1. Eaa a Iesu i pati ei ia Iehova kia tiaki i tana au pipi?

I TE po openga o tona oraanga i te enua nei, kua akamanako a Iesu i te au manamanata te ka tupu ki tana au pipi. No tona aroa i tona au oa, kua pati a Iesu ki tona Metua “kia tiaki . . . ia ratou, auraka ei kino.” (Ioa. 17:14, 15) Kua kite a Iesu e me oki aia ki te rangi, ka takinokino ua rai te Tiaporo ko Satani i tetai ua atu tei inangaro i te tavini ia Iehova. No reira, ka anoano te iti tangata o Iehova i tetai paruru anga.

2. Akapeea tatou e papu ei e ka akarongo a Iehova i ta tatou pure?

² No tona aroa i tana Tamaiti, kua pau a Iehova i te pure a Iesu. Me tauta tatou i te akamareka ia Iehova, ka aroa mai aia ia tatou e ka akarongo katoa ki ta tatou pure no te tauturu e te paruru anga. Ei Upoko ngutuare meitaki, ka akono ua rai a Iehova i tana tamariki. Me kare aia e rave i te reira, ka akakinoia tona ingoa!

3. Eaa tatou ka anoano ei i ta Iehova paruru anga i teia tuatau?

³ Ka anoanoia ta Iehova paruru anga i teia tuatau. Kua tiriaia a Satani mei te rangi e “e riri maata oki tona.” (Apo. 12:12) Ka akakeu aia i te aronga e takinokino ra ia tatou kia manako e te ‘akamori ra ratou i te Atua.’ (Ioa. 16:2) Te aronga kare e akamori i te Atua, ka takinokino ratou ia tatou no te mea kare tatou i to teianei ao. Noatu te reira, kare tatou e mataku. No teaa ra? Karanga te Tuatua a te Atua: “E tuatua-mou ra ta te Atu, nana kotou e akatinamou, e e akaora oki ia kotou i te kino.” (2 Tesa. 3:3) Akapeea a Iehova me paruru ia tatou? Ka uriuri tatou e rua ravenga.

4. Ia Ephesia 6:13-17, eaa ta Iehova i oronga mai ei paruru ia tatou?

⁴ Kua oronga mai a Iehova i te rakei katoa ei paruru ia tatou mei ta Satani au takinokinoanga. (E tatau ia Ephesia 6:13-17.) E matutu e e meitaki tikai teia rakei pae vaerua! Inara ka paruruia tatou me tamou tatou i te rakei katoa—e auraka e kiriti. Eaa ta teia rakei e akatutu maira? Ka uriuri tatou i te reira.

5. Eaa te taukupu o te tuatua mou, e eaa tatou ka tamou ei i te reira?

⁵ Te taukupu o te tuatua mou, te akatutu maira i te tuatua mou i roto i te Tuatua a te Atua, te Pipiria. Eaa tatou ka aao ei i teia taukupu? No te mea “e metua oki [a Satani] no te pikikaa.” (Ioa. 8:44) Kua pikikaa aia no tetai au tauatini mataiti e kua akavare i to te “ao katoatoa nei”! (Apo. 12:9) Ka paruru te tuatua mou i roto i te Pipiria ia tatou mei tana pikikaa. Akapeea tatou me aao i teia taukupu o te tuatua mou? Na te apii anga i te tuatua mou no runga ia Iehova, te akamori iaia “ma te vaerua e te tuatua-mou,” e te akono meitaki i te au mea katoa nei.—Ioa. 4:24; Ephe. 4:25; Ebe. 13:18.

6. Eaa te tapoki umauma o te tuatua tika, e eaa tatou ka aao ei i te reira?

⁶ Te tapoki umauma o te tuatua tika, te akatutu maira i to Iehova turanga tuatua tika. Eaa tatou ka aao ei i te tapoki umauma? Ka paruru te tapoki umauma i te pukuatu o tetai vaeau kia kore e koputaia. Mei te reira katoa, ka paruru te tapoki umauma o te tuatua tika i to tatou ngakau kia kore e takinoia e teianei ao. (Mase. 4:23) Te inangaro maira a Iehova kia aroa e kia tavini tatou iaia ma te ngakau katoa. (Mata. 22:36, 37) Ka tauta a Satani i te akakeu ia tatou kia inangaro i te au apinga o teianei ao—ta Iehova e rikarika ana—kia kore tatou e tavini iaia ma te ngakau katoa. (Iako. 4:4; 1 Ioa. 2:15, 16) Me kare te reira e angaanga, ka māro aia ia tatou kia kopae i to Iehova turanga tuatua tika.

7. Akapeea tatou me aao i te tapoki umauma o te tuatua tika?

⁷ Ka aao tatou i te tapoki umauma o te tuatua tika me āriki tatou i ta Iehova turanga no te tika e te tarevake e me aru i te reira. (Sala. 97:10) Manako tetai pae e ka akakotinga ta Iehova au turanga i to tatou tu rangatira. Inara me kare tatou e taangaanga i te au kaveinga Pipiria i roto i to tatou oraanga, ka aite tatou ki tetai vaeau tei kiriti i tona tapoki umauma i te tuatau tamaki no te mea kua manako aia e teiaa te reira. E ikianga neneva tera! Me inangaro tatou ia Iehova, kare tana au akauenga, “i te mea teiaa,” mari ra e mea ora te reira.—1 Ioa. 5:3.

8. Eaa te aiteanga kia akatamakaia to tatou vaevae i te akateateamamao o te evangeria o te au?

⁸ Akamaroiroi katoa mai a Paulo kia akatamakaia to kotou vaevae i te teateamamao o te evangelia o te au. Ko te aiteanga, kia papa ua tatou no te tutu aere i te nuti meitaki o te Patireia. Me akakite tatou i te karere a te Pipiria ki tetai ke, ka akamatutuia to tatou akarongo. Ka akamaroiroiia tatou me kite i te iti tangata o Iehova takapini i te ao e tauta ra i te akakite i te nuti meitaki—i te ngai angaanga, te apii, te ngai pitiniti, te tutu aere mei tera are ki tera are, te ngai okooko, me atoro i te kopu tangata kare i te Kite, me tuatua ki te au oa e i te kainga. Me mataku tatou e me akamutu i te tutu aere, ka aite tatou ki tetai vaeau tei kiriti i tona tamaka i te tuatau tamaki; ka viviki ua tona  vaevae i te mamae. Te ka tupu, ka ngatā iaia i te paruru iaia uaorai e kare e rauka i te aru i te akauenga a tona arataki.

9. Eaa tatou ka anoanoia ai kia apai i te paruru o te akarongo?

⁹ Ko te paruru o te akarongo, te akatutu maira i to tatou akarongo ia Iehova. Irinaki tatou e ka akatupu aia i tana i taputou. Na teia akarongo “e mate ei te au tao ai ravarai a te vaerua kino.” Eaa tatou ka anoanoia ai kia apai i teia paruru? No te mea ka paruruia tatou kia kore e akavareia e te au apiianga a te aronga tei akaruke ia Iehova e kia kore e mataku i te tuatua akakino a te aronga kimi apa. Me kare e akarongo, kare o tatou maroiroi kia patoi i te māro anga a tetai ke kia kopae i ta Iehova turanga. Inara me rave ua rai tatou i to Iehova anoano i te ngai angaanga e i te apii, te apai ra tatou i te paruru. (1 Pete. 3:15) I te au taime ravarai me patoi tatou i tetai angaanga tutaki maata te ka tamanamanata i ta tatou akamorianga, te apai ra tatou i te paruru. (Ebe. 13:5, 6) E me tavini tatou ia Iehova noatu te patoianga, ka paruru to tatou akarongo ia tatou.—1 Tesa. 2:2.

10. Eaa te pare o te ora, e eaa tatou ka aao ei i te reira?

¹⁰ Te pare o te ora, ko te manakonakoanga ïa ta Iehova i oronga mai—kia  akaora ia tatou mei te mate e te tutaki i te aronga tei rave i tona anoano. (1 Tesa. 5:8; 1 Timo. 4:10; Tito 1:1, 2) Mei tetai pare te ka paruru i te upoko o te vaeau, ka paruru te pare o te ora i to tatou manako. Na teea tu? Ka tauturu te manakonakoanga kia akamou i to tatou manako ki runga i ta te Atua au taputou e kia kore e taitaia no te au manamanata. Akapeea tatou me aao i teia pare? Na te akarotai anga i to tatou aerenga manako ki to te Atua. Ei akaraanga, ka irinaki tatou ki te Atua e kare ki te au apinga maata mou kore.—Sala. 26:2; 104:34; 1 Timo. 6:17.

11. Eaa te koke a te vaerua, e eaa tatou ka anoano ei kia taangaanga i te reira?

¹¹ Te koke a te vaerua, ko te Tuatua a te Atua, te Pipiria. Ka rauka i teia koke ririnui i te akaari mai i te au tu pikikaa ravarai e te akaora i te tangata mei te tuikaa ki te au apiianga pikikaa e te peu kino. (2 Kori. 10:4, 5; 2 Timo. 3:16, 17; Ebe. 4:12) Ka apii tatou akapeea me taangaanga i teia koke na roto i ta tatou uaorai apii e te tereni anga mei te akaaerenga a te Atua. (2 Timo. 2:15) Kapiti mai ki teia rakei katoa, kua oronga mai a Iehova i tetai akaou paruruanga. Eaa te reira?

12. Eaa atu ta tatou e anoano ra, e no teea ra?

¹² Kua kite te vaeau tukatau e kare aia e autu i te tamaki i tetai nuku vaeau maata koia anake ua; ka anoanoia te tauturu a tona pupu vaeau. Pera katoa, kare tatou e autu i te patoi ia Satani e tona au nuku me ko tatou anake ua; ka anoanoia te tauturu a to tatou au taeake e te au tuaine. Kua oronga mai a Iehova i to tatou “au taeake” takapini i te ao ei tauturu ia tatou.—1 Pete. 2:17.

13. Ia Ebera 10:24, 25, akapeea te uipaanga me tauturu ia tatou?

¹³ Tetai ravenga e rauka ai te tauturu, kia aere tatou ki te au uipaanga. (E tatau ia Ebera 10:24, 25.) E tupu ana te taitaia kia tatou pouroa i tetai au taime. Me tupu te reira, ka riro te au uipaanga i te akamaroiroi ia tatou. Ka akamaroiroiia tatou na roto i te paupau anga a te au taeake e te au tuaine. Ka akamatutu te au akoanga e te au akatutuanga Pipiria i to tatou akarongo kia tavini ua rai ia Iehova. E ka akamaroiroiia tatou me pukapuka tatou ki te au taeake i mua ake e i muri ake i te uipaanga. (1 Tesa. 5:14) Pera katoa, ka mataora tatou i te tauturu i tetai ke me aere ki te uipaanga. (Anga. 20:35; Roma 1:11, 12) Ka tauturu te uipaanga ia tatou na roto i te au mataara ke. Ka apiipii tatou kia tukatau i roto i te angaanga orometua. Ei akaraanga, ka apii tatou akapeea me taangaanga meitaki i te au Apinga Apii. No reira, e akapapa meitaki no te au uipaanga. E akarongo meitaki i te reira, e oti e taangaanga i taau i apii mai. Na te rave anga i teia, ka riro mai koe ei “toa meitaki ki o Iesu Mesia ra.”—2 Timo. 2:3.

14. Eaa atu tetai tauturu ka rauka ia tatou?

¹⁴ Ka tauturu te mirioni ua atu angera ririnui ia tatou. Akamanako i ta te angera okotai ka rauka i te rave! (Isa. 37:36) Eaa i reira ta te nuku angera ririnui ka rauka i te rave. Kare e tangata me kore e temoni e autu i te tamaki atu i te nuku vaeau ririnui o Iehova. E vaerua ririnui a Iehova. Me tauturu mai aia ia tatou, kare te aronga patoi e autu. (Aka. 6:16) E mea papu tikai teia! E akamanako ua i teia me tamatakuia koe e te au  oa angaanga, oa apii, e te kopu tangata kare i te Kite. E akamaara, kare ko koe anake ua te tamaki nei. Te aru nei koe i ta Iehova aratakianga.

15. Ia Isaia 54:15, 17, eaa ra kare e rauka i te tāpu i te angaanga tutu aere a te iti tangata o te Atua?

¹⁵ E maata te au tumu i makitakitaia ai tatou e to Satani ao. Kare tatou e piri ana ki tetai putuputuanga poritiki e ki roto i te tamaki. Te tutu aere nei tatou i te ingoa o te Atua, tona Patireia te ka apai mai i te ‘au, e te akono nei tatou i tana au kaveinga tika. Te akakite nei tatou e e pikikaa te tutara o teianei ao. (Ioa. 8:44) E kare e roa atu ka takoreia tona ao. Kare rava e rauka ia Satani e tona au nuku i te tāpu i ta tatou angaanga tutu aere. No reira, ka akapaapaa ua rai tatou ia Iehova na roto i tetai ua atu tu! Noatu e ririnui a Satani, kare i rauka ana iaia i te arai i te karere Patireia kia tae ki te au tangata i teianei ao. Mari ua ake ta Iehova paruru anga i tupu ei teia.—E tatau ia Isaia 54:15, 17.

16. Akapeea a Iehova me akaora i tona iti tangata i te tuatau o te mate maata?

¹⁶ Eaa te ka tupu a te tuatau ki mua? I te tuatau o te mate maata, ka akaora a Iehova ia tatou na roto i teia ravenga e rua. Mea mua, ka akaora aia i tona au tavini tiratiratu i te tuatau me akakeu aia i te au ariki o te enua kia takore ia Babulonia Maata, te au akonoanga pikikaa o teianei ao. (Apo. 17:16-18; 18:2, 4) E oti, ka akaora aia i tona iti tangata me takore aia i te toenga o to Satani ao ia Aramagido.—Apo. 7:9, 10; 16:14, 16.

17. Eaa te puapinga ka rauka mai me piri vaitata tatou kia Iehova?

¹⁷ Me piri vaitata tatou kia Iehova, kare e rauka ia Satani i te takinokino ia tatou e tuatau ua atu. Mari ra, koia te ka takoreia e tuatau ua atu. (Roma 16:20) No reira e aao i te rakei katoa—auraka e kiriti i te reira! Auraka e tamaki ia Satani e tona ao, ko koe anake ua. Tauturu i toou au taeake e te au tuaine. E aru i ta Iehova aratakianga. Me pera koe, e mea papu ka akamatutu e ka paruru to tatou Metua i te rangi ia koe.—Isa. 41:10.