te tangata apii ki te au uipaanga, e akaari ua rai i toou inangaro nona. (Phili. 2:4) E tauta i te kite meitaki iaia. E ui katoa no runga i tana apii Pipiria, tona ngutuare, e tana ngai angaanga, inara auraka e taakama iaia. Penei ka riro teia i te akavaitata iaia kia koe. Me akaoaoa koe ki te tangata apii, te tauturu ra koe iaia kia papetito. (E tatau ia Maseli 27:17.) Te tavini nei a Hanae ei painia tamou. Te akamaaraanga i te uipaanga mua tana i aere, karanga aia: “Te riro anga te au taeake i roto i te putuputuanga ei oa noku, kua inangaro au i te aere putuputu ki te au uipaanga, noatu toku roiroi. Kua reka au i te piri atu ki toku au oa ou, e kua tauturu teia iaku kia kopae i te piri atu ki te aronga kare e akamori ana ia Iehova. Kua inangaro au i te akavaitata atu kia Iehova e ki te au taeake e te au tuaine. No reira, kua iki au kia papetitoia.”

16. Akapeea koe me tauturu i te tangata apii kia riro mai ei tuanga no te putuputuanga?

¹⁶ Me rave te tangata apii i te au tauianga, e tauturu iaia kia riro mai ei tuanga no te putuputuanga. Ka rauka ia koe i te akono maoraora iaia. (Ebe. 13:2) Te akamaaraanga i tona tuatau i apii ei i te Pipiria, karanga a Denis, te tavini ra i Moldova: “E maata te taime kua patiia maua ko taku vaine kia kapiti atu ki te au taeake. Kua akakite mai ratou akapeea a Iehova i te tauturu anga ia ratou. Kua akamaroiroi teia ia maua. Kua akapapu mai teia i to maua inangaro kia tavini ia Iehova e kia rauka te oraanga meitaki a te tuatau ki mua.” Me riro mai te tangata apii ei papuritia, e pati iaia kia angaanga kapiti korua i roto i te angaanga tutu aere. Karanga a Diego, e papuritia no Brazil: “E maata te au taeake tei pati iaku kia aru ia ratou i roto i te angaanga tutu aere. E ravenga meitaki teia kia kite meitaki ia ratou. E maata taku i kite mai, e kua akapiri vaitata iaku kia Iehova e Iesu.”

17. Akapeea te aronga pakari me tauturu i te aronga apii Pipiria?

¹⁷ Akapou i te taime ki te aronga apii Pipiria. E te aronga pakari, me akaari koe  i te tu akono e te aroa no te aronga apii, ka tauturu koe ia ratou kia papetito. Ka rauka ainei ia koe i te tuatua ki te aronga apii Pipiria i ko i te uipaanga? Ka kite ratou i toou inangaro me maara ia koe i to ratou ingoa e me paupau ratou. Ka rauka ainei ia koe i te aru i tetai papuritia ki tana apii Pipiria? Penei ka tauturu maata koe i te tangata apii. Akakite a Jackie, e painia no Nigeria: “E maata te aronga apii tei poitirere me kite ratou e ko te taeake tei aru mai iaku, ko tetai o te aronga pakari. Karanga tetai tangata apii Pipiria: ‘Kare to matou orometua e rave i te reira. Ka atoro ua rai aia i te aronga moni e me tutakiia aia!’” Te aere nei teia tangata apii ki te au uipaanga.

18. Akapeea te aronga pakari me akono i ta ratou apainga ia Angaanga 20:28?

¹⁸ Apii e te akamaroiroi i te au puapii. E te aronga pakari, e apainga puapinga ta kotou i te tauturu i te au papuritia kia tukatau i te tutu aere e te apii Pipiria. (E tatau ia Angaanga 20:28.) Me akama te taeake i te rave i te apii Pipiria, e pati e naau e rave i te reira. Karanga a Jackie, tei taikuia i mua ana: “Ka ui putuputu ua mai te aronga pakari no runga i taku aronga apii. Me ngata iaku i te rave i tetai apii Pipiria, ka oronga mai ratou i te tauturu.” Kia tauturu e kia akamaroiroi te aronga pakari i te au puapii apii Pipiria. (1 Tesa. 5:11) Karanga a Jackie: “E reka ana au me akamaroiroi e me akameitaki mai te aronga pakari iaku no taku angaanga maroiroi. Kua aite ta ratou tuatua ki tetai karati vai anu me inu koe i tetai rā vera. Kua tauturu te reira iaku kia akameitaki atu i taku angaanga apii Pipiria e kia tamou i toku rekareka.”—Mase. 25:25.

19. Eaa te tu mataora ka rauka ia tatou pouroa?

¹⁹ Noatu kare tatou e rave ana i tetai apii Pipiria, ka rauka rai ia tatou i te tauturu i tetai tangata kia papetito. Auraka e tuatua maata, kia riro ra taau tuatua ei tauturu i te puapii i te tuatau apii. Ka rauka ia tatou i te akaoaoa ki te tangata apii me aere mai aia ki te Are Uipaanga Patireia, e kia akanoo i te akaraanga meitaki no ratou. E ka rauka te aronga pakari i te akapou i te taime no te akamaroiroi i te aronga apii, e te tereni e te akameitaki i te au puapii. No reira, e mea mataora me rave tatou i tetai apinga, noatu eaa te meangiti, ei tauturu i tetai tangata kia inangaro e kia tavini i to tatou Metua, ko Iehova!