1. Ia Mataio 24:9, eaa ra tatou kare e poitirere me makitakitaia tatou e teianei ao?

KUA anga a Iehova ia tatou kia aroa i etai ke e kia aroaia mai. No reira, ka tupu te mamae e te mataku me makitakitaia tatou. Ei akaraanga, karanga a Georgina, tei noo i Europa: “E 14 oku mataiti, kua riri toku mami iaku no te tavini ia Iehova. Kua taitaia au e kua manako penei kare au i te tamaine meitaki.” * Akakite te taeake ko Danylo: “Te pāpā anga, te akakino e te tamataku anga te au vaeau iaku no te mea e Kite au no Iehova, kua tupu te mataku tikai.” Ka tupu te mamae no te tu makitakita, inara kare tatou e poitirere. Kua totou a Iesu e ka makitakitaia tatou.—E tatau ia Mataio 24:9.

2-3. Eaa ra to teianei ao i makitakita ai i te au pipi a Iesu?

² Ka riri to teianei ao i te au pipi a Iesu. No teaa ra? No te mea mei ia Iesu rai, “kare [ratou] i to teianei ao.” (Ioa. 15:17-19) Ka akangateitei tatou i te kavamani a te tangata inara kare tatou e akamori ia ratou e to ratou reva. Ko Iehova anake ta tatou ka akamori. Ka turu tatou i to te Atua tikaanga kia tutara—ta Satani e ta tona “uanga” i patoi. (Gene. 3:1-5, 15) Te akakite aere nei tatou e na te Patireia o te Atua e akameitaki i te turanga o te tangata e na te reira e akapueurikiriki i te au patireia te ka patoi mai. (Dani. 2:44; Apo. 19:19-21) E nuti meitaki teia ki te aronga ngakau akaaka e e nuti kino ki te aronga rave kino.—Sala. 37:10, 11.

 ³ Pera katoa, ka makitakitaia tatou no te mea te akarongo ra tatou ki te ture a te Atua. E tuke maata teia ki te tu viivii e te tau kore o teianei ao. Ei akaraanga, e maata te tangata te āriki nei i te peu ainga viivii tau kore tei aite ki te peu ta te Atua i takore i roto ia Sodoma e Gomora! (Iuda 7) No te mea te akono ra tatou i te au ture Pipiria no teia au peu, e maata te aronga tei aviri mai e te karanga e e aronga akavaavaa tatou!—1 Pete. 4:3, 4.

4. Eaa te au tu te ka tauturu ia tatou me makitakitaia mai?

⁴ Eaa te ka tauturu ia tatou kia akakoromaki i te tu makitakita e te kino? Ka anoanoia te irinakianga e ka tauturu a Iehova ia tatou. Mei tetai paruru rai, na te akarongo “e mate ei te au tao ai ravarai a te vaerua kino.” (Ephe. 6:16) Inara e maata atu te ka anoanoia. Ka anoanoia te aroa. Eaa te tumu? No te mea kare te aroa e “riri vave.” Ka tapoki e ka akakoromaki te reira i te au mamae katoa. (1 Kori. 13:4-7, 13) Akapeea te aroa no Iehova, te au taeake e te au enemi me tauturu ia tatou kia akakoromaki i te tu makitakita?

5. Akapeea to Iesu aroa no Iehova te tauturu anga iaia?

⁵ I te po i mua ake ka tamateia ai aia, karanga a Iesu ki tana au pipi tiratiratu: “Te anoano nei au i te Metua; e te akono nei au i ta te Metua i akaue mai iaku.” (Ioa. 14:31) No to Iesu aroa no Iehova, kua akakoromaki aia i te au timataanga kino tikai. Ka tauturu katoa to tatou aroa no Iehova ia tatou.

6. Ia Roma 5:3-5, akapeea te au tavini o Iehova me akakoromaki i te tu riri o teianei ao?

⁶ Kua riro te aroa no te Atua ei tauturu i te au tavini o Iehova kia akakoromaki i te takinokinoanga. Ei akaraanga, te akaue anga te akavaanga ngati Iuda i te au apotetoro kia akamutu i te tutu aere, no to ratou aroa no te Atua, karanga ratou: “Ko te Atua ta matou e akarongo e tikaʼi auraka te tangata.” (Anga. 5:29; 1 Ioa. 5:3) Ka akamaroiroi katoa teia aroa mou tikai i te au taeake o teia tuatau kia vai tiratiratu noatu te takinokinoanga a te au kavamani. Me riri teianei ao ia tatou, auraka e taitaia.—Anga. 5:41; e tatau ia Roma 5:3-5.

7. Eaa ta tatou ka rave me patoi mai to tatou ngutuare?

⁷ Ka tupu tetai timataanga pakari i roto i toou ngutuare. Me inangaro tatou i te apii no runga ia Iehova, penei ka manako tetai o te ngutuare e kua akavareia tatou. Penei ka manako tetai pae e kua auouoia tatou. (Akaaite ia Mareko 3:21.) Penei ka takinokino maata ratou ia tatou. Auraka e poitirere i teia tu patoianga. Karanga a Iesu: “E kitea oki to te tangata nei enemi i roto i tona uaorai ngutuare.” (Mata. 10:36) Noatu eaa ta te kopu tangata ka manako no runga ia tatou, kare tatou e riri atu. Mari ra, me matutu to tatou aroa no Iehova, ka matutu katoa to tatou aroa no te tangata. (Mata. 22:37-39) Inara kare rava tatou e kopae i te ture e te au kaveinga i roto i te Pipiria no te akamareka i tetai tangata.

8-9. Eaa tei tauturu i tetai tuaine kia vai tiratiratu noatu te patoianga kino?

⁸ Kua rauka ia Georgina, tei taikuia i mua ana, kia vai tiratiratu noatu te patoianga kino a tona mami. Akakite a  Georgina: “Kua akamata maua ko toku mami i te apii i te Pipiria ki te Au Kite. E ono marama i muri mai, inangaro au i te aere ki te uipaanga, inara kua taui te tu o toku mami. Kua kite mai au e kua kapiti atu aia ki te aronga tei patoi ia Iehova e kua aru i ta ratou apiianga. Kua akakino aia iaku, uuti i toku rouru, roromi i toku karaponga e kua titiri i taku au puka. E 15 oku mataiti, papetitoia au. Tauta toku mami i te tāpu iaku kia kore e tavini ia Iehova na te tuku anga iaku ki roto i te are rapakauanga no te au mapu kai apinga akakona e te rave kino. E ngata tikai i te akakoromaki i te patoianga a toou metua tei tau kia aroa e kia akono ia koe.”

⁹ Eaa tei tauturu ia Georgina kia akakoromaki? Karanga aia: “Te rā i patoi mai ei toku mami, koi oti ua ake iaku te tatau i te Pipiria katoa. Papu iaku e ko teia te tuatua mou e kua piri vaitata au kia Iehova. Kua pure putuputu au e kua akarongo mai aia iaku. Iaku i roto i te are rapakauanga, kua pati tetai tuaine iaku kia apii maua i te Pipiria i tona kainga. Kua akamaroiroi te au taeake e te au tuaine iaku i ko i te Are Uipaanga Patireia. E kua āriki ratou iaku i roto i to ratou ngutuare. Taka meitaki e e ketaketa atu a Iehova i tetai tei patoi mai, noatu koai ratou.”

10. Eaa ta Iehova ka rave no tatou?

¹⁰ Tata te apotetoro ko Paulo e kare e apinga “e tika kia akataka ke ia tatou i te aroa o te Atua i roto i to tatou Atu ia Iesu Mesia.” (Roma 8:38, 39) Noatu ka tupu te mamae kia tatou no tetai tuatau, ka akapumaana e ka tauturu ua rai a Iehova ia tatou. Mei tei tupu kia Georgina, ka tauturu katoa a Iehova ia tatou na roto i te au taeake e te au tuaine i roto i te putuputuanga.

11. Akapeea te aroa tei taikuia ia Ioane 15:12, 13 te tauturu anga i tana au pipi? Oronga mai i te akaraanga.

¹¹ I mua ake ka mate ei aia, kua akamaara a Iesu ki tana au pipi kia aroa ratou i tetai e tetai. (E tatau ia Ioane 15:12, 13.) Kite aia e ka rauka i te aroa akaatinga i te tauturu ia ratou kia taokotai e kia akakoromaki i te tu makitakita o teianei ao. Akamanako i tei tupu ki te putuputuanga i Tesalonia. Mei te akamataanga, kua takinokinoia te au taeake e te au  tuaine. E kua riro ratou ei akaraanga no te tu tiratiratu e te aroa. (1 Tesa. 1:3, 6, 7) Akamaroiroi a Paulo ia ratou kia akaari i te aroa e “kia maata ua atu rai.” (1 Tesa. 4:9, 10) Ka akakeu te aroa ia ratou kia akapumaana i te ngakau taitaia e te tauturu i tei apikepike. (1 Tesa. 5:14) Kua akarongo ratou ki ta Paulo akoanga. Karanga aia i roto i te rua o tana reta: “Te tupu maata ra . . . to kotou aroa ia kotou uaorai e pini ua ake, kua maata rava ïa.” (2 Tesa. 1:3-5) Kua tauturu te aroa ia ratou kia akakoromaki i te tu ngata e te takinokino.

12. I te tuatau tamaki, akapeea te au taeake i tetai enua te akaari anga i te aroa ki tetai e tetai?

¹² Akamanako i tei tupu kia Danylo, tei taikuia i mua ana, e tana vaine. Te tupu anga te tamaki i to raua oire, kua aere rai raua ki te uipaanga, te tutu aere e kua tuʼa i te kai na te au taeake e te au tuaine. I tetai rā, kua aere mai te au vaeau ki tona kainga. Karanga a Danylo: “Kua akaue ratou iaku kia akaruke i taku akonoanga. Te patoi anga au, kua pāpā ratou iaku e kua pupui na runga ake i toku upoko e kua karanga e me oki mai ratou, ka kukumi ratou i taku vaine. Kua viviki te au taeake i te tuku ia maua ki tetai oire ke na runga i te rerue. Kare e ngaropoina iaku to ratou aroa. Te tae anga maua ki te oire ou, oronga mai te au taeake i te kai e te tauturu kia kimi i tetai kainga e te ngai angaanga naku! Kua rauka i reira ia maua i te oronga i to maua kainga ei ngai akaruruanga no te Au Kite tei oro mei te ngai tamaki.” Akaari maira teia e ka tauturu te aroa Kerititiano ia tatou kia akakoromaki i te tu makitakita.

13. Akapeea te vaerua tapu me tauturu ia tatou kia akakoromaki i te tu makitakita?

¹³ Akakite a Iesu kia aroa tana au pipi i to ratou enemi. (Mata. 5:44, 45) E mama ainei te reira? Kare! Inara ka rauka ma te tauturu a te vaerua tapu o te Atua. Ko te ua o te vaerua, te kapiti maira te inangaro, akakoromaki, takinga meitaki, maru e te akono meitaki. (Gala. 5:22, 23) Ka tauturu teia au tu ia tatou kia akakoromaki i te tu makitakita. E maata te aronga patoi tei taui no tei akaariia teia au tu manea e ta ratou tane, vaine, tamariki e te tangata tupu akarongo. E kua riro mai ratou  ei au taeake e te tuaine. No reira me ngata ia koe i te aroa i te aronga makitakita no tei tavini koe ia Iehova, e pure no te vaerua tapu. (Luka 11:13) E ko te akarongo ua rai ki te Atua te ravenga meitaki rava atu.—Mase. 3:5-7.

14-15. Akapeea a Roma 12:17-21 te tauturu anga ia Yasmeen kia akaari i te aroa ki tana tane?

¹⁴ Akamanako i tei tupu kia Yasmeen, te noo ra i te Middle East. Te riro anga mai aia ei Kite, kua manako tana tane e kua akavareia aia e kua tauta i te tāpu iaia mei te tavini i te Atua. Kua akakino tana tane iaia e kua akaue i tona kopu tangata, te orometua e te tangata purepure kia tamataku e te akaapa iaia no te akavee i tona ngutuare. Akakino katoa tana tane i te au taeake i ko i te uipaanga a te putuputuanga! Kua aue ua a Yasmeen no tona tu kino.

¹⁵ I ko i te Are Uipaanga Patireia, kua akapumaana e kua akamaroiroi te au taeake ia Yasmeen. Kua akamaroiroi te aronga pakari iaia kia taangaanga ia Roma 12:17-21. (E tatau.) Karanga a Yasmeen: “E mea ngata te reira. Inara kua pati au i ta Iehova tauturu e kua tauta i te taangaanga i tera irava. Titiri anga taku tane i te vari ki runga i te taua, kua tama au i te reira. Tuatua riri aia kiaku, kua pau maru atu au. E me rokoia aia e te maki, kua akono au iaia.”

16-17. Eaa taau i apii mai mei tei tupu kia Yasmeen?

¹⁶ Kua akameitakiia a Yasmeen no te akaari i te aroa ki tana tane. Karanga aia: “Kua irinaki taku tane iaku no te mea ka akakite ua au i te tika. Ka akarongo mai aia me tuatua maua no runga i te akonoanga e kua akatupu aia i te ‘au i te kainga. Akamaroiroi aia iaku kia aere ki te au uipaanga. I teianei, e pirianga meitaki tikai to maua e kua ‘au ua to maua ngutuare. Te inangaro nei au kia āriki taku tane i te tuatua mou e kia tavini kapiti maua ia Iehova.”

¹⁷ Akaari maira tei tupu kia Yasmeen e ka “tapoki [te aroa] i te au mea katoa, . . . e manakonako i te au mea katoa, e akakoromaki i te au mea katoa.” (1 Kori. 13:4, 7) Noatu te kino e te mamae o te tu makitakita, e ketaketa atu te aroa. Ka taui i te tu o te tangata. E ka akarekareka i to Iehova ngakau. Noatu ka makitakita  ua te aronga patoi ia tatou, ka rauka rai te rekareka. Akapeea?

18. Eaa tatou ka rekareka ai me makitakitaia tatou?

¹⁸ Karanga a Iesu: “E ao to kotou, kia makitakita mai te tangata ia kotou.” (Luka 6:22) Kare tatou e iki kia makitakitaia mai. E kare tatou e reka i te reira. Eaa tatou ka rekareka ai me makitakitaia tatou? Akamanako ana e toru tumu. Mea mua, me akakoromaki tatou, ka rekareka a Iehova. (1 Pete. 4:13, 14) Te rua, ka ketaketa atu to tatou akarongo. (1 Pete. 1:7) E te toru, ka rauka te tutaki maata—te ora mutu kore.—Roma 2:6, 7.

19. Eaa te au apotetoro i rekareka ai i to ratou pāpāia anga?

¹⁹ Muri ake i to Iesu tuakaouanga, kua kite te au apotetoro i te rekareka tana i tuatua. I to ratou pāpāia anga e te akaue anga kia akamutu i te tutu aere, kua rekareka ratou. Eaa te tumu? “No [to Iesu] ingoa i manakoiaʼi ratou e tau ia ratou taua takinga-kino ra.” (Anga. 5:40-42) Maata atu to ratou aroa no te Atu i te mataku i to ratou enemi. Akaari ratou i te aroa na te akakite anga i te nuti meitaki “kare e rā i tukua.” I teia tuatau, maata te au taeake e tavini tiratiratu ra noatu te turanga ngata. Kare a Iehova e akangaropoina i ta ratou angaanga e te aroa no tona ingoa.—Ebe. 6:10.

20. Eaa ta tatou ka uriuri i roto i te atikara ka aru mai?

²⁰ Ka riri ua rai teianei ao ia tatou i roto i teia akatereanga. (Ioa. 15:19) Inara kare tatou e anoanoia kia mataku. Ka kite tatou i roto i te atikara ka aru mai e ka “akatinamou, e e akaora oki” a Iehova i tona au tavini tiratiratu. (2 Tesa. 3:3) No reira kia aroa ua rai tatou ia Iehova, te au taeake e te au enemi. Me akarongo tatou ki teia akoanga, ka taokotai tatou, ka matutu i te pae vaerua, ka akangateitei ia Iehova, e ka akapapu tatou e ririnui atu te aroa i te tu makitakita.