1-2. Eaa te ka anoanoia kia āriki mai te Atua i ta tatou akamorianga?

 EAA taau e manako ra me rongo koe i te tuatua “akamorianga”? Penei ka manako koe i tetai taeake e tuturi ra ki raro ma te pure kia Iehova i mua ake ka moe ei. Me kore ka manako koe i tetai ngutuare mataora te apii ra i te Pipiria.

² I teia nga akaraanga, te akamori ra ratou i te Atua. Ka āriki ainei a Iehova i ta ratou akamorianga? Ae, me kua tau te reira ki tana i akakoro e me te raveia ra na roto i te tu aroa e te akangateitei. E inangaro maata to tatou ia Iehova. Kua kite tatou e ka tau aia kia akamoriia, e ka inangaro tatou i te oronga i te mea meitaki rava atu kiaia.

3. Eaa ta tatou ka uriuri i teia atikara?

³ I teia atikara, ka uriuri tatou i te tu akamorianga ta Iehova i āriki i te tuatau Pipiria. E ka uriuri tatou e varu tu akamorianga ka ārikiia i teia tuatau. Me rave tatou i teia, e akamanako akapeea me akameitaki atu i ta tatou uaorai akamorianga. Ka uriuri katoa tatou i te au tumu ka mataora atu tatou i te akamorianga mou.

4. Akapeea te aronga tei akamori ia Iehova i te tuatau Pipiria te akaari anga i te tu akangateitei e te aroa no Iehova?

⁴ I te tuatau Pipiria, kua akaari te aronga akarongo mei ia Abela, Noa, Aberahama e Iobu i to ratou tu akangateitei e te inangaro no Iehova. Akapeea? Na roto i te tu akono, te akarongo e ta ratou atinga. Kare te Pipiria i akakite mai i ta ratou i rave no te akamori i te Atua. Inara  e mea papu kua rave ratou i te mea meitaki rava atu no te akangateitei ia Iehova, e kua ārikiia ta ratou akamorianga. Muri mai, kua oronga a Iehova i te Ture a Mose ki te uanga a Aberahama. Tei roto i teia au ture te au ikuikuanga taka meitaki no te akamori ia Iehova na te tu tana i āriki.

5. Eaa te tauianga no te akamorianga mou i muri ake i to Iesu matenga e te tuakaouanga?

⁵ I muri ake i to Iesu matenga e te tuakaouanga, kare a Iehova i umuumu i tona au tavini kia aru i te Ture a Mose. (Roma 10:4) Ka anoanoia te au Kerititiano kia aru i tetai ture ou, “te ture a te Mesia.” (Gala. 6:2) Ka akono ratou i teia “ture” na te aru anga i to Iesu akaraanga e tana au apiianga, e kare na te tamou ngakau i te au ture rikiriki. I teia tuatau, ka tauta te au Kerititiano i te aru i te akaraanga o te Mesia kia akamareka ia Iehova e kia rauka te “akaangaroianga” no ratou.—Mata. 11:29.

6. Akapeea teia atikara me tauturu ia tatou?

⁶ Ia tatou e uriuri ra i teia au ravenga no te akamori i te Atua, e ui kia koe uaorai, ‘Te rave ra ainei au i teia tu akamorianga? Ka rauka ainei iaku i te akameitaki atu i te reira?’ Ka tau koe kia rekareka i taau e rave ra i teianei, inara e mea meitaki kia pure koe no te tauturu kia akameitaki atu i taau akamorianga.

7. Eaa to Iehova manako no ta tatou pure ngakau tae?

⁷ Te akamori ra tatou ia Iehova me pure tatou kiaia. Kua akaaite te Pipiria i ta tatou pure ki te atinga kakara tei orongaia i ko i te tapenakara, e i muri mai i ko i te iero. (Sala. 141:2) Kua riro teia au atinga kakara ei mea mareka ki te Atua. Mei te reira rai, ka riro ta tatou pure ngakau tae ei “mea tau ïa” kia Iehova, noatu me ka tuatua tatou i te au tuatua rikiriki. (Mase. 15:8; Deu. 33:10) E mea meitaki kia irinaki tatou e ka pumaana te ngakau o Iehova i te akarongo ki ta tatou tuatua akameitaki e te aroa. Inangaro aia ia tatou kia akakite i to tatou au manamanata, to tatou manako e to tatou au anoano. I mua ake ka pure ei kia Iehova, e akamanako meitaki i taau ka tuatua. Me pera koe, ka oronga koe i te “atinga kakara” meitaki rava atu ki toou Metua i te rangi.

8. Eaa te atianga meitaki no tatou kia akapaapaa i te Atua?

⁸ Te akamori ra tatou ia Iehova me akapaapaa tatou iaia. (Sala. 34:1) Te akapaapaa ra tatou ia Iehova me akakite aere tatou i tona au tu manea e tana i rave. Ka rave tatou i teia no to tatou inangaro iaia. Me akamanako oonu tatou i te meitaki o Iehova—tana i rave no tatou—ka akapaapaa ua rai tatou iaia. Ka riro te angaanga tutu aere ei atianga meitaki no “te apai i te atinga ra, i te akameitaki i te Atua, . . . koia oki ta te vaa nei.” (Ebe. 13:15) Mei ta tatou ka rave i mua ake ka pure ei kia Iehova, e mea meitaki kia akamanako tatou eaa ta tatou ka tuatua ki te aronga ta tatou ka aravei i te ngai tutu aere. Ka inangaro tatou kia riro ta tatou “atinga ra, i te akameitaki i te Atua” ei mea meitaki tikai. No reira, kia tuatua tatou ma te ngakau tae me akakite aere i te tuatua mou.

9. Mei te ngati Iseraela rai, akapeea tatou e puapingaia ai me aere ki te au uipaanga? Akakite mai i tei tupu kia koe.

⁹ Te akamori ra tatou ia Iehova me aere tatou ki te au uipaanga. Akakiteia ki te  ngati Iseraela: “Kia taki toru to te au tane katoa i o ou ra aere akakite anga atu ki mua i te aroaro o to Atua ra o Iehova i te mataiti okotai, i te ngai tana e akono ra.” (Deu. 16:16) Ka anoanoia ratou kia akaruke i to ratou kainga e te ngai tanu kai. Kua taputou a Iehova kia ratou: “Kare rava oki tetai e anoano mai i to enua, kia aere koe ki runga ki mua i te aroaro o to Atua ra ko Iehova.” (Exo. 34:24) Ma te irinaki pu tikai ia Iehova, kua aere te ngati Iseraela ki teia au oroa. Kua akameitakiia mai ratou; e maata atu to ratou mārama no te Ture a te Atua, kua akamanako oonu i tona au meitaki, e kua mataora i te kapiti atu ki te au taeake irinaki. (Deu. 16:15) Ka akameitaki katoaia tatou me tauta tatou i te aere ki te au uipaanga Kerititiano. E ka mareka a Iehova me oronga tatou i te au pauanga poto ua e te meitaki.

10. Eaa te imene i riro ei e tuanga puapinga no te akamorianga?

¹⁰ Te akamori ra tatou ia Iehova me imene kapiti tatou. (Sala. 28:7) Kua akariro te ngati Iseraela i te imene ei tuanga puapinga i roto i ta ratou akamorianga. Kua iki te Ariki ko Davida e 288 ngati Levi ei aronga imene i ko i te iero. (1 Para. 25:1, 6-8) I teia tuatau, ka akaari tatou i to tatou inangaro no te Atua na roto i te imene akapaapaa. Kare ko te meitaki o te reo imene te mea puapinga rava atu. E akamanako ana i teia: “Te apa anake nei tatou i te au mea katoa e manganui” me tuatua tatou, inara kare te reira e tāpu ia tatou mei te tuatua i roto i te putuputuanga, e i te ngai tutu aere. (Iako. 3:2) Mei te reira rai, auraka e tuku i to tatou reo ereni kia tāpu ia tatou mei te imene akapaapaa ia Iehova.

11. Ia Salamo 48:13, eaa te tumu ka akanoo ei tatou i te taime no te ngutuare kia apii i te Pipiria?

¹¹ Te akamori ra tatou ia Iehova me apii tatou i tana Tuatua e me apii i ta tatou tamariki no runga iaia. Kua riro te rā Sabati ei atianga no te ngati Iseraela kia akangaroi e kia akaketaketa i to ratou pirianga kia Iehova. (Exo. 31:16, 17) Kua apii te au tangata tiratiratu i ta ratou tamariki no runga ia Iehova e tona au meitaki. Ka anoano katoaia tatou kia akanoo i te taime no te tatau e te apii i te Tuatua a te Atua. E tuanga teia no te akamori ia Iehova, e ka tauturu teia ia tatou kia akavaitata atu kiaia. (Sala. 73:28) E me apii kapiti te ngutuare tangata, ka tauturu tatou i te uki ou—ta tatou tamariki—kia akatupu i tetai pirianga vaitata ki to tatou Metua aroa i te rangi.—E tatau ia Salamo 48:13.

12. Eaa to Iehova manako no te aronga tei maani i te au mea akamanea o te tapenakara?

¹² Te akamori ra tatou ia Iehova me patu e me akono tatou i te au are akamorianga. Karanga te Pipiria e e angaanga tapu te au angaanga no te maani i te tapenakara e te au akamanea o te reira. (Exo. 36:1, 4) I teia tuatau katoa, e mea tapu kia Iehova te au angaanga patu Are Uipaanga Patireia e tetai atu au are akamorianga. E akapou maata ana te au taeake e te au tuaine i to ratou taime no te rave i teia au angaanga. Kare ainei tatou e akameitaki ia ratou no te rave i teia angaanga puapinga no te Patireia? E rave katoa ana ratou i te angaanga tutu aere. Penei kua inangaro tetai pae i te painia. Ka turu te aronga pakari o te putuputuanga i te angaanga patu are na te akariroanga i teia au taeake e te au tuaine ei painia. Me e tu karape to tatou  i te patu are e me kare, ka rauka rai ia tatou pouroa i te tāmā e te akono i te au are akamori.

13. Eaa to tatou manako no te moni tauturu ta tatou ka oronga no te angaanga Patireia?

¹³ Te akamori ra tatou ia Iehova me oronga tatou i te moni tauturu no te angaanga Patireia. Kare te ngati Iseraela e aere puapinga kore ua ki mua i te aroaro o Iehova. (Deu. 16:16) Ka anoanoia ratou kia apai i tetai apinga oronga tei tau ki to ratou turanga. Na teia e akaari mai i to ratou tu āriki rekareka no te au akanoonooanga pae vaerua kia puapingaia ratou. Akapeea tatou me akaari i to tatou inangaro no Iehova e te āriki rekareka no te au mea pae vaerua tana i oronga mai? Tetai ravenga, na te oronga anga i te au moni tauturu ki te putuputuanga e ki te angaanga tutu aere i te ao nei tei tau ki to tatou turanga. Akakite te apotetoro ko Paulo: “Te vai ra oki te tika i te ngakau, e ārikiia ïa ta te tangata i rauka ra, kare i tei kore i rauka iaia.” (2 Kori. 8:4, 12) Ka akaperepere a Iehova i ta tatou moni tauturu tei orongaia ma te ngakau tae, noatu e iti ua te reira.—Mare. 12:42-44; 2 Kori. 9:7.

14. Ia Maseli 19:17, eaa to Iehova manako me tauturu tatou i te au taeake tei ngere?

¹⁴ Te akamori ra tatou ia Iehova me tauturu tatou i te au taeake Kerititiano tei ngere. Kua taputou a Iehova i te tutaki i te ngati Iseraela tei akono i te putaua. (Deu. 15:7, 10) Me tauturu tatou i tetai taeake tei ngere, te oronga ra tatou i te apinga na Iehova. (E tatau ia Maseli 19:17.) Ei akaraanga, te oronga anga te au Kerititiano i Philipi i tetai apinga aroa na Paulo i roto i te are auri, karanga aia i te reira ei “atinga mareka, e te kiteia e te Atua.” (Phili. 4:18) E akara i roto i taau putuputuanga e te ui kia koe uaorai, ‘E taeake ainei tetai tei inangaro i te tauturu?’ Ka mareka a Iehova me akapou tatou i te taime, te maroiroi, to tatou karape e te apinga no te tauturu i te aronga tei ngere. Ka āriki aia i te reira ei tuanga no ta tatou akamorianga.—Iako. 1:27.

15. Eaa ra kare i te mea teiaa kia akapou i te taime e te maroiroi no te akamorianga mou?

¹⁵ Ka pou te taime e te maroiroi no te akamori ia Iehova. E kare teia i te mea teiaa. (1 Ioa. 5:3) Eaa te tumu? No to tatou inangaro ia Iehova i akamori ei tatou iaia. Akamanako ana i tetai tamaiti tei inangaro i te oronga i te apinga aroa na tona papa. Kua pou iaia tetai tuatau roa no te toroa i tetai tutu. E ka manako aia e kua pauna tona taime. No tona inangaro i tona papa, kua rekareka aia i te oronga i teia apinga aroa kiaia. Mei te reira rai, no to tatou inangaro ia Iehova, ka rekareka tatou i te akapou i te taime e te maroiroi no te akamori iaia.

16. Ia Ebera 6:10, eaa to Iehova manako me tauta tatou i te akamareka iaia?

¹⁶ Kare te au metua e tapapa i ta ratou tamariki kia aiteite ta ratou apinga aroa ka oronga mai. Kite ratou e tuke te tu e te turanga o ta ratou tamariki. Mei te reira rai, kua mārama to tatou Metua i te rangi i to tatou turanga. Penei e maata atu taau ka rauka i te rave i ta toou au taeake akaperepere. Me kore, kare e maata taau ka rauka i te rave no toou mataiti, te tu maki e te au apainga o te ngutuare. Auraka e taitaia. (Gala. 6:4) Kare e ngaropoina ia Iehova taau i rave. Me oronga koe i taau mea meitaki rava  atu ma te tumu tau, ka mareka aia i te reira. (E tatau ia Ebera 6:10.) Te kite ra a Iehova i te au anoano o toou ngakau. Ka inangaro aia kia rekareka koe e kia mareka ua i taau ka rauka i te rave no te akamori iaia.

17. (a) Me te ngatā ra ia tatou i te rave i tetai tuanga o te akamorianga, eaa ta tatou ka rave? (e) Akapeea tetai tuanga i roto i te pia “ Akamaata Atu i Toou Rekareka” te tauturu anga ia koe?

¹⁷ Akapeea me te ngatā ra ia tatou i te rave i tetai tuanga o te akamorianga, mei taau uaorai apii me kore te angaanga tutu aere? Penei ka kite mai tatou e me rave putuputuia te reira, ka maata atu to tatou rekareka e ka puapingaia tatou. Penei ka akaaite tatou i ta tatou akamorianga ki te akaetaeta uaua, me kore ki te apiipii i tetai apinga akatangi imene. Me kare tatou e rave putuputu i te reira, kare tatou e tere ki mua. Akapeea me ka iki tatou i te rave i te reira i te au rā? Penei e nga miniti ua i te akamataanga, e oti ka akamaata mai te ora no te reira. Me kite tatou i te puapinga ka rauka mai, ka mataora tatou i te rave ua atu i te reira. Te kite ra ainei koe akapeea tatou me taangaanga i teia i roto i ta tatou akamorianga?

18. Eaa te mea puapinga rava atu kia tatou, e eaa te ka rauka mai?

¹⁸ Ko te akamorianga ngakau katoa ia Iehova te mea puapinga rava atu kia tatou. Ka rauka ia tatou tetai oraanga mataora e te puapinga e ka rauka ia tatou i te akamori ia Iehova e tuatau ua atu. (Mase. 10:22) Kua rauka ia tatou te manako ngakau ’au no te mea kua kite tatou e ka tauturu a Iehova i tona au tavini me rokoia ratou e te manamanata. (Isa. 41:9, 10) Ka rauka ia tatou te rekareka maata me akamori tatou i to tatou Metua aroa, koia tei ‘tau te kakā e te akangateitei’ no te mea nana i anga i te au mea ravarai!—Apo. 4:11.