Eaa ra te tangata tei kapikiia ko “Mea” i karanga ai ka “kino” tona kainga me akaipoipo aia ia Ruta? (Ruta 4:1, 6)

Me mate tetai tane akaipoipo kare e tamariki i te tuatau Pipiria, ka anoanoia te au uianga kia pau ia: Eaa te ka tupu ki tona enua? Ka ngaro ainei tona ingoa kopu tangata? Ka oronga mai te Ture a Mose i te au pauanga.

Eaa te ka tupu ki te enua o te tangata tei mate me kore tei putaua e kua oko i tona enua? Ka oko mai tona tuakana me kore tetai kopu tangata i te reira enua. Kia vai ua te enua ki te kopu tangata.​—Levi. 25:23-28; Nume. 27:8-11.

Akapeea te ingoa kopu tangata o te tangata tei mate e vai ei? Na te akaipoipoanga i te vaine takaua, mei tei tupu kia Ruta. Ka akaipoipo tetai tane i te vaine takaua kia uanga mai i tetai tamaiti te ka apai i te ingoa o tei mate e tona enua katoa. Na roto i teia akanoonooanga aroa ka akono katoa ia te vaine takaua.​—Deu. 25:5-7; Mata. 22:23-28.

Akamanako ana i te akaraanga o Naomi. Kua akaipoipo aia ia Elimeleka. I te mate anga tana tane e ta raua nga tamaroa, kare e tangata akono iaia. (Ruta 1:1-5) Te tae anga raua ki Iuda, kua akakite a Naomi ki tana tamaine ongai ko Ruta kia pati kia Boaza kia oko mai i te enua. E kopu tangata rai no Elimeleka. (Ruta 2:1, 19, 20; 3:1-4) Inara kua kite mai a Boaza e te ora rai tetai kopu tangata vaitata atu, tei kapikiia e te Pipiria ko “Mea.” Tei iaia te tikaanga mua no te oko mai i te enua.​—Ruta 3:9, 12, 13.

I te akamata anga, kua inangaro a “Mea” i te tauturu mai. (Ruta 4:1-4) Noatu ka pou te moni ka tutaki, kua kite mai aia e kare e rauka ia Naomi i te anau tamariki kia mono i te enua o Elimeleka. Ka peke te enua kia Mea, akaraanga e tuanga meitaki teia.

Inara, kua taui a Mea i tona manako i tona kite anga e ka akaipoipo katoa aia ia Ruta. Karanga aia: “Kare atura e tika iaku kia oko noku, ko te kino aea toku nei kainga.” (Ruta 4:5, 6) Eaa aia i taui ei i tona manako?

Me akaipoipo a Mea me kore tetai tangata ke ia Ruta e ka anau mai aia i tetai tamaiti, ka peke te enua o Elimeleka ki taua tamaiti ra. Akapeea te “kino” e tupu ei ki te “kainga” o Mea? Kare te Pipiria i akakite mai, penei ko teia tetai au tumu.

• Mea mua, akaraanga rai ka kaimoumou aia i tana moni no te mea kare te enua o Elimeleka e peke mai kiaia. Ka aere te reira ki te tamaiti a Ruta.

• Te rua, tei iaia te apainga kia angai e kia akono ia Naomi raua ko Ruta.

• Te toru, me anau tamariki a Ruta raua ko Mea, ka orongaia te enua ki ta raua anau e ki ta Mea tamariki ke.

• Te a, me kare a Mea tamariki ke atu, ka peke te tikaanga enua o Elimeleka e Mea ki te tamaiti a Ruta. Kua ruti aia i tona enua ki te uanga a Elimeleka. Kare a Mea e inangaro kia ngere aia i tona enua i te tauturu ia Naomi. Inangaro aia e na tetai taeake mei ia Boaza e apai i teia apainga. Kua rave a Boaza i teia no te mea kua inangaro aia “kia iri te ingoa o tei mate ki runga i tona kainga.”​—Ruta 4:10.

Kua inangaro ua a Mea i te akono i tona uaorai ingoa e tona enua. E tu karapii tona. Inara kare to Mea ingoa i tataia e kare i maaraia. Kua ngere aia i te akameitakianga tei rauka ia Boaza e kua tataia tona ingoa ei tupuna no te Mesia, ko Iesu Karaiti. No te karapii i te tauturu i tetai ke kua ngere a Mea i teia akameitakianga!​—Mata. 1:5; Luka 3:23, 32.