1. Eaa te au timataanga te tupu ra ki te iti tangata o Iehova?

TE TUPU ra ainei tetai timataanga ngatā kia koe? Penei kua tamamae tetai i roto i te putuputuanga ia koe. (Iako. 3:2) Me kore, penei ka aviri toou au oa angaanga me kore oa apii ia koe no te tavini ia Iehova. (1 Pete. 4:3, 4) Me kore ka tauta toou kopu tangata i te arai ia koe kia kore e aere ki te uipaanga e te akakite i toou akarongo ki etai ke. (Mata. 10:35, 36) Me ngatā roa te timataanga, penei ka tuku koe i te au. Inara e mea papu noatu te timataanga, ka oronga mai a Iehova i te pakari e te maroiroi kia akakoromaki i te reira.

2. Ia Roma 15:4, akapeea te tatau Pipiria me tauturu ia tatou?

² I roto i tana Tuatua, kua akakite mai a Iehova i te au akaraanga no te aronga apa ua tei akakoromaki i te timataanga. Eaa te tumu? Kia apii tatou mei te reira. Kua akauru a Iehova i te apotetoro ko Paulo kia tata i teia. (E tatau ia Roma 15:4.) Me tatau tatou i te reira, ka rauka te akapumaana e te manakonakoanga. Inara kia puapingaia, e maata atu ta tatou ka rave i te tatau ua i te Pipiria. E tuku tatou i te au irava kia taui i to tatou aerenga manako e te akakeu i to tatou ngakau. Eaa ta tatou ka rave kia kimi i te aratakianga no tetai manamanata? E aru i teia au takainga e ā: (1) Pure, (2) Akamanako, (3) Akamanako oonu, e te (4) Rave. Ka uriuri tatou akapeea me rave i teia au takainga. * E oti ka aru tatou i teia ravenga no te apii kia kite mei te oraanga o te Ariki ko Davida e te apotetoro ko Paulo.

3. I mua ake ka tatau koe i te Pipiria, eaa taau ka rave, e no teaa ra?

 ³ (1) Pure. I mua ake ka tatau koe i te Pipiria, e pati i ta Iehova tauturu kia puapingaia koe mei taau e tatau ra. Ei akaraanga, me kimi koe i te tauturu no tetai manamanata e pati kia Iehova no te au kaveinga i roto i tana Tuatua te ka arataki ia koe.—Phili. 4:6, 7; Iako. 1:5.

4. Eaa te ka tauturu ia koe kia kite eaa te tupu ra i roto i tetai tua Pipiria?

⁴ (2) Akamanako. Kua oronga mai a Iehova i te ravenga umere no te akamanako. Ei tauturu ia koe kia kite e eaa te tupu ra i roto i tetai tua Pipiria, e tauta i te akamanako e ko koe te tangata i roto i te tua. Tauta kia kite i tana e kite ra, tona tu, e tana e manako ra.

5. Eaa te akamanako oonu, e akapeea koe me rave i te reira?

⁵ (3) Akamanako oonu. Te aiteanga o te akamanako oonu, kia akamanako meitaki i taau e tatau ra e akapeea koe me rave i te reira. Ka tauturu te reira ia koe kia akarotai i toou aerenga manako e kia rauka i te mārama oonu. Ko te tatau Pipiria kare e akamanako oonu, kua aite te reira ki te akapapa anga i te kai e kare i tunuia ake. Inara me akamanako oonu koe, ka tunu kapiti koe te au kai e ka reka te kai anga. Ei tauturu ia koe kia akamanako oonu, penei ka ui koe e ka pau i teia au uianga: ‘Eaa ta te tangata i roto i te tua i rave kia puapingaia aia? Akapeea a Iehova te tauturu anga iaia? Eaa te au apiianga te ka tauturu iaku kia akakoromaki i te timataanga?’

6. Eaa te tumu ka rave tatou i ta tatou e apii ra?

⁶ (4) Rave. Karanga a Iesu me kare tatou e rave i ta tatou i apii, ka aite tatou ki te tangata tei akatu i tona are ki runga i te one. Ka angaanga pakari aia, inara te kaimoumou ra aia i tona maroiroi. No teaa ra? No te mea me tupu te uriia e te vai puke ka inga tona are e ka ngaangaa. (Mata. 7:24-27) Mei te reira katoa, me pure, akamanako, e me akamanako oonu tatou e kare e rave i ta tatou i apii, kaimoumou to tatou maroiroi. Me tupu te timataanga e te takinokino anga, kare to tatou akarongo e matutu. I tetai tua, me apii e me taangaanga i ta tatou i apii, ka rave i te ikianga meitaki, ka rauka te ‘au e ka akamatutuia to tatou akarongo. (Isa. 48:17, 18) I teianei, ka aru tatou i teia au takainga e ā kia apii mei tetai atianga i roto i te oraanga o te Ariki ko Davida.

7. Eaa te tua Pipiria ta tatou ka uriuri?

⁷ Kua pikikaa e kua tamamae ainei tetai oa me kore kopu tangata ia koe? Me koia, ka puapingaia koe mei te tua o Abasaloma, te tamaiti a te Ariki ko Davida, tei pikikaa i tona metua e kua rave i te taoonga ariki nona uaorai.—2 Samu. 15:5-14, 31; 18:6-14.

8. Eaa taau ka rave kia tauturu mai a Iehova ia koe?

⁸ (1) Pure. Ia koe e tatau ra i teia tua, e akakite kia Iehova eaa te kino tei tupu kia koe. (Sala. 6:6-9) E akakite pouroa i toou manako. E oti, e pati i ta Iehova tauturu kia kite i te au kaveinga te ka tauturu ia koe kia akakoromaki i toou mamae.

9. Eaa tei tupu kia Davida e Abasaloma?

⁹ (2) Akamanako. E akamanako eaa te tupu ra i roto i teia tua, e eaa tei tupu ki te Ariki ko Davida. Kua roa ta Abasaloma tauta anga kia akakeu i te iti tangata kia aru iaia. (2 Samu. 15:7) I te  tuatau tau, kua tono a Abasaloma i te aronga tutaka ki te enua Iseraela ei akapapa i te tangata kia āriki iaia ei tutara no ratou. Kua akakeu katoa aia i te oa piri mou e te tumu korero o Davida, ko Ahitophela kia meameaau. Kua akaariki a Abasaloma iaia uaorai, e kua tauta i te opu e te tamate ia Davida, iaia e maki ra i tera tuatau. (Sala. 41:1-9) Kua rongo a Davida i ta Abasaloma ka rave e kua oro mei ia Ierusalema. Aere ua rai, kua tamaki to Abasaloma vaeau ia Davida e tona au vaeau. Kua tamateia te aronga meameaau, kapiti mai a Abasaloma.

10. Eaa ta te Ariki ko Davida ka rauka i te rave?

¹⁰ E akamanako i ta Davida i na roto te tupu anga teia au mea. Akaperepere aia ia Abasaloma e kua irinaki ia Ahitophela. Inara, kua pikikaa raua iaia. Kua tamamae e kua tauta raua i te tamate iaia. Penei ka manako a Davida e kua turu tona au oa ia Abasaloma, e kare aia e irinaki akaou ia ratou. Penei ka akamanako ua aia iaia uaorai e ka oro koia anake ua. Me kore ka tuku aia i te ‘au no te taitaia. Kare a Davida i akapera ana. Mari ra, kua akakoromaki aia i teia timataanga ngata. Akapeea i rauka ai iaia i te rave i te reira?

11. Eaa ta Davida i rave i te tuatau tumatetenga?

¹¹ (3) Akamanako oonu. Eaa te au kaveinga taau ka apii mai mei teia tua? E pau i teia uianga, “Eaa ta Davida i rave ei tauturu iaia uaorai?” Kare a Davida i taitaia ana e kare i rave rapurapu i te ikianga tarevake. Kare katoa aia i tavarevare e kare i mataku i te rave i tetai ikianga. Mari ra, kua pure aia kia Iehova no te tauturu. Kua pati katoa aia i te tauturu a tona au oa. E kua viviki aia i te akatupu i tana i iki. Noatu tona mamae ngakau, kare a Davida i mareka kore e te riri. Kua irinaki ua rai aia kia Iehova e tona au oa.

12. Eaa ta Iehova i rave ei tauturu ia Davida?

¹² Akapeea a Iehova te tauturu anga ia Davida? Me rave koe i te kimikimianga, ka kite mai koe e kua akamaroiroi a Iehova ia Davida kia akakoromaki i teia timataanga. (Sala. 3:1-8; tuatua akamataanga) Kua akameitaki a Iehova i te au ikianga ta Davida i rave. E kua tauturu aia i to Davida au oa tiratiratu kia tamaki e kia paruru i to ratou ariki.

13. Akapeea koe me aru i te akaraanga o Davida me tamamae tetai ia koe? (Mataio 18:15-17)

¹³ (4) Rave. E ui kia koe uaorai, ‘Akapeea au me aru i te akaraanga o Davida?’ Ka anoanoia koe kia akatikatika viviki i te manamanata. Kia tau ki te turanga, penei ka rauka ia koe i te taangaanga i ta Iesu ako me kore te kaveinga ia Mataio pene 18. (E tatau ia Mataio 18:15-17.) Inara, auraka koe e rave rapurapu i te au ikianga me te riri ra koe. E pure kia Iehova no te ngakau marū kia kite eaa taau ka rave. E irinaki ua rai i toou au oa. E kia puareinga ua i te āriki i te tauturu. (Mase. 17:17) Te mea puapinga, e aru i ta Iehova akoanga i roto i tana Tuatua.—Mase. 3:5, 6.

14. Eaa te au atianga ka akamaroiroiia koe e 2 Timoteo 1:12-16; 4:6-11, 17-22?

¹⁴ Te patoi ra ainei toou kopu tangata ia koe? Me kore, te noo ra ainei koe i tetai enua kua tureia e kua araiia te angaanga a te iti tangata o Iehova? Me koia, penei ka akamaroiroiia koe na te tatau anga ia 2 Timoteo 1:12-16 e te 4:6-11,  17-22. * Kua tata a Paulo i teia au irava iaia i roto i te are auri.

15. Eaa taau ka pati kia Iehova?

¹⁵ (1) Pure. I mua ake ka tatau koe i teia au irava, e akakite kia Iehova i toou manamanata e toou manako no te reira. E akakite pouroa i toou manako. E oti, e pati i ta Iehova tauturu kia kite koe i te au kaveinga mei roto i ta Paulo au timataanga te ka tauturu ia koe kia kite eaa taau ka rave.

16. Eaa tei tupu kia Paulo?

¹⁶ (2) Akamanako. Akamanako ia koe i roto i to Paulo turanga. Tei roto aia i te are auri i Roma. Kua tapekaia aia i mua ana, inara i teia atianga kua papu iaia e ka tamateia aia. Kua akaruke tona au oa iaia, e kua roiroi aia i te pae kopapa.—2 Timo. 1:15.

17. Eaa ta Paulo ka rauka i te rave?

¹⁷ Penei ka rauka ia Paulo i te akamanako i te ka tupu naringa kare aia i riro mai ei Kerititiano. Penei kare aia e tukuia ki roto i te are auri. Penei ka riri aia i te au tane i Asia tei akaruke iaia, e penei ka akatupu i te tu mareka kore i tona au oa. Inara kare a Paulo i akapera ana. Akapeea i rauka ai iaia te akaari i te tu papu e te irinaki?

18. Eaa ta Paulo i rave i tona au manamanata?

¹⁸ (3) Akamanako oonu. E pau i teia uianga, “Eaa ta Paulo i rave kia puapingaia aia?” Noatu kua kite a Paulo e ka tamateia aia, kare i ngaropoina iaia te angaanga puapinga rava atu—te akakakā anga ia Iehova. E kua akamanako aia akapeea me akamaroiroi i tetai ke. Kua irinaki aia kia Iehova na te pure putuputu kiaia. (2 Timo. 1:3) Kare aia i akamou ua ki runga i te aronga tei akaruke iaia, mari ra kua akaari aia i te tu āriki rekareka no te tauturu tiratiratu a tona au oa. Kapiti mai, kua apii ua rai a Paulo i te Tuatua a te Atua. (2 Timo. 3:16, 17; 4:13) Te mea puapinga, kua irinaki papu tikai aia e te aroa maira a Iehova e Iesu iaia. Kare raua i akaruke iaia, e ka tutaki raua iaia no tana tavini tiratiratu anga.

19. Akapeea a Iehova te tauturu anga ia Paulo?

¹⁹ Kua akamatakite a Iehova ia Paulo e ka anoanoia aia kia akakoromaki i te au takinokino anga ei Kerititiano. (Anga. 21:11-13) Akapeea a Iehova te tauturu anga ia Paulo? Kua pau mai aia i ta Paulo au pure, e kua akamaroiroi iaia. (2 Timo. 4:17) Kua papu ia Paulo e ka rauka te tutaki no tana angaanga pakari i rave. Kua akakeu katoa a Iehova i to Paulo au oa tiratiratu kia tauturu iaia.

20. Ia Roma 8:38, 39, akapeea koe me aru i te akaraanga o Paulo?

²⁰ (4) Rave. E ui kia koe uaorai, ‘Akapeea au me aru i te akaraanga o Paulo?’ Mei ia Paulo rai, ka takinokinoia tatou no to tatou akarongo. (Mare. 10:29, 30) Kia vai tiratiratu, ka anoanoia kia irinaki ia Iehova na roto i te pure e kia apii putuputu i te Pipiria. E akamaara i te mea puapinga, kia akakakā ia Iehova. E mea papu kare rava a Iehova e akaruke ia tatou e kare e apinga e takore i tona aroa no tatou.—E tatau ia Roma 8:38, 39; Ebe. 13:5, 6.

21. Eaa tei tauturu ia Aya e Hector i to raua manamanata?

²¹ Noatu eaa to tatou turanga, ka rauka te maroiroi mei te au akaraanga Pipiria.  Ei akaraanga, karanga tetai painia i Tiapani ko Aya e kua tauturu te tua o Iona iaia kia kore e mataku i te tutu aere i te ngai tangata. Ko Hector, e mapu i Indonesia, kare tona nga metua e tavini ana ia Iehova, kua akamaroiroiia aia e te akaraanga o Ruta kia apii no runga ia Iehova e te tavini iaia.

22. Akapeea koe e puapinga ai mei te au nuku Pipiria e te au atikara “Aru i to Ratou Akarongo”?

²² Ka kitea te au akaraanga Pipiria te ka akamaroiroi ia koe kiea? Ka tauturu te au vitio, tatau anga nuku Pipiria e te au atikara “Aru i to Ratou Akarongo” kia kite meitaki koe eaa te tupu ra i roto i te Pipiria. * I mua ake ka akara, akarongo, me kore tatau i te au tua Pipiria, e pati i ta Iehova tauturu kia kite koe i te au apiianga puapinga taau ka taangaanga. Akamanako e ko koe te tangata i roto i te tua. Akamanako oonu i ta te au tavini tiratiratu o Iehova i rave e akapeea aia te tauturu anga ia ratou. E oti e rave i taau i apii mai. Akameitaki ia Iehova no te tauturu tana i oronga mai kia koe. E e akaari i toou rekareka na te tauta anga i te akamaroiroi e te tauturu i etai ke.

23. Ia Isaia 41:10, 13, eaa ta Iehova i taputou e ka rave aia no tatou?

²³ E ngata te akakoromaki i te oraanga i roto i to Satani ao. I tetai taime, kare tatou i kite i ta tatou ka rave. (2 Timo. 3:1) Auraka tatou e taitaia e te mataku. Kua kite ua a Iehova i to tatou au manamanata. Me inga tatou, taputou mai aia e ka mou aia ia tatou ki tona rima katau ririnui. (E tatau ia Isaia 41:10, 13.) Papu ia tatou e ka tauturu mai a Iehova, e ka rauka te maroiroi mei te Pipiria kia akakoromaki i tetai ua atu manamanata.