1. Mei teaa rai toou oraanga i mua ake ka apii ei koe i te Pipiria?

 MEI teaa rai toou oraanga i mua ake ka apii ei koe i te Pipiria ki te Au Kite o Iehova? E mataku ana te maata anga ia tatou me akamanako ua i te reira. Kua akakeuia to tatou oraanga e te vaerua o teia ao—te turanga tika e tarevake o teianei ao. Me koia ïa, “e manakoanga kore, e te Atua kore [to tatou] i te ao nei.” (Ephe. 2:12) Inara, kua taui te apii Pipiria i teia au mea pouroa!

2. Eaa taau i kite mai mei te apii anga i te Pipiria?

² Te apii anga koe i te Pipiria, kua kite mai koe e e Metua toou i te rangi te aroa maata maira ia koe. Kite katoa mai koe e kia akamareka ia Iehova e kia rauka i te piri atu ki tona iti tangata, ka anoanoia koe kia taui takiri i toou oraanga, toou tu, e toou aerenga manako. Ka anoanoia koe kia akono i ta Iehova au turanga no te mea tika e te tarevake.—Ephe. 5:3-5.

3. Ia Kolosa 3:9, 10, eaa ta Iehova e inangaro ra kia rave tatou, e eaa ta tatou ka uriuri i teia atikara?

³ No te mea na Iehova i anga ia tatou, e koia to tatou Metua i te rangi, e tikaanga tona kia akatere i tona ngutuare. I mua ake ka papetitoia ai tatou, te umuumu maira aia kia tauta tatou i te ‘kopae i te tangata taito ra e tana katoa au ravenga.’ * (E tatau ia Kolosa 3:9, 10.) Ka tauturu teia atikara i te aronga tei inangaro i te papetito kia pau i teia au uianga: (1) Eaa te “tangata taito”? (2) Eaa ra a Iehova ka inangaro ei ia tatou kia kopae i te tangata taito?  (3) Akapeea tatou me rave i te reira? Me kua papetitoia koe, ka tauturu teia apii kia kore koe e akatupu akaou i te tangata taito.

4. Eaa ta tetai tangata ka rave me akatereia aia e “te tangata taito”?

⁴ Tetai tangata tei akatereia e te “tangata taito,” ka akamanako e ka rave aia i te au angaanga a te kopapa. E tu noinoi tona, riririri, mareka kore e te ngakau parau. E reka ana aia i te akara i te au apinga ainga viivii e te au teata ta tangata e te tau kore. Penei e au tu meitaki tona, e ka tataraapa aia no te au mea kino tana i tuatua e i rave. Kare ra aia e maroiroi ana i te taui i tona aerenga manako e tona tu.—Gala. 5:19-21; 2 Timo. 3:2-5.

5. Ka rauka ainei ia tatou i te kopae takiri i te tangata taito? Akamārama mai. (Angaanga 3:19)

⁵ E tu apa ua to tatou, no reira kare e rauka ia tatou i te akaatea takiri i te au manako e te au anoano tika kore mei to tatou ngakau e te manako. Tetai taime, ka tuatua e ka rave tatou i tetai apinga tarevake. (Iere. 17:9; Iako. 3:2) Inara, me kopae tatou i te tangata taito, kare te au peu tarevake e akatere akaou ia tatou. Ka taui takiri to tatou tu.—Isa. 55:7; e tatau ia Angaanga 3:19.

6. Eaa a Iehova i inangaro ei ia tatou kia kopae i te au manako e te au peu tarevake?

⁶ No tona inangaro maata ia tatou, te akamaroiroi maira a Iehova ia tatou kia kopae takiri i te au manako e te au peu tarevake kia mataora to tatou oraanga. (Isa. 48:17, 18) Kua kite aia e me rave tatou i te au anoano tau kore, ka mamae tatou e tetai ke. Ka tupu katoa te mamae kiaia.

7. Ia Roma 12:1, 2, eaa te ikianga ta tatou ka rave?

⁷ Penei ka aviri mai te au oa e te kopu tangata me tauta tatou i te taui i to tatou tu. (1 Pete. 4:3, 4) Penei ka karanga ratou e e tikaanga to tatou kia rave i ta tatou ka inangaro, e auraka tetai ke e akakite i ta tatou ka rave. Inara ko te aronga tei kopae i ta Iehova au turanga, kare na ratou e arataki ana ia ratou uaorai. Mari ra te tuku ra ratou i teia ao o Satani kia akatere  ia ratou. (E tatau ia Roma 12:1, 2.) E ikianga ta tatou pouroa: Me ka akaari ua tatou i te tu tangata taito, tei akatereia e Satani e to tatou tu ara, me ka tuku tatou ia Iehova kia taui i to tatou tu kia riro mai tatou ei aronga meitaki.—Isa. 64:8.

8. Eaa te ka tauturu ia tatou kia kopae i te au manako e te peu tarevake?

⁸ Kua kite a Iehova e ka anoanoia tetai tuatau e te maroiroi kia rauka i te kopae i te au manako e te peu tarevake. (Sala. 103:13, 14) No reira na roto i te Pipiria, tona vaerua tapu e tana akaaerenga, ka oronga mai a Iehova i te pakari, te maroiroi e te tauturu tei anoanoia kia taui i to tatou tu. Kare e ekoko e kua rave takere aia i te reira. Teianei, ka uriuri tatou i te au takainga te ka tauturu ia tatou kia kopae i te tangata taito, e kia tau no te papetito.

9. Akapeea te Pipiria me tauturu ia koe?

⁹ Taangaanga i te Pipiria kia kite meitaki i toou tu. Mei te iʼo rai te Tuatua a te Atua; ka tauturu te reira ia koe kia akara meitaki i toou aerenga manako, taau tuatua e taau ka rave. (Iako. 1:22-25) Ka rauka katoa i toou puapii e tetai Kerititiano tukatau i te tauturu ia koe. Ei akaraanga, ka taangaanga raua i te Pipiria ei tauturu ia koe kia kite i toou tu maroiroi e te paruparu. Ka apii mai raua akapeea koe me kimi i te au akakiteanga meitaki a te Pipiria no te kopae i te au peu tarevake. Pera katoa, kua papa ua a Iehova i te tauturu mai. Kua kite aia i te ravenga meitaki no te rave i te reira, e kua kite aia eaa to roto i toou ngakau. (Mase. 14:10; 15:11) No reira e akamatau i te pure putuputu kiaia e te apii i tana Tuatua i te au rā ravarai.

10. Eaa taau i apii mai mei te akaraanga o Elie?

¹⁰ Kia papu e na Iehova te turanga meitaki rava atu. Ka puapingaia tatou me rave tatou i ta Iehova e pati maira. Ka rauka ia tatou te tu akangateitei, te oraanga puapinga e te mataora. (Sala. 19:7-11) Inara, me kopaeia ta Iehova au turanga, ka tupu te au manamanata me raveia te au angaanga a te kopapa. Teia ta Elie i karanga no runga i te kopae anga i te au turanga a te Atua. Kua utuutuia mai aia e tona nga metua tei inangaro maata ia Iehova. Inara, i tona mapu anga, kua iki a Elie i te piri atu ki tona au oa kino. Kua akamata aia i te kai i te au apinga akakona, te rave i te ainga tau kore, e te keikeia. Kua maata atu tona riri e te tu kino. Karanga a Elie, “Kua rave au i te au mea pouroa kare te au Kerititiano i apiiia kia rave.” Inara, kare i ngaropoina iaia i tana i apii mai i tona tamariki anga. Muri mai kua akamata akaou aia i te apii i te Pipiria. Kua tauta pakari aia i te takore takiri i tana au peu kino, e kua papetitoia i te mataiti 2000. Akapeea aia i puapingaia ai mei te aru anga i ta Iehova au turanga? Karanga a Elie: “Kua rauka iaku te ngakau ’au e te akava ngakau mā.” * Mei ta teia akaraanga i akaari mai, ka mamae te aronga tei kopae i ta Iehova au turanga. Noatu ra, ka inangaro a Iehova i te tauturu ia ratou kia taui.

11. Eaa te au mea ta Iehova e rikarika ra?

¹¹ Kia rikarika i ta Iehova e rikarika ra. (Sala. 97:10) Akakite te Pipiria e te rikarika ra a Iehova i te aronga “mata teitei,  te arero pikikaa, e te rima i maringi ei te toto ara kore ra.” (Mase. 6:16, 17) Rikarika katoa Aia i te “ta tangata ra, e te tangata pikikaa.” (Sala. 5:6) No teia au tu e te au peu i takore takiri ei a Iehova i te aronga rave kino i to Noa tuatau no te mea kua ki oki te enua i te takinga kino. (Gene. 6:13) Teia akaou tetai akaraanga. Na roto i te peroveta ko Malaki, akakite a Iehova e te riri ra aia i te aronga tei pikikaa e tei kopae i to ratou tokorua akaipoipo. Kare te Atua e āriki i ta ratou akamorianga e ka akava aia ia ratou no ta ratou i rave.—Mala. 2:13-16; Ebe. 13:4.

12. Eaa te aiteanga “kia rikarika i te kino”?

¹² Ka inangaro a Iehova ia tatou “kia rikarika i te kino.” (Roma 12:9) Ko te aiteanga o te tuatua “kia rikarika,” koia oki kia riri otooto i tetai apinga, kia akaviivii pakari i te reira. E akamanako ana eaa taau ka rave me patiia koe kia kai i tetai kai kua pe. Penei ka akaviivii koe i te akamanako ua i te reira. Mei te reira rai, ka akaviivii pakari katoa tatou i te akamanako i te rave i tetai mea ta Iehova e rikarika ra.

13. Eaa ra tatou ka paruru ei i to tatou aerenga manako?

¹³ Paruru i toou aerenga manako. Na to tatou aerenga manako e akakeu i ta tatou ka rave. No reira a Iesu i apii ei ia tatou kia kopae i te au manako tarevake te ka taki atu ki te ara kino. (Mata. 5:21, 22, 28, 29) Ka inangaro tatou i te akamareka i to tatou Metua i te rangi. No reira, e mea puapinga kia patoi viviki tatou i tetai ua atu manako kino!

14. Eaa ta tatou au tuatua ka akaari mai no runga ia tatou, e eaa te au uianga ta tatou ka pau?

¹⁴ Akamanako i taau tuatua. Karanga a Iesu: “Kareka ta te vaa e tuku mai, no roto mai ïa i te ngakau.” (Mata. 15:18) Ae, ka akaari mai ta tatou au tuatua eaa to roto i to tatou ngakau. No reira e ui i teia au uianga: ‘Ka kopae ainei au i te pikikaa, noatu e ka tupu te manamanata me akakite au i te tika? Me kua akaipoipo au, ka kopae ainei au i te akameamea atu i tetai ke? Ka kopae ainei au i te akarongo ki te au tuatua tau kore e te viivii? Ka tuatua maru atu ainei au me akariri mai tetai tangata iaku?’ Ka puapingaia koe me akamanako koe i teia au uianga. Ka aite taau  au tuatua ki te au pitopito i runga i te kakau. Me tauta koe i te akakore i te tuatua akakino, te pikikaa e te tuatua viivii, ka māmā ua i reira ia koe i te kopae i te tangata taito.

15. Eaa te aiteanga kia “akasatauroia” to tatou tu tangata taito?

¹⁵ Kia papa ua i te rave i te ka anoanoia. Kua taangaanga te apotetoro ko Paulo i tetai akatutuanga no te apii ia tatou i te puapinga kia taui i to tatou oraanga. Tata aia e ka anoanoia kia “akasatauroia” to tatou tu tangata taito. (Roma 6:6) Koia oki, ka inangaro tatou i te aru i te akaraanga o Iesu. Ka anoanoia tatou kia takore i te au tu e te au peu ta Iehova e rikarika ra. Me rave tatou i teia, ka rauka mai te akava ngakau mā e te manakonakoanga no te ora mutu kore. (Ioa. 17:3; 1 Pete. 3:21) E akamaara, kare a Iehova e taui i tana au turanga kia tau kia tatou. Mari ra, ko tatou te ka anoanoia kia taui kia tau ki tana au turanga.—Isa. 1:16-18; 55:9.

16. Eaa ra koe ka patoi ua rai ei i te au anoano tika kore?

¹⁶ Patoi ua rai i te au anoano tika kore. Noatu e kua papetito koe, ka anoanoia rai koe kia patoi ua rai i te au anoano tika kore. Akamanako ana i tei tupu ki tetai tangata ko Maurício. I tona mapu anga, kua piri ainga ana aia ki te au tane. I muri mai, kua aravei aia i te iti tangata o Iehova, e kua apii i te Pipiria. Te taui anga tona oraanga, kua papetitoia aia i te mataiti 2002. Noatu kua tavini ana aia ia Iehova no tetai tuatau roa, karanga a Maurício: “Ka āriki au e i tetai taime, ka anoanoia au kia patoi pakari i te au anoano tika kore.” Kare aia i tuku i te reira kia akataitaia iaia. Mari ra, karanga aia: “Akamaroiroiia au i te kite anga e me iki au kia kore e akatupu i teia au anoano, te akamareka ra au ia Iehova.” *

17. Eaa taau i reka mei te tua o Nabiha?

¹⁷ Pure no ta Iehova tauturu, irinaki ki tona vaerua tapu, eiaa ki toou uaorai maroiroi. (Gala. 5:22; Phili. 4:6) Ka tauta pakari tatou i te kopae i te tangata taito. Akamanako ana i tei tupu ki tetai vaine ko Nabiha. E ono ona mataiti, kua akaruke tona metua tane iaia. Karanga  aia, “Kua tupu te mamae ngakau maata kiaku.” I tona maata anga mai, kua akaari a Nabiha i te tu riririri e te ta ua. Kua okooko atu aia i te au mea akakona, kua opuia e te akava e kua tiria ki roto i te are auri. Te akamata anga te Au Kite tei atoro i te are auri i te apii i te Pipiria kiaia, kua rave a Nabiha i te au tauianga i roto i tona oraanga. Karanga aia, “E mea māmā ua kia akamutu i tetai au peu kino, inara ko te kai avaava te mea ngatā rava atu.” Kua tauta ua rai a Nabiha i te takore i te reira e e tai mataiti i muri mai, kua rauka iaia. Eaa tana i rave? Karanga aia, “Ko te pure akatenga kia Iehova te mea puapinga rava atu tei tauturu iaku.” Inangaro aia i te akakite ki tetai ke: “Me ka rauka iaku i te rave i te au tauianga kia akamareka ia Iehova, ka rauka katoa i tetai ua atu!” *

18. Ia 1 Korinetia 6:9-11, eaa ta te au tavini o te Atua i rave?

¹⁸ I te anere mataiti mua, tetai aronga ta Iehova i iki kia tutara ma Iesu, kua rave katoa ana ratou i te au angaanga kino. Ei akaraanga, kua rave ana tetai pae i te akaturi, te sodoma e te keikeia. Inara ma te tauturu a te vaerua tapu o te Atua, kua rauka ia ratou i te taui i to ratou tu. (E tatau ia 1 Korinetia 6:9-11.) Pera katoa i teia tuatau, kua tauturu te Pipiria e mirioni ua atu tangata kia taui i to ratou oraanga. * Kua akamutu ratou i te rave i te au peu tarevake tei ngatā tikai i te akakore. Te akaari maira to ratou akaraanga e ka rauka katoa ia koe i te taui i toou tu e taau au peu tarevake kia tau koe no te papetito.

19. Eaa ta tatou ka uriuri i te atikara ka aru mai?

¹⁹ Kapiti mai ki te kopae anga i te tangata taito, ka anoanoia te aronga te ka inangaro i te papetito kia akatangata ou ia ratou. I te atikara ka aru mai, ka uriuri tatou akapeea me rave i te reira e akapeea tetai ke me tauturu ia tatou.